!Bambae Mifala i Neva Stop Long Wok Blong Mifala!

“BAMBAE MIFALA I NEVA STOP LONG WOK BLONG MIFALA.” Hemia nao mesej we yu kasem taem yu visitim wan haos long Tokyo, Japan, we i defren long ol narafala haos. Wan famle blong 22 man mo woman oli stap long haos ya. Evriwan oli gat raonabaot 70 yia. Oli no joen tugeta from we oli stret famle, be from we evriwan oli gat semfala intres​—misinari wok. !Olgeta 22 memba ya tugeta, oli mekem wok blong prij fultaem blong kolosap 1,026 yia! I gat tri long olgeta we oli olfala moa, oli bon long yia 1910. Seven long olgeta oli joen long wok blong prij fultaem bifo we oli gat 20 yia. Naen blong olgeta oli kam long Japan taem wok blong talemaot Kingdom i jes stat long kantri ya, afta Namba Tu Bigfala Faet long Wol, mo oli luk olsem wanem wok i gru kasem naoia.​—Aesea 60:22.

Haos ya we i gat sikis store blong hem, we bifo i branj ofis blong Watch Tower, i wan ples we i leftemap tingting. Hemia from speret mo strongfala tingting blong ol misinari we oli laef long ples ya. Nating se bighaf blong olgeta oli no save mekem plante wok from oli olfala no oli sik, i no gat wan long ol soldia ya long saed blong speret we oli rere blong stop. Ol Wetnes long Japan oli mekemgud haos ya bakegen blong ol olfala ya, wetem wan Haos Kingdom daon mo wan spesel bokis wetem enjin we i save karem ol man oli go antap mo kamdaon.

Wanem i Mekem Oli Hapi

From we oli bin mekem wok blong misinari long ples ya blong plante yia finis, oli harem se kantri ya i stret ples blong olgeta. Wan memba blong famle ya we i olfala moa i talem se, “!Taem mi gobak long Ostrelya blong go long distrik asembli las yia long hot taem, afta long tu wik nomo, mi mi rere blong kamhom!” Oli bin givhan long plante man, mo oli laekem tumas ol man ya mo oli gat bigfala filing we i gru from olgeta. Olgeta misinari ya oli glad tumas taem oli kasem sam leta no taem sam man oli telefon long olgeta mo tokbaot ol wok long ol yia we oli pas finis.

Hemia nao frut blong wok blong prij, we oli mekem wetem fasin traehad. Lav blong olgeta long Jeova i pusum ol misinari ya, ale oli bin wok strong blong talemaot Tok blong God tru long ol defren kaen samting we oli hapen long laef blong olgeta. (Skelem 2 Timote 4:2.) Wan woman, nem blong hem Vera MacKay, we i mekem wok blong misinari long Japan blong 37 yia, i talem se, “Mifala i lanem blong harem i glad, jes from we mifala i stap mekem wok blong Jeova nomo. Nating se samtaem i no gat man long haos, mifala i kilim evri doa from we mifala i wantem wetnes long saed blong Jeova.”

Twelef blong ol misinari ya oli neva mared, be oli glad blong mekem wok blong Masta we i no gat narafala tingting i pulum olgeta. (1 Korin 7:35) Gladys Gregory, we i bin mekem wok blong misinari blong 43 yia, i wan long olgeta ya. Hem i talem se: “Blong kam moa fri blong mekem wok blong Jeova, mi joen long wok blong paenia. Biaen mi go long Gilead [Wajtaoa Baebol Skul blong Gilead], mo long wok blong misinari. Mi no mekem eni promes blong no mared, be mi neva mared. Mo olsem plante narafala Wetnes, mi neva sore from.”

Rere Blong Jenisim Laef Blong Olgeta

I tru se samtaem ol man oli stronghed taem oli kam olfala, be ol misinari ya oli rere blong jenis mo folem defren laef. Lois Dyer, Molly Heron, mo Lena mo Margrit Winteler oli bin stap tugeta long wan smol misinari haos long narafala ples long Tokyo. Oli laef long ples ya blong bitim 20 yia, mo oli kam gud fren wetem ol man raonabaot long olgeta. Long teritori blong olgeta, tufala sista Winteler oli visitim 40 man blong givim ol nyufala magasin long olgeta evri manis, mo Molly mo Lois oli visitim 74 man olsem. Biaen, Sosaeti i askem olgeta blong muf i go long narafala haos ya blong ol misinari we i gat sikis store blong hem, long medel blong Tokyo stret. Lena i talem se, “Fastaem mi harem nogud mo tingting blong mi i foldaon.” Be, olsem oltaem, oli jenis folem nyufala ples we oli stap long hem. ?Oli harem olsem wanem naoia? Lena i ansa se, “Mifala i hapi tumas. Naoia i gat tu brata blong Betel we oli kam blong kuk mo klinim haos ya. Oli lukaotgud long mifala.” Evriwan oli agri long tok blong Lois, we i talem se: “Bigfala lav we ogenaesesen blong Jeova i soemaot taem i keagud long mifala, i halpem mifala blong gohed yet.”

