Stampa Blong Fasin No Fraet We i No Save Foldaon

“WAN noes i mekem mifala i stop wantaem nomo. Long wan bus long lefsaed blong mifala, tu pijin oli ron i kam from mifala we wing blong tufala i open. Long fored long mifala, i gat tu eg oli stap long wan smol hol long graon. Tufala pijin ya oli blokem mifala blong no wokbaot long nes blong tufala we mifala i no luk. Evri taem we mifala i wantem go kolosap moa blong tekem foto long ol naesfala eg ya we oli gat sam braon mak long olgeta, tufala pijin ya oli mekem sem mak bakegen. Nao long tingting blong mifala, mifala i talem se, ‘?Oli no fraet a?’ ”

Hemia ekspiryens blong fo man we oli go kolosap long nes blong wan pijin, nem blong hem dikop, we i gat ol mak long hem long kala. Wan pijin we i smol moa, hem i blaksmit plova. Long buk ya Everyone’s Guide to South African Birds, tufala man ya blong stadi long ol pijin, Sinclair mo Mendelsohn, oli eksplenem se: “Ol man mo woman pijin ya we oli gat pikinini, oli strong blong protektem nes mo ol smol pikinini blong olgeta, mo oli kros bigwan taem wan samting i traem blong go kolosap. Oli no kea long saes blong ol samting we oli wantem go kolosap, mo oli flae i go antap we oli singaot bigwan, mo oli daeva i kamdaon wantaem nomo long ol man tu, blong givim woning long olgeta blong kamaot long ples ya.”

Samfala oli bin luk wan bigfala elefen i wokbaot i go long ples we i no save se i gat nes blong wan blaksmit plova i stap long hem, ale pijin ya i statem fasin ya blong hem blong givim woning long elefen ya. Kolosap oltaem ol elefen oli agri blong tanem raon i go long narafala rod.

?Ol pijin oli kasem fasin no fraet ya weples? I kamaot long Hemia we i wokem olgeta. Jeova God i putum long tingting blong ol smol pijin ya wan fasin blong blokem ol anamol we oli bigwan moa blong no spolem nes no smol pikinini blong olgeta.

Wan Lesen Blong Ol Kristin

Pijin ya i save lanem ol Kristin long wan samting, nating se oli wantem go moa long fasin no fraet we oli bon wetem. Oli mas folem eksampel blong Masta blong olgeta, Jisas Kraes, we hem i no fraet blong obei long ol loa blong God. (Hibrus 12: 1-3) Baebol i agensem ol man we oli fraet nao oli no wantem mekem wok blong God. (Hibrus 10:39; Revelesen 21:⁠8) Long semtaem, Jeova i kasem save se yumi no stretgud olgeta mo Hem i save se samtaem yumi mekem sin no yumi sot long fasin no fraet we yumi nidim blong mekem wok blong hem. (Ol Sam 103:​12-14) ?Wan man i save mekem wanem sipos fraet i blokem hem blong mekem wanem i stret?

Wan Kristin i mas prea long God blong askem paoa blong fesem ol traem mo blong gohed blong mekem wok blong God. Baebol i gat promes ya blong God we i mekem yumi haremgud se: “Hem i stap givim paoa long olgeta we oli taed; mo long hemia we i no gat paoa, hem i givim bigfala paoa long hem. Ol boe bambae oli kam taed mo slak, mo ol yangfala man bambae oli foldaon, be olgeta we oli hop long Jeova bambae oli kasem paoa bakegen. Bambae i olsem we oli gat wing, olsem ol igel, blong go antap. Bambae oli resis, be bodi blong olgeta i no slak. Bambae oli wokbaot, be oli no taed.” (Aesea 40: 29-31) Plante man we oli no stretgud olgeta oli luksave se ol tok ya oli tru long laef blong olgeta, “oli no gat paoa, be God i givim paoa long olgeta.” (Hibrus 11⁠:34) Wan gudfala eksampel, hemia Kristin aposol Pol we i raetem se: “Masta blong yumi, hem i stap wetem mi, mo hem i givim paoa long mi blong mi talemaotgud olgeta tok blong hem long fes blong ol hiten man, blong oli harem.”​—⁠2 Timote 4:⁠17.

Ol nyuwan tu we oli wantem folem Jisas Kraes, oli save kasem paoa ya blong givhan long olgeta. Tingbaot man Saot Afrika ya we nem blong hem Henry, we i stap lukaot long mane blong jyos blong hem, mo haos blong hem i stap kolosap long haos blong pasta blong hem. Henry i stap lukaot trutok. Nating se hem i holemstrong long jyos blong hem, wan dei hem i agri blong stadi Baebol fri nomo wetem ol Wetnes blong Jeova. Samtaem i pas, ale hem i talem se hem i wantem kam wan Wetnes mo i askem wanem nao hem i mas mekem blong kasem mak ya. Oli eksplenem long hem se fastaem hem i mas kamaot long jyos blong hem. (Revelesen 18:⁠4) From we pasta i stap laef kolosap mo i fren blong hem, Henry i harem se hem i no save raetem leta nomo blong talem se bambae hem i kamaot long jyos blong hem, be i nidim blong eksplenem bisnes ya stret long pasta. Hem i no fraet blong mekem samting ya.

Pasta i sapraes mo samtaem biaen, hem i tekem jeaman blong komiti blong jyos mo sam narafala memba blong jyos blong visitim Henry. Oli wantem save from wanem hem i kamaot long jyos blong olgeta blong kam wan memba blong wan skul we, long tingting blong olgeta, skul ya i no gat tabu speret blong God. Henry i eksplenem se: “Fastaem mi fraet blong ansa long olgeta, from oltaem oli gat bigfala paoa long mi. Be mi prea long Jeova blong givhan long mi, mo Hem i mekem se mi save tok long saed blong trutok se: ‘Long olgeta skul blong wol, ?weswan nomo i stap yusum nem blong God, Jeova? ?I no ol Wetnes blong Jeova? ?Yufala i ting se God i save letem olgeta oli holem nem blong hem mo no givim tabu speret blong Hem long olgeta?’ ” Ol bigman ya blong jyos oli no save ansa long wan tok olsem. Henry i talem tangkyu tumas long save mo paoa we God i stap givim, mo naoia hem i no fraet blong joen wetem ol Wetnes blong Jeova long minista wok long ol haos wanwan.

Yes, blong stap olsem wan tru Kristin i nidim fasin no fraet. Taem wol ya i stap kam long en blong hem, ol traem long saed blong bilif bambae oli kam antap moa. Setan i stap traem blong mekem ol man blong wok blong Jeova oli no moa holemstrong bilif blong olgeta, blong hem i save spolem nambawan hop blong olgeta, hemia laef we i no save finis. (Skelem wetem Revelesen 2⁠:10.) Be yumi mas neva lego. Nating sipos yumi slak smoltaem from yumi fraet, Jeova i save halpem yumi blong kam strong bakegen. Gohed blong askem paoa long hem blong gohed blong mekem wok blong hem. Tingbaot, hemia we i wokem ol pijin we oli no save fraet, hem i Stampa blong fasin no fraet we i no save foldaon. Yes, ol trufala Kristin oli mas ‘mekem tingting blong olgeta i strong blong talem se: “Hae God i stap givhan long mifala, mifala i no save fraet. ?Wanem samting bambae ol man oli save mekem long mifala?” ’​—⁠Hibrus 13:⁠6.