Septemba

God i givim paoa long Jisas blong i stretem ol problem blong ol man. Taem Jisas i stap mekem ol merikel, hem i pruvum se hem i save stretem olgeta problem we ol man oli no save stretem. Hem i gat paoa blong mekem yumi kam fri long stamba blong ol problem yumi, hemia sin mo evri samting we i kamaot from sin, inkludum sik mo ded. (Mat. 9:​1-6; Rom 5:​12, 18, 19) Ol merikel blong Jisas oli pruvum se hem i save hilim “ol defdefren” sik, mo mekem man i laef bakegen. (Mat. 4:23; Jon 11:​43, 44) Mo tu, hem i gat paoa blong kontrolem ol strong win mo mekem man i kam fri long ol rabis spirit. (Mak 4:​37-39; Luk 8:2) !I gud tumas blong save se Jehova i givim paoa long Boe blong hem blong mekem ol samting ya! Yumi sua fulwan se ol blesing we bambae yumi kasem long fiuja aninit long Kingdom blong God, bambae oli kamtru. Ol merikel we Jisas i mekem taem hem i stap long wol, oli tijim yumi se bambae hem i mekem plante moa samting long wol, from we hem i King long Kingdom blong God long heven. w23.04 3 ¶5-7

Sipos yu stap long wan bigfala kongregesen mo plante taem oli no jusum yu blong ansa, maet i isi blong yu givap. Be yu no mas stop blong traehad. I gud yu rerem plante ansa blong givim long wan miting. Nao sipos oli no jusum yu blong ansa long ol faswan haf blong stadi, yu gat janis yet blong givim ansa long ol narafala haf blong miting. Taem yu stap rerem Wajtaoa blong yu, tingbaot olsem wanem wanwan paragraf i joen wetem taetel blong stadi ya. Olsem nao, long taem blong stadi, yu save givim ol gudfala ansa. Antap long hemia, maet yu save rerem ol ansa blong ol paragraf we oli tokbaot ol dip trutok blong Baebol, we i had blong ol man oli eksplenem. ?From wanem? From we maet i no gat plante man i ansa long ol haf ya. ?Olsem wanem sipos yu folem ol advaes ya, be yu no gat janis yet blong givim wan ansa? Bifo long miting, yu save go luk brata we i lidim stadi, mo talem stret paragraf we yu wantem ansa long hem. w23.04 21-22 ¶9-10

Josef i folem gud ol daereksen blong Jehova mo hemia i mekem se hem i kam wan gudfala hasban. Long tri defren taem, hem i kasem instraksen long God long saed blong famle blong hem. Long trifala taem ya, hem i obei nating se hem i mas mekem sam bigfala jenis. (Mat. 1:20; 2:​13-15, 19-21) Taem Josef i folem ol daereksen blong God, hem i protektem Meri, i sapotem hem, mo i lukaot gud long hem. !I sua se ol aksen blong Josef i mekem se Meri i lavem mo i respektem hem moa! Ol hasban, yufala i save folem eksampol blong Josef, taem yufala i folem ol advaes blong Baebol blong lukaot gud long famle blong yufala. Taem yufala i folem advaes ya nating se i yufala i mas mekem sam bigfala jenis, yufala i soemaot se yufala i lavem ol waef blong yufala mo yufala i mekem mared blong yufala i kam strong. Wan sista long Vanuatu we i mared bitim 20 yia, i talem se: “Taem hasban blong mi i lukaot ol advaes blong Jehova, mi respektem hem moa, mi haremsave se mi sef, mo mi trastem ol desisen blong hem.” w23.05 21 ¶5

Ol man Jiu we oli aot long Babilon blong gobak long Isrel, oli mas kam “ol tabu man” blong God. (Dut. 7:6) Be hemia i no min se oli no nid blong mekem eni jenis blong Jehova i glad long olgeta. Bighaf blong ol man Jiu oli bon long Babilon, mo i luk olsem se plante long olgeta oli gat sem tingting mo fasin olsem ol man Babilon. Sikisti naen yia afta we fas grup blong ol man Jiu oli gobak long Isrel, Hed Gavman ya Nehemaea i sek se plante long ol pikinini we oli bon long Isrel oli no save lanwis blong ol man Jiu. (Dut. 6:​6, 7; Neh. 13:​23, 24) ?Olsem wanem ol pikinini ya oli save lanem blong lavem mo wosipim Jehova, sipos oli no kasemsave long lanwis Hibru, hemia men lanwis we oli raetem Tok blong God long hem? (Esra 10:​3, 44) So ol man Jiu ya oli mas mekem plante bigfala jenis. Be bambae i moa isi long olgeta blong mekem ol jenis ya sipos oli stap long Isrel, hemia ples we sloslo oli stanemap tru wosip bakegen.—Neh. 8:​8, 9. w23.05 15 ¶6-7

