Novemba

Sipos yu wan papa o mama, givhan long pikinini blong yu blong rerem wan ansa we i stret long yia blong hem. Samtaem, yumi stadi long sam impoten topik olsem, ol problem blong mared, o ol rabis fasin, be maet i gat wan o tu paragraf we pikinini blong yu i save ansa long hem. Mo tu, givhan long pikinini blong i kasemsave se i no oltaem we bambae oli jusum hem blong ansa. Sipos yu eksplenem long hem, hemia bambae i mekem se hem i no harem nogud taem oli jusum narafala blong ansa. (1 Tim. 6:18) Yumi evriwan i wantem rerem ol gudfala ansa blong presem nem blong Jehova mo leftemap tingting blong ol narafala Kristin. (Prov. 25:11) Taem yumi gat janis blong tokbaot prapa ekspiriens blong yumi, yumi mas lukaot se yumi no mas tokbaot yumi wan tumas. (Prov. 27:2; 2 Kor. 10:18) Be yumi save pulum tingting blong ol narafala i go long Jehova, tok blong hem, mo ol man blong hem.—Rev. 4:11. w23.04 24-25 ¶17-18

Lav i impoten, from i save givhan long yumi blong stap wekap mo gat klia tingting. (Mat. 22:​37-39) Lav we yumi gat long God i save halpem yumi blong gohed blong prij, nating se yumi save kasem trabol from. (2 Tim. 1:​7, 8) Yumi lavem ol man we oli no wosipim Jehova, taswe yumi gohed nomo blong prij, nating se hem i tru long telefon o leta. Yumi gat hop yet se wan dei, ol man ya bambae oli jenis mo oli stat blong mekem samting we i stret. (Esik. 18:​27, 28) Yumi lavem ol Kristin brata mo sista blong yumi tu. Yumi soemaot lav ya taem yumi ‘leftemap tingting blong yumi, mo yumi givgivhan long yumi blong mekem yumi strong.’ (1 Tes. 5: 11) Olsem ol soldia we oli joen tugeta blong go faet, yumi lefleftemap tingting blong yumi. Yumi neva wantem minim blong mekem ol brata mo sista oli harem nogud o givimbak nogud fasin we oli mekem long yumi. (1 Tes. 5:​13, 15) Mo tu, yumi soemaot lav taem yumi respektem ol brata we oli lukaot long kongregesen.—1 Tes. 5:12. w23.06 10 ¶6; 11 ¶10-11

Wan rod blong mekem bilif blong yumi i strong hemia blong tingting dip long ransom. Ransom i olsem wan garanti se ol promes blong God bambae oli kamtru. Taem yumi tingbaot from wanem Jehova i givim ransom, mo samting we Jehova i lego, yumi save bilif strong se promes ya blong man i laef olwe long wan gudfala wol bambae i kamtru. ?From wanem yumi talem olsem? Tingbaot: ?Wanem i mekem se ransom i spesel? Jehova i sanem fasbon Boe blong hem we hem i lavem tumas, i kamdaon long wol, mo i bon olsem wan man we i stret gud olgeta. Taem Jisas i stap long wol, hem i stanap strong tru long plante defren hadtaem. Biaen hem i safa mo i ded long wan fasin we i nogud olgeta. !Jehova i givim wan praes we i hae tumas! God blong yumi we i lavem yumi, bambae i neva letem Boe blong hem i safa mo i ded jes blong yumi gat wan gudfala laef blong sot taem nomo. (Jon 3:16; 1 Pita 1:​18, 19) From we Jehova i givim Boe blong hem we hem i lavem tumas blong i halpem yumi, bambae hem i meksua se yumi kasem laef blong olwe long niufala wol. w23.04 27 ¶8-9

?Yu ting se Jehova i wantem tumas blong mekem ol dedman oli laef bakegen? Yes. Hem i pulum plante man blong raetem long Baebol ol promes blong laef bakegen. (Aes. 26:19; Rev. 20:​11-13) Mo taem Jehova i mekem wan promes, oltaem hem i mekem i kamtru. (Jos. 23:14) Yes, Jehova i wantem tumas blong mekem ol dedman oli laef bakegen. Traem tingbaot samting we Job i talem. Hem i sua se nating sipos hem i ded, Jehova i wantem tumas blong luk hem i laef bakegen. (Job 14:​14,15, fut.) Mo hemia sem tingting we Jehova i gat long ol man blong hem we oli ded finis. Hem i wantem tumas blong mekem oli laef bakegen, we oli gat gudfala helt mo oli glad. ?Be olsem wanem long ol bilian man we oli ded we oli no gat janis blong lanem trutok long saed blong Jehova? God blong yumi we i gat lav i wantem mekem olgeta tu oli laef bakegen. (Wok 24:15) Hem i wantem se oli gat janis blong kam fren blong hem mo laef olwe long wol ya.—Jon 3:16. w23.04 9 ¶5-6

