Mei

Ol Kristin long faswan handred yia oli kasem bigfala trabol taem kakae i sot “long olgeta ples long wol.” I sua se ol hed blong famle oli wari se bambae famle blong olgeta i kakae wanem. ?Mo olsem wanem long ol yangfala we oli plan blong mekem moa long wok blong prij? Maet oli gat tingting se oli mas wet fastaem kasem we draetaem i finis. Nating se i olsem wanem, ol Kristin ya oli mekem sam jenis folem situesen we oli stap long hem. Oli gohed blong mekem bes blong olgeta long wok blong prij, mo oli glad blong serem olting blong olgeta wetem ol brata mo sista long Judia. (Wok 11:​29, 30) Olgeta we oli kasem help long taem ya oli luksave se Jehova i stap halpem olgeta. (Mat. 6:​31-33) Mo oli harem se oli kam klosap moa long ol brata mo sista we oli halpem olgeta. Mo olgeta we oli givim samting o oli joen long wok blong halpem ol man long taem blong disasta, oli harem gud from oli gat fasin ya we oli glad blong givim samting.—Wok 20:35. w23.04 16 ¶12-13

Samtaem Jehova i save yusum sam man we oli no wosipim hem, blong ansa long prea blong ol man blong hem. Eksampol, Jehova i pulum King Ataksekses blong i letem Nehemaea i gobak long Jerusalem blong givhan blong bildim bak taon. (Neh. 2:​3-6) Tede tu, Jehova i save yusum ol man we oli no wosipim hem blong givhan long yumi taem yumi gat nid. Samtaem, Jehova i stap ansarem ol prea blong yumi long wan rod we yumi no luksave. Be rod we Jehova i yusum blong ansarem ol prea blong yumi, hemia nao stret samting we yumi nidim blong gohed blong holemstrong long hem. Taswe, yu mas traehad blong luksave se Jehova i stap ansarem ol prea blong yu. Wanwan taem i gud yumi stop mo tingbaot olsem wanem Jehova i stap ansarem ol prea blong yumi. (Sam 66:​19, 20) Yumi soemaot bilif long Jehova i no long prea nomo, be tu taem yumi akseptem ol defren rod we hem i yusum blong ansa long ol prea blong yumi.—Hib. 11:6. w23.05 11 ¶13; 12 ¶15-16

Taem yumi givim laef blong yumi long Jehova, yumi promes blong wosipim hem mo mekem wil blong hem. Hemia wan promes we yumi mas holemtaet. I no had tumas blong mekem, from we Jehova i wokem yumi blong mekem wil blong hem. (Rev. 4:11) Hem i putum filing ya long yumi we yumi wantem save hem mo wosipim hem, mo hem i wokem yumi long pija blong hem. From samting ya, yumi naf blong kam klosap long hem mo yumi glad nomo blong mekem wil blong hem. Mo taem yumi mekem wil blong God mo folem eksampol blong Pikinini blong hem, yumi “harem gud long laef.” (Mat. 11:​28-30) Gohed blong mekem lav we yu gat long Jehova i kam strong moa. Yu save mekem olsem, taem yu tingting dip long ol gudfala samting we hem i mekem long yu mo ol blesing we oli stap long fored blong yu. Taem lav blong yu long Jehova i kam strong moa, i isi blong yu obei long hem. (1 Jon 5:3) Jisas i naf blong mekem wil blong Jehova from we hem i prea blong askem help, mo i tingbaot ol blesing we bambae hem i kasem. (Hib. 5:7; 12:2) Olsem Jisas, yumi save prea blong Jehova i givim paoa long yumi mo gohed blong tingbaot hop ya blong laef olwe. w23.08 27-28 ¶4-5

Yumi evriwan i laekem ol man we oli gat longfala tingting. ?From wanem? Yumi respektem olgeta we oli save wet wetem longfala tingting mo oli no kam kros. Taem yumi mekem mastik, yumi glad sipos narafala i gat longfala tingting. Yumi glad we tija blong yumi i gat longfala tingting taem yumi stap traehad blong lanem ol tijing blong Baebol, akseptem olgeta, mo folem long laef blong yumi. !Antap moa, yumi glad tumas taem Jehova God i gat longfala tingting long yumi! Yumi glad taem narafala i gat longfala tingting, be plante taem i no isi blong yumi gat longfala tingting. Maet i had blong yu wet long laen taem yu stap long stoa, speseli sipos yu stap hariap blong go samples. Maet i had blong stap kwaet taem narafala i mekem yumi kros, mo samtaem i had blong wet blong niufala wol i kam. Long ol taem olsem, yumi mas gat longfala tingting. w23.08 20 ¶1-2