Nating se yumi gat strong tingting o yumi naf blong bos long tingting, be i save gat sam samting i hapen nao i mekem se yumi no kasem mak blong yumi. Eksampol, “samting we i hapen we man i no tingbaot” i save blokem yumi mo yumi no moa gat taem blong traehad blong kasem mak blong yumi. (Pri. 9:11) Maet yumi fesem wan hadtaem we i mekem tingting blong yumi i foldaon mo yumi harem se yumi no moa gat paoa. (Prov. 24:10) From we yumi sinman, yumi save mekem sam mastik we i mekem i had blong yumi kasem mak blong yumi. (Rom 7:23) O maet yumi harem se yumi taed. (Mat. 26:43) ?Wanem i save halpem yumi blong winim ol samting we oli traem blokem yumi blong kasem mak blong yumi? Tingbaot se sipos wan samting i hapen we i blokem yu blong kasem mak blong yu, hemia i no min se bambae yu stop blong traehad. Baebol i talem se bambae yumi gohed blong kasem ol problem mo ol hadtaem. Be hem i talem tu se yumi save girap mo gohed bakegen. Yes, taem yu gohed blong traehad blong kasem mak blong yu nating se yu fesem ol hadtaem, yu stap pruvum long Jehova se yu wantem mekem hem i glad. !I sua se Jehova i glad tumas taem hem i luk we yu gohed blong traehad blong kasem mak blong yu! w23.05 30 ¶14-15

Wok blong paenia i save halpem wan yang brata blong i lanem blong wok gud wetem ol man we oli gat defdefren fasin. Mo tu hem i lanem olsem wanem blong sevem mane mo yusum gud. (Fil. 4:​11-13) Wan gudfala rod blong statem wok blong Jehova fultaem, i blong mekem haftaem paenia, hemia i save rerem yu blong kam wan fultaem paenia. Wok blong paenia i openem doa blong yu save mekem moa long wok blong Jehova, inkludum wok long konstraksen, o kam wan Betelaet. Evri brata i sud traehad blong wokem ol fasin we oli save halpem hem blong kam wan elda. Baebol i talem se man we i traehad blong kasem wok ya, hem i stap “wantem wan gudfala wok.” (1 Tim. 3:1) Fastaem hem i mas kasem mak ya blong kam wan man blong givhan. Ol man blong givhan, oli halpem ol elda long plante defren rod. Ol elda mo ol man blong givhan, oli gat tingting daon blong halpem ol brata mo sista mo oli wok strong long wok blong prij. w23.12 28 ¶14-16

King Josaea i gat 16 yia taem hem i stat blong lukaot Jehova. Hem i wantem kasemsave long Jehova mo mekem samting we Hem i wantem. Be laef blong yangfala king ya i no isi. Long taem ya, bighaf blong ol man oli wosipim ol giaman God, taswe Josaea i mas gat strong tingting blong stanemap trufala wosip. !Mo i tru se hem i gat strong tingting! Bifo we hem i gat 20 yia, hem i tekemaot giaman wosip long nesen ya. (2 Kron. 34:​1, 2) Nating se yu yangfala nomo, yu save folem eksampol blong Josaea blong kasemsave moa long Jehova mo ol gudfala fasin blong hem. Nao bambae yu wantem givim laef blong yu long hem. ?Hemia i minim wanem? Luke we i baptaes taem hem i gat 14 yia, i talem se: “Naoia bambae mi putum Jehova long fasples long laef blong mi, mo traem mekem hem i glad.” (Mak 12:30) !Sipos yu tu yu mekem olsem bambae yu kasem bigfala blesing! w23.09 11 ¶12-13

