Wan Bigfala Hif Blong Ol Man Blong Mekem Tru Wosip—?Oli Kamaot Weples?
“Mi luk bakegen, nao i gat wan bigfala hif blong man, . . . we oli kamaot long olgeta kala mo long olgeta laen, mo long olgeta kantri, mo long olgeta lanwis. Oli stap stanap long fes blong God ya we i stap sidaon long bigfala jea blong hem, mo long fes blong Smol Sipsip.”—REVELESEN 7:9.
1. ?From wanem yumi intres bigwan long vison long profet tok blong Revelesen tede?
KOLOSAP long en blong faswan handred yia K.T., aposol Jon i luk sam vison we oli save mekem man i sapraes. Ol samting we hem i luk long ol vison ya, oli joen wetem stampa tingting blong Jeova. Sam long ol samting we hem i luk, oli stap kamtru stret naoia. Sam narafala samting bambae oli kamaot i no longtaem nating, long fyuja. Olgeta samting ya oli long saed blong bigfala tingting blong Jeova blong leftemap haenem blong hem long fes blong olgeta samting we hem i mekem. (Esikel 38:23; Revelesen 4:11; 5:13) Mo tu, oli joen wetem fyuja laef blong yumi evriwan. ?Olsem wanem?
2. (a) ?Aposol Jon i luk wanem long namba fo vison blong hem? (b) ?Bambae yumi stadi long wanem ol kwestin long saed blong vison ya?
2 Long namba fo vison blong Revelesen, Jon i luk we sam enjel oli stap holemtaet ol win blong bigfala trabol we bambae i spolem ol samting. From we fastaem oli mas putum mak long fes blong ol “slef blong God blong yumi.” Biaen, hem i luk wan samting we i mekem hem i haremgud tumas—“wan bigfala hif blong man, we olgeta i plante tumas, i no gat man i save kaontem olgeta. Ol man ya oli kamaot long olgeta kala mo long olgeta laen, mo long olgeta kantri, mo long olgeta lanwis.” Oli stap joen wanples blong wosip long Jeova mo givim ona long Pikinini blong hem. Jon i harem tok we i talem se, hemia ol man ya we bambae oli pastru long bigfala trabol. (Revelesen 7:1-17, NW) ?Hu ya ol man ya we Revelesen i talem se oli ol “slef blong God blong yumi”? ?Mo hu ya ol man ya we bambae oli mekemap “bigfala hif blong man” we bambae oli pastru long bigfala trabol? ?Yu yu wan long olgeta?
?Hu Ya Ol “Slef Blong God Blong Yumi”?
3. (a) ?Long Jon 10:1-18, Jisas i yusum wanem pijatok blong eksplenem fasin fren blong hem long ol man blong hem? (b) ?Tru long ded blong Jisas, wanem samting we hem i mekem se ol sipsip blong hem oli save kasem?
3 Samwe long fo manis bifo we Jisas i ded, hem i tokbaot hem wan olsem “gudfala man ya blong lukaot long sipsip.” Mo hem i talem se, ol man blong hem oli olsem “sipsip” we hem i givim laef blong hem blong sevem olgeta. Long saed blong ol sipsip we hem i faenem, hem i tokbaot olgeta long wan spesel fasin. Hem i tokbaot moa ol sipsip we hem i faenem insaed long wan yad, we biaen hem i stap keagud long olgeta long wan spesel fasin. (Jon 10:1-18)a Wetem fasin lav, Jisas i givim laef blong hem blong sevem ol sipsip blong hem, i pem wan ransom we oli nidim blong kam fri long sin mo ded.
4. ?Hu ya ol faswan man we oli hivap olsem sipsip folem samting we Jisas i talem?
