Save Jeova Tru Long Tok Blong Hem
“Mo hemia laef ya we i no save finis, we man i kasem save long yu, we yu nomo yu God tru, mo we man i kasem save long mi ya, Jisas Kraes, we yu yu sanem mi mi kam.”—JON 17:3.
1, 2. (a) ?Wanem mining blong “save” mo “kasem save” olsem we Baebol i yusum? (b) ?Wanem eksampel i mekem mining i kam klia moa?
BLONG save wan man taem yu luk hem nomo no blong kasem save we i no dip hemia i no stret wetem mining blong ol tok ya “save” mo “kasem save” olsem we oli yusum long Baebol. Long Baebol samting ya i minim “save we i kamaot from ekspiryens,” wan save we i soem “wan fasin fren blong tu man we tufala i trastem tufala.” (The New International Dictionary of New Testament Theology) Hemia i minim fasin blong save Jeova from we yu makem ol spesel samting we hem i stap mekem, olsem ol eksampel long buk blong Esikel we i soem se God i stap jajem ol man we oli stap mekem ol rabis fasin, hem i se: ‘Mo bambae yufala i mas save se mi mi Jeova.’—Esikel 38:23.
2 Ol defren rod we yumi save yusum “save” mo “kasem save” bambae i kam klia wetem sam eksampel. Long plante man we oli stap talem se oli mekem wok long nem blong Jisas, Jisas i talem se, “Neva mi mi save yufala”; hem i minim se neva hem i bin joen wetem olgeta. (Matyu 7:23) Seken Korin 5:21 i talem se Kraes “i no save sin.” (NW) Samting ya i no min se hem i no luksave sin, no gat, be hem wan i no joen long sin. Sem mak, taem Jisas i talem se: ‘Mo hemia laef ya we i no save finis, we man i kasem save long yu, we yu nomo yu God tru, mo we man i kasem save long mi ya, Jisas Kraes, we yu yu sanem mi mi kam,’ hemia i no fasin blong save nomo sam samting long saed blong God mo Kraes, hem i go moa.—Lukluk Matyu 7:21.
3. ?Wanem i pruvum se Jeova i gat wan mak blong trufala God?
3 Yumi save kasem save plante long ol fasin blong Jeova tru long Tok blong hem, Baebol. Wan long olgeta hem i fasin blong hem blong save talem profet tok we i stret. Fasin ya i wan mak blong trufala God: “Soem mo talem long mifala ol samting we bambae oli kamaot. Ol faswan samting—oli wanem—talem long mifala, blong mifala i save putum hat blong mifala long hem mo save fyuja blong olgeta. No yu mekem mifala i harem ol samting we bambae oli kamaot. Talem ol samting we bambae oli kamaot biaen, blong mifala i save se yufala nao yufala ol god.” (Aesea 41:22, 23) Long Tok blong hem, Jeova i talem ol faswan samting long saed blong wok we i kamaot long wol mo laef we i stap long hem. Hem i bin talem bifo finis ol samting we bambae oli hapen mo oli kamtru. Mo naoia tu hem i ‘mekem yumi i harem ol samting we bambae oli kamaot,’ speseli ol samting blong hapen long “lasdei” ya.—2 Timote 3:1-5, 13; Jenesis 1:1-30; Aesea 53:1-12; Daniel 8:3-12, 20-25; Matyu 24:3-21; Revelesen 6:1-8; 11:18.
4. ?Olsem wanem Jeova i yusum paoa blong hem, mo olsem wanem bambae hem i yusum yet?
