Eprel

Ol man blong Jehova long taem bifo oli fesem ol problem we oli no ekspektem. Traem tingbaot Jekob. Papa blong hem i talem long hem blong i go long haos blong Laban, wan famle blong olgeta we i bilif, mo tekem wan gel blong hem blong i kam waef blong hem, nao Jehova bambae i blesem hem bigwan. (Jen. 28:​1-4) Hemia nao samting we Jekob i mekem. Hem i aot long kantri blong Kenan mo i go long haos blong Laban. Laban i gat tu gel, hemia Lea mo Rejel. Jekob i laekem tumas yangfala gel blong Laban, hemia Rejel, mo hem i agri blong wok seven yia blong papa blong hem bifo we hem i maredem hem. (Jen. 29:18) Be hemia i no hapen. Laban i trikim hem nao hem i maredem fasbon gel blong hem, Lea. Biaen Laban i talem long Jekob se afta long wan wik hem i save maredem Rejel, be nomo se hem i mas wok blong hem seven yia bakegen. (Jen. 29:​26, 27) !Mo tu, long ol 20 yia we Jekob i wok blong Laban, hem i mekem plante samting we i no stret long Jekob!—Jen. 31:​41, 42. w23.04 15 ¶5

?Yumi save askem long hu blong i halpem mo lidim yumi? Yumi save finis ansa blong kwestin ya. Yumi save prea long Jehova God, mo hemia nao samting we Jehova i wantem. Baebol i talem se: “Yufala i mas prea oltaem.” (1 Tes. 5:17) Yumi save prea mo askem long hem blong i halpem yumi long laef blong yumi. (Prov. 3:​5, 6) From we Jehova i wan God we i glad nomo blong givim samting, hem i no putum wan limit blong talem hamas taem yumi save prea long hem long wan dei. Jisas i kasemsave se Jehova i tinghae long ol prea. Bifo we Jisas i kam long wol, hem i luk we Papa blong hem i stap ansarem prea blong ol gudfala man mo woman we oli wosipim hem. Eksampol, Jisas i bin stap long saed blong Papa blong hem, taem hem i ansarem prea blong Hana, Deved, Elaejah, mo blong plante moa gudfala man blong hem. (1 Saml. 1:​10, 11, 20; 1 King 19:​4-6; Sam 32:5) !Hemia nao from wanem Jisas i tijim ol disaepol blong hem blong oli prea oltaem, mo wetem strong tingting!—Mat. 7:​7-11. w23.05 2 ¶1, 3

Hae Pris Jehoeada i fraet long Jehova. Hem i soemaot klia samting ya long taem we Atalia, gel blong Jesebel, i putumap hem wan i kam kwin long Juda. Fasin blong hem i nogud we i nogud. Mo from we hem i wantem tumas blong kam kwin, hem i traem kilim i ded evri smol bubu blong hem, blong hem i save rul. (2 Kron. 22:​10, 11) Be wan long ol pikinini ya, hemia Jehoas, i stap laef from we Jehosabiat we i waef blong Jehoeada, i sevem hem. Hem mo hasban blong hem i haedem pikinini ya mo lukaot gud long hem. Long rod ya, Jehoeada mo Jehosabiat i mekem se i gat man yet long laen blong Deved we i save kam king. Jehoeada i holemstrong long Jehova mo i no fraet long Atalia. Taem Jehoas i gat seven yia, Jehoeada i pruvum bakegen se hem i holemstrong long Jehova. Hem i mekem wan plan. Mo sipos plan ya i wok gud, Jehoas bambae i kam king, mo hemia i stret from we hem i laen blong Deved. Be sipos plan ya i no wok gud, Jehoeada i save lusum laef blong hem. Be wetem help blong Jehova, plan ya i go gud. w23.06 17 ¶12-13

King Nebukadnesa i save gat tingting ya se Daniel i wantem agensem hem, mo i save kilim hem i ded. Nating se i olsem, Daniel i soemaot strong tingting blong talemaot mining blong drim ya. ?Wanem i halpem Daniel blong gat strong tingting long ful laef blong hem? Yumi sua se gudfala eksampol blong papa mo mama blong hem i givhan. (Dut. 6:​6-9) Daniel i savegud ol Ten Komanmen, wetem ol smosmol samting long Loa, olsem ol samting we ol man Isrel oli save kakae mo oli no save kakae. (Lev. 11:​4-8; Dan. 1:​8, 11-13) Mo tu, Daniel i lanem histri blong ol man blong Jehova mo samting we i save hapen taem man i no obei. (Dan. 9:​10, 11) Ol ekspiriens we Daniel i gat long ful laef blong hem, oli mekem hem i sua se nomata wanem samting i hapen, Jehova mo ol enjel bambae oli halpem hem.—Dan. 2:​19-24; 10:​12, 18, 19. w23.08 3-4 ¶5-6