4 Be, bifo we Jisas i givim laef blong hem, hem wan, olsem Gudfala Man blong Lukaot Sipsip, i hivimap ol disaepol. Jon Baptaes, “man blong lukaot long doa” long parabol blong Jisas, hem nao i lidim ol faswan disaepol long Jisas. Jisas i stap lukaot ol man we bambae oli tekem jans blong joen long grup ya we i olsem ‘laen blong Ebraham.’ (Jenesis 22:18; Galesia 3:16, 29) Hem i mekem se ol man ya, oli gat fasin tangkyu long hat blong olgeta from Kingdom blong heven. Mo hem i mekem promes long olgeta se bambae hem i go blong mekem ples blong olgeta i rere long haos blong Papa blong hem long heven. (Matyu 13:44-46; Jon 14:2, 3) I stret nomo we hem i talem se: “I stat long taem blong Jon Baptaes, i kam kasem tede, ol man oli stap traehad blong kasem kingdom blong heven. Mo ol man we oli stap traehad olsem we oli pusum strong, olgeta nao oli save kasem.” (Matyu 11:12, NW) Olgeta we oli folem hem, olsem we oli stap traehad blong kasem mak ya, oli soem se oli stap long yad blong ol sipsip we Jisas i tokbaot.
5. (a) ?Hu ya ol “slef blong God blong yumi” we Revelesen 7:3-8 i tokbaot? (b) ?Wanem i soem se bambae plante moa man oli joen wetem Isrel long saed blong speret blong mekem wosip?
5 Mo tu, Revelesen 7:3-8 i tokbaot ol man we oli stap pusum strong blong kasem mak ya blong heven se, oli ol “slef blong God blong yumi.” (Lukluk 1 Pita 2:9, 16.) ?Ol 144,000 man we Revelesen i tokbaot long ples ya, oli ol man Jyu long saed blong bodi? ?Olgeta we oli olsem sipsip long yad long pijatok blong Jisas, oli ol man Jyu nomo? No gat; oli ol memba blong Isrel blong God long saed blong speret. Evriwan oli joen wetem Kraes long laen blong Ebraham long saed blong speret. (Galesia 3:28, 29; 6:16; Revelesen 14:1, 3) Yes, i gat taem i stap kam we bambae oli kasem fulnamba blong olgeta. ?Biaen long taem ya, bambae wanem samting i hapen? Olsem Baebol i bin talem, ol narafala man—wan bigfala hif blong man—bambae oli joen wetem ol man Isrel long saed blong speret blong wosip long Jeova.—Sekaraea 8:23.
“Ol Narafala Sipsip”—?Oli No Man Jyu?
6. ?Jon 10:16 i tokbaot wanem we bambae i hapen?
6 Afta we Jisas i tokbaot yad ya blong sipsip long Jon 10:7-15, hem i tokbaot wan narafala grup, se: “Mi gat ol narafala sipsip bakegen tu blong mi we oli no blong yad ya. Bambae mi mas tekem olgeta ya tu oli kam. Olgeta ya tu bambae oli save harem voes blong mi, nao bambae olgeta sipsip ya evriwan oli kam wan kampani nomo, we i gat wan man nomo blong lukaot long olgeta.” (Jon 10:16) ?Hu ya “ol narafala sipsip” ya?
7, 8. (a) ?From wanem i no stret blong ting se ol narafala sipsip oli ol Kristin we oli no man Jyu? (b) ?Wanem stampa tingting blong God long saed blong wol we i givhan long yumi blong kasem save hu ya ol narafala sipsip?
7 Sam man blong eksplenem Baebol long Krisendom oli talem se ol narafala sipsip ya, oli ol Kristin we oli no man Jyu. Mo se olgeta we oli stap long yad blong sipsip we yumi tokbaot fastaem, oli ol man Jyu, olgeta we oli stap aninit long kontrak blong Loa. Mo oli talem se tufala grup ya bambae oli go long heven. Be Jisas i bon olsem wan man Jyu we i stap aninit long kontrak blong Loa finis. (Galesia 4:4) Antap long samting ya, olgeta we oli talem se, ol narafala sipsip oli ol Kristin we oli no man Jyu, mo se bambae oli kasem pei long laef blong heven, oli no luksave wan impoten samting long stampa tingting blong God. Taem Jeova i wokem tufala faswan man mo i putum tufala long garen blong Iden, hem i mekem i klia se stampa tingting blong hem i blong fulumap wol ya long man, fulwol i kam paradaes, mo ol man we oli lukaot long wol oli haremgud long laef foreva—sipos oli gat respek mo obei long Man we i Wokem olgeta.—Jenesis 1:26-28; 2:15-17; Aesea 45:18.