Jehova i talem long Gideon blong i katemdaon namba blong ol soldia blong hem. Maet hem i save gat tingting ya se: ‘?I rili nidim blong mekem jenis ya? ?Bambae mifala i win?’ Nating se i olsem, Gideon i obei. Tede, ol elda oli folem fasin blong Gideon taem oli folem ol niufala save we i kamaot long oganaesesen. (Hib. 13:17) Gideon i obei long Jehova nating se hem i fraet mo wok we hem i mas mekem i denja. (Jaj. 9:17) Afta we Jehova i toktok long Gideon, Gideon i sua fulwan se Jehova bambae i sapotem hem, from we Gideon i stap protektem ol man blong Hem. Ol elda we oli laef long ol kantri we oli putum tabu long wok blong yumi, oli folem fasin blong Gideon. Oli gat strong tingting blong lidim ol miting mo wok blong prij, nating se oli save arestem, kwestinim olgeta, lusum wok blong olgeta, o kilim nogud olgeta from. Long taem blong bigfala trabol, ol elda bambae oli nidim strong tingting blong obei long ol tok we oli kasem, nating se hemia i putum laef blong olgeta long denja. w23.06 5-6 ¶12-13

Jehova i raetem stori blong Jehoeada long Baebol blong tijim yumi. (Rom 15:4) Mo taem Jehoeada i ded, oli ona long hem taem oli berem hem “long Taon Blong Deved wetem ol king, from we hem i mekem samting we i gud long Isrel, antap moa taem i respektem tru God mo haos blong Hem.” (2 Kron. 24:​15, 16) Stori blong Jehoeada i save halpem yumi evriwan blong wokem fasin ya blong fraet long God. Ol elda oli save folem fasin blong Jehoeada sipos oli lukaot rod oltaem blong protektem ol sipsip blong God. (Wok 20:28) Eksampol blong Jehoeada i tijim ol olfala se taem oli gohed blong fraet long Jehova mo oli holemstrong long hem, Jehova i yusum olgeta moa long wok blong hem. Ol yangfala oli save lanem lesen long fasin blong Jehova blong mekem i gud long Jehoeada, mo soemaot respek long ol olfala brata mo sista, speseli olgeta we oli mekem wok blong Jehova longtaem finis. (Prov. 16:31) I gud yumi evriwan i gohed blong sapotem “olgeta we oli stap lidim” yumi taem yumi obei long olgeta.—Hib. 13:17. w23.06 17-18 ¶14-15

Yumi mas waes taem yumi tingbaot hamas taem yumi wantem ansa long miting. Sipos yumi leftemap han blong yumi oltaem, maet yumi save mekem se brata we i lidim stadi i wantem jusum yumi oltaem, nating se ol narafala oli no gat janis yet blong ansa. Hemia i save mekem tingting blong ol narafala i foldaon, mo oli no moa wantem leftemap han blong olgeta. (Pri. 3:7) Taem i gat plante pablisa we oli leftemap han blong olgeta, maet yumi no ansa oltaem olsem we yumi wantem. Samtaem, maet brata we i lidim stadi i no gat janis blong jusum yumi. Long taem olsem yumi save harem nogud, be yumi no mas kam kros taem oli no jusum yumi. (Pri. 7:9) Maet yumi no givim plante ansa olsem yumi wantem, be yumi save lesin gud long ol narafala taem oli givim ansa. Mo afta long miting, yumi save talem ol gudfala toktok long olgeta from ansa blong olgeta. Ol brata mo sista oli save haremgud long ol gudfala tok ya, sem mak olsem we yumi givim wan ansa. w23.04 23-24 ¶14-16

Yumi mas stadi mo tingting dip long Tok blong God. Wan tri i save stanap strong sipos rus blong hem i go dip long graon. Long sem fasin, yumi save stanap strong sipos yumi bilif strong long Tok blong God. Taem wan tri i gru, ol rus blong hem oli stap go dip moa long graon mo oli stap spred i go longwe moa. Taem yumi stadi mo tingting dip, yumi stap mekem bilif blong yumi i kam strong moa. Mo yumi trastem moa se ol rod blong Jehova oli beswan. (Kol. 2:​6, 7) Tingbaot olsem wanem ol instraksen, ol advaes mo ol samting we Jehova i mekem blong protektem ol man blong hem long taem bifo, i halpem olgeta. Eksampol, Esikel i stap luklukgud taem wan enjel i stap mesarem tempol ya we hem i luk long wan vison. Vison ya i mekem Esikel i strong, mo i tijim yumi tu blong obei long ol rul blong Jehova long saed blong tru wosip. (Esik. 40:​1-4; 43:​10-12) Yumi tu, yumi save kasem gudfala samting taem yumi tekem taem blong stadi mo tingting dip long ol dip trutok blong Baebol. Yumi save mekem hat blong yumi i stap strong mo trastem Jehova fulwan.—Sam 112:7. w23.07 18-19 ¶15-16