Rebeka i wan waes woman mo long ful laef blong hem, hem i gat strong tingting blong mekem ol desisen. Mo tu, hem i save wetaem mo olsem wanem blong mekem samting. (Jen. 24:58; 27:​5-17) Be hem i gat respek mo i rere blong obei. (Jen. 24:​17, 18, 65) Sipos yu gat tingting daon mo yu sapotem ol plan blong Jehova olsem Rebeka, bambae yu kam wan gudfala eksampol long famle blong yu mo long kongregesen. Evri Kristin we oli bigman long spirit oli mas gat tingting daon. Esta i gat tingting daon mo hem i wan gudfala woman we i holemstrong long God. From we hem i gat tingting daon, hem i no mekem samting we hem i no gat raet blong mekem. Hem i lesin gud mo i folem advaes we Modekae i talem long hem. (Esta 2:​10, 20, 22) Yu tu yu save soemaot tingting daon taem yu askem ol gudfala advaes long ol narafala mo yu folem. (Taet. 2:​3-5) Esta i soemaot tingting daon long wan narafala rod tu. “Fes mo bodi blong hem i naes tumas,” be hem i no traem pulum ol man blong oli lukluk hem.—Esta 2:​7, 15. w23.12 19-20 ¶6-8

Sipos yu gohed blong harem se yu gat fol from wan sin we yu mekem, hemia wan hevi samting we Jehova i no wantem se yu karem. Sipos yumi talemaot ol sin blong yumi, tanem tingting, mo traehad blong no mekem sin ya bakegen, yumi save trastem se Jehova bambae i fogivim yumi. (Wok 3:19) Afta we yumi mekem ol samting ya, Jehova i no wantem se yumi gohed blong harem se yumi gat fol. Hem i save se bambae yumi spolem yumi, sipos yumi gohed blong harem nogud. (Sam 31:10) Mo tu, maet yumi save lego resis ya blong kasem laef. (2 Kor. 2:7) Sipos yu stap harem se yu gat fol, tingbaot se Jehova i ‘stap fogivim ol man we hem i no giaman.’ (Sam 130:4) Taem hem i fogivim olgeta we oli rili tanem tingting blong olgeta, hem i promes se: “Bambae mi no moa tingbaot sin blong olgeta.” (Jer. 31:34) Hemia i min se Jehova bambae i no moa tingbaot ol sin blong yu we hem i fogivim finis. Yu no mas gohed blong blemem yu wan sipos yu lusum sam wok long kongregesen from mastik blong yu. Jehova i no stap tingbaot ol sin blong yu, mo yu yu mas mekem sem mak. w23.08 30-31 ¶14-15

Long taem blong COVID-19 pandemik, ol Witnes blong Jehova we oli lesin long ol advaes we i kamaot long oganaesesen blong yumi, oli harem gud from we oli no wari olsem ol man we oli stap lesin long ol giaman toktok. (Mat. 24:45) Oltaem yumi mas tingbaot “ol samting we oli moa impoten.” (Fil. 1:​9, 10) Taem wan samting i pulum tingting blong yumi, hemia i save mekem se yumi westem plante taem mo paoa blong yumi. Sipos yumi letem ol samting blong laef, olsem kakae, dring, spel mo pleplei, mo wok oli kam moa impoten long laef blong yumi, hemia i save pulum tingting blong yumi i gowe long ol samting we oli moa impoten. (Luk 21:​34, 35) Antap long hemia, evri dei yumi stap harem mo ridim plante nius blong ol protes mo ol bisnes blong politik. Yumi mas lukaot gud se ol nius ya oli no pulum tingting blong yumi, sipos no bambae yumi stat blong tekem saed long tingting mo hat blong yumi. Setan i yusum ol defdefren rod blong mekem se yumi no moa gat strong tingting blong mekem samting we i stret. w23.07 16-17 ¶12-13

