Disemba

?Jehova i gat paoa blong mekem ol dedman oli laef bakegen? !Yes! Hem i “God Ya We i Gat Olgeta Paoa.” (Rev. 1:8) Taswe hem i gat paoa blong winim eni enemi, wetem ded tu. (1 Kor. 15:26) Wan narafala risen we i mekem yumi save se God i naf blong mekem ol dedman oli laef bakegen, hemia se memori blong hem i bigwan we i bigwan. Hem i singaotem wanwan sta long nem blong olgeta. (Aes. 40:26) Mo tu, hem i tingbaot ol man we oli ded finis. (Job 14:13; Luk 20:38) I isi nomo blong hem i tingbaot evri smosmol samting long saed blong ol man we bambae hem i mekem oli laef bakegen, inkludum ol fasin we oli bon wetem we i mekem se oli defren long ol narafala man, wetem ol ekspiriens blong olgeta long laef, mo ol memori blong olgeta. I klia se yumi save bilivim promes blong Jehova long saed blong laef bakegen, from yumi save se hem i wantem tumas mo i gat paoa blong mekem promes ya i kamtru. Traem tingbaot wan narafala risen from wanem yumi bilif long promes ya blong God: Jehova i bin mekem sam man we oli ded oli laef bakegen finis. Long taem bifo, hem i givim paoa long sam gudfala man blong hem inkludum Jisas, blong mekem dedman i laef bakegen. w23.04 9-10 ¶7-9

Sipos yumi toktok kaen mo long kwaet fasin, bambae ol man oli glad moa blong lesin mo gohed blong storian. Be sipos man i wantem rao o jikim bilif blong yumi nomo, i no nid blong yumi gohed long storian. (Prov. 26:4) Bighaf blong ol man oli no olsem, plante oli glad blong storian. I klia se taem yumi lanem blong gat kwaet fasin, hemia i givhan long yumi bigwan. Taswe i gud yu prea long Jehova blong i mekem se yu naf blong ansa long kwaet fasin, taem narafala i askem kwestin o i agensem yu. Yu mas tingbaot se kwaet fasin i save blokem rao, taem yu stap storian wetem man we i gat defren tingting long yu. Mo ansa we yu givim long kwaet fasin mo wetem respek, i save pulum man blong jenisim tingting blong hem long saed blong yumi mo ol trutok blong Baebol. Yu mas “rere oltaem blong ansa long eni man we i askem kwestin” long saed blong bilif blong yu, be yu mas “mekem long kwaet fasin mo bigfala respek.” (1 Pita 3:15) !Yes, taem yu gat kwaet fasin, yu soemaot se yu strong! w23.09 19 ¶18-19

Hemia fo rod blong soemaot longfala tingting. Faswan, man we i gat longfala tingting i no kros kwik. Taem narafala i mekem hem i harem nogud o i stres, hem i stap kwaet mo i no givimbak nogud fasin long narafala. (Eks. 34:6) Seken rod, man we i gat longfala tingting i stap kwaet mo i wet. Hem i no save kam kros, taem hem i mas wet longtaem moa i bitim wanem we hem i ekspektem. (Mat. 18:​26, 27) Namba tri rod, man we i gat longfala tingting i no hariap tumas. Taem hem i gat wan impoten wok blong mekem, hem i tingting gud fastaem. Hem i meksua se hem i gat wan plan blong folem, mo i gat inaf taem blong finisim wok ya. Namba fo rod, man we i gat longfala tingting i no komplen taem hem i kasem trabol. Be hem i traehad blong mekem wok blong Jehova wetem glad. (Kol. 1:11) Ol man blong Jehova oli mas soemaot longfala tingting long ol fofala rod ya. w23.08 20-21 ¶3-6

Wan impoten risen from wanem yumi mas protektem hat blong yumi long saed blong spirit, hemia from we Jehova i stap skelem hat blong yumi. Hemia i min se Jehova i stap luk ol samting we ol narafala man oli no save luk long yumi, mo hem i save gud se yumi wanem kaen man. Jehova bambae i lavem yumi sipos yumi fulumap tingting blong yumi wetem ol waes advaes blong hem we oli save halpem yumi blong laef olwe. (Jon 4:14) Bambae yumi no letem nating ol nogud fasin, mo ol giaman tok blong Setan mo wol blong hem oli kam insaed long tingting blong yumi. (1 Jon 5:​18, 19) Taem yumi kam klosap moa long Jehova, bambae yumi lavem hem mo respektem hem moa. From we yumi no wantem mekem Papa blong yumi i harem nogud, bambae yumi no wantem nating blong mekem sin. Marta, wan sista long Kroesia we i fesem traem ya blong wantem mekem rabis fasin, i talem se: “I had blong mi gat klia tingting mo faet agensem filing ya blong wantem mekem samting we i no stret. Be fasin ya blong fraet long Jehova i protektem mi.” ?Olsem wanem fasin ya i givhan? Marta i talem se hem i tingting dip long nogud frut we i save kamaot sipos hem i mekem rabis fasin ya. Yumi tu yumi save mekem sem mak. w23.06 20-21 ¶3-4