4 Narafala fasin blong Jeova hem i paoa. Yumi luksave samting ya long skae, ples ya we ol sta oli stap bon olsem bigfala faea mo givimaot laet mo hot. Taem ol rabis man mo ol rabis enjel oli agensem hae rul blong Jeova, hem i yusum paoa blong hem olsem “wan strong man blong faet,” blong faet agensem olgeta mo holem gud nem blong hem mo ol stret rul blong hem. Long taem olsem hem i no wet blong yusum paoa blong hem blong spolem olgeta, olsem long Bigfala Wora long taem blong Noa, long taem ya we Sodom mo Gomora i lus, mo long taem ya we hem i tekem ol man Isrel tru long Red Si. (Eksodas 15:3-7; Jenesis 7:11, 12, 24; 19:24, 25) I no longtaem, God bambae i yusum paoa blong hem blong “kilimdaon Setan olgeta, we bambae yufala i save go purumbut long hem.”—Rom 16:20.
5. ?Wanem fasin Jeova i gat tu wetem paoa blong hem?
5 Nating se paoa ya blong God i no gat mak blong hem, be i gat tingting we i stap daon. Ol Sam 18:35, 36 i talem se: “Prapa tingting blong yu we i stap daon bambae i leftemap mi. Bambae yu yu mekem ples i bigwan i naf long mi blong mi wokbaot long hem.” (NW) Tingting daon blong God i mekem se hem “i glad blong lukluk i kamdaon long skae mo graon. Hem i stap leftemap ol puaman, i stap tekemaot olgeta long ol trabol blong olgeta.”—Ol Sam 113:6, 7.
6. ?Wanem fasin blong Jeova i stap sevem man?
6 Fasin sore blong God long ol man i sevem ol man. !Tingbaot, hem i soem fasin sore long Manase taem hem i fogivim hem, nating se Manase i mekem ol sin we oli nogud we oli nogud! Jeova i talem se : “Taem mi mi talem long wan man nogud se: ‘Tru ya, bambae yu yu ded,’ mo hem i tanem baksaed long sin blong hem mo hem i gohed blong mekem stret fasin, ol sin we hem i bin mekem bambae mi no moa tingbaot blong mi agensem hem from. Stret fasin mo ol fasin we oli stret hemia nao wanem hem i stap mekem. Tru ya bambae hem i gohed blong stap laef.” (Esikel 33:14, 16; 2 Kronikel 33:1-6, 10-13) !Jisas i soem tingting blong Jeova taem hem i talem fasin blong fogivim man long 77 taem, 7 taem long wan dei tu!—Ol Sam 103:8-14; Matyu 18:21, 22; Luk 17:4.
Wan God We i Gat Filing
7. ?Olsem wanem Jeova i defren long ol god blong ol man Gris, mo wanem gudfala jans i open long yumi?
7 Ol man Gris we oli waes gud long fasin blong toktok, olsem ol Epikyurian, oli bilif long ol god be oli tingbaot olgeta olsem we ol god ya oli stap longwe long wol, olsemia nao oli no intres long ol man no long ol filing blong ol man. !Samting ya i defren long fasin fren bitwin Jeova mo ol trufala Wetnes blong hem! “Hae God i stap glad long ol man blong hem.” (Ol Sam 149:4) Ol nogud man we oli laef bifo Bigfala Wora i ron, oli mekem hem i sore tumas mo hem i “harem nogud tumas from.” Isrel i mekem Jeova i harem i soa tumas from we oli no stap tru long hem. Ol Kristin oli save mekem speret blong Jeova i harem nogud sipos oli no obei long hem; be sipos oli holemstrong long hem, oli save mekem hem i glad. !Wan sapraes blong tingbaot se man nating we i stap long wol i save mekem Man we i Wokem olgeta samting long heven mo long wol i harem nogud no i glad! !From ol samting we hem i stap mekem long yumi, i gud tumas we yumi gat gudfala jans ya blong mekem hem i haremgud!—Jenesis 6:6; Ol Sam 78:40, 41; Proveb 27:11; Aesea 63:10; Efesas 4:30.
8. ?Olsem wanem Ebraham i yusum fasin fri blong hem blong toktok wetem Jeova?