Ol man blong Jehova oli tingbaot Memoriol blong ded blong Kraes olsem dei we i moa impoten i bitim ol narafala dei blong yia. Mo hemia nomo dei we Jisas i talem stret long ol man blong hem se oli mas tingbaot. (Luk 22:​19, 20) Memoriol i mekem yumi tingbaot ol rod we yumi save soemaot se yumi gat bigfala tangkiu from sakrefaes blong Jisas. (2 Kor. 5:​14, 15) Mo tu, i givim janis long yumi blong joen wetem ol brata mo sista, blong ‘lefleftemap tingting’ blong yumi. (Rom 1:12) Evri yia, plante man we oli gat intres, oli stat blong wokbaot long rod blong laef, from samting we oli luk mo oli harem. Memoriol i mekem se ol brata mo sista raon long fulwol oli joen wanples tu. !Hemia nao from wanem yumi luk Memoriol se i spesel tumas! w24.01 8 ¶1-3

Taem yumi tingting dip long praes ya we Jehova mo Jisas i givim, yumi naf blong kasemsave olsem wanem tufala i lavem yumi tumas. (Gal. 2:20) Jehova i givim presen ya ransom from hem i gat lav. Jehova i pruvum se hem i lavem yumi taem hem i sakrefaesem wan samting we i impoten tumas long hem, hemia Jisas. Jehova i letem Boe blong hem i safa mo i ded long bihaf blong yumi. Jehova i no harem nomo se hem i lavem yumi, be hem i talemaot tu se hem i lavem yumi. (Jer. 31:3) Jehova i pulum yumi i kam long hem from we hem i lavem yumi. (Skelem wetem Dutronome 7:​7, 8.) I no gat wan samting o wan man i save tekemaot yumi long lav ya blong hem. (Rom 8:​38, 39) ?Naoia we yu save se Jehova i lavem yu, ?yu harem olsem wanem? w24.01 28 ¶10-11

Ol tabu Kristin oli glad long hop we oli gat blong laef long heven. Wan long olgeta, Brata Frederick Franz, i talemaot tingting we hem i gat, i se: “Mifala i sua se hop ya bambae i kamtru mo mifala evriwan ol 144,000 man ya, bambae mifala i kasem samting we God i promes blong givim. Blesing ya bambae i gud moa i bitim eni narafala blesing we mifala i save tingbaot.” Long 1991, Brata Franz i talem se: “Mifala i tinghae yet long nambawan hop we mifala i gat. . . . Taem ol yia oli stap pas, mifala i glad moa long hop ya. Mifala i glad nomo blong wet long hop ya . . . Mi mi tinghae moa long hop ya i bitim bifo.” Nating se hop blong yumi i blong laef long heven o long wol, be yumi gat wan nambawan hop we i save mekem yumi glad. Mo hop ya i save gru i kam strong moa. w23.12 9 ¶6; 10 ¶8

Long fored blong doa blong tabenakel, i gat wan olta we oli wokem long kopa mo we oli stap bonem ol animol olsem sakrefaes blong givim i go long Jehova. (Eks. 27:​1, 2; 40:29) Be ol sakrefaes ya oli no save mekem se God i fogivim fulwan ol sin blong ol man. (Hib. 10:​1-3) Ol sakrefaes we oli stap mekem oltaem long tabenakel, oli pija blong wan sakrefaes we bambae i naf blong tekemaot fulwan sin blong olgeta man. Jisas i save se Jehova i sanem hem i kam long wol ya olsem wan man, blong givim laef blong hem olsem wan ransom sakrefaes blong pemaot olgeta man. (Mat. 20:28) Taem Jisas i baptaes, hem i givim hem wan i go blong mekem samting we Jehova i wantem. (Jon 6:38; Gal. 1:4) Jisas i givim laef blong hem “wan taem nomo mo blong olwe” blong kavremap sin blong olgeta man we oli soemaot se oli bilif long Kraes.—Hib. 10:​5-7, 10. w23.10 26-27 ¶10-11