8 Taem Adam i mekem sin, samting ya i no blokem stampa tingting blong Jeova. Wetem fasin lav, God i mekem rod blong ol pikinini blong Adam oli gat jans blong haremgud long gudfala laef we Adam i no bin gat fasin tangkyu long hem. Jeova i talem se bambae hem i stanemap wan man blong sevem man, wan laen, we tru long hem, bambae olgeta nesen oli save kasem blesing. (Jenesis 3:15; 22:18) Promes ya i no minim se bambae God i tekem olgeta gudfala man long wol ya, oli go antap long heven, no gat. Jisas i tijim ol man blong hem blong prea se: “Yu mekem kingdom blong yu i kam. Yu mekem ol samting we yu yu wantem oli kamaot long wol, olsem we oli kamaot finis long heven.” (Matyu 6:9, 10, NW) Smoltaem bifo we Jisas i talem parabol we i stap long Jon 10:1-16, hem i talem long ol man blong hem se, Papa blong hem i glad blong givim Kingdom blong heven long “ol sipsip” ya nomo ‘we oli no plante.’ (Luk 12:32, 33) Olsem nao, taem yumi ridim parabol we Jisas i talem blong tokbaot hem wan olsem Gudfala Man blong Lukaot Sipsip, we i givim laef blong hem blong sevem ol sipsip blong hem, i no stret blong no tingbaot bighaf blong ol man we Jisas i stap keagud long olgeta long fasin lav. Hemia olgeta we bambae oli laef long wol ya aninit long Kingdom blong hem long heven.—Jon 3:16.
9. ?Long 1884, ol Baebol Studen oli ting se ol narafala sipsip oli hu?
9 Long 1884, Wajtaoa i soem se ol narafala sipsip oli ol man we oli gat jans blong laef long wol ya long wan fasin we i fulumap faswan stampa tingting blong God. Ol faswan Baebol Studen oli luksave se sam long ol narafala sipsip ya, oli laef mo oli ded bifo we Jisas i mekem minista wok blong hem long wol ya. Be, i gat sam smosmol samting we oli no kasem stret save long olgeta. Eksampel, oli ting se wok blong hivimap ol narafala sipsip bambae i kamaot afta we olgeta tabu Kristin oli kasem pei blong olgeta long heven. Be yet, oli luksave klia se ol narafala sipsip i no minim nomo ol man we oli no man Jyu. Ol man Jyu mo ol narafala man, ol man blong olgeta nesen mo kala, evriwan oli save gat jans blong kam wan long ol narafala sipsip.—Lukluk Ol Wok 10:34, 35.
10. ?Sipos yumi wantem stap olsem ol man ya we Jisas i rili tingbaot olgeta olsem ol narafala sipsip blong hem, yumi mas mekem wanem?
10 Blong laenap wetem pijatok blong Jisas, ol narafala sipsip oli mas ol man we, nating se oli blong wanem kala no laen, oli luksave Jisas Kraes olsem Gudfala Man blong Lukaot Sipsip. ?Olsem wanem oli mekem samting ya? Oli mas soem se oli kwaet man mo oli glad blong hem i lidim olgeta. Hemia nao fasin blong ol sipsip. (Ol Sam 37:11) Oli mas mekem sem samting olsem ol sipsip ya we oli no plante. Olgeta evriwan oli mas kasem ‘save long voes blong [gudfala man blong lukaot long sipsip]’ mo bambae oli no mas letem ol man nogud i lidim olgeta oli gowe. (Jon 10:4; 2 Jon 9, 10) Oli mas luksave se samting we Jisas i mekem i impoten tumas, taem i givim laef blong hem blong sevem ol sipsip blong hem. Mo oli mas bilif fulwan long samting ya. (Ol Wok 4:12) Oli mas ‘obei’ taem Gudfala Man blong Lukaot long Sipsip i talem long olgeta blong mekem tabu wok long Jeova nomo, blong gohed blong lukaot Kingdom fastaem, blong no joen long wol, mo blong lego sam samting we yumi nomo i wantem, blong soem lav long ol narafala. (Matyu 4:10; 6:31-33; Jon 15:12, 13, 19) ?Yu gat fasin ya blong ol man we Jisas i tokbaot olgeta olsem ol narafala sipsip blong hem? ?Yu yu wantem kam wan long olgeta? !Hemia nambawan fasin fren we i open long evriwan we oli rili wantem kam olsem ol narafala sipsip blong Jisas!