8 Tok blong God i soem se Jeova i givim nambawan “fasin fri blong toktok” long yumi. (1 Jon 4:17, NW) Makem samting ya long Ebraham taem Jeova i kam blong spolem Sodom. Ebraham i talem long Jeova se: “?Bambae yu kilim ol man nogud wetem ol stret man tu? ?Sipos i gat fefte man i stap long taon ya we oli stap mekem i stret nomo, yu ting se bambae yu mas spolem olgeta man blong taon ya? . . . !Be hemia i krangke olgeta! Yu yu man blong jajem olgeta man blong wol. !Yu yu stap jajem man long stret fasin nomo!” !Tingbaot ol tok olsem blong talem long God! Be Jeova i agri blong sevem Sodom sipos i gat 50 man i stap we oli stap mekem i stret. Ebraham i gohed mo i mekem namba i godaon long 20. Hem i harem se maet hem i save bitim mak blong askem. Nao hem i talem se: ‘Jeova, plis yu no kros. Hemia i las taem blong mi blong tok. Bambae mi no moa tok bakegen. ?Sipos i gat ten man nomo i stap we oli stap mekem i stret nomo, bambae i olsem wanem nao?’ Bakegen Jeova i talem se: “Sipos mi faenem we i gat ten man i stap we oli stap mekem i stret nomo, bambae mi no spolem taon ya.”—Jenesis 18:23-33.
9. ?From wanem Jeova i letem Ebraham i toktok olsem long hem, mo yumi lanem wanem samting from?
9 ?From wanem Jeova i givim fasin fri ya blong toktok long Ebraham, blong hem i save toktok olsem? From wan samting se, Jeova i luksave filing blong Ebraham. Hem i save se, Lot, nefiu blong Ebraham i stap laef long Sodom, mo Ebraham i stap tingbaot laef blong hem. Mo tu, Ebraham i fren blong God. (Jemes 2:23) ?Taem wan man i tok strong long yumi, yumi traem blong luksave ol filing long ol toktok blong hem mo lesin long hem, antap moa sipos hem i wan brata we i harem nogud long sam samting? ?Yu yu haremgud blong luk se Jeova bambae i harem save taem yumi yusum fasin fri ya blong toktok, olsem hem i mekem wetem Ebraham?
10. ?Olsem wanem fasin fri blong toktok i givhan long yumi taem yumi prea?
10 Antap moa taem yumi lukluk i go long hem olsem man we i “stap harem prea” blong yumi, nao yumi wantem tumas fasin fri ya blong toktok blong yumi talemaot tingting blong yumi long hem, taem tingting blong yumi i foldaon bigwan no taem yumi harem nogud. (Ol Sam 51:17; 65:2, 3, NW) Mo tu long ol taem olsem taem yumi no save ol toktok blong talem, “tabu speret ya, hem nomo i stap prea long God oltaem from yumi, hem i stap krae we i no gat ol tok we i naf blong talem tok blong hem,” mo Jeova i lesin. Jeova i save ol tingting blong yumi: “Yu stap longwe, be yu save olgeta tingting blong mi. Nomata we mi no tok yet, be yu yu save finis ol samting ya we bambae mi talem.” Nating se i olsem, yumi mas stap askem, lukaot, mo kilkilim doa.—Rom 8:26; Ol Sam 139:2, 4; Matyu 7:7, 8.
11. ?Olsem wanem yumi save se Jeova i kea long yumi?
11 Jeova i kea long yumi. Hem i givim kakae long olgeta laef samting we hem i wokem. “Olgeta samting we yu yu mekem, oli stap lukluk long yu, mo yu yu stap givim kakae long olgeta taem oli wantem. Yu stap givim plante kakae long olgeta we oli hanggri, yu stap mekem olgeta evri wan oli harem gud.” (Ol Sam 145:15, 16) Hem i askem yumi blong luk olsem wanem hem i stap fidim ol pijin long ol bus. Luk ol flaoa ya we oli stap gru olbaot, hem i flasem gud olgeta. Jisas i gohed i se God bambae i mekem olsem mo bambae hem i mekem moa long yumi bitim we hem i mekem long ol samting ya. Taswe yumi no mas wari tumas. (Dutronome 32:10; Matyu 6:26-32; 10:29-31) Fas Pita 5:7 i askem yufala blong “putum ol trabol blong yufala long han blong hem, from we oltaem hem i stap tingbaot yufala.”