Taem aposol Pol i raetem leta ya, kongregesen long Tesalonaeka i jes stat nomo, i no bitim wan yia yet. Ol man we oli putumap olgeta blong lukaot long kongregesen ya, oli no gat plante ekspiriens mo maet oli mekem sam mastik. Be yet, i impoten we ol narafala oli respektem olgeta. Taem bigfala trabol i stap kam moa klosap, bambae yumi nidim blong dipen moa long ol elda blong oli lidim yumi i bitim ol taem naoia. Maet long taem ya, bambae yumi no moa kasem ol daereksen we i kam long hedkwota mo branj ofis. Taswe, i impoten we yumi lanem naoia blong lavem mo respektem ol elda. Nomata wanem i hapen, i gud yumi gohed blong gat klia tingting mo yumi no tingbaot ol mastik blong olgeta. Be i gud we yumi tingbaot se Jehova nao i yusum Jisas blong givim daereksen long ol elda blong oli lidim yumi. Olsem we hat blong faet i protektem hed blong wan soldia, hop ya se God bambae i sevem yumi, i save protektem tingting blong yumi. Yumi luksave se ol samting we wol ya i givim oli blong nating nomo. (Fil. 3:8) Hop blong yumi i halpem yumi blong gat wan tingting we i kwaet mo yumi tingting gud. w23.06 11-12 ¶11-12

Olgeta we “woman we i stupid” i stap singaotem olgeta, oli gat wan desisen blong mekem. ?Bambae oli akseptem invetesen blong hem o oli sakemaot? I gat sam impoten risen from wanem yumi mas stap longwe long enikaen doti fasin blong seks. Ol Proveb i tokbaot se “woman we i stupid” i stap singaot se: “Wota we man i stilim i swit.” (Prov. 9:17) ?“Wota we man i stilim,” i minim wanem? Baebol i komperem seks bitwin hasban mo waef se i olsem wota we i mekem man i harem gud. (Prov. 5:​15-18) I stret nomo we man mo woman we i mared i harem gud blong slip tugeta. Be hemia i defren olgeta long “wota we man i stilim” we i pijarem rabis fasin blong seks bitwin man mo woman we i no mared. Plante taem, ol man we oli stap mekem nogud fasin ya, oli traem blong haedem long ol narafala, sem mak olsem we wan stilman i kam stil taem i no gat man i luk hem. Maet wan man i save gat tingting ya se ‘wota we hem i stilim’ i swit from we bambae i no gat man i faenemaot nogud fasin we hem i mekem. !Be hem i stap giaman long hem wan nomo, from we Jehova i luk evri samting! Sipos yumi lusum frensip blong yumi wetem Jehova, hemia i moa nogud i bitim eni narafala samting, mo i klia se hemia i no wan samting we i “swit” o i mekem yumi glad.—1 Kor. 6:​9, 10. w23.06 22 ¶7-9

?Olsem wanem sipos yu harem se ol prea blong yu oli no moa kamaot long hat blong yu, o yu no moa glad blong prij? Yu no mas ting se tabu spirit blong Jehova i gowe long yu. Yumi ol sinman, mo ol filing blong yumi oli no stap sem mak oltaem. Sipos yu luk se yu no moa gat strong tingting olsem bifo, i gud yu tingbaot eksampol blong aposol Pol. Nating se hem i traehad blong folem eksampol blong Jisas, be samtaem tingting we i pusum hem i kam slak. Nating se i olsem, Pol i gat strong tingting blong finisim wok blong prij we hem i stap mekem. Long sem fasin, yu no mas mekem ol desisen folem filing blong yu. I gud yu gat strong tingting blong mekem samting we i stret, nomata wanem filing we yu yu gat. Sloslo, ol aksen blong yu oli save mekem ol filing blong yu oli jenis.—1 Kor. 9:16. w24.03 11-12 ¶12-13

Yumi soemaot lav long ol brata mo sista, taem yumi fren gud mo spenem taem wetem olgeta. (2 Kor. 6:​11-13) Plante long yumi oli stap go long wan kongregesen we i gat ol brata mo sista we oli gat ol defdefren bakgraon, mo oli gat ol defren tingting mo fasin. Yumi save lavem olgeta moa, sipos yumi tingbaot nomo ol gudfala fasin blong olgeta. Taem yumi lanem blong luk ol narafala olsem we Jehova i luk olgeta, yumi pruvum se yumi lavem olgeta. Lav i wan impoten fasin we bambae yumi nidim long taem blong bigfala trabol. Taem bigfala trabol i stat, ?olsem wanem Jehova bambae i protektem yumi? Tingbaot instraksen we Jehova i talem long ol man blong hem, taem ami blong Babilon i kam atakem olgeta, hem i se: “Ol man blong mi, yufala i go insaed long ol rum blong yufala we i stap insaed olgeta, mo yufala i stap insaed, yufala i satem doa. Yufala i haed smoltaem gogo kasem we kros blong God i godaon.” (Aes. 26:20) Maet i luk olsem se bambae yumi folem sem instraksen ya long taem blong bigfala trabol. w23.07 6-7 ¶14-16