Yumi no save mekem wan samting blong sevem yumi wan long sin mo ded. (Sam 49:​7, 8) Taswe, Jehova i mekem plan blong Jisas i givim laef blong hem from yumi, mo hemia i wan bigfala sakrefaes we hem mo Pikinini blong hem, tufala i mekem. Taem yumi tingting dip moa long wanem we Jehova mo Jisas i mekem blong yumi, bambae yumi tinghae moa long ransom. Taem Adam i mekem sin, hemia i mekem se hem mo ol pikinini blong hem oli lusum janis ya blong laef olwe. Blong pembak wanem we Adam i lusum, Jisas i givim laef blong hem we i stretgud olsem wan sakrefaes. Long ful laef blong Jisas long wol, hem “i no mekem sin, mo i no gat wan giaman tok i kamaot long maot blong hem.” (1 Pita 2:22) Taem Jisas i ded, hem i stretgud olgeta olsem Adam bifo we hem i mekem sin. Taswe, Jisas i naf blong pembak samting we Adam i lusum.—1 Kor. 15:45; 1 Tim. 2:6. w24.01 10 ¶5-6

Afta we Jisas i laef bakegen, hem i go insaed long Rum We i Tabu We i Tabu long tempol long saed blong spirit. Hemia i soemaot se arenjmen blong Jehova long saed blong tru wosip we i stanap long ransom sakrefaes blong Jisas mo wok blong hem olsem Hae Pris, i moa gud i bitim long taem blong ol man Isrel. Bifo, hae pris i tekem blad blong ol animol we oli sakrefaesem i go insaed long Rum We i Tabu We i Tabu we man nomo i wokem, be Jisas i go “insaed long heven stret,” long ples ya we i holi we i holi blong stanap long fored blong Jehova. Long ples ya, hem i givim praes blong laef blong hem we i stret gud i go long God, long bihaf blong yumi “olsem wan sakrefaes blong tekemaot sin.” (Hib. 9:​24-26) Nomata se yumi gat hop blong laef olwe long heven o long wol, be yumi evriwan i save wosipim Jehova long tempol ya long saed blong spirit. w23.10 28 ¶13-14

Traem tingbaot wok we Jisas i stap mekem long heven, olsem King blong yumi mo Hae Pris we i gat sore long yumi. Tru long Kraes, yumi save kam klosap “long tron blong God ya we i kaen tumas,” blong prea mo askem long hem blong i sore long yumi mo i halpem yumi “long stret taem.” (Hib. 4:​14, 15) I gud evri dei yumi tingbaot ol samting we Jehova mo Jisas i mekem finis blong yumi mo we oli stap mekem blong yumi naoia. Lav we tufala i soemaot long yumi, i mas pulum yumi blong wok strong long wok blong Jehova mo wosipim hem. (2 Kor. 5:​14, 15) Wan rod blong soemaot bigfala tangkiu blong yumi, hemia taem yumi halpem ol narafala blong oli kam ol Witnes blong Jehova mo kam disaepol blong Jisas. (Mat. 28:​19, 20) Hemia nao samting we aposol Pol i mekem. Hem i save se wil blong Jehova, hemia blong “ol defdefren kaen man oli mas kasem laef, mo i wantem we olgeta man oli kasem stret save long trutok.”—1 Tim. 2:​3, 4. w23.10 22-23 ¶13-14

Taem yumi prij long ol narafala, plante long yumi i yusum naesfala vas ya blong tokbaot laef long Paradaes. ?Be olsem wanem yumi save halpem ol narafala mo yumi wan, blong trastem se ol blesing we Revelesen 21:​3, 4 i tokbaot bambae oli kamtru? Jehova i no mekem nambawan promes ya nomo, be hem i givim sam nambawan risen tu blong yumi trastem promes ya. Long ol vas we i kam biaen, bambae yumi luk ol risen from wanem yumi save trastem promes blong Jehova long saed blong Paradaes. Ol vas ya oli se: “Man ya we i sidaon long tron, i talem se: ‘!Yu luk! Mi mi stap mekem olgeta samting oli kam niuwan.’ Mo hem i talem bakegen se: ‘Yu raetemdaon ol tok ya from we oli tru mo ol man oli save trastem.’ Mo hem i talem long mi se: ‘!Ol tok ya oli kamtru finis! Mi mi Alfa mo mi mi Omega, mi mi stat mo mi mi en.’”—Rev. 21:​5, 6a. w23.11 3 ¶3-5