Norrine Thompson tu i jenis folem ol samting we oli hapen long laef blong hem. Hem i talem se, “Long 15 yia, mi gat jans blong folem hasban blong mi [hem i blong Nyu Silan] we i mekem wok blong distrik elda long Japan, taem Japan i olsem wan distrik nomo.” Be, hasban blong hem i kam sik. Afta, hem i mas winim traem we i bigwan olgeta long laef blong hem​—taem man blong hem i ded, 18 yia bifo. Hem i talem se: “Long taem ya, samting we i givhan long mi blong gohed long wok blong misinari, hemia lav we ol brata long olgeta ples blong Japan oli soem, wetem prea mo fasin blong stap bisi long wok blong prij.”

Stanap Strong Nating Se i Gat Problem Blong Helt

Albert Pastor, we i lukaot long haos blong ol misinari, i talem se, “Plante long olgeta oli gat sam problem long helt, be oli glad oltaem mo wan nambawan fasin blong olgeta se oli wantem tumas blong wok.” Blong lukaot long ol misinari, wan dokta mo woman blong hem, we i wan nes, oli kam stap long haos ya tu.

Tri yia bifo, wantaem nomo, Elsie Tanigawa, we i bin stap long namba 11 klas blong Skul blong Gilead, i no moa save lukluk wetem lefsaed ae blong hem. Fo manis biaen, raetsaed ae blong hem tu i stat kam nogud. Elsie i talem se, “Samtaem mi harem nogud from we mi no moa save mekem bigfala wok olsem bifo. Be wetem kaen fasin blong Sosaeti mo lav we misinari fren blong mi mo ol narafala oli soemaot, mi gohed blong faenem glad long wok blong Jeova.”

Shinichi Tohara mo waef blong hem, Masako, we oli go long Gilead skul semtaem wetem Elsie, oli fesem plante traem long saed blong helt blong olgeta long ol yia we oli jes pas. Shinichi i wan man we i save givim ol gudfala tok long kongregesen, be hem i kasem wan bigfala traem taem ae blong hem i kam nogud, ale naoia hem i no moa save ridim ol not blong hem. Nating se oli bin katem hem from sam bigfala sik mo from sam smol sik long ol yia we oli jes pas, ae blong hem i saen taem hem i tokbaot olsem wanem hem i stap givhan long wan Baebol stadi blong hem we i gat 90 yia.

Nating se oli gat wan ‘trabol we i olsem nil blong aranis, i stap stikim olgeta,’ ol misinari ya oli gat sem tingting long saed blong slak bodi blong olgeta olsem aposol Pol i gat. Hem i talem se: “Taem mi mi no gat paoa blong mi, long taem ya nao, mi mi gat paoa.” (2 Korin 12:​7-10) !Mo i tru tumas, oli gat paoa! Oli girap evri moning blong mekem wosip long seven klok. Afta we oli dring ti finis, olgeta we oli strong inaf long bodi, oli goaot long wok blong prij long eli moning.

Richard and Myrtle Shiroma oli goaot oltaem blong prij. Long 1978, Myrtle i bin kasem wan sik long ol string long bren we i mekem hafbodi blong hem i ded, be hem i gohed blong folem man blong hem long wok blong visitim ol kongregesen go kasem Novemba 1987. Naoia Richard, we hem i gat 70 yia finis, i halpem Myrtle blong mekem evri samting. Hem i girap long 5 klok long moning, i tekemaot Myrtle long bed, i mekem hem i swim, i jenisim hem, i mekem gud fes mo hea blong hem, mo i fidim hem wetem wan spun. Afta, hem i putum Myrtle long wan wiljea mo tufala i goaot long wok blong prij evri moning. Oli prij long ol haos wanwan blong wan haoa mo biaen oli go toktok long ol man long bas stop. Myrtle i no moa save toktok, be ol laswan tok we hem i talem long lanwis blong Japan, hemia Dendo, dendo, i minim “Prij, prij.”