?Olsem wanem yu save mekem hop blong yu i kam strong moa? Sipos yu gat hop blong laef olwe long wol, i gud yu ridim ol vas we oli tokbaot paradaes mo yu tingting dip long olgeta. (Aes. 25:8; 32:​16-18) Traem tingbaot se laef bambae i olsem wanem long niufala wol. Pijarem yu wan long paradaes. Sipos yumi gohed oltaem blong tingbaot niufala wol, bambae yumi luk ol problem blong yumi se “oli smol nomo, mo oli no save stap longtaem.” (2 Kor. 4:17) Hop we Jehova i givim long yu i save halpem yu blong stanap strong. Hem i givim finis samting we yu nidim blong yu save kasem paoa blong hem. Taswe taem yu nidim help blong finisim wan wok, stanap strong long wan trabol, o gohed blong stap glad, i gud yu stadi yu wan mo prea blong Jehova i halpem yu. I gud yu akseptem help blong ol Kristin brata mo sista, mo yu tekem taem blong tingbaot hop blong fiuja. Long rod ya, ‘God ya we i gat bigfala paoa bambae i givim olgeta paoa we yu nidim, blong yu naf blong stanap strong long olgeta samting, mo yu gat longfala tingting mo glad.’—Kol. 1:11. w23.10 17 ¶19-20

Yumi gat plante risen blong talem tangkiu long Jehova taem yumi prea. Yumi save talem tangkiu long hem from evri gudfala samting we yumi gat, oli kamaot long hem. (Jem. 1:17) Eksampol, yumi save talem tangkiu long hem from naesfala wol ya, mo from ol naesfala samting we hem i krietem. Yumi save talem tangkiu tu from laef blong yumi, famle blong yumi, ol fren blong yumi, mo hop we yumi gat. Mo yumi wantem talem tangkiu long Jehova from hem i save letem blong yumi fren wetem hem. Maet yumi mas traehad blong tingbaot sam risen we yumi wan yumi wantem talem tangkiu long Jehova from. Yumi laef long wan wol we ol man oli no gat fasin ya blong talem tangkiu. Plante taem ol man oli tingbaot nomo samting we oli wantem, i bitim we oli talem tangkiu from samting we oli gat. Sipos yumi stat blong gat fasin ya, ol prea blong yumi bambae oli kam olsem wan lis nomo blong ol samting we yumi askem. Blong blokem fasin ya, yumi mas gohed blong talem tangkiu from evri samting we Jehova i mekem blong yumi.—Luk 6:45. w23.05 4 ¶8-9

Papa blong yumi Jehova we i lavem yumi, i no wantem luk we yumi safa. (Aes. 63:9) Nating se i olsem, hem i no blokem yumi long ol trabol we oli olsem reva mo faea. (Aes. 43:2) Be hem i promes se bambae hem i halpem yumi blong “pastru” long olgeta, mo bambae hem i no letem ol trabol ya oli mekem yumi harem nogud blong olwe. Mo tu, Jehova i givim tabu spirit blong hem blong halpem yumi blong stanap strong. (Luk 11:13; Fil. 4:13) From samting ya, yumi save sua se oltaem bambae hem i givim stret samting we yumi nidim blong stanap strong, mo gohed blong wosipim hem. Jehova i wantem se yumi trastem hem. (Hib. 11:6) Samtaem, maet yumi harem se ol problem we yumi fesem oli had tumas. Mo maet yumi stat blong gat tu tingting se Jehova bambae i halpem yumi o nogat. Be Baebol i talem se Jehova i save givim paoa long yumi blong “klaem i go narasaed long wan stonwol.” (Sam 18:29) Taswe, i bitim we yumi gat tu tingting, yumi mas prea wetem strong bilif mo trastem se Jehova bambae i ansarem ol prea blong yumi.—Jem. 1:​6, 7. w23.11 22 ¶8-9

