?Yu Yu Gat Fasin Tangkyu From Ogenaesesen Blong Jeova Long Wol?

?WANEM samting yu luk taem yu lukluk wan naesfala daemon? Ating yu luk wan naes samting we oli wokem blong flasem bodi. Nao traem yusum glas (maekroskop) blong lukluk daemon ya. ?Yu luk wanem? Ating yu luk sam skras mo sam hol no sam samting we i no stret long daemon ya.

?Olsem wanem, bambae yu spolem no yu sakem daemon ya from we yu lukluk hem long glas? !No gat! Taem yu no yusum glas ya, ating yu laekem yet naesfala kala blong daemon ya. Hem i saen mo i moa gud bitim ol narafala sas ston.

Ogenaesesen blong Jeova long wol i olsem wan daemon. I gat plante samting we i soemaot se hem i moa gud long ol narafala ogenaesesen long wol. Ogenaesesen ya i frengud wetem God. From samting ya, aposol Pita i talem long ol Kristin long faswan handred yia, i se: “Be yufala, God i bin jusumaot yufala blong yufala bambae i laen blong hem. Yufala i olsem ol pris blong King. Yufala i olsem ol man blong wan ples nomo, we yufala i tabu man blong God. Yufala i olsem ol man we God i tekem yufala i blong hem nomo.” (1 Pita 2:9) Olgeta oli gat hop blong go long heven. Tede bigfala hif blong “narafala sipsip,” we oli gat hop blong laef blong olwe long wol ya, oli joen long smol haf blong “tabu laen ya” blong wosipim God. (Jon 10:16) Tufala grup ya i mekem wan ogenaesesen we i moa gud bitim ol narafala ogenaesesen long wol ya. Hem i naes mo i saen olsem wan daemon we i moa gud long ol narafala sas ston.

Yu No Mas Lukluk Ol Smol Mastik Blong Ol Narafala Man

Yumi mas tingbaot se ol sinman nomo oli stap insaed long ogenaesesen ya. Maet yu wantem mekem olsem we yu stap lukluk long glas. Yu wantem lukluk olgeta man wanwan insaed long ogenaesesen ya. Sipos yumi mekem olsem, bambae yumi faenemaot ol slak fasin mo ol prapa fasin blong ol man we oli stap insaed long ogenaesesen ya.​—Rom 3:23.

Aposol Pol i tokbaot ol slak fasin blong hem se: “Taem mi wantem mekem ol samting we i gud, be oltaem mi stap jusumaot ol samting nomo we i nogud.” (Rom 7:21) Olgeta Kristin oli stap mekem wan faet we i sem mak. Evriwan i gat ol mastik. Maet sam man oli save harem nogud from ol mastik blong ol narafala man. Yumi save luk ol mastik mo ol slak fasin blong ol Kristin fren blong yumi, from we oli sinman nomo. ?Olsem wanem, yumi mas letem tingting blong yumi i foldaon no lego bilif blong yumi from? ?Olsem wanem, samting ya bambae i daonem fasin tangkyu blong yumi long ogenaesesen blong Jeova? No gat. Yumi no mas lukluk long glas. I min se yumi no mas lukluk long ol slak fasin blong ol man insaed long ogenaesesen ya, from we oli sinman nomo.

Baebol i tokbaot sam fasin we i save makemaot olgeta ya we tabu speret i stap wok long olgeta. Hemia “lav, glad, pis, longfala tingting, kaen fasin, gud fasin, bilif, kwaet fasin, fasin we man i save bos long tingting blong hem.” (Galesia 5:​22, 23, NW) Ol ogenaesesen olsem skul, politik, mo bisnes blong wol ya oli no gat fasin olsem. Baebol i talem se oli stap soemaot ol fasin we olgeta nomo oli wantem. “Oli stap rao oltaem, nao oli stap seraot from. Oli stap faet, oli stap jelas, oli stap kros, oli stap leftemap olgeta nomo, oli stap mekem enemi long olgeta oltaem, oli no save joen wanples. Oli wantem kasem mak blong narafala man, oli stap dring we oli lusum hed, oli stap mekem lafet blong mekem nogud nomo, mo oli stap mekem ol narafala samting olsem.” (Galesia 5:​20, 21) Olsem wan daemon we i stap saen long medel blong ol ston, ol man blong Jeova oli saen long medel blong wan wol we i fulap long ol rabis fasin.​—Matyu 5:​14-16.

“Mas Gat Wan Tingting Nomo”

Ol smosmol haf insaed long daemon (atom) oli joen gud blong mekem daemon i strong. I sem mak long ogenaesesen blong Jeova long wol. Ol man insaed oli joengud long bilif mo oli olsem brata sista long wol. Olgeta we oli haf blong ogenaesesen ya oli stap folem advaes we i stap long Baebol long 1 Korin 1:10 se: “Ol brata mo sista. Long nem blong Jisas Kraes ya, Masta blong yumi, mi mi talem strong long yufala se mi wantem tingting blong yufala i kam wan nomo. Bambae yufala i no moa seraot long ol narnarafala kampani. Yufala i mas gat wan tingting nomo mo fasin blong yufala i mas wan nomo.”

