Mi Mi Lego Fasin Blong Faet

Jose Antonio Nebrera i talem stori ya

?WANEM i mekem se wan man i laekem fasin ya blong faet? Taem mi mi pikinini, mi luk plante raf fasin, mo samting ya i tijim mi blong faet. Papa blong mi i wok wetem wan grup blong ol polis long Spen, mo grup ya i raf tumas. Taem papa blong mi i smol, oltaem papa blong hem i wipim hem. Papa blong mi i mekem sem mak long mi. Oltaem hem i yusum bigfala strap blong hem blong wipim nogud mi. Antap long hemia, oltaem hem i singaot mi se krangke. Be hem i mekem i gud tumas long smol sista blong mi. Mama i fraet long Papa from we taem Papa i kros, hem i nogud. Ale, Mama i no mekem wan samting blong traem blokem Papa taem hem i stap kilim mi. Mi mi wantem tumas we Mama i lavem mi, be hem i fraet blong mekem olsem.

Taem mi stap wetem ol narafala pikinini long skul, mi mekem olsem se laef blong mi i gud mo mi mi hapi. Ating ol man we oli luk mi oli ting se mi mi glad mo mi gat gudfala tingting. Be samting ya i no tru. Mi mi stap haedem bigfala fraet mo kros we i stap insaed long mi. Long en blong dei, mi mas fesem bakegen ol raf fasin long famle. Taem mi stap wokbaot sloslo i gobak long haos, mi harem nogud finis. Mi stap tingbaot se Papa bambae i sakem ol rabis tok long mi bakegen mo i wipim mi.

Taem mi mi gat 13 yia, mi ronwe long haos from we i no gat lav long hom blong mifala. Mi mi go stap long wan skul blong ol Jesuit. Smoltaem ya, mi tingbaot blong kam wan pris. Be mi luk se skul ya i no givhan long mi nating blong mi faenem mining blong laef. Mifala i girap long faef klok moning blong swim long kolwota. Long fuldei, mifala i folem wan strong program blong stadi, prea, mo go long ol jos seves. Mifala i stop smoltaem nomo blong spel.

Mifala i ridim stori blong “ol tabu man” blong jos, be neva mifala i stadi long Baebol. I gat wan Baebol nomo i stap long skul ya, mo oli putum Baebol ya i stap long wan bokis we oli wokem long glas. Sipos mifala i wantem ridim, mifala i mas askem fastaem.

Long namba tri yia we mi stap long skul ya, oli joenem wan narafala samting long program blong mifala. Oli talem se hemia blong “tijim man blong i kam klosap moa long God.” Mifala i mas mekem sam samting blong panisim mifala bakegen mo blong mekem mifala i harem nogud long bodi mo long tingting blong mifala. Mi no wantem nating blong mekem samting ya. Ale mi kakae bitim mak blong mekem se mi traot, nao mi talem long ol tija se mi mi sik tumas. Afta we klosap tri yia i pas, mi harem se mi no moa save stap long skul ya blong ol Jesuit we i mekem ol fasin olsem. Ale, mi ronwe mo mi gobak long papa mama blong mi. Long taem ya, mi mi gat 16 yia.

Mi Mekem Ol Samting We Oli Denja

Taem mi go stap wetem papa mama blong mi bakegen, mi lanem boksing mo resling. From we mi mi gud long ol raf spot olsem, mi harem se mi impoten. Be mi stat blong folem fasin blong papa blong mi. Mi yusum strong bodi blong mi blong kasem samting we mi mi wantem.

Taem mi mi gat 19 yia, mi mitim wan gel we nem blong hem Encarnita. Naoia mi jes harem se i gat lav long laef blong mi. Naen manis biaen, mi tekem hem i kam woman blong mi. Hem i luk we mi mi gat respek, mi kaen, mo mi hapi. Be hem i no save nating se mi mi stap harem nogud tumas long hat blong mi, mo mi stap kros tumas. Fasin ya we i stap haed insaed long mi i kamaot klia taem gavman i singaot mi blong joen long ami. Hemia jes afta we fas pikinini blong mitufala i bon.