!Hemia wan naesfala pija tok blong diskraebem tru lav! Ol tok ya oli mekem ol kapol oli sua se: Lav we i stap bitwin olgeta i save stap blong olwe. Blong lav blong wan kapol i stap strong olwe, tufala i mas traehad. Eksampol, wan faea i save gohed blong laet nomo sipos man i gohed blong putum faea wud long hem, sipos no faea ya bambae i ded. Long sem fasin, lav bitwin wan hasban mo waef i save stap strong nomo, sipos tufala i gohed blong mekem frensip blong tufala i stap strong. Samtaem wan kapol i save harem se lav blong tufala i kam kolkol, speseli sipos tufala i fesem ol trabol long saed blong mane, helt, o tufala i faenem i had blong tijim ol pikinini. Blong mekem “faea blong Jah” i laet i stap, hasban mo waef i mas wok had blong mekem frensip blong tufala wetem Jehova i kam strong. w23.05 20-21 ¶1-3

?Yumi save mekem wanem blong gat strong tingting? Ol perens oli save talem long yumi blong gat strong tingting, be oli no save pasem strong tingting blong olgeta i kam long yumi, hemia i wan samting we yumi mas lanem. Taem yu stap lanem wan niufala samting, yu wajem ol aksen blong tija blong yu mo yu kopi olgeta. Long sem fasin, yumi save lanem blong gat strong tingting, taem yumi luk olsem wanem ol narafala oli soem fasin ya, mo yumi kopi olgeta. Olsem Daniel, yumi mas savegud Tok blong God. Yumi save kam klosap long Jehova taem yumi toktok long hem oltaem, mo talemaot samting we i stap long hat blong yumi. Mo yumi mas trastem Jehova mo sua oltaem se hem i stap wetem yumi. Nao taem wan samting i traem bilif blong yumi, bambae yumi gat strong tingting. Plante man oli respektem olgeta we oli gat strong tingting. Mo tu, olgeta we oli gat strong tingting, oli save halpem ol narafala we hat blong olgeta i stret blong oli save Jehova. From samting ya, i gud yumi wokem strong tingting. w23.08 2 ¶2; 4 ¶8-9

Grik tok we oli tanem i kam “traem olgeta samting” oli yusum blong diskraebem fasin blong man blong testem gol mo silva blong luk sipos oli tru o nogat. Taswe yumi tu, yumi mas traem ol samting we yumi harem mo ridim, blong luk sipos oli tru o nogat. Hemia i impoten moa naoia from we yumi kam klosap moa long bigfala trabol. Bitim we yumi bilivim evri samting we yumi ridim o harem, i gud yumi yusum tingting blong yumi blong skelem olgeta wetem samting we Baebol mo oganaesesen i talem. Long rod ya, bambae ol giaman tok blong ol dimon oli no save lidim yumi i go krangke. (Prov. 14:15; 1 Tim. 4:1) Ol man blong Jehova bambae oli laef tru long bigfala trabol. Nating se i olsem, yumi wanwan i no save wanem bambae i hapen tumoro. (Jem. 4:14) Nomata se yumi laef tru long bigfala trabol o yumi ded bifo, be bambae yumi kasem blesing ya blong laef olwe, sipos yumi gohed blong holemstrong long Jehova. !I gud yumi evriwan i gohed blong tingbaot nambawan hop ya mo stap rere oltaem from dei blong Jehova! w23.06 13 ¶15-16

Yumi no save olsem wanem sam profet tok blong Baebol bambae oli kamtru. (Dan. 12:​8, 9) Be hemia i no min se bambae i no kamtru. I sua se long stret taem, Jehova bambae i givhan long yumi blong kasemsave long ol samting we yumi mas save, stret olsem we hem i bin mekem bifo. Bambae oli talemaot se “i gat pis mo seftaem.” (1 Tes. 5:3) Biaen ol gavman blong wol ya bambae oli atakem olgeta giaman skul mo spolemgud olgeta. (Rev. 17:​16, 17) Mo afta, bambae oli atakem ol man blong God. (Esik. 38:​18, 19) Taem ol samting ya oli hapen, faet blong Amagedon bambae i stat. (Rev. 16:​14, 16) Yumi sua se i no longtaem bambae ol samting ya oli hapen. Go kasem taem ya, i gud yumi gohed blong soemaot tangkiu long Papa blong yumi long heven. Blong mekem olsem, yumi mas gohed blong kasemsave long ol profet tok blong Baebol mo givhan long ol narafala blong mekem sem mak. w23.08 13 ¶19-20

