Stadi 24

Pulum Tingting i Go Long Baebol

1, 2. ?From wanem yumi mas pulum tingting blong ol man i go long Baebol?

¹ Long minista wok blong yumi, yumi wantem pulum tingting blong ol man i go long Tok blong God, Baebol. Hem i karem mesej we yumi stap talemaot, mo yumi wantem se ol man oli luksave se ol tok we yumi talem oli no kamaot long yumi be oli kam long God fastaem. Ol man we oli laekem God oli trastem Baebol. Taem yumi ridim long olgeta, oli lesin mo oli holem ol advaes blong hem insaed long hat blong olgeta. Be taem oli tekem prapa Baebol blong olgeta mo oli ridim, samting ya i gat moa paoa long olgeta. Taswe, long wok blong prij, sipos i stret, i waes blong yumi askem man blong haos i tekem prapa Baebol blong hem mo hem i save lukluk ol vas we yumi wantem ridim long hem. Sem mak, long ol miting blong kongregesen, sipos yumi askem evriwan blong oli stap yusum Baebol blong olgeta, bambae ol nyuwan oli luksave wantaem se Baebol i stampa blong ol bilif blong yumi, mo yumi evriwan i save kasem ol gudfala samting we i kamaot taem yumi lukluk wan samting, yumi no harem nomo.

² Taswe, yu save mekem plan blong tok blong yu i kamtru sipos olgeta we oli stap lesin long yu, oli lukluk ol vas ya wetem yu long prapa Baebol blong olgeta taem yu stap ridim. Maet oli mekem no oli no mekem be samting ya i dipen bigwan long yu, sipos yu yu askem olgeta long fasin we i stret. Hemia nao samting we i stap long Pepa Blong Givim Advaes olsem se “Askem man blong yusum Baebol.”

3, 4. ?Olsem wanem yumi save mekem samting ya long fasin we i save karem frut?

³ Askem. Wan long ol gudfala rod i blong askem stret long ol man we oli lesin long yu blong oli yusum Baebol; oltaem ol man oli yusum fasin ya. Samtaem sem samting i save kamaot sipos yu talem fastaem ples we vas i stap long hem bifo we yu ridim; maet yu save mekem olsem: “Naoia taem yumi ridim 2 Timote 3:1-5, tingbaot ol samting we oli stap kamaot raonabaot yumi.” Nao, taem yu yu openem Baebol blong yu long vas ya, lukluk raon blong luk sipos ol man we oli lesin long yu oli mekem olsem we yu askem olgeta. Oltaem bambae oli stat blong lukaot vas ya.

⁴ I dipen long man we i givim tok blong jusum, wanem vas hem i wantem tokbaot taem hem i askem ol man blong lukaotem. Lukluk ol man we oli stap lesin long yu. Yu mas intres blong luk sipos oli stap lukluk vas taem yumi ridim. Nating sipos yu yu givim wan tok we yu mas ridim, samtaem yu yu save lukaotgud long ol impoten vas blong mekem se olgeta we oli lesin oli save ridim tu long Baebol blong olgeta.

5, 6. Eksplenem from wanem i gud blong letem taem blong ol man oli faenem vas we yumi wantem ridim.

⁵ Givim inaf taem blong oli faenem vas. Fasin ya blong talem wan vas long Baebol i no naf. Tingting blong olgeta we oli lesin i save foldaon sipos yu ridim vas mo yu go long narafala vas bakegen bifo we oli gat taem blong faenem vas ya, bambae oli no moa wantem lukaotem ol vas. Lukluk ol man we oli lesin long yu, taem plante long olgeta oli faenem vas long Baebol finis, nao yu save ridim.

⁶ I gud blong talem vas long Baebol fastaem bifo we yu rere blong ridim vas ya, blong mekem se i gat naf taem blong oli faenem mo yu yu no lusum taem from we yu yu spel longtaem no yu stap talem ol samting blong kavremap taem ya we ol man oli stap traem faenemaot vas ya long Baebol. Be i stret blong spel smol long ples ya. Mo tu, sipos yu talemaot vas fastaem, yu mas tingbaot se sam long ol samting we bambae yu talem oli no save kasem save long olgeta. Taswe ol samting we oli impoten blong sapotem tok blong yu bambae yu talem fastaem bifo we yu talem vas.