Jisas i save se stamba tingting blong Jehova, hemia blong mekem nem blong Hem i kam tabu mo tekemaot olgeta giaman tok we Setan i bin talem agensem Hem. Taswe hem i tijim ol man blong hem blong prea se: “Papa blong mifala long heven, plis yu mekem we nem blong yu i tabu.” (Mat. 6:9) Jisas i kasemsave se olgeta kriesen oli joen insaed long impoten bisnes ya. Be Jisas nao i leftemap moa tabu nem blong Jehova i bitim eni narafala man. Nating se i olsem, taem ol enemi oli arestem Jisas, oli talem se hem i stap tok nogud long nem blong Papa blong hem. Jisas i save se i wan bigfala sin taem man i tok nogud long tabu nem blong Jehova. Mo hem i harem nogud from hem i save se bambae oli jajem hem from giaman tok ya mo talem se hem i gilti. Maet hemia nao from wanem hem “i harem nogud tumas” long ol laswan aoa ya bifo we oli arestem hem.—Luk 22:​41-44. w24.02 11 ¶11

Long resis blong laef, yumi mas lavem Jehova mo Jisas moa i bitim we yumi lavem ol famle. (Mat. 10:37) Hemia i no min se yumi no moa mekem ol wok insaed long famle, from yumi stap mekem wok blong Jehova. Sipos yumi wantem se Jehova mo Jisas i glad long yumi, yumi mas mekem ol wok insaed long famle. (1 Tim. 5:​4, 8) Taem yumi mekem olsem, yumi glad moa. Jehova i save se famle bambae i glad, sipos hasban mo waef i soemaot lav mo respek long tufala, tufala i lavem mo trenem ol pikinini, mo ol pikinini oli obei long tufala. (Efes. 5:33; 6:​1, 4) Nomata wanem wok we yumi gat long famle, i gud yumi trastem ol waes advaes blong Baebol. Yumi no sud folem prapa tingting blong yumi, kalja blong yumi, o samting we ol man blong stadi oli talem. Yusumgud ol buk blong yumi we oli eksplenem olsem wanem yumi save folem ol advaes blong Baebol. w23.08 28 ¶6-7

Kristin woman i mas traehad blong lanem ol samting we i save halpem hem evri dei. Ol samting we wan gel i lanem taem hem i pikinini, bambae oli givhan long hem long ful laef blong hem. I gud yu lanem blong rid mo raet gud. Long sam kalja, ol man oli ting se i no impoten we ol woman oli lanem blong rid mo raet. Be hemia i impoten long evri Kristin. (1 Tim. 4:13) Taswe, yu no mas letem eni samting i stopem yu blong lanem blong rid mo raet gud. ?From wanem? From hemia i save halpem yu blong faenem wan wok mo holemtaet. Mo tu, bambae i mekem se yu kam wan gudfala studen mo wan gudfala man blong tijim Tok blong God. Antap long hemia, bambae yu kam klosap moa long Jehova taem yu ridim mo tingting dip long Tok blong hem.—1 Tim. 4:15. w23.12 20 ¶10-11

Askem Jehova blong i halpem yu blong stanap strong taem wan samting i traem yu. From we yumi sinman, oltaem yumi mas faet agensem ol samting we oli traem pulum yumi blong mekem samting we i no stret. Setan tu i traem bes blong hem blong mekem i had long yumi blong stanap strong. Wan rod we hem i traem blong spolem tingting blong yumi, hemia tru long ol samting blong spel mo pleplei we oli no klin. Ol samting ya oli save mekem tingting blong yumi i kam doti, nao yumi no moa stap klin long fored blong Jehova. Mo oli save pulum yumi blong mekem wan bigfala sin. (Mak 7:​21-23; Jem. 1:​14, 15) Yumi nidim help blong Jehova sipos yumi wantem winim wan samting we i traem pulum yumi blong mekem i no stret. Long prea we Jisas i tijim long ol disaepol blong hem, hem i soemaot olsem wanem yumi save askem samting ya, taem i se: “Yu no letem ol samting oli kam traem mifala, be yu tekemaot mifala long man ya we i rabis.” (Mat. 6:13) Jehova i wantem halpem yumi, be yumi mas askem hem blong i halpem yumi. Be tu, yumi mas wok folem samting we yumi prea from. w23.05 6-7 ¶15-17