Afta we aposol Pol i tokbaot bilif, hop, mo lav, hem i talem se: “Lav nao hem i impoten moa long trifala.” (1 Kor. 13:13) ?From wanem Pol i talem olsem? From we long fiuja, bambae yumi no moa nid blong gat hop mo bilif long ol promes blong God long saed blong niufala wol, from we oli kamtru finis. Nating se i olsem, bambae yumi mas gohed blong lavem Jehova mo ol man. Yes, lav ya bambae i gohed blong gru olwe. Mo tu, lav i makemaot yumi olsem ol trufala Kristin. Jisas i talem long ol aposol blong hem se: “Sipos yufala i lavlavem yufala, bambae olgeta man oli save se yufala i disaepol blong mi.” (Jon 13:35) Taem yumi lavlavem yumi, hemia i mekem yumi joengud. Pol i tokbaot lav se i olsem “wan rop we i save joenem ol man oli kam wan.” (Kol. 3:14) Aposol Jon i raet i go long ol Kristin brata se: “Man we i lavem God, hem i mas lavem brata blong hem tu.” (1 Jon 4:21) Taem yumi soemaot se yumi lavlavem yumi, hemia i soemaot se yumi lavem God tu. w23.11 8 ¶1, 3

Baebol i talem se laef blong ol Kristin i olsem wan resis. Olgeta we oli winim resis ya bambae oli kasem laef we i no save finis. (2 Tim. 4:​7, 8) Yumi mas mekem evri samting we yumi naf blong mekem blong gohed long resis ya, from we en blong resis i klosap moa i bitim bifo. Aposol Pol i tokbaot sam samting we i save givhan long yumi blong winim resis ya, i se: ‘Yumi mas sakemaot evri samting we i hevi mo stanap strong mo yumi ron long resis ya we i stap long fored blong yumi.’ ?Hemia i min se ol Kristin oli no mas karem eni hevi samting? Nogat. Pol i wantem talem se yumi mas sakemaot ol samting we yumi no nid blong karem, we oli save mekem se yumi kam taet mo slodaon. Blong winim resis blong yumi, yumi mas kwik blong luksave ol hevi samting we yumi no nid blong karem mo sakemaot olgeta. Be long semtaem, yumi mas lukaot se yumi no sakemaot ol samting we yumi sud karem, nao yumi no moa naf blong gohed long resis ya.—2 Tim. 2:5. w23.08 26 ¶1-2

Fasin ya blong no mekem i strong long narafala, i save halpem yumi blong respektem tingting blong narafala. Eksampol, sam sista oli laekem blong putum mekap, be sam narafala oli no laekem. Sam Kristin oli laekem blong dring alkol, be sam narafala oli disaed blong no dring nating. Evri Kristin oli wantem gat gudfala helt, be oli jusum ol defren rod blong lukaot gud long helt blong olgeta. Sipos yumi ting se yumi nao yumi stret oltaem, mo yumi traem blong fosem ol brata mo sista blong oli folem tingting blong yumi, yumi save mekem ol narafala oli stambol, mo yumi no joen gud. (1 Kor. 8:9; 10:​23, 24) Jehova i no talem stret wanem klos yumi sud werem, be hem i givim ol stamba trutok blong yumi folem. Yumi mas werem ol klos we oli stret, oli givim ona long God, oli soemaot se yumi gat respek mo “stret tingting.” (1 Tim. 2:​9, 10) Taswe, yumi no wantem werem ol klos we i pulum ol man blong lukluk yumi nomo. Ol stamba trutok ya bambae oli halpem ol elda tu blong oli no putum prapa rul blong olgeta long saed blong klos mo stael blong hea. w23.07 23-24 ¶13-14

Jehova i soemaot long yumi olsem wanem blong gat wan hapi fiuja. Olgeta we oli akseptem invetesen blong “woman we i stupid,” oli tingbaot nomo blong harem gud long samting we i “swit,” hemia ol doti fasin blong seks. Samting ya bambae i lidim olgeta i go “dip insaed long Gref.” (Prov. 9:​13, 17, 18) !Hemia i defren olgeta long ol man we oli akseptem invetesen blong “trufala waestok”! (Prov. 9:1) Yumi stap lanem blong laekem ol samting we Jehova i laekem, mo blong agensem ol samting we hem i no laekem nating. (Sam 97:10) Mo yumi glad tumas from we yumi save invaetem ol narafala blong kam harem gud long “trufala waestok.” Yumi olsem ol man blong wok ya we “oli go long ol hae ples long taon, oli singaot se: ‘Man we i no gat ekspiriens, i gud hem i kam long ples ya.’” Ol blesing we yumi mo ol man we oli akseptem invetesen ya bambae yumi kasem, oli no blong naoia nomo, be bambae oli mekem yumi kasem “laef” olwe long fiuja, from we yumi stap “wokbaot i go fored folem rod blong save.”—Prov. 9:​3, 4, 6. w23.06 24 ¶17-18