Ol man oli mas luk se yumi gat fasin we i no strong tumas. I gud yu askem se: ‘?Ol man oli tingbaot mi olsem wan man we i no mekem i strong long narafala, i rere blong lego prapa tingting blong hem, mo i folem tingting blong narafala? ?O oli tingbaot mi se mi strik, mi mekem i strong tumas long narafala, mo mi stronghed? ?Mi mi lesin long narafala mo folem tingting blong olgeta sipos i stret?’ Taem yumi no mekem i strong long ol narafala, yumi stap folem fasin blong Jehova mo Jisas. No mekem i strong long narafala, i min se yumi jenisim tingting blong yumi taem situesen long laef blong yumi i jenis. Ol jenis ya oli save mekem plante problem i kamaot we maet yumi neva tingbaot. Maet yumi gat wan problem long helt, o kwiktaem nomo i gat jenis long ekonomi o gavman, we i mekem se laef blong yumi i kam had moa. (Pri. 9:11) O maet i gat wan jenis long oganaesesen we i traem yumi. Yumi save stanap strong sipos yumi mekem ol fo samting ya: (1) akseptem jenis we i hapen, (2) lukluk i go long fiuja, (3) tingbaot ol gudfala samting, mo (4) mekem samting blong halpem narafala. w23.07 21-22 ¶7-8

Profet Daniel i wan yangfala, taem ol man Babilon oli tekem hem i go kalabus longwe long ples blong hem Jerusalem. Nating se hem i yangfala, ol haeman blong Babilon oli glad long hem. Hemia from we oli “lukluk bodi nomo,” mo oli luk se i “no gat samting i rong long hem, hem i luk naes,” mo hem i kamaot long wan famle we i impoten. (1 Saml. 16:7) From samting ya, oli trenem hem blong i naf blong wok long pales blong king. (Dan. 1:​3, 4, 6) Jehova i lavem Daniel from we hem i jus blong kam wan gudfala man. Daniel i gat samwe 20 yia nomo, taem Jehova i tokbaot hem se i sem mak long Noa mo Job, tufala stret man ya we i holemstrong long Jehova blong plante yia. (Jen. 5:32; 6:​9, 10; Job 42:​16, 17; Esik. 14:14) Mo long ful laef blong Daniel, Jehova i lavem hem.—Dan. 10:​11, 19. w23.08 2 ¶1-2

Bifo we yu pem wan haos, bambae yu wantem luk evri smosmol ditel blong haos ya. Hemia sem samting we yumi save mekem taem yumi ridim mo stadi Baebol. Sipos yu rid kwik, bambae yu lanem nomo “ol stamba tijing we i stap long ol tabu tok blong God.” (Hib. 5:12) Be olsem haos ya we yu mas go “insaed” blong faenemaot evri samting long saed blong hem, yu mas stadi gud long Baebol blong kasemsave gud. Beswan rod blong stadi long Baebol, hemia blong faenemaot olsem wanem ol samting we Baebol i talem oli joen gud. Traem kasemsave long ol trutok we yu bilif long olgeta, mo faenemaot from wanem yu bilif se hemia trutok. Blong kasemsave fulwan long Baebol, i gat sam samting we yumi mas stadi dip long olgeta. Aposol Pol i talem long ol Kristin brata mo sista blong oli stadi gud long Tok blong God, blong “kasem save fulwan se trutok i bigwan olsem wanem, i longfala olsem wanem, i hae olsem wanem, mo i dip olsem wanem.” Olsem nao, bambae oli save “stanap strong” long bilif “olsem we rus blong tri i holemtaet graon, mo olsem we haos i fas strong long fandesen blong hem.” (Efes. 3:​14-19) Yumi save mekem sem mak. w23.10 18 ¶1-3