Taem wan kapol i tinghae long frensip blong tufala wetem Jehova, bambae tufala i folem ol advaes blong hem, mo hemia i save halpem tufala blong blokem o winim ol problem we i save mekem lav blong tufala i kam kolkol. Olgeta tu we oli bigman long spirit oli mas mekem bes blong olgeta blong folem ol fasin blong Jehova olsem blong kaen, gat longfala tingting mo fogif. (Efes. 4:32–5:1) Wan kapol we i soemaot ol fasin ya, bambae i isi blong tufala i mekem lav blong tufala i kam strong. Wan sista we nem blong hem Lena, mo we i mared blong bitim 25 yia, i talem se: “I isi blong lavem mo respektem wan man we i bigman long spirit.” Traem tingbaot wan eksampol long Baebol. Taem Jehova i mas jusum wan kapol long laen blong Deved blong i kam perens blong fiuja Mesaea, hem i jusum Josef mo Meri. ?From wanem? From we tufala wanwan i fren gud wetem Jehova, mo Jehova i save se bambae tufala i putum hem fas ples long mared blong tufala. w23.05 21 ¶3-4

Nating se Jisas, we i Lida blong yumi, i stret gud olgeta, be hem i yusum sam sinman blong lidim yumi long wol ya. Maet i had blong yumi obei long olgeta, speseli sipos oli askem yumi blong mekem wan samting we yumi no wantem mekem. I gat wan taem we i had tu long Aposol Pita blong i obei. Taem wan enjel i talem long hem blong kakae ol animol we oli no klin folem loa blong Moses, !Pita i no wantem obei, i no wan taem nomo, be tri taem! (Wok 10:​9-16) ?From wanem? From we Pita i harem se daereksen ya i narakaen. Be aposol Pol i “rere blong obei” taem ol elda long Jerusalem oli talem long hem blong i tekem fo man i go long tempol mo mekem olgeta i kam klin blong soemaot se oli stap obei long Loa. Pol i save se ol Kristin oli no moa stap aninit long Loa. Mo hem i save tu se hem i no mekem wan samting we i rong. Be “long nekis dei, Pol i tekem ol man ya nao olgeta evriwan oli mekem ol samting blong oli klin folem Loa.” (Wok 21:​23, 24, 26) From we Pol i obei long daereksen we hem i kasem, hemia i givhan blong mekem se ol brata oli joengud.—Rom 14:​19, 21. w23.10 10 ¶15-16

Maet yu neva tingbaot se fraet i wan impoten fasin we yu mas gat blong fren gud wetem narafala. Be olgeta we oli wantem fren gud wetem Jehova oli mas “fraet long hem.” Nomata se yumi mekem wok blong Jehova longtaem olsem wanem, be yumi evriwan i mas gohed blong fraet long Jehova. ?I minim wanem blong fraet long God? Wan man we i fraet long God, hem i lavem God mo i no wantem mekem eni samting we i save spolem frensip blong hem wetem God. Jisas tu i “fraet long God.” (Hib. 5:7) Be hem i no fraet se Jehova bambae i panisim hem. (Aes. 11:​2, 3) Hem i lavem Jehova tumas mo i wantem obei long hem. (Jon 14:​21, 31) Olsem Jisas, yumi fraet long Jehova mo yumi gat bigfala respek long hem from hem i gat lav, i waes, i mekem i stret, mo i gat bigfala paoa. Mo tu, yumi save se Jehova i lavem yumi mo i intres blong save se bambae yumi mekem wanem taem yumi kasem ol tijing blong hem. Sipos yumi no obei long Jehova bambae hem i harem nogud, be sipos yumi obei bambae yumi mekem hem i glad.—Sam 78:41; Prov. 27:11. w23.06 14 ¶1-2; 15 ¶5