?Yu harem olsem wanem taem wan fren long wok o long skul i askem kwestin long saed blong bilif blong yu? ?Yu yu fraet smol? Bighaf blong yumi i fraet. Be wan kwestin olsem i save givhan long yumi blong kasemsave long tingting mo bilif blong narafala, mo i mekem i isi moa blong serem gud nius wetem hem. Be maet wan man i askem kwestin from hem i wantem agensem yumi o rao long yumi. Yumi no mas sapraes long samting ya. Plante taem, man i gat rong save long saed blong bilif blong yumi. (Wok 28:22) Mo tu, long “ol las dei” ya, plante man “oli no save agri long wan tingting” mo samfala “oli wael olgeta.” (2 Tim. 3:​1, 3) Maet yu askem se: ‘?Olsem wanem mi save toktok kaen taem narafala i wantem rao long mi from bilif blong mi?’ Kwaet fasin i save givhan long yu. Man we i gat kwaet fasin i no kam kros kwik, be hem i naf blong stap kwaet taem narafala i mekem hem i kros o taem hem i no sua olsem wanem blong ansa long hem. w23.09 14 ¶1-2

Samtaem, yumi kasem sam advaes we i blokem yumi blong ronem ol sas samting, mo ol samting we i save pulum yumi blong brekem ol loa blong God. Long taem olsem, i gud blong folem ol advaes we Jehova i givim. (Aes. 48:​17, 18; 1 Tim. 6:​9, 10) I sua se Jehova bambae i gohed blong yusum ol man blong lidim yumi long taem blong bigfala trabol, mo go kasem Wan Taosen Yia Rul Blong Kraes. ?Olsem wanem? ?Bambae yumi gohed blong folem ol tok blong Jehova? Sipos yumi traehad blong folem ol tok blong Jehova naoia, bambae i isi blong mekem olsem long fiuja. Taswe, i gud we oltaem yumi folem ol tok blong Jehova, mo hemia i minim tu ol tok we hem i talem tru long ol man we hem i putumap blong lidim yumi. (Aes. 32:​1, 2; Hib. 13:17) Mo sipos yumi mekem olsem, yumi gat evri risen blong trastem Jehova, we hem nao Man ya we stap halpem yumi blong gowe long ol denja we i save spolem frensip blong yumi wetem hem, mo lidim yumi i go kasem laef we i no save finis long niufala wol. w24.02 25 ¶17-18

Aposol Pol i harem gud taem i mekem wok blong Jehova, be i no isi oltaem. Plante taem, Pol i mas wokbaot longwe, mo long taem blong hem i no isi blong wokbaot longwe olsem. Samtaem, klosap Pol i ‘lusum laef blong hem long ol reva we oli ron bigwan’ mo “long ol man blong stil.” Mo tu, i gat samtaem we ol enemi blong hem oli kilim hem. (2 Kor. 11:​23-27) Mo samtaem ol Kristin brata mo sista tu oli no talem tangkiu from ol samting we Pol i mekem blong halpem olgeta. (2 Kor. 10:10; Fil. 4:15) ?Wanem i halpem Pol blong i gohed long wok blong Jehova? Pol i lanem plante gudfala fasin blong Jehova tru long Baebol mo long ol prapa ekspiriens blong hem. Nao hem i trastem se Jehova God i lavem hem. (Rom 8:​38, 39; Efes. 2:​4, 5) Pol i lavem Jehova tumas. Yes, hem i soemaot se hem i lavem Jehova, taem “i stap gohed yet blong givhan long ol tabu man.”—Hib. 6:10. w23.07 9 ¶5-6

Plante man oli luksave se yumi nidim ol gavman mo yumi mas obei long sam loa we “ol haeman” oli putumap. Be sam long ol man ya oli ting se i no nid blong obei long ol loa we oli no laekem o we oli ting se i no stret. Baebol i talem se ol man blong gavman nao oli stap mekem ol man oli safa mo se Setan i stap kontrolem olgeta. Mo tu, i no longtaem bambae oli lus. (Sam 110:​5, 6; Pri. 8:9; Luk 4:​5, 6) Baebol i talem se “eni man we i agensem ol haeman ya, hem i agensem plan we God i putum.” Naoia we i stap, Jehova i letem ol gavman oli rul blong mekem se oli save kontrolem evri samting, mo hem i ekspektem yumi blong obei long olgeta. Taswe “ol samting we i stret blong olgeta oli kasem, [yumi] mas givim long olgeta,” hemia i minim se yumi mas pem ol takis, respektem olgeta, mo obei long olgeta. (Rom 13:​1-7) Maet yumi harem se wan loa i strong tumas, i no stret o maet yumi harem se sipos yumi obei long loa ya bambae yumi spenem plante mane. Be yumi obei long ol haeman ya from we Jehova nao i talem long yumi blong mekem olsem, sipos samting we oli askem i no brekem ol loa blong hem.—Wok 5:29. w23.10 8 ¶9-10