Gat Respek Long Rul Blong Kingdom
11. (a) ?Long saen we Jisas i talem blong soem se hem i stap, hem i talem wanem long saed blong ol sipsip mo ol nani? (b) ?Hu ya ol brata we Jisas i tokbaot?
11 Sam manis afta we Jisas i talem parabol ya antap, hem i kambak bakegen long Jerusalem. Taem hem i stap sidaon long Hil blong ol Oliftri, i stap lukluk i go long eria blong tempel, hem i givim sam save long ol disaepol blong hem long saed blong ‘saen we bambae i soemaot se hem i stap finis mo we fasin ya blong wol i kasem en blong hem.’ (Matyu 24:3) Bakegen, hem i tokbaot wok blong hivimap ol sipsip. Wan long ol samting we hem i talem, hemia se: “Long taem ya we mi, mi Pikinini blong man, bambae mi kamtru wetem olgeta enjel, bambae mi mi king, mi gat olgeta paoa blong mi, nao mi go sidaon long bigfala jea blong mi. Nao olgeta man blong wol bambae oli kam stanap long fes blong mi, mo mi bambae mi seraotem olgeta, olsem we man blong lukaot sipsip i stap seraot ol sipsip blong hem long ol nani blong hem. Bambae mi putum ol sipsip oli stap long raet saed blong mi, mo olgeta nani long lef saed blong mi.” Long parabol ya, Jisas i soem se King i jajem olgeta ya from ol samting we oli mekem long “ol brata” blong hem. (Matyu 25:31-46) ?Hu ya ol brata ya? Hemia ol Kristin we tabu speret i makemaot olgeta, nao oli kam olsem “ol pikinini blong God.” Jisas i fasbon Pikinini blong God. Taswe ol tabu Kristin ya oli ol brata blong Kraes. Oli ol “slef blong God blong yumi” we Revelesen 7:3 i tokbaot. Oli ol man we God i jusumaot olgeta long wol blong joen wetem Kraes long Kingdom blong hem long heven.—Rom 8:14-17.
12. ?From wanem fasin we ol man oli mekem long ol brata blong Kraes i impoten tumas?
12 Fasin we ol narafala man oli mekem long olgeta we bambae oli rul long Kingdom, i impoten tumas. ?Yu yu tingbaot olgeta olsem we Jisas Kraes mo Jeova, tufala i stap tingbaot olgeta? (Matyu 24:45-47; 2 Tesalonaeka 2:13) Wanem fasin we man i mekem long ol tabu Kristin ya, i olsem we hem i mekem long Jisas Kraes mo long Papa blong hem, Hae Rula blong heven mo wol.—Matyu 10:40; 25:34-46.
13. ?Long 1884, ol Baebol Studen oli save wanem long saed blong parabol blong ol sipsip mo ol nani?
13 Samting we Wajtaoa blong Ogis 1884 i talem i stret nomo, se “ol sipsip” long parabol ya, oli ol man we oli gat hop blong kasem laef we i stretgud olgeta long wol. Oli kasem save tu se, parabol ya i mas kamtru taem Kraes i stap rul long bigfala jea blong hem long heven. Be long taem ya, oli no luksave klia se wetaem bambae wok blong seraotem ol sipsip mo ol nani i stat, mo bambae i tekem hamas taem blong finisim wok ya.
14. ?Olsem wanem pablik tok long wan asembli long 1923 i halpem ol Baebol Studen blong luksave taem we profet tok long parabol blong Jisas i kamtru?