Wan yang man i soem se hem i gat fasin blong tingting gud, taem hem i jusum gud stael blong klos mo hea blong hem. Plante taem, bighaf blong ol man we oli mekem mo salem ol niufala stael blong klos, oli no respektem Jehova mo oli gat ol rabis fasin. Yumi luksave samting ya tru long ol stael blong klos we oli taet tumas, o oli mekem man i luk olsem woman. Taswe, wan yang man we i bigman long spirit, bambae i letem ol stamba trutok blong Baebol mo ol gudfala eksampol long kongregesen oli gat paoa long hem taem i jusum klos we bambae hem i werem. Hem i save askem se: ‘?Ol stael we mi jusum oli soemaot se mi gat stret tingting mo mi respektem ol narafala? ?Stael blong klos blong mi bambae i mekem ol narafala oli bilivim se mi mi mekem wok blong God?’ (1 Kor. 10:​31-33) Wan yang man we i tingting gud, bambae i mekem se ol brata mo sista oli respektem hem, be antap moa Jehova. w23.12 26 ¶7

Long taem bifo, “king blong saot” i atakem ol man blong Jehova. (Dan. 11:40) Long ol yia 1900, oli putum plante Witnes long kalabus from we oli no wantem joen long politik. Mo ol skul oli sakemaot plante pikinini we oli Witnes from we oli stap nutrol. Be long ol yia we i jes pas, ol man blong Jehova we oli laef aninit long rul blong king blong saot oli fesem sam narafala trabol. Long taem blong ol kampen blong eleksen, maet wan Kristin i save harem se i wantem sapotem wan politik pati o wan kandidet. I tru se hem i no vot, be maet long tingting mo hat blong hem, hem i laekem wan politik pati i bitim narawan. Taswe blong stap nutrol yumi mas lukaot long ol samting we yumi mekem, mo long ol tingting mo filing blong yumi tu.—Jon 15:​18, 19. w23.08 12-13 ¶17

Taem yumi stap ron long resis ya blong kasem laef, yumi “mas resis long fasin we [yumi] save kasem praes.” (1 Kor. 9:24) Jisas i talem se yumi mas lukaot se ‘fasin blong kakae bitim mak, dring bitim mak, mo wari from ol samting blong laef, oli no mekem tingting blong yumi i kam slak olgeta.’ (Luk 21:34) Ol vas ya mo sam narafala vas oli save givhan long yu blong luksave ol jenis we yu mas mekem, taem yu stap ron long resis blong laef. Yumi save se bambae yumi winim resis blong laef, from Jehova i stap givim paoa we yumi nidim. (Aes. 40:​29-31) !From samting ya yumi no mas slodaon! Olsem aposol Pol, yumi mas ron strong blong kasem praes we i stap long fored blong yumi. (Fil. 3:​13, 14) Ol narafala oli no save resis long bihaf blong yu, be wetem help blong Jehova yu save winim resis ya. Jehova i save halpem yu blong karem ol hevi samting mo sakemaot ol samting we yu no nid blong karem. !Jehova i stap long saed blong yu, taswe yu naf blong stanap strong mo winim resis ya! w23.08 31 ¶16-17

Taem Jisas i gat twelef yia, perens blong hem i no luksave se oli mestem hem i stap long Jerusalem. (Luk 2:​46-52) Hemia responsabiliti blong Josef mo Meri blong meksua se evri pikinini oli kambak wetem tufala afta long lafet. Taem Josef mo Meri i faenem Jisas, Meri i blemem hem. Jisas i save talem stret long hem se samting we hem i mekem i no stret. Be hem i no mekem olsem, hem i toktok kaen mo i respektem tufala. Josef mo Meri i “no kasem save mining blong tok ya we hem i talem long tufala.” Nating se i olsem, Jisas i “gohed blong putum hem i stap aninit long tufala.” Ol yangfala, ?yufala i harem se i had blong obei long perens blong yufala taem oli mekem mastik, o taem oli no kasemsave long yufala? ?Long taem olsem yufala i save mekem wanem? Tingbaot filing blong Jehova. Baebol i talem se taem yufala i obei long ol perens blong yufala, “Masta i glad.” (Kol. 3:20) Jehova i save se samtaem ol perens blong yufala oli no kasemsave long yufala, o samtaem oli putumap sam rul we i no isi blong folem. Nating se i olsem, taem yufala i jusum blong obei, yufala i mekem Jehova i glad. w23.10 7 ¶5-6