Baebol i fulap long ol gudfala eksampol we ol yang man oli save folem. Ol man bifo, oli lavem God mo oli mekem plante defren wok blong lukaot long ol man blong hem. Insaed long famle mo long kongregesen, yu save faenem ol gudfala eksampol blong ol Kristin we oli bigman long spirit. (Hib. 13:7) Mo tu, yu save folem gudfala eksampol blong Jisas Kraes. (1 Pita 2:21) Taem yu stadi gud long ol eksampol ya, traem makem fasin blong ol man ya we yu yu laekem. (Hib. 12:​1, 2) Biaen, luk olsem wanem yu save folem fasin blong olgeta. Wan man we i yusum tingting blong hem, i tingting gud fastaem bifo we i tekem aksen. Taswe i gud yu wok had blong wokem fasin ya mo holemtaet. Fastaem, yu save lanem ol stamba trutok blong Baebol mo luk olsem wanem oli save mekem i gud long yu. Biaen, yusum ol save ya blong mekem ol desisen we i mekem Jehova i glad. (Sam 119:9) Impoten fasin ya bambae i halpem yu bigwan, blong kam bigman long spirit.—Prov. 2:​11, 12; Hib. 5:14. w23.12 24-25 ¶4-5

Ol perens oli save tijim pikinini olsem wanem blong ansa long kwaet fasin taem narafala i agensem olgeta. (Jem. 3:13) Samfala oli mekem trening long taem blong famle wosip. Oli tokbaot olsem wanem blong givim ansa long sam yangfala long skul long sam topik, mo olsem wanem blong toktok long kwaet fasin we i pulum narafala blong lesin. Taem famle i mekem trening tugeta, hemia i halpem ol yangfala blong mekem bilif blong olgeta i strong moa, mo blong oli naf blong eksplenem bilif blong olgeta long ol narafala. Long jw.org, klosap long haf ya “Ol Yangfala Oli Askem,” i gat ol pepa we ol yangfala oli save fulumap. Ol pepa ya oli blong halpem ol yangfala blong oli mekem bilif blong olgeta i strong moa mo blong oli ansa long prapa toktok blong olgeta. Sipos famle i stadi long ol haf ya tugeta, oli save lanem olsem wanem blong ansa long ol kwestin long fasin we i kwaet mo i pulum intres blong man. w23.09 17 ¶10; 18 ¶15-16

?Yu bin putum sam mak long saed blong spirit we yu faenem i had blong kasem? Sipos i olsem, i no yu wan nomo. Eksampol, Philip i wantem kam gud moa long fasin ya blong prea oltaem, be i had blong hem i faenem taem blong prea. Erika i putum mak ya blong go long ol miting blong prij long stret taem, be hem i stil kam let long ol miting. Sipos yu jes putum wan mak we yu no kasem yet, plis yu no letem tingting blong yu i foldaon. Samtaem, blong kasem wan smol mak we yumi putum, hemia tu i nidim taem mo traehad. Taem yu stap traehad blong kasem mak blong yu, hemia i soemaot se yu tinghae long frensip blong yu wetem Jehova, mo yu wantem mekem bes blong yu long wok blong hem. Jehova i tinghae long traehad blong yu, mo hem i wantem nomo blong yu mekem samting we yu yu naf blong mekem. (Sam 103:14; Maeka 6:8) Taem yu putum wan mak, meksua se yu save kasem. w23.05 26 ¶1-2

Olgeta we oli gat strong tingting oli save fraet, be oli no letem fasin ya i stopem olgeta blong mekem samting we i stret. Daniel i wan yangfala we i gat strong tingting. Hem i stadi long ol raeting blong ol profet, olsem Jeremaea. Daniel i kasemsave se i no longtaem, ol man Jiu we oli stap kalabus long Babilon bambae oli go fri. (Dan. 9:2) Taem Daniel i luk ol tok blong Jehova oli kamtru, hem i trastem Jehova moa, mo olgeta we oli trastem God fulwan oli gat strong tingting. (Skelem wetem Rom 8:​32, 37-39.) Be samting we i impoten moa, Daniel i prea oltaem long Papa blong hem long heven. (Dan. 6:10) Hem i talemaot ol sin blong hem, i serem ol filing blong hem mo i askem help. (Dan. 9:​4, 5, 19) Olsem yumi, Daniel i no bon wetem strong tingting, be hem i wokem fasin ya taem i stadi, prea, mo trastem Jehova. w23.08 3 ¶4; 4 ¶7