14 Be, long 1923, long wan pablik tok long wan asembli, J. F. Rutherford, presiden blong Watch Tower Society long taem ya, i eksplenemgud taem we parabol ya blong ol sipsip mo nani i kamtru long hem. ?From wanem? Blong talem smol, from we parabol ya i soem se ol brata blong King—no maet sam long olgeta nomo—bambae oli stap yet long wol. Long medel blong ol man long wol ya, hem i save singaot ol man blong hem nomo we tabu speret i makemaot olgeta olsem ol trufala brata blong hem. (Hibrus 2:10-12) Olgeta ya bambae oli no moa stap long wol long Rul blong Wan Taosen Yia, blong ol man oli gat jans blong mekem i gud long olgeta long fasin we Jisas i bin talem.—Revelesen 20:6.
15. (a) ?Wanem samting i halpem ol Baebol Studen blong makemaot stret ol sipsip long parabol blong Jisas? (b) ?Olsem wanem ol sipsip oli soemaot se oli gat fasin tangkyu long Kingdom?
15 Long pablik tok ya long 1923, oli traehad blong eksplenem mining blong tok blong Masta long saed blong ol sipsip mo ol nani. Be oli mas kasem save long sam narafala samting bifo we fulwan mining blong parabol ya i klia. Long ol yia we oli kam biaen, sloslou, Jeova i mekem se ol man blong wok blong hem oli kasem save long ol impoten save ya. Long 1927, oli kasem klia save long samting ya se “slef ya we i stret mo i waes,” i minim fulwan grup blong ol Kristin we tabu speret i makemaot olgeta long wol. Mo long 1932, oli luksave tu nid blong no fraet blong joen blong wok wetem ol tabu man blong Jeova, olsem Jonadab i mekem wetem Jehu. (Matyu 24:45; 2 King 10:15) Long taem ya, folem Revelesen 22:17, ol man ya we oli olsem sipsip, oli kasem wan spesel oda blong joen long wok blong karem mesej blong Kingdom i go long ol narafala. Fasin tangkyu we oli gat long Kingdom blong Mesaea bambae i pusum olgeta blong soem fasin kaen blong givim ol help long saed blong bodi long ol tabu man blong Masta. Be i no hemia nomo. Bambae oli givim laef blong olgeta long Jeova tru long Kraes mo bambae oli joengud wetem ol man blong hem we tabu speret i makemaot olgeta, blong wok strong long wok we oli stap mekem. ?Yu yu stap mekem ol samting ya? Long olgeta we oli stap mekem, bambae King i talem se: “Yufala i kam, Papa blong mi i mekem i gud tumas long yufala finis. Taem hem i no mekem wol ya yet we yumi stap long hem, be hem i makemaot ol ples blong yufala long nyufala wol we naoia bambae i kam, we hem i king long hem. Yufala i kam tekem ples ya blong yufala.” Oli gat bigfala hop blong laef we i no save finis, we oli stretgud olgeta, long wol ya aninit long rul blong Kingdom.—Matyu 25:34, 46.
“Bigfala Hif Blong Man”—?Oli Stap Go Long Weples?
16. (a) ?Wanem rong tingting we ol faswan Baebol Studen oli gat long saed blong bigfala kampani, no bigfala hif blong man blong Revelesen 7:9? (b) ?Wetaem mo from wanem oli stretem tingting blong olgeta?
16 Bifo, ol man blong wok blong Jeova oli bilif se bigfala kampani (no, bigfala hif blong man) long Revelesen 7:9, 10, i defren long ol narafala sipsip long Jon 10:16 mo ol sipsip long Matyu 25:33. From we Baebol i talem se, oli “stap stanap long fes blong God ya we i stap sidaon long bigfala jea blong hem,” oli ting se ol man ya oli stap long heven, oli no sidaon long ol jea blong king, blong joen wetem Kraes blong rul, be long seken ples, long fored blong jea blong king. Oli ting se hemia ol Kristin we bilif blong olgeta i no strong tumas. Olgeta we oli no soem trufala tingting blong lego sam samting we oli gat. Long 1935, oli stretem tingting ya.b Taem oli skelemgud Revelesen 7:9 wetem ol vas olsem Matyu 25:31, 32, i klia se ol man long wol ya oli save “stanap long fes blong God ya we i stap sidaon long bigfala jea blong hem.” Mo tu, i klia se i no gat tu kaen fasin blong stap tru long God. Olgeta we oli wantem se God i glad long olgeta, oli mas holemstrong long hem oltaem.—Matyu 22:37, 38; Luk 16:10.