“Stret Pija Blong God We i Stap Soemaot Prapa Fasin Blong Hem”
12, 13. Yumi save luk Jeova tru long ol samting we hem i wokem mo ol fasin blong hem we i stap long Baebol; ?wanem samting moa yumi save luk mo lesin long God long hem?
12 Yumi save luk Jeova tru long ol samting we hem i wokem; mo tu yumi save luk hem taem yumi ridim ol fasin blong hem long Baebol; yumi save luk hem tu long ol toktok mo ol fasin blong Jisas Kraes. Jisas hem wan i talem olsem, long Jon 12:45 i se: “Man we i luk mi, hem i luk hemia we i sanem mi mi kam.” Mo bakegen, long Jon 14:9 i se: “Man we i luk mi, hem i luk Papa blong mi.” Kolosi 1:15 i talem se: “[Jisas] i olsem wan pija we yumi save luk, wan pija blong God ya we yumi no save luk.” Hibrus 1:3 i talem se: “[Jisas] i olsem laet ya [blong God] we i saenaot i kam long yumi. Hem i olsem stret pija blong God, we i stap soemaot prapa fasin blong hem.”
13 Jeova i sanem Pikinini blong hem i no blong givim wan ransom nomo, be tu i blong givim wan eksampel blong ol man oli folem, tugeta long toktok mo wok blong hem. Jisas i stap talem ol tok blong God. Hem i talem long Jon 12:50 i se: “Ol tok ya we mi mi stap talemaot, hemia ol tok ya we Papa blong mi i talemaot long mi finis blong mi talem.” Hem i no stap mekem ol prapa samting blong hem, be hem i stap mekem ol samting we God i talem long hem blong hem i mekem. Long Jon 5:30 hem i talem se: “Mi mi no save mekem wan samting nating long tingting blong mi nomo.”—Jon 6:38.
14. (a) ?Wanem samting Jisas i luk nao hem i sore from? (b) ?From wanem fasin blong toktok blong Jisas i pulum plante man oli kam blong lesin long hem?
14 Jisas i luk ol man we oli gat leprosi, oli no save wokbaot, sora oli fas, oli blaen, mo olgeta we devel i stap long olgeta mo olgeta we oli stap kraekrae from ol ded man. Fasin sore i pulum hem, nao hem i mekem ol sik man oli kam gud bakegen mo ol ded man oli laef bakegen long ded. Hem i luk ol hif man oli hanggri mo oli no gat kakae long saed blong speret, mo hem i stat blong tijim olgeta long plante samting. Hem i no tij wetem ol stret tok nomo be tu hem i tij wetem gudfala toktok we oli kamaot long hat blong hem mo oli go stret long hat blong ol narafala man, we i pulum olgeta oli kam long hem, we i pulum olgeta long eli moning blong oli kam long tempel blong lesin long hem, we i mekem se oli gohed blong folem hem, mo glad blong lesin long hem. Oli kam blong lesin long hem, oli talem se “i no gat man samtaem we i stap tok olsem man ya.” Oli sapraes long fasin blong hem blong tij. (Jon 7:46; Matyu 7:28, 29; Mak 11:18; 12:37; Luk 4:22; 19:48; 21:38) Mo taem ol enemi blong hem oli traem kasem hem wetem ol kwestin, hem i tanraon i kasem olgeta wetem ol kwestin blong hem, nao oli no moa gat tok blong talem.—Matyu 22:41-46; Mak 12:34; Luk 20:40.
15. ?Wanem bigfala stampa tok blong wok blong prij blong Jisas, mo olsem wanem hem i pulum ol narafala blong oli talemaot?
