Strong Bodi Mo Glad Taem—?Yu Yu Save Faenem Olgeta?
OL MAN mo ol woman oli no stret olgeta. From samting ya, oli no gat wan strong bodi mo oli no stap glad oltaem. Be nating se ol man oli wantem tufala samting ya tumas i bitim ol narafala samting, be oli no naf.
Ol man oli talemaot plante tingting, oli givim plante advaes finis olsem wanem blong gat strong bodi mo stap glad. Wan dokta, nem blong hem Dennis Jaffe, i talem se: “Long taem blong yumi, sipos fasin blong laef blong man i gud, hem i save gat strong bodi mo taem hem i sik, hem i save kam strong bakegen.” Wan dei, man ya Abraham Lincoln i talem se: “Ol man oli save stap hapi sipos oli wantem olsem. Hemia i dipen long olgeta nomo.” ?Olsem wanem? ?Yu yu agri wetem ol tok ya? ?Yu yu wantem stap glad? ?I tru se sipos man i gat strong bodi, hem i save stap glad?
Ol man oli traem plante defren kaen rod finis blong oli save stap glad. Oli stadi long tok blong ol waesman, long tingting blong man blong luk we hem i wok olsem wanem, mo long mining blong laef. Sam narafala oli wantem hapi tu, ale oli stadi long sayens, oli dro, oli katem pija, oli danis, oli mekem myusek. Be yet, blong man i rili save hapi, i klia we hem i mas gat strong bodi. Tufala samting ya oli joen. Long televisin, blong pulum ol man oli pem wan kaen meresin, oli stap talem se: “Sipos bodi blong yu i strong, yu yu gat evri samting.”
Folem tingting ya, plante man oli traem faenem plante defren kaen rod blong gat strong bodi. Samfala rod ya, plante man oli folem olgeta, mo sam narafala, smol man nomo i agri long olgeta. Long plante pablik laebri, i gat fulap buk we i tokbaot ol kakae we man i save tekem blong gat strong bodi. Be ol advaes we oli givim oli plante tumas. Wan dokta blong hat, Paul Dudley White, i talem se: “I stat longtaem bifo, ol man oli raetem plante buk we oli tokbaot fasin blong mekem bodi i strong. Beswan blong ol buk ya, (Regiment of Helthe) oli raetem wan taosen yia bifo.”
Nating se oli mekem ol samting ya, be bighaf blong ol man oli no gat strong bodi, mo oli no stap glad. Sipos yu yu tingbaot ol samting we ol man oli naf blong mekem tede, ating yu yu sapraes long tok ya. Be i klia se ol dokta i no save finisim sik, fasin blong kam olfala, mo ded.
I no gat rod yet blong skelem sipos man i hapi smol no i hapi bigwan. Mo tu man i no save talemaot se fasin ya i olsem wanem. Ating yu yu sapraes long samting ya tu. Wan man, Pierre Teilhard de Chardin, i mekem wan tok long “Glad Taem i Olsem Wanem.” Long en blong tok ya blong hem, hem i talem se: “Long plante handred yia finis, ol man oli tokbaot samting ya long plante buk mo oli stadi dip long hem. Plante man tugeta mo ol man wanwan oli mekem ekspiryens long hem. Yes, oli traem plante rod. Be sore tumas, oli no agri evriwan long risal blong ol stadi mo ol ekspiryens ya. Blong finisim bigfala toktok ya, i gat wan samting nomo we plante long yumi i agri long hem. Hemia: I blong nating nomo we yumi gohed blong traem faenem ansa long kwestin ya.”
?Yu yu gat sem filing ya long saed blong glad taem? Traem tingbaot mo ansa long ol kwestin ya: ?Yu yu rili hapi naoia? ?No yu ting se man i save hapi long heven nomo? ?I gat sam gudfala risen blong bilif se bambae yumi save gat strong bodi mo glad taem, mo yumi save kasem olgeta long wol ya nomo?