Mi mi mekem wan kwik desisen blong joen long ami ya we oli kolem Spanish Foreign Legion. Mi mekem desisen ya from tufala risen ya: Mi no wantem we oli katem hea blong mi i sot olsem ol soldia, mo mi wantem mekem ol samting we oli denja. Tingting blong mi se bambae mi harem se mi fri, taem mi go long draeples blong Moroko blong mekem spesel wok blong ami we i denja tumas. Mo tu, hemia wan rod blong ronwe long wok blong mi insaed long famle. Be taem mi joen long ami ya, mi jes kam moa nogud.

Komanda blong mifala i wan bigfala man we i raf mo i laekem tumas blong mekem i nogud long ol niufala soldia. I no longtaem, mi mi kasem trabol wetem hem. Mi no laekem man we i no mekem i stret long narafala. Mo mi mi no fraet blong faet taem mi mi bilif se tingting blong mi i stret. Wan moning, taem oli singaot nem blong mifala blong jekem sipos mifala evriwan i stap, mi mi talem wan smol tok plei. Komanda i kasem rong tingting long saed blong tok blong mi. Hem i leftemap han blong hem blong kilim mi. Wantaem nomo, mi tanem han blong hem, mo mitufala i resling gogo hem i foldaon long floa. Mi pusum han blong hem i fas long graon. Mi fraet blong lego han blong hem, from we mi ting se bambae hem i karemaot masket blong hem blong sutum mi.

From samting ya, oli panisim mi se bambae mi go stap tri manis long wan smol rum, we mifala 30 man i stap long hem. Long tri manis ya, mi no jenisim klos blong mi nating. Komanda blong grup ya i laekem tumas blong wipim ol man we hem i bos long olgeta. Wan dei, mi talem long hem se sipos hem i tajem mi, bambae mi kilim hem i ded. Ale, hem i no moa givim 30 wip long mi, hem i givim 3 nomo. Mi mi kam strong tumas, olsem ol man ya we oli panisim mi.

Ami i Wok Long Fasin Blong Haed

Taem mi mi stap tren wetem spesel grup ya blong ol soldia, mi mekem wan kwik desisen bakegen blong joen long wok we i “denja” moa. Mi no save nating se desisen ya bambae i lidim mi mi go wea. Mi kasem trening blong go long ples blong ol enemi mo wok long fasin blong haed. Mi mas mekem faet long olgeta kwiktaem, mo biaen mi aot bakegen. Mi lanem blong yusum ol defren tul blong faet mo ol bom. Long las haf blong kos ya, oli sanem mi mi go long Langley long Virginia long Yunaeted Stet. Long ples ya, mi tren wetem ol spae we oli wok blong kampani ya CIA.

I no longtaem, mi mi stap insaed long wan grup we i wok long fasin blong haed. Mifala i mekem ol enemi oli sek, mifala i kilim olgeta i ded, nao mifala i aot bakegen kwiktaem. Long ol yia 1960, mi wetem grup ya, mifala i mekem plante faet olsem. Long Sentrol mo Saot Amerika, mi faet agensem ol man blong salem drag mo ol man we oli karem ol tul blong faet oli kam insaed long kantri long fasin haed. Komanda blong mifala i talem se taem mifala i luk ol man ya, mifala i mas kilim olgeta oli ded. Mi mi sem blong talem se mi tu mi joen blong mekem samting ya. Mifala i no tekem ol man oli go kalabus, mifala i kilim olgeta oli ded. Olgeta we oli save givim moa save long mifala, mifala i livim olgeta ya nomo oli stap laef, nao mifala i kwestinim olgeta.

Biaen, oli givim wok long mi blong spae long ol lida blong ami blong Spen. Mi mas faenemaot ol man we oli no stap sapotem strong rul ya blong Jenerol Franco. Mifala i mekem wok blong spae long Franis tu, blong faenem ol man we oli stap long ples ya we oli agensem gavman blong Franco. Mifala i wantem faenem ol bigman blong olgeta mo karem olgeta oli go long Spen. Long ples ya, bambae mifala i kilim olgeta oli ded.

Wok we mi mekem laswan, se mi mekemrere wan grup blong ol soldia blong mifala i go sakemaot gavman blong wan smol kantri long Afrika. Oli talem long mifala se mifala i mas go long kapital blong kantri ya, mo kilim ol soldia oli ded long kamp blong olgeta, mo holemtaet haos blong presiden. Mifala i folem plan ya. Mifala i kasem kantri ya long medel naet, mo mifala i finisim wok blong mifala long fo aoa nomo. Tri long ol soldia long grup blong mifala oli ded long faet ya, wetem plante soldia we oli “enemi” blong mifala. Mi tu mi joen long rabis wok ya blong kilim ol man ya oli ded.