Taem Samson i bon, ol man Filistia oli stap rulum nesen blong Isrel mo mekem i strong long olgeta. (Jaj. 13:1) Ol man Isrel oli safa bigwan from we ol man Filistia oli raf tumas. Jehova i jusum Samson blong “statem wok ya blong sevem ol man Isrel, i tekemaot olgeta long han blong ol man Filistia.” (Jaj. 13:5) Samson i mas dipen fulwan long Jehova blong mekem wok ya. Wan taem ol soldia blong Filistia oli kam long Lehi we i stap long Juda, blong holemtaet Samson. Ol man Juda oli fraet, nao oli putum Samson long han blong ol enemi blong olgeta. Ol man ples blong Samson oli fasem hem wetem tu niufala rop mo oli karem hem i go long ol man Filistia. (Jaj. 15:​9-13) Be “spirit blong Jehova i mekem hem i strong” nao hem i brekem ol rop ya. Biaen, “hem i faenem wan bun blong maot blong wan man dongki we i strong gud yet,” i pikimap, mo i yusum bun ya blong kilim 1,000 man Filistia i ded.—Jaj. 15:​14-16. w23.09 2 ¶3-4

Sloslo Jehova i soemaot long Baebol, “bigfala tingting we hem i gat longtaem finis i kam.” Hem i save jusum blong folem plante defren rod, be oltaem olgeta samting we hem “i mekem, oli wok blong mekem plan blong hem i kamtru.” (Prov. 16:4) Mo frut blong ol wok blong hem oli stap blong olwe. ?Wanem nao stamba tingting blong Jehova, mo wanem ol jenis we hem i mekem blong stamba tingting blong hem i kamtru? God i talemaot long faswan man mo woman, stamba tingting we hem i gat long saed blong tufala, i se: ‘Yufala i mas gat ol pikinini mo yufala i kam plante mo fulumap wol, mo mekem ol samting long wol ya oli stap aninit long han blong yufala, mo bos long evri laef samting’ long wol. (Jen. 1:28) Taem Adam mo Iv i rebel, mo i mekem se sin i kasem olgeta man long wol, hemia i no stopem Jehova blong mekem stamba tingting blong hem i kamtru, be hem i folem wan narafala rod. Stret long taem ya, Jehova i plan blong putumap wan Kingdom long heven, we bambae i mekem stamba tingting blong hem long saed blong wol mo ol man i kamtru.—Mat. 25:34. w23.10 20 ¶6-7

Jehova i save halpem yumi blong no givap. Maet i no isi, speseli taem yumi traehad longtaem blong winim wan slak fasin. Samtaem maet yumi ting se ol slak fasin blong yumi oli had moa blong winim i bitim hemia blong aposol Pita. Be Jehova i save givim paoa long yumi blong yumi no givap. (Sam 94:​18, 19) Tingbaot wan brata we bifo, hem i homoseksuol blong plante yia. Be taem hem i lanem trutok, hem i jenisim laef blong hem mo i folem ol samting we Baebol i talem. Nating se i olsem, plante taem hem i mas faet agensem ol nogud filing we oli pulum hem. ?Wanem i halpem hem blong i no givap? Hem i talem se: “Jehova i stap givim paoa long ol man blong hem.” Mo i gohed i se: ‘Mi mi lanem se wetem spirit blong Jehova, yumi naf blong gohed blong laef long fasin we hem i wantem Jehova i stap yusum mi, mo nating se mi gat plante slak fasin, hem i gohed blong givim paoa long mi.’ w23.09 23 ¶12