Taem King Usia i kasem moa paoa, hem i fogetem se Jehova nao i Stamba blong paoa blong hem mo ol gudfala samting we hem i kasem. ?Yumi lanem wanem? I gud yumi tingbaot oltaem se Jehova nao i givim ol blesing we yumi kasem long laef mo long wok blong hem. I nogud yumi tok flas from ol samting we yumi mekem, be yumi mas talem tangkiu long Jehova from. (1 Kor. 4:7) Yumi mas gat tingting daon mo luksave se yumi sinman, mo samtaem narafala i mas stretem yumi. Wan brata we i gat samwe 60 yia i talem se: “Mi mi lanem blong no kam kros mo no harem nogud tumas taem ol narafala oli stretem mi from sam krangke mastik we mi mekem, be mi traem blong kam gud moa mo mekem bes blong mi blong gohed.” Taem yumi obei long Jehova mo gat tingting daon oltaem, yumi save gat wan gudfala laef.—Prov. 22:4. w23.09 10 ¶10-11

Ol Kristin bifo oli nidim blong stanap strong. Oli fesem plante problem olsem ol narafala man long taem ya, be tu oli fesem problem from oli ol Kristin. Plante long olgeta, ol lida blong ol man Jiu mo ol haeman blong Rom oli mekem i nogud long olgeta, be antap moa ol famle blong olgeta tu i agensem olgeta. (Mat. 10:21) Mo tu, insaed long kongregesen oli mas meksua se ol giaman tijing blong ol apostasi we oli stap traem blong seraotem kongregesen, i no gat paoa long olgeta. (Wok 20:​29, 30) Be oli gohed blong stanap strong. (Rev. 2:3) ?Wanem i givhan long olgeta? Oli tingbaot eksampol blong ol man long Baebol we oli stanap strong olsem Job. (Jem. 5:​10, 11) Mo tu, oli prea blong kasem paoa. (Wok 4:​29-31) Mo oli gohed blong tingbaot se Jehova bambae i blesem olgeta sipos oli stanap strong. (Wok 5:41) Yumi tu yumi save stanap strong, sipos yumi stadi mo tingting dip oltaem long ol stori long Baebol mo long ol buk blong yumi, we oli tokbaot ol man we stanap strong. w23.07 3 ¶5-6

Bambae Jehova mo Jisas i neva lego yumi. Afta we aposol Pita i talem se hem i no save Jisas, hem i gat wan impoten desisen blong mekem. ?Bambae hem i givap? ?O bambae hem i gohed blong traehad blong stap olsem wan disaepol blong Kraes? Jisas i askem strong long Jehova, blong i givhan long Pita blong i no lego bilif blong hem. Jisas i tokbaot prea ya long Pita, mo i talem se bambae Pita i naf blong mekem ol brata blong hem oli strong. (Luk 22:​31, 32) !I sua se taem Pita i tingting bak long ol tok ya blong Jisas, tingting blong hem i kam strong! Taem yumi mas mekem wan impoten desisen long laef blong yumi, Jehova i save yusum ol gudfala man blong lukaot long sipsip, blong givim paoa we yumi nidim blong stanap strong. (Efes. 4:​8, 11) Jehova i givim ol samting we Pita mo ol narafala aposol oli nidim blong laef, long sem fasin, bambae hem i givim ol samting we yumi nidim sipos yumi putum wok blong hem long fasples long laef blong yumi. w23.09 24-25 ¶14-15

Jehova i makem evri smosmol samting we yumi mekem blong kaen long ol narafala. Hem i luk samting we yumi mekem olsem wan sakrefaes o wan kaon we bambae hem i pembak yumi from.Sipos yu no moa mekem wok blong man blong givhan o wan elda, tingbaot se Jehova i no fogetem ol wok we yu bin mekem, mo lav we i pusum yu blong mekem wok blong hem. (1 Kor. 15:58) Mo hem i luk tu lav we yu gohed blong soemaot. Jehova i wantem se yumi evriwan i lavem hem mo ol narafala moa. Yumi save lavem Jehova moa, taem yumi ridim mo tingting dip long Tok blong hem, mo prea oltaem. Yumi save lavem moa ol brata mo sista, taem yumi mekem samting blong givhan long olgeta. Taem lav blong yumi i kam bigwan moa, bambae yumi kam klosap moa long Jehova, mo long ol Kristin brata mo sista. !Mo tu, bambae yumi fren gud wetem olgeta blong olwe! w23.07 10 ¶11; 11 ¶13; 13 ¶18