Maet wan fren long skul i talem se ol Witnes blong Jehova oli sud jenisim tingting blong olgeta long saed blong ol homoseksuol. I gud yumi mekem hem i save se yumi respektem raet blong ol man wanwan blong oli jus. (1 Pita 2:17) Biaen, maet yumi save tokbaot samting we Baebol i talem mo olsem wanem laef blong man i gud moa taem i folem ol rul blong Baebol. Taem man i strong blong agensem yu, yu no mas hariap blong ting se yu save finis bilif blong hem. Olsem nao, sipos wan fren long skul i talem se i krangke blong bilif long God, i no stret we yu ting se hem i bilif strong long evolusen o i gat plante save long saed ya. Blong talem stret, maet hem i stap talem nomo samting we i harem narafala i talem. Ating yu save soem sam save long saed blong kriesen we i stap long jw.org. Samtaem biaen, maet hem i glad blong tokbaot wan video o wan atikol we hem i luk long ples ya. Taem yumi ansa wetem respek, hemia i save givhan long hem blong lanem moa long saed blong Baebol. w23.09 17 ¶12-13

Nating se yumi mekem mastik, be yumi save bilif strong se Jehova bambae i gohed blong yusum mo blesem yumi, sipos yumi stretem ol rong blong yumi mo dipen long hem. (Prov. 28:13) Samson i no stretgud olgeta, be afta we hem i mekem mastik wetem Delila, hem i no givap. Hem i traehad blong gohed blong mekem wok blong Jehova. Mo Jehova i no lego Samson. Hem i yusum Samson bakegen long wan bigfala fasin. Jehova i tingbaot Samson olsem wan man we i gat bigfala bilif, mo i raetem nem blong hem long lis blong olgeta we oli gat bilif long Hibru japta 11. !I gud tumas blong save se Papa blong yumi long heven i gat bigfala lav mo i wantem tumas blong givhan long yumi, antap moa, taem yumi harem se yumi slak! Taswe olsem Samson, yumi mas askem strong long Jehova se: ‘Plis, yu tingbaot mi, mo yu mekem mi mi strong.’—Jaj. 16:28. w23.09 7 ¶18-19

From we yumi save se dei blong Jehova i klosap, yumi wantem mekem bes blong yumi blong talemaot gud nius long ol narafala. Be samtaem yumi fraet blong mekem olsem. ?From wanem? Maet yumi fraet long tingting blong ol narafala man. Hemia nao sem samting we i hapen long Pita. Long naet bifo we Jisas i ded, Pita i fraet blong talem se hem i wan disaepol blong Jisas, bakegen mo bakegen hem i talem se hem i no save hem. (Mat. 26:​69-75) Be biaen taem Pita i winim fraet ya, hem i talem wetem strong tingting se: “Yufala i no mas fraet long samting we olgeta oli fraet long hem, mo tingting blong yufala i no mas trabol.” (1 Pita 3:14) Ol tok ya blong Pita i soemaot klia se yumi save winim fraet long man. ?Wanem i save givhan long yumi? Pita i talem se: “Yufala i mas akseptem long hat blong yufala se Kraes i Masta blong yufala mo hem i tabu.” (1 Pita 3:15) Hemia i min se yumi mas tingting dip long posisen mo paoa we Masta mo King blong yumi Jisas Kraes i gat. w23.09 27-28 ¶6-8

Yumi mas lukaot gud oltaem blong no mekem ol samting “we oli blong tudak.” (Efes. 5:11) I gat plante ekspiriens we oli soemaot se sipos wan man i lukluk oltaem, i lesin, i tokbaot ol samting we oli no stret, mo ol rabis fasin, bambae i isi nomo blong hem i mekem samting we i no stret. (Jen. 3:6; Jem. 1:​14, 15) Wol blong Setan i traem trikim yumi blong yumi bilif se ol nogud fasin mo ol doti fasin oli no rong. (2 Pita 2:19) Longtaem finis, Setan i yusum sem samting ya nomo blong mekem ol man oli no naf blong luksave samting we i stret mo samting we i rong. (Aes. 5:20; 2 Kor. 4:4) Hemia nao from wanem plante muvi, ol program long televisen, o websaet oli leftemap ol fasin we i go agensem ol rul blong Jehova. Setan i stap traem blong trikim yumi blong ting se ol nogud fasin mo ol stael long wol tede oli no rong.—Efes. 5:6. w24.03 22 ¶8-10