Las rabis wok ya we mi mi joen long hem i mekem we tingting blong mi i trabol we i trabol. Mi no save slip. Oltaem mi luk ol nogud drim, we mi mi stap faetem ol enemi wanwan mo mi kilim olgeta oli ded. Mi luk fes blong ol man we mi mi stap kilim olgeta oli ded. Fes mo ae blong olgeta i soemaot we oli fraet bitim mak.

Long taem ya, mi mi mekem desisen se bambae mi no moa joen long wan narafala faet. Ale, mi givimbak ol pepa blong ami, mo mi mi aot long ami. Tri manis biaen, ol haeman blong ami oli singaot mi bakegen blong mi mekem wan narafala wok blong spae. Mi mi ronwe i go long kantri blong Swiselan. Sam manis biaen, woman blong mi, Encarnita, i kam stap wetem mi long taon ya Basel. Hem i no save wan samting long saed blong wok blong spae we mi mi mekem.

I Hadwok Blong Lego Ol Rabis Fasin

Long ol tri yia we mi mi stap long ami, Encarnita i stap long Spen, mo hem i stadi Baebol wetem ol Witnes blong Jehova. Hem i talem long mi se hem i faenem trutok long saed blong God. Hem i glad tumas, mo fasin blong hem i gat paoa long mi. Long Swiselan, mitufala i faenem ol Witnes kwiktaem, ale oli kam mekem Baebol stadi long mitufala.

Mi mi glad tumas blong kasem save long ol stamba tingting blong God. Mi wantem tumas blong folem ol rul blong Baebol long laef blong mi, be i hadwok blong jenisim ol fasin blong mi. Samting we i mekem i hadwok moa, hemia prapa fasin blong mi blong laekem faet. Be mi laekem tumas niufala save mo bilif we mi stap kasem. Ale, afta we mi stadi blong sam manis, mi mi rere blong joen wetem ol Witnes blong Jehova long wok blong prij.

Jehova i givhan bigwan long mi, nao sloslo mi lanem blong bos long tingting mo fasin blong mi. Biaen, mi mo Encarnita, mitufala i baptaes. Taem mi mi gat 29 yia, mi kam wan elda long kongregesen.

Long yia 1975, mitufala i kambak long Spen. Be ami i no fogetem mi yet. Oli singaot mi bakegen blong mi mekem wan narafala wok blong spae. Blong mekem se i no gat trabol, mi mi ronwe i gobak long Swiselan. Mifala i stap long ples ya go kasem yia 1996. Biaen, mifala i kambak long Spen bakegen.

Naoia, boe mo gel blong mitufala wetem tu smol bubu blong mitufala, oli stap mekem wok blong Jehova. Mo tu, long ol yia we oli pas, mi mi halpem samwe long 16 man blong oli save Jehova. Wan long olgeta, hem i wan yangfala man we fastaem hem i joen long wan stronghed grup we i maj long rod long Not blong Spen. Man ya i wan raf man. Mi mi harem gud tumas blong halpem ol man olsem.

Mi prea bakegen mo bakegen long God, blong hem i halpem mi blong tanem baksaed blong mi long laef blong mi bifo. Mi prea tu blong mi save sakemaot ol tingting we oli stap mekem mi mi luk ol rabis drim. Taem mi stap traehad blong mekem samting we i stret, mi folem advaes ya blong Ol Sam 37:5, se: “Yu mas givim laef blong yu long Hae God, yu mas trastem hem, nao bambae hem i halpem yu.” Jehova i mekem promes ya i kamtru long mi. Hem i halpem mi blong mi sakemaot ol raf fasin. Hemia wan bigfala blesing long mi mo long famle blong mi.

[Tok blong pija long pej 21]

Taem mi mi gat 13 yia, mi go stap long wan skul blong ol Jesuit

[Tok blong pija long pej 23]

Long yia 1968, ofis blong ami i givim raet long mi blong mi save aot long ami

[Tok blong pija long pej 23]

Mi wetem woman blong mi, Encarnita