Wanwan Kristin i mas mekem desisen olsem wanem blong lukaot gud long prapa helt blong hem. Taem ol Kristin oli mekem desisen long saed blong ol tritmen, oli mas obei long ol loa blong Baebol we i talem se yumi no mas tekem blad, mo stap longwe long wok blong rabis spirit. (Wok 15:20; Gal. 5:​19, 20) Be olgeta wanwan oli mas mekem desisen long saed blong ol narafala tritmen. Nomata wanem tingting yumi gat long wan tritmen, be yumi mas respektem desisen blong ol brata mo sista long saed blong ol tritmen we oli mekem. Blong givhan long yumi, yumi mas tingbaot fo poen ya: (1) Kingdom blong God nomo bambae i finisim mo hilim ol sik blong olwe. (Aes. 33:24) (2) Taem wan Kristin i mekem desisen long saed blong helt, hem i mas “savegud” samting we i beswan long hem. (Rom 14:5) (3) Yumi no mas jajem narafala mo mekem samting we oli save stambol from. (Rom 14:13) (4) Ol Kristin oli mas soem lav mo kasemsave se i impoten blong mekem kongregesen i joen gud, i bitim we oli wantem folem prapa tingting blong olgeta.—Rom 14:​15, 19, 20. w23.07 24 ¶15

?Yu yu tinghae long fasin fren blong yu wetem Jehova? !I sua se yes! Long taem bifo, plante man oli gat sem tingting olsem yu. (Sam 104:​33, 34) Plante oli lego sam samting blong oli save wosipim Jehova. Hemia nao samting we wan Nasiraet o man we i dediketem laef blong hem, i mekem long taem blong ol man Isrel bifo. Oli yusum tok ya Nasiraet blong tokbaot ol man Isrel we oli gat strong tingting blong lego sam samting blong mekem wok blong Jehova long wan spesel fasin. Loa Blong Moses i letem wan man o woman blong i mekem wan spesel promes long Jehova, taem i jusum blong stap olsem wan Nasiraet blong sam taem. (Nam. 6:​1, 2) Taem wan man Isrel i mekem promes blong kam wan Nasiraet, hem i mas folem sam rul we ol narafala man Isrel oli no nid blong folem. Be, ?wanem i pusum wan man Isrel blong mekem promes blong kam wan Nasiraet? Maet hemia from we hem i lavem Jehova tumas mo i tinghae long ol blesing we Jehova i givim.—Dut. 6:5; 16:17. w24.02 14 ¶1-2

Plante taem Baebol i tokbaot “fasin ya blong stap tru” o “fasin ya blong lavem man oltaem,” blong tokbaot lav we God i gat long ol man blong hem. Baebol i yusum sem tok ya blong tokbaot olsem wanem ol man blong God oli lavlavem olgeta. (2 Saml. 9:​6, 7) Taem ol yia oli pas, yumi stap kamgud moa long fasin ya blong stap tru. Tingbaot olsem wanem samting ya i hapen long Daniel. I gat plante samting long laef blong Daniel we i traem fasin blong hem blong stap tru long Jehova. Be wan samting we i traem hem moa, i hapen taem hem i gat bitim 90 yia. Ol haeman blong King Darias oli no laekem Daniel mo oli no respektem God blong hem. Ale oli mekem wan plan blong kilim Daniel i ded. Oli pulum king blong saenem wan loa we i traem Daniel, se bambae hem i stap tru long God o long king. Sipos hem i no wantem kasem panis, hem i mas stap tru long king mo i no mas prea long Jehova blong 30 dei. Be Daniel i jusum blong stap tru long Jehova.—Dan. 6:​12-15, 20-22. w23.08 5 ¶10-12

Jehova i wantem se yumi gohed blong soemaot lav long ol Kristin brata mo sista. Sipos wan long olgeta i mekem yumi harem nogud, yumi save sua se hem i no minim blong mekem olsem, mo se hem i stap traehad blong mekem samting we i stret. (Prov. 12:18) Jehova i lavem ol man blong hem, nating se oli gat ol slak fasin. Taem yumi mekem wan sin, Jehova i no lego yumi, mo i no stap kros olwe long yumi. (Sam 103:9) !Hemia wan gudfala eksampol we yumi save folem! (Efes. 4:32–5:1) Yumi mas tingbaot tu se naoia we en i kam klosap tumas, yumi nidim blong stap klosap long ol brata mo sista. Yumi save se ol man bambae oli agensem yumi moa, mo maet oli putum yumi long kalabus from bilif blong yumi. Sipos i hapen olsem, bambae yumi nidim moa ol brata mo sista i bitim bifo.—Prov. 17:17. w24.03 15-16 ¶6-7