Ol Wetnes blong Jeova oli no seraot from ol kala blong man mo oli no flas from kantri blong olgeta. Oli “kasem waes long heven,” mo ‘oli joengud wetem ol narafala man.’ (Jemes 3:17) Yumi presem Jeova from ol fasin blong ol man long oganaesesen ya, nating se oli no stret gud olgeta.

Magasin ya The Christian Century, i tokbaot yia 1990 se, “wol ya i seraot tumas from ol skul, kala mo ol flas tingting blong man se kantri blong hem i gud moa long narafala kantri. Tingting ya i joen wetem ol bilif blong skul. I stat long India i go kasem Yurop mo i stat long Medel Is i go kasem long Pasifik, ol skul oli joen wetem fasin blong ol man i seraot from kala mo kantri. Mo samtaem oli joen long ol trabol blong politik.” Taswe olgeta we oli wantem mekem wok blong God oli save go long wan ogenaesesen nomo. Jeova i blesem ogenaesesen ya mo i stap harem gud from speret blong Jeova.

‘Mi Mekem Fored Blong Yu i Olsem Wan Daemon’

Daemon i wan strongfala ston i bitim ol narafala ston we ol man oli save long hem. Baebol i tokbaot daemon se oli stap yusum blong skrasem no katem ol strongfala samting. (Jeremaea 17:1) Tingbaot ol tok blong Jeova long Esikel se: “!Yu luk! Mi mi mekem fes blong yu i had olsem fes blong olgeta ya mo fored blong yu i strong olsem fored blong olgeta. Olsem wan daemon, hem i strong i bitim ston ya flin, mi mi mekem fored blong yu i olsem.” (Esikel 3:​8, 9) Jeova i givim strong tingting olsem wan daemon long Esikel, blong mekem hem i naf blong talemaot ol profet tok long ol man we oli stronghed.​—Esikel 2:6.

Tede tu, Jeova i mekem tingting blong ol man blong hem oli strong olsem daemon, blong oli fesem ol enemi blong olgeta. Ol man oli putum tabu long wok blong ol Wetnes, oli ronem olgeta, oli traem hangem olgeta, oli kilim nogud olgeta, oli putum olgeta long kalabus, mo oli stap givim kil long bodi blong olgeta, mo tu oli stap kilim olgeta i ded. Be ol Wetnes oli winim ol trabol ya mo oli soemaot se bilif blong olgeta i strong.

“Ol Man Blong Wok Blong Mi Bambae Oli Glad”

Baebol i stap tokbaot wan taem we ol man bambae oli “folem fasin blong Kristin man, be oli no wantem paoa blong God nating long laef blong olgeta.” (2 Timote 3:​1, 5) Ripot long wan nyuspepa i talem se: “Ol man blong Protestan skul, ol man blong Roman Katolik skul mo ol Jyu oli wari from namba blong olgeta i stap godaon” long ol jyos no haos prea blong olgeta. Be ol Wetnes blong Jeova oli defren. Olgeta oli tingting strong blong lanem Baebol. Namba blong ol yangfala mo ol olfala, ol man mo ol woman i stap gru. Olgeta oli stap go long ol miting oltaem. Wan leta we i go long wan nyuspepa i tokbaot olgeta se: “Skul blong olgeta i olsem wan sas samting long olgeta, mo bigfala wari blong olgeta se oli mas talemaot bilif blong olgeta long ol narafala man.”

Fasin olsem i mekem se ogenaesesen blong Jeova i defren. Hem i olsem wan naesfala daemon. Yumi save talem bigfala tangkyu long God from we hem i givim paoa long olgeta we oli stap insaed long ogenaesesen ya. Mo hem i yusum tabu speret blong hem blong lukaot long olgeta.

Profet Aesea i talemaot finis se: “Hemia wanem Hae Masta Jeova i talem: ‘!Yu luk! Ol man blong wok blong mi bambae oli kakae . . . !Yu luk! Ol man blong wok blong mi bambae oli dring . . . !Yu luk! Ol man blong wok blong mi bambae oli glad . . . !Yu luk! Ol man blong wok blong mi bambae oli singaot bigwan from we oli harem harem gud long hat blong olgeta.’”​—Aesea 65:​13, 14.

Tede yumi luk profet tok ya i kamtru. !God i stap lukaot gud long ol man blong hem, long fasin we i defren olgeta! Taswe, sipos yu stap joen wetem olgeta, yu no mas letem ol nogud tingting oli blokem yu blong stap glad. Yu no mas lukluk ol smosmol poen long ol man, i no gat wan narafala ogenaesesen long wol, we i stap harem gud from God i stap lukaot gud long hem. I gud tumas blong stap insaed long ogenaesesen ya. Taswe yu mas holemtaet long hem, olsem wan sas samting.