Baebol i tokbaot plante man we oli gat longfala tingting. I gud yu stadi mo mekem risej long olgeta. Traem tingbaot Deved, nating se oli makemaot hem blong i kam king taem hem i yangfala nomo, be hem i mas wet plante yia bifo we hem i kam king. Simeon mo Ana i gohed blong wosipim Jehova, taem tufala i stap wet blong luk Mesaea we God i promes blong sanem. (Luk 2:​25, 36-38) Taem yu stap stadi long ol eksampol ya, i gud yu traem faenem ansa blong ol kwestin ya: ?Wanem i givhan long man ya blong i gat longfala tingting? ?Hem i kasem wanem blesing? ?Olsem wanem mi save folem fasin blong hem? Yu save lanem samting tu long eksampol blong olgeta we oli no gat longfala tingting. (1 Saml. 13:​8-14) Maet yu save askem se: ‘?Wanem i mekem se oli no gat longfala tingting? ?Wanem nogud samting i kamaot from?’ w23.08 25 ¶15

Aposol Pita i stap tru long Jisas mo i no letem wan samting i blokem hem blong folem Jisas. Wan taem, Jisas i talem sam tok we ol disaepol oli no kasemsave long hem, be Pita i stap tru long Jisas. (Jon 6:68) Ol narafala oli no wet blong faenemaot mining blong tok blong Jisas, be oli lego hem wantaem. Pita i no mekem olsem. Hem i luksave se Jisas nomo i gat “ol tok blong laef ya we i no save finis.” Jisas i save se Pita mo ol narafala aposol bambae oli lego hem. Be Jisas i sua se Pita bambae i kambak long hem mo i stanap strong. (Luk 22:​31, 32) Jisas i kasemsave se, ‘spirit i wantem tumas, be bodi i slak.’ (Mak 14:38) Taswe nating we Pita i talem se hem i no save Jisas, be Jisas i no lego hem. Afta we Jisas i laef bakegen, hem i kamtru long Pita taem i stap hem wan. (Mak 16:7; Luk 24:34; 1 Kor. 15:5) !Tingbaot olsem wanem samting ya i mas leftemap tingting blong Pita, we i harem nogud from mastik we hem i bin mekem! w23.09 22 ¶9-10

God i fogivim o i kavremap sin blong ol man we oli bilif long hem. Hem i fogivim olgeta fulwan mo i no moa tingbaot ol sin blong olgeta. (Sam 32:​1, 2) Hem i luk olgeta olsem ol man we oli no gat fol, mo oli stret man from bilif blong olgeta. Nating we Jehova i talemaot se Ebraham, Deved, mo ol narafala we oli wosipim hem oli stret man, be oli sinman yet. Be from bilif blong olgeta, God i luk olgeta se oli no gat fol, speseli taem hem i skelem olgeta wetem ol man we oli no bilif long hem. (Efes. 2:12) Aposol Pol i talemaot klia long leta blong hem se yumi mas gat bilif blong yumi save kam fren blong God. Hemia nao samting we Ebraham mo Deved i mekem, mo yumi tu yumi mas mekem sem mak. w23.12 3 ¶6-7

Tede, olgeta Kristin oli gat privilej ya blong givim ol sakrefaes i go long Jehova taem oli yusum paoa mo taem blong olgeta, mo ol samting we oli gat blong sapotem Kingdom blong God. Yumi soem se yumi glad long privilej ya we yumi gat blong wosipim Jehova, taem yumi mekem bes blong yumi long wok blong hem. Aposol Pol i tokbaot sam samting we yumi mas mekem oltaem, taem yumi wosipim Jehova. (Hib. 10:​22-25) Yumi mas gohed blong prea long Jehova, tokbaot hop we yumi gat long ol narafala, joen tugeta long ol miting blong kongregesen, mo lefleftemap tingting blong yumi. Mo yumi “mas mekem samting ya moa, taem [yumi] luk we dei ya [blong Jehova] i stap kam klosap.” Klosap long en blong buk blong Revelesen, enjel blong Jehova i talem se: “!Yu mas wosipim God nomo!” (Rev. 19:10; 22:9) Hem i talem toktok ya tu taem, blong soemaot se samting ya i impoten tumas. Yumi neva mas fogetem olgeta samting we yumi bin lanem long bigfala tempol blong Jehova long saed blong spirit, mo yumi mas tinghae long nambawan privilej we yumi gat blong wosipim God ya blong yumi we i hae olgeta. w23.10 29 ¶17-18