Tabenakel i olsem wan tent blong wosip we ol man Jiu oli tekem wetem olgeta taem oli stap muv long wan ples i go long narafala ples. Oli yusum blong klosap 500 yia, kasem we oli bildim tempol long Jerusalem. (Eks. 25:​8, 9; Nam. 9:22) Hem i ples we ol man Isrel oli kam long hem blong wosipim God mo givim ol sakrefaes i go long hem. (Eks. 29:​43-46) Be tabenakel i representem tu wan nambawan samting. Hem i olsem wan ‘sado blong ol samting we oli stap long heven,’ mo i pijarem bigfala tempol blong Jehova long saed blong spirit. Aposol Pol i talem se “tent [o tabenakel] ya i wan pija blong makem taem ya we yumi stap long hem naoia.” (Hib. 9:9) Taswe, taem hem i raet i go long ol Hibru Kristin, tempol long saed blong spirit i stap finis. Hem i stat long yia 29 K.T., long taem ya we Jisas i tekem baptaes, mo i stat blong mekem wok blong Jehova olsem “bigfala hae pris” long tempol ya long saed blong spirit.—Hib. 4:14; Wok 10:​37, 38. w23.10 25-26 ¶6-7

Yumi ol Kristin, yumi mas rere blong jenisim tingting blong yumi taem yumi fesem hadtaem, blong yumi save gohed blong wosipim Jehova. ?Olsem wanem blong mekem olsem? Yumi no mas mekem i strong long narafala. Yumi rere blong jenisim tingting blong yumi taem situesen long laef blong yumi i jenis, mo taem yumi respektem ol tingting mo desisen blong ol narafala. Yumi ol man blong Jehova, yumi no wantem mekem i strong long ol narafala. Mo tu, yumi wantem gat tingting daon mo yumi kaen. Baebol i tokbaot Jehova se hem i “Bigfala Ston,” from we hem i save stanap strong we i no gat samting i muvum hem. (Dut. 32:4) Be long semtaem, hem i no mekem i strong long narafala. Taem ol samting long wol oli stap jenis, Jehova i jenisim tingting blong hem mo i meksua se evri samting we hem i promes blong mekem, bambae oli kamtru. Jehova i wokem ol man long pija blong hem, blong olgeta tu oli save jenisim tingting blong olgeta, taem i gat wan jenis long laef blong olgeta. Jehova i yusum Baebol blong givim ol gudfala advaes blong halpem yumi blong mekem ol waes desisen, nomata wanem traem yumi fesem. Eksampol blong Jehova mo ol gudfala advaes we hem i givim, i halpem yumi blong luksave se nating se hem i “Bigfala Ston,” be hem i no mekem i strong long narafala. w23.07 20-21 ¶1-3

Baebol i talem se Jehova i olsem wan mama we i lavem tumas pikinini blong hem. (Aes. 66:​12, 13) Traem tingbaot, wan mama we i lukaot gud long pikinini blong hem, hem i meksua se hem i givim samting we pikinini ya i nidim. Taem yumi harem nogud, yumi save sua se Jehova i lavem yumi. Hem i no save lego yumi taem yumi mekem wan samting we i rong. (Sam 103:8) Nesen blong Isrel i mekem Jehova i harem nogud plante taem, be taem oli tanem tingting blong olgeta, hem i mekem oli haremsave se hem i stil lavem olgeta. Eksampol, hem i talem long olgeta se: “Long ae blong mi, yu olsem wan sas samting, yu kasem ona, mo mi mi lavem yu.” (Aes. 43:​4, 5) Lav we God i gat, i neva jenis. Nating sipos yumi mekem wan bigfala sin, be taem yumi tanem tingting blong yumi mo yumi kambak long Jehova, bambae yumi luksave se hem i lavem yumi yet. Hem i promes se: “Bambae hem i fogif long wan fasin we i bigwan.” (Aes. 55:7) Baebol i talem se taem Jehova i fogivim yumi, hemia i olsem we ‘hem i mekem se yumi gat niufala paoa.’—Wok 3:19. w24.01 27 ¶4-5

