Hem i Faet From Bilif Blong Hem
TRI yia bifo finis, Caridad Bazán Listán, wan long ol Wetnes blong Jeova long Cádiz, hemia long Spen, oli mas katem hem kwiktaem. Ston i gru insaed long bel blong hem mekem se hem i kasem fiva mo i stap spolem rod we blad i pas long hem. Taem oli karem hem i go long wan hospetal we i stap kolosap, hem i eksplenem bilif blong hem long saed blong Baebol blong no agri blong tekem blad transfyusen. Ol dokta oli agri blong katem hem we oli no yusum blad. Be, bifo we oli tekem hem i go insaed long rum blong katem man, ol dokta oli askem hem blong saenem wan leta. Hemia i blong soemaot se oli laekem blong obei long desisin blong hem long saed blong blad be se sipos wan bigfala trabol i kamaot, oli wantem hem i agri long wanem samting we oli ting se i stret blong givim long hem.
Wan elda blong kongregesen we i stap long hospetal long taem ya wetem boe blong Caridad, we hem tu i wan Wetnes, oli givim advaes long Caridad blong kasem save long olgeta samting we i stap insaed long leta olsem bifo we hem i saenem. Saen blong sista ya i save givim paoa long ol dokta blong givim blad long taem we oli nidim kwiktaem. Taem man we i wok long hospetal ya i kam blong tekem hem i go insaed long rum blong katem man, sista ya i eksplenem se hem i no save saen long pepa ya. Oli karem hem i gobak long rum blong hem mo oli fosem hem strong blong traem jenisim tingting blong hem.
Afta long sam toktok oli mekem desisin blong singaot wan jaj we i lukaot long saed ya blong mekem se sista ya i save lego bilif blong hem, be oli no winim. Caridad i eksplenem se hem i harem se bambae hem i gat poen fored long God sipos hem i agri blong oli givim blad long hem. Hem i soemaot se aninit long Loa blong Moses, sipos man i fosem wan woman mo i mekem nogud wetem hem, oli tingbaot woman ya olsem hem i no gat poen sipos hem i bin singaot from help blong agensem samting ya. (Dutronome 22:23-27) Hem i talem se, “Ol dokta oli stap spolem tingting blong mi mo oli stap pusum mi blong spolem voes blong hat mo tingting blong mi nao mi mas agensem fasin ya we i olsem oli stap fosem mi blong mekem nogud wetem mi.”
Sam haoa i pas, mo biaen ol dokta oli agri blong katem hem we oli no yusum blad. Insaed long rum blong katem man, Caridad i askem olgeta blong letem smoltaem long hem blong prea long Jeova. Hem i mekem, mo wok blong olgeta blong katem hem i gohedgud.
Nating se i olsem, biaen sik blong Caridad i kam moa nogud, mo ol dokta oli mekem desisin blong no tingbaot tingting blong sista ya mo blong fosem blad transfyusen i go long hem. Taswe, wan dokta wetem wan dresa oli rere blong givim blad long hem. Nating se Caridad i sik tumas, hem i agensem samting ya wetem olgeta paoa blong hem. Hem i traehad tu blong kakae brekem plastik paep we blad i mas pas long hem. Biaen, dokta ya i sem tumas long samting we oli stap mekem nao hem i stop. Hem i talem se, “Mi no save win wetem samting ya. !Mi mas lego!”
Caridad i pastru long bigfala hadtaem ya mo i kamgud we i no moa gat wan sik i kamaot biaen from. Ol dokta mo ol dresa oli sapraes tumas from strong tingting mo bilif blong hem. Ol samting ya oli kamaot taem Caridad i gat 94 yia.