I gat plante stori long Baebol blong ol yangfala we oli kam klosap long Jehova, nao hem i glad long olgeta mo oli gat wan gudfala laef. Deved i wan long olgeta. Taem hem i yangfala, hem i jusum blong wosipim God mo biaen hem i kam wan king we i stap tru long God. (1 King 3:6; 9:​4, 5; 14:8) Taem yu stadi long laef blong Deved, eksampol blong hem bambae i givhan long yu blong gohed blong holemstrong long Jehova. Mo tu, yu save stadi long eksampol blong Mak o Timoti. Tufala i stat blong mekem wok blong Jehova taem tufala i yangfala nomo, mo tufala i gohed blong holemstrong long hem. Desisen ya i mekem Jehova i glad. Fiuja blong yu i dipen long samting we yu mekem long laef blong yu naoia. Sipos yu no trastem yu wan be yu trastem Jehova, bambae hem i halpem yu blong mekem ol waes desisen. Yu save gat wan gudfala laef we yu glad long hem. Yu no mas fogetem se Jehova i tinghae long samting we yu mekem blong hem. Beswan rod blong yusum laef blong yu, i blong mekem wok blong Papa blong yumi long heven we i lavem yumi. w23.09 13 ¶18-19

Aposol Pol i save se ol Kristin brata mo sista oli no stret gud. Eksampol, taem hem i stat blong joen wetem kongregesen, ol brata mo sista oli gat rong tingting long hem. (Wok 9:26) Biaen, samfala oli talem sam nogud samting long saed blong hem we i mekem se ol narafala oli no trastem hem. (2 Kor. 10:10) Mo tu, Pol i luk se wan elda i mekem wan rong desisen we i save mekem ol narafala oli stambol. (Gal. 2:​11, 12) Antap long hemia, Mak we i gudfala fren blong Pol, i mekem hem i harem nogud tumas. (Wok 15:​37, 38) Pol i save letem wan long ol problem ya i blokem hem blong i no moa joen wetem ol brata mo sista ya, be hem i gat stret tingting long olgeta mo i gohed blong mekem wok blong Jehova. ?Wanem i givhan long hem? Pol i lavem ol brata mo sista. Lav we hem i gat long olgeta i pulum hem blong tingbaot ol gudfala fasin blong olgeta, be i no ol slak fasin. Mo tu, lav i halpem Pol blong mekem samting we vas blong dei i tokbaot. w24.03 15 ¶4-5

I gat plante stori long Baebol we oli soemaot se kwaet fasin i impoten. Tingbaot eksampol blong Aesak. Taem hem i stap long ples blong ol man Filistia long Gera, ol neba blong hem we oli jalus oli berem ol wel we ol wokman blong papa blong hem oli bin digim. Be Aesak i no faet agensem olgeta, hem i girap i muvum famle blong hem i go longwe, mo i digim sam niufala wel. (Jen. 26:​12-18) Be ol man Filistia oli talem bakegen se ol wota long ol wel ya i blong olgeta. Nating se i olsem, Aesak i holemtaet pis wetem olgeta. (Jen. 26:​19-25) ?Wanem i givhan long hem blong stap kwaet, nating se ol narafala oli traem mekem hem i kros? I sua se hem i lanem plante samting long gudfala eksampol blong papa blong hem Ebraham we i wan man blong mekem pis, mo mama blong hem Sera we i gat pis long laef blong hem mo i wan kwaet woman.—1 Pita 3:​4-6; Jen. 21:​22-34. w23.09 15 ¶4

Jehova i sanem Boe blong hem i kam long wol blong tijim ol man long saed blong Kingdom, mo blong givim laef blong hem olsem wan ransom blong pemaot yumi long sin mo ded. Biaen, Jehova i mekem Jisas i laef bakegen blong i go long heven mo i rul olsem King long Kingdom blong God. Bigfala tingting long Baebol hemia se Jehova bambae i leftemap nem blong hem, taem i yusum Kingdom we Kraes i rul long hem blong mekem stamba tingting blong hem i kamtru long wol ya. Stamba tingting blong Jehova i no save jenis. Hem i promes se evri samting bambae oli hapen stret olsem we hem i talem. (Aes. 46:​10, fut.; Hib. 6:​17, 18) Wol ya bambae i kam wan paradaes, mo ol pikinini we oli kamaot biaen long Adam mo Iv we oli stret gud, bambae oli “enjoem laef olwe.” (Sam 22:26) Be i no hemia nomo. Bambae hem i mekem tu se olgeta long heven mo long wol, oli joen gud. Mo evriwan bambae oli obei long Jehova, olsem rula blong olgeta. (Efes. 1:​8-11) Yumi glad tumas blong luk olsem wanem Jehova bambae i mekem stamba tingting blong hem i kamtru. w23.10 20 ¶7-8