Jehova i save halpem yumi taem yumi fesem wan had situesen. Eksampol, taem yumi askem long bos blong yumi, blong yumi save spel sam dei blong go long wan asembli, o yumi askem blong jenisim program blong yumi blong wok, blong yumi save joen long olgeta miting, hemia i wan janis blong yumi luk han blong Jehova long laef blong yumi. Long taem olsem, maet yumi sapraes se ol samting oli rongud nomo. Mo hemia i save mekem yumi trastem Jehova moa. Esra i gat tingting daon mo i lukluk i go long Jehova blong i halpem hem. Evri taem we hem i wari from ol wok we hem i mas mekem, hem i prea long Jehova. (Esra 8:​21-23; 9:​3-5) From we Esra i dipen long Jehova, hemia i pulum ol narafala tu blong oli sapotem hem mo folem fasin blong hem blong bilif. (Esra 10:​1-4) Taem yumi wari bitim mak from ol samting long saed blong bodi o from sefti blong famle blong yumi, yumi mas trastem Jehova mo prea long hem. w23.11 18 ¶15-17

Jehova i no talem se sipos yumi wantem kam stret man, yumi mas mekem evri samting stret olsem we Ebraham i mekem. I gat plante defren samting we yumi save mekem blong soemaot se yumi gat bilif. Yumi save welkamem ol niuwan long kongregesen, halpem ol brata mo sista we oli gat bigfala nid, mo mekem i gud long ol famle blong yumi. Hemia nao ol samting we Jehova i glad long hem, mo bambae i blesem yumi from. (Rom 15:7; 1 Tim. 5:​4, 8; 1 Jon 3:18) Wan long ol impoten rod blong soemaot se yumi gat bilif, hemia taem yumi wok strong blong talemaot gud nius long ol narafala. (1 Tim. 4:16) Yumi evriwan i save soemaot long ol wok blong yumi, se yumi bilif we ol promes blong Jehova bambae oli kamtru, mo se ol rod blong hem oli beswan. Mo sipos yumi mekem olsem, yumi save sua fulwan se God bambae i luk yumi olsem ol stret man, mo bambae yumi kam ol fren blong hem. w23.12 2 ¶3; 6 ¶15

Jes bifo we King Deved i ded, hem i talem long Solomon ol tok we i stap long vas blong tede. (1 King 2:​1, 3) Hemia wan advaes we olgeta Kristin man tede oli sud folem. Blong mekem olsem, oli mas lanem blong obei long ol loa blong God, mo folem ol stamba trutok blong God long laef blong olgeta. (Luk 2:52) ?From wanem i impoten we ol yangfala brata oli kam bigman long spirit? Wan Kristin man i gat plante wok blong mekem long famle mo long kongregesen. Taswe i sua se ol yangfala brata oli stap tingbaot ol wok we oli save mekem long fiuja. Maet yu wantem kasem mak ya blong mekem wok blong Jehova fultaem, o kam wan man blong givhan mo biaen kam wan elda long kongregesen. Mo tu, maet yu wantem mared mo gat pikinini. (Efes. 6:4; 1 Tim. 3:1) Be blong kasem ol mak ya mo mekem gud ol wok ya, yu mas kam wan Kristin we i bigman long spirit. w23.12 24 ¶1-2

Ol elda oli gat wok ya blong lukaot gud long ol sipsip blong Jehova. Ol gudfala brata ya oli glad from we Jehova i trastem olgeta blong oli lukaot gud long ol brata mo sista, mo oli wok had olsem ‘ol man blong lukaot long sipsip we oli lukaot gud long olgeta.’ (Jer. 23:4; 1 Pita 5:2) !Yumi glad tumas blong gat ol man olsem long ol kongregesen blong yumi! Ol elda oli save lanem samting from eksampol blong Jaj Gideon. (Hib. 6:12) Hem i mekem wok ya blong protektem mo lidim ol man blong God. (Jaj. 2:16; 1 Kron. 17:6) Olsem Gideon, Jehova i putumap ol elda blong oli lukaot gud long ol man blong Hem, taem oli stap gotru long ol hadtaem. (Wok 20:28; 2 Tim. 3:1) Yumi save lanem samting long fasin blong Gideon taem hem i luksave limit blong hem, i gat tingting daon, mo i obei. Taem hem i stap mekem ol wok blong hem, hem i fesem sam samting we i traem fasin blong hem blong holemstrong. Nating se yumi mekem wok olsem elda o nogat, be yumi save lanem blong glad long wok blong ol elda, mo sapotem olgeta, from we oli wok had blong lukaot gud long kongregesen.—Hib. 13:17. w23.06 2 ¶1, 3