Ol yangfala brata, yufala i no save kam bigman long spirit olsem nomo, be yufala i mas traehad. Yufala i mas jusum ol gudfala eksampol blong folem, wokem fasin blong yusum gud tingting, soemaot se narafala i save trastem yu, lanem ol samting we i save halpem yu evri dei, mo rerem yu from fiuja blong yu. Taem yu tingbaot ol samting we yu mas wok had blong mekem, ating bambae yu harem se hemia i had tumas. Be yu save mekem. Tingbaot se Jehova i wantem tumas blong halpem yu. (Aes. 41:​10, 13) Mo tu, ol brata mo sista long kongregesen bambae oli halpem yu. Taem yu kasem mak ya blong kam bigman long spirit, bambae yu glad mo laef blong yu bambae i ron gud. !Mifala i lavem yufala ol yangfala brata! Bambae Jehova i blesem yufala bigwan, taem yufala i stap traehad naoia blong kam bigman long spirit. w23.12 29 ¶19-20

Traem tingbaot se yu joen wetem wan grup blong ol brata mo sista long wan kakae. Yufala i gat gudfala taem, mo yufala i tekem wan foto tugeta. Be afta, yu tekem tu moa foto from yu fraet se maet faswan foto bambae i no klia. Naoia yu gat tri foto. Be yu makem se long wan long ol foto ya, wan brata i no smael. Ale, yu dilitim foto ya from yu gat tu narafala foto we evriwan oli smael, inkludum brata ya. Yumi gat ol gudfala memori blong ol taem we yumi spenem wetem ol brata mo sista. Be maet long wan long ol taem ya, wan brata o sista i talem o i mekem wan samting we i no kaen. ?Bambae yu mekem wanem wetem memori ya? I gud yu dilitim olsem we yu dilitim wan long ol foto ya. (Efes. 4:32) Yumi save mekem olsem, from we yumi gat plante gudfala memori blong ol gudfala taem we yumi spenem wetem brata o sista ya. Hemia nao ol memori we yumi wantem kipim mo tinghae long olgeta. w23.11 12-13 ¶16-17

Grik tok we oli yusum long vas ya i givim tingting se wan Kristin woman i mas werem ol klos we i soemaot respek, mo se i tingbaot tingting mo filing blong ol narafala. !Mifala i praod long yufala ol sista, we yufala i folem advaes ya! Fasin luksave i wan narafala fasin we ol sista oli mas wokem blong kam bigman long spirit. ?Wanem ya fasin luksave? Hem i fasin blong luksave samting we i stret mo samting we i rong. Mo biaen yumi save mekem waes desisen. Tingbaot eksampol blong Abigel. Hasban blong hem i mekem wan nogud desisen we i save mekem se olgeta man long haos blong hem oli kasem trabol. Be Abigel i tekem aksen kwiktaem. Mo from we hem i luksave samting, hem i sevem laef blong plante man. (1 Saml. 25:​14-23, 32-35) Fasin blong luksave samting i save halpem yumi tu blong save wetaem i stret blong toktok mo wetaem i stret blong stap kwaet, mo halpem yumi blong no bitim mak taem yumi soem intres long ol man wanwan.—1 Tes. 4:11. w23.12 20 ¶8-9

Aposol Pol i raetem ol tok ya i go long kongregesen long Rom. Ol brata mo sista long ples ya oli kasemsave long saed blong Jehova mo Jisas, oli gat bilif, mo oli kam ol Kristin. Taswe, Jehova i ‘talemaot se oli stret man from bilif blong olgeta,’ mo i makemaot olgeta long tabu spirit. (Rom 5:1) Yes, oli gat wan nambawan hop mo oli sua se hop ya bambae i kamtru. Samtaem biaen, Pol i raet i go long ol tabu Kristin long Efesas blong tokbaot hop we God i givim long olgeta. Hop ya hemia blong oli save kasem “ol gudgudfala blesing we hem i holem i stap, blong givim long ol tabu man.” (Efes. 1:18) Mo tu, Pol i talem long ol Kristin long Kolosi, weples bambae oli kasem ol blesing ya. Hem i talem se ‘hop ya God i putumgud finis i stap rere blong yufala long heven.’ (Kol. 1:​4, 5) Yes, hop blong ol tabu Kristin, hemia se bambae oli laef bakegen blong kasem laef we i no save finis long heven, mo bambae oli rul wetem Kraes.—1 Tes. 4:​13-17; Rev. 20:6. w23.12 9 ¶4-5