Yumi evriwan i wantem “gohed blong lavlavem yumi.” Be i impoten we yumi tingbaot woning blong Jisas we i se: “Lav blong plante moa man bambae i kam kolkol.” (Mat. 24:12) Jisas i no stap talem se plante long ol disaepol blong hem bambae oli stop blong soemaot lav long olgeta. Be yumi mas lukaot gud se yumi no letem fasin blong ol man blong wol ya we oli no lavlavem olgeta, i gat paoa long yumi. Taswe, naoia i gud yumi tokbaot impoten kwestin ya: ?I gat rod blong faenemaot sipos lav we yumi gat long ol brata mo sista i strong yet? Wan rod blong save sipos lav we yumi gat i strong o nogat, hemia blong skelem fasin we yumi gat taem yumi fesem ol defren situesen long laef. (2 Kor. 8:8) Aposol Pita i tokbaot wan long ol situesen ya, i se: “Antap long ol samting ya, yufala i mas lavlavem yufala mo lav ya i mas strong gud, from we lav i kavremap plante plante sin.” (1 Pita 4:8) Taswe, fasin we yumi mekem taem narafala i talem o i mekem wan samting we i spolem yumi, i save halpem yumi blong luk sipos lav we yumi gat long olgeta i strong o nogat. w23.11 10-11 ¶12-13

Sipos yumi soemaot lav long samfala nomo long kongregesen, yumi no stap obei long komanmen blong Jisas long saed blong lav. I tru, olsem Jisas, maet yumi harem se yumi klosap moa long samfala i bitim ol narafala. (Jon 13:23; 20:2) Be aposol Pita i mekem yumi tingbaot se yumi mas traehad blong “laekem tumas ol brata” mo sista, from oli olsem famle blong yumi. (1 Pita 2:17) Pita i talem se: “Yufala i mas strong blong lavlavem yufala long fulhat blong yufala.” (1 Pita 1:22) Lav ya i “mas strong” from we samtaem i had blong lavem narafala. Traem tingbaot sipos wan brata i mekem yu yu harem nogud. Maet yu harem se yu wantem givimbak long hem mo yu kros, i bitim we yu soemaot lav long hem. Be Jisas i tijim Pita se God i no glad taem yumi givimbak. (Jon 18:​10, 11) Pita i raetem se: “Taem man i mekem i nogud long yufala, yufala i no mas mekem i nogud long hem bakegen. Taem man i tok nogud long yufala, yufala i no mas tok nogud long hem bakegen. Be yufala i mas toktok kaen long hem.” (1 Pita 3:9) Taem yumi strong blong lavem narafala, yumi kaen mo yumi tingbaot hem. w23.09 28-29 ¶9-11

Yumi sapraes blong luk we wan pikinini i gru kwiktaem mo i kam bigman. Mo i luk olsem se oli no nid blong mekem plante samting blong oli gru kwik olsem. Be blong kam bigman long spirit, yumi mas traehad blong mekem sam samting. (1 Kor. 13:11; Hib. 6:1) Blong kasem mak ya, yumi mas frengud wetem Jehova. Mo tu, yumi nidim tabu spirit blong yumi wokem ol gudfala fasin we God i glad long hem, lanem ol samting we i save halpem yumi evri dei, mo rerem yumi from fiuja blong yumi. (Prov. 1:5) Jehova i wokem yumi we sam oli man mo sam oli woman. (Jen. 1:27) I isi blong luk se man i defren long woman, be i gat sam narafala samting tu we i mekem se tufala i defren. Taem Jehova i wokem man mo woman, hem i mekem se tufala i gat defdefren wok. Taswe, tufala i nidim ol fasin mo tufala i mas lanem blong gat gudhan long ol samting we bambae i halpem tufala blong mekem ol wok ya.—Jen. 2:18. w23.12 18 ¶1-2

?Olsem wanem? ?Jisas i wantem se ol man oli yusum prapa nem blong Papa blong hem? Yes. Sam lida blong skul long taem ya, maet oli talem se nem blong God i tabu tumas, man i no mas yusum. Be Jisas i neva letem ol tingting ya we i no kamaot long Baebol, i blokem hem blong no ona long nem blong Papa blong hem. Tingbaot taem ya we Jisas i ronemaot dimon long wan man we i stap long rijen blong ol man Gerasa. Ol man oli fraet mo oli askem strong long Jisas blong i aot long rijen ya. (Mak 5:​16,17) Be Jisas i wantem se ol man oli save nem blong Jehova. Taswe, hem i talem long man ya blong i go talemaot long ol man, samting we Jehova i bin mekem, be i no samting we hem i mekem. (Mak 5:19) Hemia nao samting we Jisas i wantem se yumi mekem tede, hemia blong mekem ol man long olgeta ples long wol oli save nem blong Papa blong hem. (Mat. 24:14; 28:20) Taem yumi mekem olsem, yumi mekem King blong yumi Jisas i glad tumas. w24.02 10 ¶10