15 Hem i talemaot se ‘taem blong Kingdom hem i kam kolosap nao’ mo i askem ol man we oli stap lesin long hem blong ‘fastaem oli mas lukaot Kingdom blong God.’ Hem i sanem ol narafala blong oli prij se ‘taem blong Kingdom i kam kolosap nao,’ blong ‘pulum ol man blong oli kam man blong hem,’ blong oli kam wetnes blong Kraes “gogo i finisim olgeta ples long wol.” Tede kolosap fo mo haf milyan Wetnes blong Jeova oli stap wokbaot long ol step blong hem, oli stap mekem ol samting ya.—Matyu 4:17; 6:33; 10:7; 28:19; Ol Wok 1:8.
16. ?Olsem wanem fasin lav blong Jeova i kasem bigfala traem, be samting ya i givhan olsem wanem long ol man?
16 “God i stampa blong fasin ya blong laekem tumas ol man,” 1 Jon 4:8 i talem long yumi. Nambawan fasin ya blong hem i kasem bigfala mak ya we yumi no naf blong tingbaot taem hem i sanem stret Pikinini blong hem we hem nomo hem i gat blong i kam long wol blong i ded. Soa we Pikinini ya we hem i laekem i stap harem i soa long hem mo ol toktok we hem i stap talem long Papa blong hem long heven taem hem i harem nogud long bodi i mas mekem Jeova i sore tumas, nating se Jisas i pruvum gyaman toktok blong Setan agensem Jeova, se ol man long wol oli no naf blong holemstrong bilif blong olgeta long Hem sipos oli kasem bigfala traem. Yumi mas luksave tu bigfala samting long sakrifaes blong Jisas, from we God i sanem hem i kam blong hem i ded from yumi. (Jon 3:16) Hemia i no wan ded we i isi mo i kwik. Blong luksave paoa blong samting ya long God mo Jisas mo luksave bigfala sakrifaes we tufala i mekem long yumi, i gud yumi skelem store blong Baebol long ol samting ya.
17-19. ?Olsem wanem Jisas i tokbaot trabol we bambae hem i kasem?
17 Fo taem we Jisas, i talem long ol aposol blong hem wanem bambae i hapen. Sam dei nomo bifo we samting ya i kamaot, hem i talem se: “Naoia yumi stap go antap long Jerusalem. Be bambae i no longtaem oli putum mi, mi Pikinini blong Man, mi go long han blong ol jif pris mo tija blong Loa. Olgeta ya bambae oli jajem mi se bambae mi ded, mo bambae oli putum mi long han blong ol hiten man. Nao olgeta ya bambae oli mekem plei long mi, oli spet long mi, oli wipim mi mo bambae oli kilim mi, mi ded.”—Mak 10:33, 34.
18 Samting ya we bambae i hapen long Jisas, i mekem tingting blong hem i hevi, hem i haremsave finis soa we bambae i kamaot taem ol man Rom bambae oli wipim hem. Ol strap ya we oli stap yusum blong wipim ol man long hem, oli gat ol pispis aean mo ol bun blong sipsip insaed long olgeta; taswe taem oli gohed blong wipim man long hem, hem i terem ol mit long baksaed mo long ol leg. Sam manis bifo, Jisas i soem nogud filing taem hem i stap tingbaot samting ya we bambae i hapen long hem, nao hem i talem, olsem we yumi ridim long Luk 12:50: “I gat wan samting olsem baptaes i stap yet blong mi. Mo mi mi stap harem nogud tumas oltaem, gogo samting ya bambae i kamtru, i finis.”