Taem ol man Jiu we oli bin stap long Babilon oli kamtru long Jerusalem, oli faenem i had blong givim samting we famle i nidim, mo tu i gat problem blong politik mo oli fesem fasin agens. Samfala oli faenem i had blong putum wok ya blong bildim bak tempol blong Jehova i stap long fasples long laef blong olgeta. Taswe, Jehova i sanem tu profet, hemia Hagae mo Sekaraea, blong halpem ol man blong oli gat strong tingting bakegen, mo wok we tufala i mekem i karem gudfala frut. (Hag. 1:1; Sek. 1:1) Be 50 yia biaen, ol man Jiu oli nidim ol toktok blong leftemap tingting blong olgeta bakegen. Esra, we i wan man blong raetemdaon kopi blong Loa, i aot long Babilon mo i go long Jerusalem blong leftemap tingting blong ol man blong God blong oli putum wosip blong Jehova long fasples. (Esra 7:​1, 6) Ol profet tok blong Hagae mo Sekaraea oli halpem ol man blong God long taem bifo blong oli gohed blong trastem Jehova, taem oli fesem fasin agens. Long sem fasin, oli save halpem yumi tu blong trastem se Jehova bambae i halpem yumi, nomata wanem hadtaem yumi fesem.—Prov. 22:19. w23.11 14-15 ¶2-3

?Olsem wanem yumi soemaot lav long ol brata mo sista? Wan rod hemia taem yumi leftemap tingting blong olgeta. Sipos yumi gat sore, bambae yumi naf blong “gohed blong leftemap tingting” blong yumi. (1 Tes. 4:18) ?Olsem wanem blong mekem lav we yumi gat i stap strong? Hemia taem yumi fogivim mastik blong ol brata mo sista, nating se i no isi. ?From wanem i impoten we tede yumi soemaot se yumi lavlavem yumi? Makem samting we Pita i talem, i se: “En blong evri samting i kam klosap. Taswe, . . . yufala i mas lavlavem yufala mo lav ya i mas strong gud.” (1 Pita 4:​7, 8) ?Wanem bambae i hapen taem en blong rabis wol ya i kam klosap moa? Jisas i tokbaot ol man blong hem se: “Ol man blong olgeta nesen bambae oli no laekem yufala nating from we yufala i holem nem blong mi.” (Mat. 24:9) Taswe, blong stanap strong long ol hadtaem ya, yumi mas gohed blong joen gud. Long rod ya, Setan bambae i no save seraotem yumi, from we lav i joenem yumi.—Fil. 2:​1, 2. w23.11 13 ¶18-19

Yumi luk gudfala samting i kamaot taem yumi tijim ol man long saed blong Jehova. Ol trutok blong Baebol oli gat bigfala paoa mo oli mekem ol man oli kam fri long ol giaman tok blong Setan, mo oli stat blong luk ol gudfala fasin blong Jehova. Mo hemia i mekem oli sapraes long bigfala paoa we God i gat. (Aes. 40:26) Oli lanem blong trastem Jehova from we hem i gat jastis. (Dut. 32:4) Oli lanem tu se hem i gat bigfala waes. (Aes. 55:9; Rom 11:33) Mo oli glad blong lanem se Jehova, hem i lav. (1 Jon 4:8) Taem oli kam klosap moa long Jehova, hop we oli gat blong laef olwe olsem ol pikinini blong God, bambae i kam strong moa. !I wan bigfala ona blong givhan long ol man blong oli kam klosap long Jehova! Taem yumi mekem olsem, Jehova i luk yumi olsem ol man we oli ‘joen wetem hem blong mekem wok blong hem.’—1 Kor. 3:5. w24.02 12 ¶15

Sipos yu yu wan Baebol stadi o yu wan pikinini we perens blong yu oli Witnes blong Jehova, ?yu yu stap tingbaot blong baptaes? !Hemia wan gudfala mak blong kasem! Be bifo we yu baptaes, yu mas givim laef blong yu long Jehova. ?Olsem wanem blong givim laef blong yu long Jehova? Yu mekem wan spesel prea long hem mo yu promes se bambae yu wosipim hem nomo, mo yu putum wok blong hem i stap long fasples long laef blong yu. Blong talem stret, yu promes long Jehova se bambae yu gohed blong lavem hem “long olgeta hat blong yu mo long olgeta sol blong yu mo long olgeta tingting blong yu mo long olgeta paoa blong yu.” (Mak 12:30) Taem yu givim laef blong yu long Jehova, i no gat wan narafala man i save, yu mo Jehova nomo. Be taem yu baptaes, yu soemaot long evri man se yu givim laef blong yu finis long Jehova. Hemia wan spesel promes we Jehova i wantem se yu holemtaet, mo yu tu yu save se yu mas holemtaet.—Pri. 5:4. w24.03 2 ¶2; 3 ¶5