Taem yumi obei long ol haeman, ?olsem wanem hemia i mekem i gud long yumi wan mo ol narafala? Wan samting se yumi blokem panis we yumi save kasem sipos yumi no obei long ol loa. (Rom 13:​1, 4) Mo tu, taem yumi obei long haeman, oli save gat gudfala tingting long saed blong ol Witnes blong Jehova. Eksampol, plante yia bifo, long Naejeria ol soldia oli kam insaed long wan Haos Kingdom long taem blong miting blong lukaotem ol man we oli no wantem pem takis. Be lida blong ol soldia ya i talem long olgeta blong oli aot, i se: “Ol Witnes blong Jehova oltaem oli pem ol takis.” Evri taem we yu obei long loa, yu stap givhan blong holemtaet gudnem we Ol Witnes blong Jehova oli gat. Mo wan dei, gudnem ya i save protektem ol brata mo sista. w23.10 9 ¶13

Sam man blong Jehova oli wet longtaem finis blong Jehova i finisim rabis wol ya. Long tingting blong ol man, i luk olsem se promes ya i slo tumas blong kamtru. Jehova i kasemsave long filing blong ol man blong hem, taswe hem i talem long profet Habakuk se: “Vison ya i stap wet long stret taem blong hem, mo i stap muv kwik i go from en blong hem, mo bambae i no giaman. !Nating sipos hem i tektaem, be yu mas gohed blong wet long hem! From we bambae hem i mas kamtru. !Bambae hem i no let!” (Hab. 2:3) ?Olsem wanem? ?God i talem ol tok ya blong givhan long Habakuk nomo? ?O ol tok ya oli stret yet long yumi tede? Jehova i pulum aposol Pol blong talem ol tok ya long ol Kristin we oli wantem tumas blong niufala wol i kam. (Hib. 10:37) Yes, yumi save sua se nating sipos long lukluk blong yumi promes ya i slo tumas blong kamtru, be “hem i mas kamtru. !Bambae hem i no let!” w23.04 31 ¶16

Bighaf blong ol man Isrel oli no wantem luksave klia pruf ya se Jehova i stap yusum Moses blong toktok long bihaf blong Hem. (Nam. 14:​10, 11) Plante taem oli no wantem luksave samting ya. From risen ya, Jehova i no letem olgeta oli go insaed long Promes Lan. (Nam. 14:30) Be i gat sam man Isrel we oli folem ol tok blong Jehova. Eksampol, Jehova i talem se: “Keleb . . i gohed blong folem mi long fulhat blong hem.” (Nam. 14:24) God i blesem Kaleb, mo i letem hem i jusum ples we hem i wantem laef long hem long Promes Lan. (Jos. 14:​12-14) Ol nekiswan jeneresen blong ol man Isrel we oli go insaed long Promes Lan, olgeta tu oli soemaot wan gudfala eksampol, taem oli folem ol tok blong Jehova. Taem Josua i putumap Moses blong i lidim ol man Isrel, ‘long ful laef blong olgeta, oli respektem hem bigwan.’ (Jos. 4:14) Taswe Jehova i blesem olgeta, taem i tekem olgeta i go long kantri ya we hem i promes blong givim long olgeta.—Jos. 21:​43, 44. w24.02 21 ¶6-7

Dokta i tajem han blong yumi blong jekem sipos hat blong yumi i wok gud o nogat. Long sem fasin, blong faenemaot sipos lav we yumi gat long God i strong o nogat, yumi mas jekem lav we yumi gat long ol brata mo sista. Sipos yumi luksave se yumi no moa lavem ol brata mo sista olsem fastaem, hemia i min se lav we yumi gat long God i no moa strong. Be taem yumi soemaot lav oltaem long ol brata mo sista, hemia i soemaot se lav we yumi gat long God i strong. Sipos lav we yumi gat long ol brata mo sista i kam slak, hemia i wan bigfala problem. ?From wanem? From hemia i soemaot se frensip blong yumi wetem Jehova i no moa strong. Aposol Jon i talemaot klia samting ya, i se: “Sipos man i no lavem brata blong hem we hem i stap luk oltaem, hem i no save lavem God we hem i no luk hem samtaem.” (1 Jon 4:20) ?Yumi lanem wanem? Yumi lanem se Jehova i save glad nomo long yumi sipos yumi “lavlavem yumi.”—1 Jon 4:​7-9, 11. w23.11 8 ¶3; 9 ¶5-6