19 Tingting i kam hevi moa taem dei ya i stap kam kolosap. Hem i tokbaot samting ya long Papa blong hem long heven: “Naoia tingting blong mi i hevi tumas. ?Bambae mi save talem olsem wanem? Mi no save talem se ‘Papa, plis yu no letem ol trabol ya we oli stap kam long mi naoia oli kasem mi’, no gat. From we mi mi kam long wol ya blong oli kasem mi.” (Jon 12:27) !Tingbaot filing blong Jeova taem hem i harem tok ya blong stret Pikinini blong hem! Long Getsemane, sam haoa nomo bifo long ded blong hem, tingting blong Jisas i trabol tumas mo hem i talem long Pita, Jemes, mo Jon se: “Tingting blong mi i hevi tumas, we kolosap mi mi ded from.” Sam menet biaen hem i talem laswan prea blong hem long saed blong bisnes ya long Jeova: “‘Papa, sipos yu save letem, plis yu tekemaot kap ya, blong bambae mi mi no dring long hem. Be yu no mekem olsem we mi mi wantem, yu mekem olsem we yu nomo yu wantem.’ Nao tingting blong hem i trabol tumas, mo hem i stap prea i strong moa, we swet blong hem we i drop, i foldaon long graon, i olsem blad nomo.” (Matyu 26:38; Luk 22:42, 44) Maet hemia i olsem samting we ol dokta oli kolem hematidrosis. Samting ya i no stap kamaot plante taem be hem i save kamaot taem tingting blong man i hevi tumas.
20. ?Wanem i givhan long Jisas blong hem i gotru long trabol ya blong hem?
20 Long taem ya long Getsemane, Hibrus 5:7 i talem se: “Long laef blong hem long wol ya, Kraes i stap prea long God, i stap askem ol samting long hem, i stap krae bigfala, we wora i stap kamaot long ae blong hem. God i gat paoa blong sevem hem long ded, mo from we tingting blong Kraes i stap daon, God i harem hem.” From we “God i gat paoa blong sevem hem long ded” be i no bin sevem hem long ded, ?olsem wanem nao God i harem prea blong hem? Luk 22:43 i givim ansa, i se: “Wan enjel i aot long heven i kam, nao i kamtru long Jisas, i mekem hem i strong bakegen.” Prea ya i gat ansa blong hem from we God i sanem enjel ya blong mekem Jisas i strong blong gotru long had taem ya.
21. (a) ?Wanem i soem se Jisas i winim trabol ya? (b) ?Taem ol traem blong yumi oli kam strong moa, i gud sipos yumi save talem wanem?
21 Samting we i kamaot i pruvum samting ya. Taem tingting blong hem we i trabol tumas i finis, Jisas i girap, i gobak long Pita, Jemes, mo Jon, hem i talem se: “Yufala i stanap, yumi go.” (Mak 14:42) I olsem we hem i talem se, ‘I gud mi go blong man ya we bambae i kisim mi i letem mi mi go long han blong ol enemi blong mi, blong kampani blong ol rabis man oli holemtaet mi, blong oli jajem mi blong nating nomo, blong talem se mi mas ded nating se mi no mekem i rong. I gud mi go blong oli mekem plei long mi, spet long mi, wipim mi, mo nilim mi long wan pos.’ Long sikis haoa hem i stap hang long ples ya, i harem i soa tumas, i holemstrong longtaem go kasem en. Taem hem i ded, hem i singaot bigwan from we hem i winim: “!Olgeta samting i finis nao!” (Jon 19:30) Hem i stap holemstrong nomo mo hem i pruvum bilif blong hem blong leftemap hae rul blong Jeova. Evri samting we Jeova i sanem hem i kam long wol blong hem i mekem, hem i finisim olgeta. ?Taem yumi ded no taem Amageden i kam, bambae yumi save talem long saed blong wok we Jeova i givim long yumi se: “Olgeta samting i finis nao”?
22. ?Wanem mak save long saed blong Jeova i mas kasem?
22 Nating se wanem bambae i hapen, yumi save sua se long prapa taem blong Jeova we i stap kam kwiktaem, ful “wol ya bambae i fulap tru long save blong Jeova olsem we ol wora oli kavremap solwora.”—Aesea 11:9.
?Yu Yu Tingbaot Yet?
◻ ?Wanem mining blong save mo kasem save?
◻ ?Olsem wanem yumi luksave fasin sore mo fasin fogif blong Jeova long Tok blong hem?
◻ ?Olsem wanem Ebraham i yusum fasin fri blong toktok wetem Jeova?
◻ ?Olsem wanem yumi save luk ol fasin blong Jeova taem yumi luk laef blong Jisas?