17, 18. (a) ?Stat long 1935, wanem i mekem se namba blong ol man we oli gat hop blong kasem laef foreva long wol i go antap bigwan? (b) ?Olgeta long bigfala hif blong man oli stap wok strong long wanem wok?
17 Plante yia finis, ol man blong Jeova oli stap tokbaot ol promes blong God long saed blong wol ya. From samting we oli ting se bambae i kamaot long ol yia biaen long 1920, oli talemaot se “Plante Milyan Man We Oli Stap Laef Naoia, Bambae Neva Oli Ded.” Be long taem ya, i no gat plante milyan man yet we oli akseptem ol samting we God i mekem blong ol man oli kasem laef. Long olgeta man we oli akseptem trutok, tabu speret i makemaot bighaf blong olgeta blong oli kasem laef long heven. Be afta long 1935, i gat wan bigfala jenis i kamaot. I no se Wajtaoa i bin fogetem hop blong laef foreva long wol, no gat. From we plante yia finis, ol man blong wok blong Jeova oli bin tokbaot hop ya mo oli bin traem blong luksave hu nao olgeta we profet tok ya blong Baebol i tokbaot. Be, long stret taem blong Jeova, hem i mekem se poen ya i kam long klia ples.
18 Ol ripot oli soem se long plante yia, bighaf blong ol man we oli kam long Memoriol, oli tekem bred mo waen we i olsem saen blong bodi mo blad blong Kraes. Be long ol 25 yia afta long 1935, ol man we oli kam long Memoriol blong ded blong Kraes we oli stap mekem wan taem long wan yia, namba blong olgeta i go antap bitim wan handred taem long namba blong ol man we oli kakae bred mo dring waen. ?Hu ya ol narafala man ya? Olgeta we bambae oli kam memba blong bigfala kampani long fyuja. I klia nomo, taem i kam finis blong Jeova i hivimap olgeta mo mekem olgeta oli rere blong pastru long bigfala trabol we i kolosap nomo. Olsem Baebol i talem, oli “kamaot long olgeta kala mo long olgeta laen, mo long olgeta kantri, mo long olgeta lanwis.” (Revelesen 7:9) Oli stap wok strong long wok ya we Jisas i tokbaot taem i talem se: ‘Nao bambae ol man oli stap talemaot gud nyus ya se God i king blong olgeta man. Bambae oli talemaot long olgeta ples long wol, blong oli wetnes long hem long fes blong olgeta man. Nao biaen, bambae en i save kam.’—Matyu 24:14.
[Ol futnot]
a Blong save fulwan long ol laswan save long saed blong ol yad blong sipsip long Jon japta 10 Jon 10, ridim Wajtaoa, Febuwari 15, 1984, pej 10 kasem 20, mo pej 31 (long Engglis); Wajtaoa, Mei 15, 1984, pej 8 kasem 18, mo pej 31 (long Franis).
b Wajtaoa blong Ogis 1 mo 15, 1935 (Engglis).
?Wanem Ansa Blong Yu?
◻ ?From wanem yumi gat spesel intres long vison blong Revelesen japta 7?
◻ ?From wanem ol narafala sipsip we Jon 10:16 i tokbaot, oli no ol Kristin nomo we oli no man Jyu?
◻ ?Olgeta we oli wantem kam olsem ol narafala sipsip long profet tok blong Baebol, oli mas mekem wanem?
◻ ?Olsem wanem parabol long saed blong ol sipsip mo ol nani i leftemap fasin blong gat respek long rul blong Kingdom?
◻ ?Wanem i soemaot stret taem blong Jeova blong hivimap bigfala hif blong man long Revelesen 7:9?