Taem King Jehoas i yangfala, hem i mekem wan waes desisen. From we papa blong hem i ded, Hae Pris Jehoeada i lukaot long hem mo i tijim hem long saed blong Jehova. Jehoas i waes from we hem i lesin long advaes we Jehoeada i givim. Hem i folem eksampol blong Jehoeada, mo i lidim ol man blong mekem tru wosip long Jehova. Mo tu, hem i mekem plan blong ol wok blong fiksimap tempol blong Jehova. (2 Kron. 24:​1, 2, 4, 13, 14) Sipos papa mo mama blong yu o wan narafala i tijim yu blong lavem Jehova mo ol loa blong hem, hemia i wan nambawan presen. (Prov. 2:​1, 10-12) Papa mo mama blong yu i save trenem yu long plante defren rod. Taem yu folem ol advaes blong Baebol we Papa mo Mama i givim long yu, bambae yu mekem tufala i hapi. Antap moa, bambae yu mekem God i hapi mo bambae yu kam fren blong hem blong olwe. (Prov. 22:6; 23:​15, 24) Hemia ol gudfala risen blong folem eksampol blong yangfala Jehoas. w23.09 8-9 ¶3-5

Jehova i promes blong lesin long ol prea blong yumi. Hem i lavem yumi from we yumi gohed blong wosipim hem, taswe oltaem hem i lesin long ol prea blong yumi. (Sam 10:17; 37:28) Be hemia i no min se bambae hem i givim evri samting we yumi askem. Maet yumi mas wet go kasem niufala wol, blong yumi kasem sam long ol samting ya we yumi prea from. Jehova i tingbaot olsem wanem ol prea blong yumi oli joen wetem stamba tingting blong hem. (Aes. 55:​8, 9) Wan haf blong stamba tingting blong Jehova, hemia blong wol ya i fulap wetem ol man mo woman we oli joen gud, mo oli glad blong stap aninit long rul blong hem. Be Setan i talem se ol man bambae oli glad moa sipos oli rulum olgeta wan. (Jen. 3:​1-5) Blong pruvum se Devel i wan man blong giaman, Jehova i letem ol man oli rulum olgeta bakegen. Be rul blong ol man i stamba blong plante problem we yumi stap fesem tede. (Pri. 8:9) Yumi kasemsave se Jehova bambae i no tekemaot olgeta problem ya tede. w23.11 21 ¶4-5

Jehova i promes se tru long Ebraham, bambae hem i blesem plante nesen. Be taem Ebraham i gat 100 yia mo Sera i gat 90 yia, promes ya i no kamtru yet. Long lukluk blong ol man, i no posibol blong Ebraham mo Sera i gat wan boe. Hemia i save traem bilif blong Ebraham. Be “hem i hop mo i bilif se maet hem i save kam papa blong plante nesen.” (Rom 4:​18, 19) Yes, samting we Ebraham i wet from i kamtru. Hem i kam papa blong Aesak. (Rom 4:​20-22) Yumi save mekem God i glad mo kam fren blong hem olsem Ebraham. Hemia nao samting we Pol i makem gud taem i raetem se: ‘Tok ya se, “God i luk hem” oli no raetem i go long Ebraham nomo, be oli raetem i kam long yumi tu we God bambae i luk yumi se yumi stret man, from we yumi bilif long hem we hem i mekem Jisas i laef bakegen.’ (Rom 4:​23, 24) Olsem Ebraham, yumi mas gat bilif, mekem ol gudfala wok, mo gat hop. w23.12 7 ¶16-17

Taem yu fesem wan trabol we i mekem yu yu fraet, tingbaot se Jehova i luk mo i kasemsave long filing blong yu. Eksampol, Jehova i luk trabol we ol man Isrel oli fesem long Ijip, mo hem i kasemsave filing blong olgeta se “oli harem nogud tumas.” (Eks. 3:7) Taem yu fesem wan trabol we i mekem yu yu fraet, maet yu no luksave we Jehova i stap halpem yu. Taswe i gud yu askem long hem blong i givhan long yu blong luksave se hem i stap halpem yu. (2 King 6:​15-17) Biaen, tingbaot se: ?I gat wan tok o wan ansa long miting we i mekem bilif blong yu i strong? ?I gat wan buk, wan video, o wan original singsing blong yumi we i leftemap tingting blong yu? ?I gat wan man i serem wan naesfala vas wetem yu blong leftemap tingting blong yu? Maet i isi blong yumi ting nating long lav blong ol brata mo sista, mo ol kakae long saed blong spirit we yumi kasem. Be hemia ol gudfala presen we i kam long Jehova. (Aes. 65:13; Mak 10:29, 30) Mo oli pruvum klia se Jehova i kea long yu. (Aes. 49:​14-16) Mo se yumi save trastem hem. w24.01 4-5 ¶9-10