Yumi glad tumas blong stap insaed long oganaesesen blong Jehova, long ol las dei ya we laef i had tumas. Naoia we wol i stap kam mowas, Jehova i givim ol gudfala brata mo sista blong oli halpem yumi. (Sam 133:1) Hem i givhan long yumi tu blong yumi gat wan hapi famle. (Efes. 5:33–6:1) Mo hem i givim waes blong yumi save dil wetem ol wari blong yumi mo stap glad. Be yumi mas traehad blong gohed blong wosipim Jehova. ?From wanem? From we maet samtaem, slak fasin blong narafala i save mekem yumi harem nogud. Mo tu, maet yumi harem nogud from ol sin we yumi mekem, speseli sipos yumi mekem sem sin ya bakegen mo bakegen. Yumi mas gohed blong wosipim Jehova, nating se (1) wan brata o sista i mekem yumi harem nogud, (2) hasban o waef blong yumi i mekem yumi harem nogud, mo (3) yumi harem nogud from wan sin we yumi mekem. w24.03 14 ¶1-2

Samtaem yu save harem ekspiriens blong ol brata mo sista we oli traehad blong mekem moa long wok blong Jehova. Maet oli go long Skul Blong Kingdom Ivanjelis, o oli muv i go long ples we i gat moa nid. Sipos yu yu naf blong kasem wan mak olsem, i gud yu mekem. Ol man blong Jehova oli wantem tumas blong mekem moa long wok blong hem. (Wok 16:9) ?Be olsem wanem sipos yu no save mekem moa naoia? Yu no mas ting se olgeta we oli save mekem moa, oli gud moa long yu. Long resis blong ol Kristin, samting we i moa impoten hemia se yu stanap strong. (Mat. 10:22) Yu no mas fogetem se Jehova i glad taem yu mekem samting we yu yu naf blong mekem. Hemia nao impoten samting we yu save mekem blong folem Jisas oltaem, afta we yu baptaes.—Sam 26:1. w24.03 10 ¶11

Papa blong yumi long heven i promes blong fogivim yumi sipos yumi tanem tingting blong yumi. (Sam 86:5) Taswe, sipos yumi rili sore from ol sin we yumi bin mekem, yumi save trastem tok blong Jehova we i se hem i fogivim yumi. Tingbaot se Jehova i no save mekem i strong tumas long yumi. Bambae hem i neva askem long yumi blong mekem samting we yumi no naf blong mekem. Sipos hem i luk se yumi mekem bes blong yumi long wok blong hem, hem i glad. Mo tu, i gud blong tingbaot sam man long Baebol we oli mekem wok blong Jehova long fulhat blong olgeta. Wan eksampol, hemia aposol Pol. Hem i wok had blong plante yia, hem i wokbaot plante taosen kilometa, mo i stanemap plante kongregesen. Be taem ol samting long laef blong hem i jenis, nao hem i no moa save prij plante, ?Jehova i no moa glad long hem? Si, Jehova i glad yet. Pol i gohed blong mekem samting we hem i naf blong mekem, mo Jehova i blesem hem. (Wok 28:​30, 31) Long sem fasin, samting we yumi naf blong givim long Jehova, maet i save jenis. Be samting we i moa impoten long hem, hemia tingting we i pusum yumi blong mekem. w24.03 27 ¶7, 9

Ol prea we Jisas i mekem i go long Jehova, oli wan nambawan eksampol blong ol disaepol oli folem. Taem Jisas i stap long wol ya, oltaem hem i prea. Jisas i makemaot taem blong hem i save prea, from we plante taem hem i bisi mo plante man oli stap biaenem hem. (Mak 6:​31, 45, 46) Hem i girap long eli moning blong hem i save stap hem wan blong prea. Wan taem, hem i prea fulnaet bifo we hem i mekem wan impoten desisen. (Luk 6:​12,13) Mo long naet bifo we Jisas i ded, hem i gohed nomo blong prea blong hem i save finisim fulwan impoten wok ya we hem i kam long wol blong mekem. (Mat. 26:​39, 42, 44) Eksampol blong Jisas i tijim yumi se nomata we yumi bisi olsem wanem, be yumi mas makemaot taem blong prea. Olsem Jisas, yumi save makemaot taem blong prea long eli moning o let long naet. Taem yumi mekem olsem, yumi stap soem long Jehova se yumi tinghae long nambawan presen ya. w23.05 3 ¶4-5