Evri man we i mared i save fesem ol hadtaem. Baebol i talem klia se olgeta we oli mared, bambae oli kasem “trabol long bodi blong olgeta.” (1 Kor. 7:28) ?From wanem? Hemia from we mared i joenem tu sinman. Tufala wanwan i gat ol defren fasin, mo samting we tufala i laekem o no laekem i no sem mak. Maet tufala i kamaot long defren kalja o bakgraon. Sloslo, maet tufala i soemaot sam slak fasin we tufala i no bin soemaot bifo we tufala i mared. Ol samting olsem oli save mekem problem i kamaot. Maet tufala i stat blong blemem tufala, i bitim we tufala i luksave problem mo wok tugeta blong stretem. Mo maet tufala i gat tingting ya se beswan rod blong stretem ol problem ya, hemia blong tufala i seraot o divos. ?I tru se hemia nao beswan rod blong stretem problem? Nogat. Jehova i wantem se ol hasban mo waef oli stap tugeta, nating se fasin blong narawan i strong tumas. w24.03 16 ¶8; 17 ¶11

Afta we yu givim laef blong yu long Jehova mo yu baptaes, yu gohed blong kasemsave moa long Jehova mo yu lavem hem moa. From samting ya, hop blong yu blong laef olwe long paradaes long wol i gohed blong gru i kam strong moa. (Hib. 5:13–6:1) Maet yu ekspiriensem samting we Rom 5:​2-4 i talem. Yu fesem plante trabol, be yu stanap strong mo Jehova i soemaot se hem i glad long yu. Naoia, yu sua se yu save kasem ol samting ya we hem i promes blong givim. Mo tu, hop blong yu i kam strong moa i bitim bifo. I olsem we Jehova i mekem promes ya stret long yu. Mo hemia i save gat paoa long olgeta haf blong laef blong yu, fasin we yu mekem long famle, ol desisen, mo olsem wanem yu yusum taem blong yu. Aposol Pol i tokbaot wan narafala impoten poen long saed blong hop blong yu, taem God i glad long yu. Hem i mekem yu yu sua se hop we yu gat bambae i kamtru.—Rom 15:13. w23.12 12-13 ¶16-19

Taem yumi gotru long wan hadtaem, ol filing, tingting, mo aksen blong yumi oli olbaot. I olsem wan sip we strong win i stap saksakem hem i go olbaot. Long taem olsem, ?olsem wanem Jehova i stap halpem yumi? Hem i mekem yumi sua se bambae hem i mekem yumi stap strong yumi no jenis. Taem wan sip i fesem wan strong win long solwota, maet wef i stat blong saksakem hem i go olbaot. Be blong holemtaet sip blong i no muvmuv, maet plante sip oli gat tu longfala spesel fin long saed saed blong olgeta. Tufala fin ya i givhan long sip blong i no muvmuv tumas, nao ol pasenja oli save harem se oli sef mo enjoem trip blong olgeta. Be tufala fin ya i save wok gud nomo taem sip i stap ron. Long sem fasin, Jehova bambae i mekem yumi stap strong yumi no jenis, taem yumi gohed blong mekem wok blong hem nating se yumi fesem hadtaem. w24.01 22 ¶7-8

Taem yu harem se yu fraet, askem yu wan se, ‘?Jehova i mekem wanem finis?’ I gud yu tingbaot ol samting we hem i krietem. Eksampol, Jehova i no wokem ol pijin mo ol flaoa long pija blong hem, mo oli no save wosipim hem. Be taem yumi “lukluk gud” olsem wanem Jehova i kea long olgeta, bambae yumi trastem moa se hem i naf blong lukaot gud long yumi. (Mat. 6:​25-32) Mo tu, tingbaot samting we Jehova i mekem finis long ol man we oli wosipim hem. Maet yu stadi long eksampol blong wan man long Baebol we i soemaot strong bilif, o yu ridim ekspiriens blong wan man blong Jehova long taem blong yumi tede. Antap moa, i gud yu tingting dip long samting we Jehova i mekem finis blong lukaot gud long yu. Tingbaot olsem wanem hem i pulum yu yu kam long trutok. (Jon 6:44) Tingbaot olsem wanem hem i stap ansarem ol prea blong yu. (1 Jon 5:14) Mo tingbaot olsem wanem sakrefaes blong Pikinini blong hem i stap givhan long yu evri dei.—Efes. 1:7; Hib. 4:​14-16. w24.01 4 ¶6; 7 ¶17