Bifo we Jisas i gobak antap long heven, hem i rimaenem ol disaepol blong hem blong oli talemaot hem “long Jerusalem, mo long olgeta ples long Judia mo Sameria, gogo oli kasem olgeta ples long wol.” (Wok 1:8; Luk 24:​46-48) Smoltaem biaen, ol lida blong ol man Jiu oli arestem aposol Pita mo Jon, mo oli tekem tufala i go long Sanhedrin, oli talem se tufala i mas stop blong prij, mo oli tok strong blong mekem tufala i fraet. (Wok 4:​18, 21) Pita mo Jon i talem se: “?Olsem wanem? ?Yufala i ting se i stret long fes blong God blong mitufala i lesin long yufala, o mitufala i lesin long hem? Hemia i stap long yufala blong yufala i skelem. Be mitufala, mitufala i no save stop blong tokbaot samting we mitufala i luk mo mitufala i harem.” (Wok 4:​19, 20) Taem oli letem Pita mo Jon i go fri, ol disaepol oli prea long Jehova blong i givhan long olgeta blong oli mekem wil blong hem. Mo Jehova i ansa long prea blong olgeta.—Wok 4:31. w23.05 5 ¶11-12

Jehova mo Boe blong hem i bin stap tugeta plante bilian yia long heven, taswe tufala i fren gud tugeta mo tufala i lavlavem tufala. Olsem we yumi ridim long vas blong tede, Jehova i talemaot klia se hem i lavem Jisas. Jehova i save talem nomo se, ‘Hemia nao man ya we mi glad long hem.’ Be hem i wantem we yumi savegud se hem i lavem Jisas tumas, taswe hem i singaot hem se ‘Pikinini blong mi we mi lavem hem tumas.’ Jehova i praod long Jisas mo long samting we bambae hem i mekem. (Efes. 1:7) Mo Jisas i no gat tu tingting se Jehova i lavem hem o nogat. Hem i haremsave se Jehova i lavem hem taswe hem i sua fulwan. Oltaem hem i gat strong tingting blong talemaot se Papa blong hem i lavem hem.—Jon 3:35; 10:17; 17:24. w24.01 28 ¶8

Traem pijarem samting ya: Wan man we yu kea long hem i talem wan giaman tok long saed blong yu. Yu save se hemia i no tru, be samfala oli bilivim. Samting we i mowas se oli stat blong ripitim giaman tok ya, mo plante man oli bilivim tu. ?Bambae yu harem olsem wanem? I sua se bambae yu harem nogud. Eksampol ya i save givhan long yumi blong kasemsave filing blong Jehova taem oli spolem nem blong hem. Taem wan long ol spirit pikinini blong hem i toktok long faswan woman ya Iv, hem i talem giaman tok long saed blong Jehova. Iv i bilivim tok ya. Mo hemia i pulum faswan perens blong yumi blong tufala i rebel agensem Jehova. Nao sin mo ded i kasem olgeta famle long wol. (Jen. 3:​1-6; Rom 5:12) Olgeta problem long wol tede, olsem ded, wo, mo fasin safa, oli kamaot from giaman tok ya we Setan i bin talem. ?Yu ting se Jehova i harem nogud from giaman tok ya, mo nogud frut we i kamaot from? I sua se yes. Be Jehova i no kam kros. Hem i gohed blong stap olsem wan “hapi God.”—1 Tim. 1:11. w24.02 8 ¶1-2

?Olsem wanem yu save folem eksampol blong Josef? Yu mas tingbaot naoia samting we bambae yu mekem, sipos yu fesem wan traem. Lanem blong talem no kwiktaem long ol samting we Jehova i no laekem, mo no tingbaot olgeta nating. (Sam 97:10; 119:165) Sipos yu mekem olsem, bambae yu no mekem sin taem wan samting i traem yu. Maet yu save se yu faenem trutok mo yu wantem mekem wok blong Jehova long fulhat blong yu, be i gat wan samting we i blokem yu blong givim laef blong yu long Jehova mo baptaes. Sipos i olsem, yu save mekem olsem King Deved. Yu askem strong long Jehova se: “O God, yu jekemgud laef blong mi mo yu save hat blong mi. Yu lukluk gud laef blong mi, mo i gud yu save ol tingting we oli stap mekem mi mi wari. Yu traem luk sipos i gat eni nogud samting long laef blong mi, mo yu lidim mi long rod we i no gat en blong hem.” (Sam 139:​23, 24) Jehova i blesem olgeta we oli “stap traehad blong faenem hem.” Taem yu stap traehad blong kasem mak ya blong givim laef blong yu long Jehova mo baptaes, yu soemaot long hem se yu stap traehad blong faenem hem.—Hib. 11:6. w24.03 6 ¶13-15