Makem gud tok ya “soemaot” we i stap long vas blong tede. Wan buk i tokbaot vas ya se “hem i soemaot lav olsem we i kafsaedem wan smol reva i kam long yumi.” !Hemia wan naesfala pijatok blong soemaot se Jehova i lavem tumas ol tabu Kristin! Ol tabu Kristin oli savegud se ‘God i lavem’ olgeta. (Jud 1) Aposol Jon i tokbaot filing blong olgeta taem hem i raetem se: “!Yufala i luk, Papa i lavem yumi tumas nao i singaot yumi se yumi pikinini blong God!” (1 Jon 3:1) ?Olsem wanem? ?Jehova i lavem nomo ol tabu Kristin? Nogat. Jehova i pruvum se hem i lavem yumi evriwan. ?Wanem bigfala samting we Jehova i mekem blong soemaot se hem i gat lav? Hemia ransom. !Ransom i olsem wan pruf se Jehova i lavem ol man moa i bitim eni narafala man!—Jon 3:16; Rom 5:8. w24.01 28 ¶9-10

Vas ya antap i soemaot wan samting we i halpem Deved blong winim fraet we hem i gat. Nating se laef blong hem i stap long denja, be hem i tingting dip long samting we Jehova bambae i mekem yet long hem long fiuja. Deved i save se Jehova bambae i sevem hem long stret taem. Antap long hemia, Jehova i bin talemaot se Deved bambae i kam nekiswan king blong Isrel. (1 Saml. 16:​1, 13) Deved i sua fulwan se wanem samting we Jehova i promes blong mekem, bambae i mas kamtru. ?Jehova i promes blong mekem wanem long yu? Yumi save se Jehova bambae i no blokem evri trabol we bambae oli kasem yumi. Be tingbaot se nomata wanem trabol yu fesem naoia, Jehova bambae i finisim fulwan long niufala wol we i stap kam. (Aes. 25:​7-9) Krieta blong yumi i gat paoa blong mekem ol dedman oli laef bakegen, hilim ol sik, mo tekemaot ol man blong agens.—1 Jon 4:4. w24.01 6 ¶12-13

Tingbaot from wanem yu givim laef blong yu long Jehova mo tekem baptaes. Yu mekem ol samting ya from yu wantem stap long saed blong Jehova. Traem tingbaot bakegen samting we i bin halpem yu blong trastem se yu faenem trutok. Yu stat blong save moa Jehova, yu respektem, mo yu lavem hem olsem Papa blong yu long heven. Bilif blong yu i kam strong moa, mo hemia i pulum yu blong tanem tingting blong yu. Yu lego ol nogud fasin we yu stap mekem mo yu mekem laef blong yu i laenap wetem tingting blong hem. Yu harem gud moa from yu haremsave se God i fogivim yu. (Sam 32:2) Yu joen long ol Kristin miting, mo yu stat tokbaot long ol narafala ol nambawan samting we yu bin lanem. From we yu givim laef blong yu mo yu baptaes, naoia yu stap wokbaot long rod blong laef, mo yu gat strong tingting blong gohed blong wokbaot long rod ya. (Mat. 7:​13, 14) Yu mas gohed blong stanap strong, lavem Jehova oltaem, mo obei long ol komanmen blong hem. w23.07 17 ¶14; 19 ¶19

Taem yu tingbaot prea we yu mekem blong givim laef blong yu long Jehova, hemia i save halpem yu blong stanap strong agensem eni traem. Eksampol, ?bambae yu pleplei wetem filing blong hasban o waef blong narafala? !I sua se nogat! Yu promes finis long Jehova se bambae yu no mekem wan samting olsem. Sipos yu no letem ol nogud filing olsem oli gru long hat blong yu, bambae yu no nid blong faet agensem olgeta. Bambae yu “tanem baksaed” long “rod blong ol man nogud.” (Prov. 4:​14, 15) Taem yu tingbaot strong tingting we Jisas i gat blong mekem Papa blong hem i glad, bambae yu tu yu gat strong tingting mo yu kwik blong blokem eni samting we i save mekem God i harem nogud. (Mat. 4:10; Jon 8:29) Taem yu fesem ol trabol mo traem, hemia wan janis blong soemaot se yu gat strong tingting blong folem Jisas oltaem. Taem yu mekem olsem, yu save sua se Jehova bambae i halpem yu. w24.03 9-10 ¶8-10