Grik tok we oli tanem i kam “lukaot gud,” oli yusum blong tokbaot ol soldia we oli stap gad long wan taon, blong ol enemi oli no kam insaed. Ol man we oli laef long wan taon we ol soldia oli gad long hem, oli slip gud from oli save se ol soldia oli protektem olgeta. Long sem fasin, taem pis ya blong God i lukaot gud long hat mo tingting blong yumi, yumi no fraet from yumi save se yumi sef. (Sam 4:8) Olsem Hana, nating sipos situesen blong yumi i no jenis kwiktaem, be yumi save harem yet se yumi gat pis long tingting. (1 Saml. 1:​16-18) Mo taem tingting blong yumi i kwaet, plante taem i isi blong tingting gud mo mekem ol waes desisen. ?Yumi save mekem wanem? Taem yumi wari, i gud yumi singaot i go long Jehova blong i lukaot gud long yumi. ?Yumi mekem samting ya olsem wanem? Yumi mas prea long hem gogo yumi harem se yumi gat pis ya blong God. (Luk 11:9; 1 Tes. 5:17) Sipos yu stap gotru long wan hadtaem, i gud yu prea oltaem, mo bambae yu haremsave se pis ya blong Jehova i lukaot gud long hat mo tingting blong yu.—Rom 12:12. w24.01 21 ¶5-6

Bigfala samting we Jisas i mekem blong nem blong Papa blong hem i stap tabu, hemia blong stanap strong taem ol man oli kilim hem, tok nogud long hem, mo talem ol giaman tok long saed blong hem. Hem i obei long Papa blong hem long evri samting, mo i no gat wan samting we hem i save sem from. (Hib. 12:2) Mo tu, hem i save se Setan nao i stap atakem hem long ol hadtaem ya. (Luk 22:​2-4; 23:​33, 34) Setan i ting se hem i save mekem Jisas i lego Jehova, be hem i no win nating. Jisas i pruvum se Setan i wan man blong giaman, mo se i gat sam gudfala man we oli stap holemstrong long Jehova, nating se oli fesem ol trabol we i rili had. ?Yu save mekem wanem blong King blong yu i glad? I gud yu gohed blong presem nem blong Jehova mo halpem ol narafala blong oli save ol gudfala fasin blong hem. Taem yu mekem olsem, yu stap folem eksampol blong Jisas. (1 Pita 2:21) Mo olsem Jisas, yu stap mekem Jehova i glad mo pruvum long enemi blong Hem, Setan, se hem i wan man blong giaman. w24.02 11-12 ¶11-13

Long ol faef yia we i pas, i gat bitim wan milian man oli tekem baptaes mo oli kam ol Witnes blong Jehova. Taem yu givim laef blong yu long Jehova, yu jusum blong kam wan disaepol blong Jisas Kraes, mo yu putum wok blong Jehova long fasples long laef blong yu. ?Olsem wanem blong mekem olsem? Jisas i talem se: “Sipos eni man i wantem kam biaen long mi, hem i mas blokem ol samting we hem nomo i wantem.” (Mat. 16:24) Grik tok we oli tanem i kam “blokem ol samting we hem nomo i wantem,” i save minim tu se “hem i mas talem no long hem wan.” Wan man we i givim laef blong hem long Jehova, i mas talem no long eni samting we i go agensem wil blong Jehova. (2 Kor. 5:​14, 15) Hemia i minim tu se hem i mas talem no long “ol wok we oli kamaot long tingting blong man nomo,” olsem enikaen doti fasin blong seks. (Gal. 5:​19-21; 1 Kor. 6:18) Sipos yu obei long ol loa ya, ?laef blong yu bambae i kam had moa? !Nogat! Bambae i no had sipos yu lavem Jehova mo yu bilif se ol loa ya oli blong mekem i gud long yu.—Sam 119:97; Aes. 48:​17, 18. w24.03 2 ¶1; 3 ¶4

Jehova i givim tabu spirit long ol man we hem i glad long olgeta. (Mat. 12:18) Taswe, yumi wanwan i save askem se: ‘?Mi mi stap soemaot sam long ol fasin we oli olsem frut blong tabu spirit?’ ?Yu yu luksave se yu gat longfala tingting moa i bitim taem ya we yu jes save Jehova? !Taem yu lanem blong soemaot moa ol frut blong tabu spirit, bambae yu sua moa se Jehova i glad long yu! Jehova i yusum praes blong ransom blong pemaot ol man we hem i glad long olgeta. (1 Tim. 2:​5, 6) ?Be olsem wanem sipos yumi bilif long ransom mo yumi baptaes, be yumi gat tingting ya yet se Jehova i no glad long yumi? I gud blong tingbaot se yumi no save trastem prapa filing blong yumi oltaem, be yumi save trastem Jehova. Hem i luk ol man we oli bilif long ransom se oli ol stret man long fes blong hem, mo hem i promes blong blesem olgeta.—Sam 5:12; Rom 3:26. w24.03 30 ¶15; 31 ¶17