Hae pris i stanap long fored blong God long bihaf blong ol man. Jehova i putumap faswan hae pris blong ol man Isrel, hemia Eron, long taem we oli dediketem tabenakel. Be olsem we aposol Pol i eksplenem, “ol pris oli stap ded, nao oli no save gohed long wok blong olgeta, from samting ya ol narafala oli mas tekem ples blong olgeta.” (Hib. 7:​23-26) Mo tu, from we ol hae pris ya oli sinman, oli mas mekem sakrefaes from prapa sin blong olgeta. Hemia nao samting we i defren long saed blong ol hae pris blong Isrel mo bigfala Hae Pris ya, Jisas Kraes. Jisas Kraes we i Hae Pris blong yumi, “i mekem minista wok . . long tent ya we i tru, we Jehova nomo i stanemap, i no man.” (Hib. 8:​1, 2) Pol i eksplenem se Jisas “i no save ded samtaem, taswe bambae i no gat narafala man i tekem ples blong hem.” Pol i talem tu se Jisas “i klin, mo hem i defren long ol man we oli stap mekem sin,” mo hem i no nid blong “mekem sakrefaes evri dei” from ol sin blong hem, olsem we ol hae pris blong Isrel oli mekem. w23.10 26 ¶8-9

‘Heven we i stap fastaem,’ i minim ol gavman blong man we Setan mo ol dimon blong hem oli gat paoa long olgeta. (Mat. 4:​8, 9; 1 Jon 5:19) Long Baebol, tok ya “wol” oli yusum plante taem blong tokbaot ol man long wol. (Jen. 11:1; Sam 96:1) Taswe, ‘wol we i stap fastaem’ i minim ol rabis man long wol tede. Jehova bambae i no traem mekem se “heven” mo “wol” we i stap naoia, i kam gud moa. Be bambae hem i putumap “wan niufala heven mo wan niufala wol” blong tekem ples blong olgeta, hemia i minim wan niufala gavman we bambae i rul long ol gudfala man. Yes, Jehova bambae i mekem wol ya mo ol man oli kam niuwan, taem i mekem oli kam stretgud olgeta. Olsem Aesea i talemaot, fulwol bambae i kam wan naesfala garen, olsem garen blong Iden. Mo tu, bambae yumi kam niuwan taem Jehova i mekem se yumi kam stretgud olgeta. Olgeta we leg blong olgeta i nogud, ol blaenman, mo olgeta we sora blong olgeta i fas bambae oli kam gud. Antap moa ol dedman bambae oli laef bakegen.—Aes. 25:8; 35:​1-7. w23.11 4 ¶9-10

“Bigfala trabol” bambae i stat wantaem nomo. (Mat. 24:21) Be hem i defren long ol narafala disasta, from we yumi save se i stap kam. Samwe 2,000 yia bifo, Jisas i wonem ol man blong hem blong oli stap rere from dei ya. Sipos yumi rere gud naoia, bambae i isi blong yumi stanap strong long dei ya, mo yumi naf blong halpem ol narafala blong oli mekem sem mak. (Luk 21:36) Yumi mas stanap strong blong yumi save obei long Jehova, mo trastem se bambae hem i protektem yumi. ?Bambae yumi mekem wanem sipos ol brata mo sista oli lusum evri samting blong olgeta? (Hab. 3:​17, 18) Yumi mas gat sore, we bambae i pusum yumi blong givim ol samting we oli nidim. ?Bambae yumi mekem wanem sipos wan grup blong ol nesen i atakem yumi, nao yumi mas laef wetem ol brata mo sista blong sam taem? (Esik. 38:​10-12) Yumi mas gat lav we i strong, blong yumi save gotru long hadtaem ya. w23.07 2 ¶2-3