7-18. ?Wanem rod yumi save yusum blong wokem rod blong yusum vas blong Baebol?

⁷ Oltaem ol vas we yu yusum long wan tok oli impoten poen blong tok. Ol tok blong yu oli kamaot from ol vas ya nomo. Olsem wanem ol vas ya oli save sapotem tok blong yu, samting ya i dipen sipos yu yusumgud. Taswe fasin blong “Wokem rod blong yusum ol vas” we i stap long Pepa Blong Givim Advaes blong yu, i impoten blong stap tingbaot.

⁸ I gat plante defren fasin blong wokem rod blong yusum vas, ridim mo talem mining blong hem. Eksampel, samtaem rod blong yusum wan vas long Baebol i no pulum man nomo blong ridim be hem i givim mining blong vas tu, mekem se taem man i ridim vas hem i kasem poen long hem. Be, sam vas oli tok stret i no nid blong wokem rod blong yusum, eksampel, taem oli ridim long stat blong wan tok.

⁹ Blong lanem olsem wanem blong wokem rod i go long ol vas, lukluk olsem wanem ol man we oli gat gudhan blong givim tok oli stap mekem. Traem luksave ol defren fasin blong wokem rod blong yusum vas. Tingbaot olsem wanem oli karem frut. Taem yu mekemrere ol tok blong yu tingbaot fastaem wanem poen vas i save givim, olsem sipos hem i wan impoten vas we i soem wan bigfala poen. Tingtinggud long fasin blong wokem rod i go long vas ya blong bambae i save gat paoa taem yu ridim. I gat sam advaes ya blong folem:

¹⁰ Wan kwestin. Ol kwestin oli nidim ansa. Oli wekemap tingting. Letem vas long Baebol mo mining blong hem oli givim ansa. Eksampel, sipos yu tokbaot blad transfyusen, maet fastaem yu save tokbaot ol loa blong blad long Hibru haf blong Baebol blong wokem rod blong yusum Ol Wok 15:28, 29. Yu save wokem rod blong yusum vas ya sipos yu askem se, “?Be loa ya i stap long ol Kristin tu? Makemgud rul ya we hed kampani blong ol Kristin bifo we tabu speret i lidim oli talem.”

¹¹ Wan tok no wan rul, we biaen vas long Baebol bambae i sapotem. Eksampel, sipos long wan tok yu stap tokbaot ol fasin, maet yu save talem se: “Fasin blong jusum ol fren blong yumi i save soem wanem kaen tingting yumi gat long saed blong stret fasin mo rabis fasin.” Nao yu save ridim tok blong Pol long 1 Korin 15:33 blong sapotem tok blong yu.

¹² Yusum Baebol olsem stampa blong ol poen we yu talem. Long sam vas maet yu save talem se: “I gud blong makem wanem Tok blong God i talem long poen ya.” Samting ya i naf blong mekem ol man oli tingting long vas we bambae yu talem mo i givim risen from wanem yu yusum.

¹³ Wan trabol. Long wan tok olsem long saed blong “hel” maet yu save talem se: “Sipos wan man i stap harem nogud olwe long faea blong hel, samting ya i min se hem i gat tingting afta we hem i ded. Be makem wanem Eklesiastis 9:5, 10 i talem.”

¹⁴ Plante samting blong jusumaot. Sipos wan stret kwestin no wan trabol i strong tumas long sam grup blong ol man we oli lesin, talem sam samting we maet oli givim ansa mo letem vas mo mining blong hem i givim stret ansa long olgeta. Sipos yu toktok long wan man Katolik maet yu wantem yusum Matyu 6:9 blong soemaot Hemia we yumi mas prea long hem. Wan stret kwestin no trabol maet i save tanem tingting blong man blong haos i go long rong ples, taswe maet yu save talem se: “I gat plante tingting long saed blong hu nao yumi mas prea long hem. Sam man oli talem se Meri, sam narafala man oli talem se ‘ol tabu man,’ be sam narafala man oli talem se yumi mas prea long God nomo. Be Jisas i talem long ples ya se.”