Ol kapol oli save lanem samting long eksampol blong Akwila mo Prisila, we plante Kristin bifo oli lavem tufala. (Rom 16:​3, 4) Tufala i joen tugeta long wok blong prij mo halpem ol narafala. (Wok 18:​2, 3, 24-26) Taem Baebol i tokbaot Akwila mo Prisila, plante taem hem i tokbaot tufala tugeta. ?Olsem wanem ol kapol oli save folem eksampol blong tufala? Tingbaot ol wok we yu mo hasban blong yu i mas mekem. ?Olsem wanem? ?Yutufala i save joen tugeta blong mekem ol wok ya i bitim we wan nomo i mekem hem wan? Akwila mo Prisila i prij tugeta. ?Yutufala i plan blong mekem sem mak? Akwila mo Prisila i wok tugeta. Maet yu mo hasban o waef blong yu i no mekem sem wok, ?be yutufala i save joen tugeta blong mekem ol wok long haos? (Pri. 4:9) Taem yutufala i givgivhan long yutufala blong mekem wan wok, yutufala i save harem se yutufala i olsem wan tim mo yutufala i gat janis blong storian. w23.05 22-23 ¶10-12

Yumi evriwan i fraet samtaem. Taem Sol i stap ronem Deved blong kilim hem, hem i ronwe i go long Gat we i wan taon blong ol man Filistia. I no longtaem afta, king blong Gat hemia Akis, i faenemaot se Deved i wan strong man blong faet we i kilim “plante taosen” man Filistia oli ded. Taswe, Deved “i fraet tumas.” (1 Saml. 21:​10-12) Hem i wari long samting we Akis bambae i mekem long hem. ?Wanem i halpem Deved blong winim fraet ya? Long Ol Sam 56, Deved i tokbaot ol filing we hem i gat, taem hem i stap long Gat. Long Sam ya, Deved i talemaot klia samting we i mekem hem i fraet, be hem i eksplenem tu, samting we i halpem hem blong winim fraet ya. Taem Deved i fraet, hem i trastem Jehova. (Sam 56:​1-3, 11) Hem i gat gudfala risen blong trastem Jehova. Taswe wetem help blong Jehova, Deved i plan blong mekem wan samting we i narakaen. !Hem i mekem olsem se hem i krangke! Mo plan blong hem i wok. Ale, Akis i no moa gat plan blong kilim hem, be hem i wantem se Deved i mas aot, taswe Deved i naf blong ronwe.—1 Saml. 21:13–22:1. w24.01 2 ¶1-3

?Olgeta we vas blong tede i tokbaot, oli hu? !Hemia ol tabu Kristin we oli laef bakegen! So taem laswan haf blong ol tabu Kristin we oli stap long wol oli go long heven klosap long en blong bigfala trabol, faswan wok blong olgeta hemia blong faet. Afta we oli go long heven, bambae oli joen wetem Kraes mo ol tabu enjel blong hem, blong faet long laswan faet agensem ol enemi blong God. !Traem tingbaot! Long wol, sam tabu Kristin oli olfala mo oli no strong. Be taem oli laef bakegen mo oli go long heven, bambae oli kam ol strongfala spirit man we oli no save ded samtaem, mo bambae oli joenem King blong olgeta Jisas Kraes blong faet. Afta long faet blong Amagedon, bambae olgeta oli wok wetem Jisas blong halpem ol man blong oli kam stret gud olgeta. I sua se long heven bambae oli naf blong mekem plante moa samting, blong givhan long ol Kristin brata mo sista blong olgeta, i bitim taem ya we oli bin stap long wol olsem ol sinman. w24.02 6-7 ¶15-16

Samfala oli rere blong givim laef blong olgeta long Jehova mo baptaes, be oli fraet. Maet oli stap tingting se: ‘?Olsem wanem sipos afta we mi baptaes, mi mekem wan bigfala sin mo kongregesen i putumaot mi?’ Sipos yu gat tingting olsem, i gud yu trastem Jehova se bambae hem i givim evri samting we yu nidim blong “wokbaot stret olsem we [hem] i wantem, blong mekem hem i glad.” (Kol. 1:10) Mo tu, bambae hem i givim paoa long yu blong mekem samting we i stret. Hem i bin halpem plante man finis blong oli mekem samting we i stret. (1 Kor. 10:13) Hemia nao from wanem i gat smol man nomo we kongregesen i putumaot olgeta. Yes, Jehova i halpem ol man blong hem blong oli holemstrong long hem. From we yumi evriwan i sinman, yumi save mekem sam samting we i no stret. (Jem. 1:14) Be taem wan samting i traem yu, yu save jusum se bambae yu mekem wanem. Yu wan yu save jusum se laef blong yu bambae i olsem wanem. Sam man oli talem se yumi no save kontrolem ol filing mo ol samting we yumi wantem mekem. Be tingting ya i giaman. Yu save lanem blong kontrolem ol nogud filing we yu gat. w24.03 5 ¶11-12