¹⁵ Histri. Ating yu yu yusum Hibrus 9:12 long tok blong yu long saed blong ransom blong soem se blong “mekem yumi fri, gogo i no save finis,” Jisas i givim prapa blad blong hem. Maet yu nid blong tokbaot fastaem vas we bambae yu ridim mo eksplenem “Tabu Ples” long haos tapolen, we Pol i soem se i pija blong ples we Jisas i go insaed long hem.

¹⁶ Ol vas raonabaot. Samtaem ol vas raonabaot long wan vas oli givhan blong wokem rod blong yusum vas ya. Eksampel, sipos yu yusum vas ya long Luk 20:25 blong soem wanem mining blong “samting we i blong Sisa, yufala i givimbak long Sisa,” maet i gud blong eksplenem fasin ya we Jisas i yusum mane we nem blong Sisa i stap long hem, olsem ol vas raonabaot oli talem.

¹⁷ Olgeta fasin ya. Yes, yu save yusum olgeta fasin mo oltaem samting ya i gud.

¹⁸ Wokem rod blong yusum wan vas i mas wekemap tingting blong man blong oli rere blong kasem samting we bambae yu ridim mo i pulum tingting long riding mo hem i mas pulum tingting long risen blong yusum vas.

19, 20. ?Olsem wanem blong save sipos yumi wekemap tingting blong man i go long vas we yumi wantem yusum?

¹⁹ Wekemap tingting blong ridim vas. ?Olsem wanem blong save sipos yu wekemap tingting blong man long vas we bambae yu yusum? Sipos yu stap lukluk fasin blong ol man we oli lesin long yu. Mo tu fasin blong wokem rod i go long vas. Sipos ol man we oli lesin bambae oli no tingbaot wan samting from we yu yu no ridim vas afta we yu yu pulum tingting blong olgeta i go long hem, no sipos yu yu stanemap wan kwestin long tok blong yu, nao yu save se yu yu wekemap intres blong ol man i go long vas. Tru ya, tok blong pulum man i go long vas i mas laenap wetem samting we yu tokbaot mo wetem vas we bambae yu ridim. Mo vas ya no mining blong hem we bambae i kamaot i mas ansa long kwestin we yu stanemap long tok blong yu.

²⁰ Fasin blong wokem rod blong yusum vas maet yumi save talem se i olsem wan tok we i kamaot bifo long wan oda we i kamaot. Man we i blou pupu blong statem wan konset, i no hem nomo we i mekem ful konset. No gat. Be, ol tok we i wekemap tingting i pulum tingting blong ol man i stap long tok we i kamaot biaen. Fasin ya blong wokem rod blong yusum vas bambae i mekem ol man oli glad mo oli kasem gudfala samting long ol vas we yu jusum blong ridim.

21. ?From wanem yumi mas pulum tingting i go long risen blong yusum wan vas?

²¹ Pulum tingting long risen blong yusum vas. Fasin blong wokem rod blong yusum vas i save stanemap sam kwestin we oli no gat ansa yet long hem, be tu hem i mas gat sam risen from wanem vas ya i stret mo i gud blong ridim. Eksampel, sipos yu tokbaot wol olsem ples we man i save laef blong olwe long hem maet yu save rere blong yusum Revelesen 21:3, 4. Long fastok blong yu we i blong soemaot risen long samting ya, maet yu save talem se: “Naoia long nekis vas, Revelesen 21:3, 4, traem luk weples haos tapolen blong God bambae i stap taem ol trabol mo ded bambae oli finis.” I no se yu wekemap tingting blong man nomo taem yu livim kwestin blong vas ya i ansa long hem, be yu yu pulum tingting long impoten haf blong vas ya tu we i isi blong yu save sapotem tok blong yu afta we yu ridim. Taem yu yusum fasin ya blong pulum tingting i go long ol samting we oli stap long vas, yu yu stap makemgud olsem wanem Tok blong God i impoten.