Gel blong tufala, Sandra Sumida, i muf i go long misinari haos ya tu, blong givhan long tufala. Sandra i lusum gudfala hasban blong hem i no longtaem, from wan hat atak. Hem i bin mekem wok blong misinari wetem hasban blong hem long Guam. Be hem i gat bigfala tangkyu long kaen fasin blong Watch Tower Sosaeti blong sanem hem i gobak long Japan. Hem i talem se, “Oltaem mi harem se mi no stap givhan long papa mama blong mi from we mi stap long Guam. Sista blong mi, Joanne, i bin lukaot long tufala long haos ya. Taswe taem mi gat jans blong kam, mi glad tumas. Mi harem se oli nidim mi long ples ya, mo samting ya i olsem meresin blong mekem mi haremgud bakegen afta we mi lusum hasban blong mi kwiktaem.”

Oli Gohed Yet

Nating se bodi blong ol misinari ya oli no moa strong from oli olfala, oli no wantem stop long wok blong misinari. (Ol Sam 90:10; Rom 5:12) Jerry mo Yoshi Toma, we tufala i kam long Japan wetem ol faswan misinari blong Gilead, tufala i gohed yet blong prij long ol stoa long Sibuya, long medel blong Tokyo. Yoshi i talem se, “Long 1949, mitufala i kam stap long wan haos we i gat tu store blong hem we i bin stanap long ples ya. Ale, mitufala i prij long ol man we oli mekem haos blong olgeta long ol hol we oli digim long saed blong ol hil. Naoia Tokyo i kam wan bigfala taon. Mitufala i olfala finis mo mitufala i no moa save mekem plante samting olsem bifo. Be taem mitufala i kambak long wok blong prij, mitufala i haremgud tumas.”

Lillian Samson i bin mekem wok blong misinari long Japan blong 40 yia, mo hem i laekem wok blong hem tumas. Hem i talem se, “Mi stap halpem wan olfala woman we i gat 80 yia. Hem i bin stadi wetem misinari fren blong mi, Adeline Nako, we i gobak finis long Hawai blong lukaot long mama blong hem we i sik. Olfala woman ya i jes kam wan pablisa blong Kingdom, afta we hem i winim fasin blong wosip long ol bubu blong hem we oli ded. Hem i go long tempel mo i talem long waef blong pris se, ‘!Mi mi kam wan Kristin nao!’ ” Ol samting olsem we oli givim bigfala glad long Lillian, oli mekem se neva hem i sore we hem i bin lego wok blong hem long wol blong statem wok blong paenia, taem hem i gat 19 yia.

Ruth Ulrich mo Martha Hess, we tufala i mekem wok blong misinari tugeta blong bitim 45 yia, oli stap long haos ya blong ol misinari blong 35 yia finis. Ol man long eria ya oli savegud tufala ya. Wan taem, wan seket elda i askem Martha se: “?Mi save stilim fes blong yu blong go prij long ol haos wanwan?” Ol man oli savegud fes blong Martha mo oli pusum han blong olgeta kwiktaem blong karem ol magasin blong hem. Be seket elda ya i hadwok blong faenem wan man we i wantem storeyan wetem hem.

Ruth i stap karem ol nyufala magasin i go long wan woman evri manis, be woman ya i no save rid from sam problem blong helt. Be nating, woman ya i laekem blong karem ol magasin mo hem i glad tumas blong karem buk ya Mankind’s Search for God. Ruth i stap tingting sipos bambae hem i no moa karem ol magasin i go long woman ya, from i luk olsem se i no gat man i ridim ol buk ya. Be wan dei, hasban blong woman ya i kam luk Ruth wetem Search buk ya, mo i talem se: “!Hemia i rili wan nambawan buk! Tu taem mi ridim buk ya fulwan.” Ruth i statem wan Baebol stadi wetem hem mo woman blong hem.

Haos ya blong ol misinari, hem wan i pulum ol man we oli intres. Let long wan aftanun, wan yangfala man i kam long haos ya mo i talem se: “Wan man i bin talem long mi se sipos mi kam long ples ya, bambae mi save kasem help blong lanem Baebol.” Oli statem wan Baebol stadi wetem hem. Hem i stap wok olsem kuk long wan Jaenis ples blong kakae. Long ples ya, hem i wok wetem wan woman we kongregesen i sakemaot hem plante yia finis. Wan dei, wan pablisa i kam long ples ya, mo i livim sam magasin, ale biaen ol magasin ya oli go long kijin. Yangfala man ya i laekem ol magasin ya mo i stat blong askem plante kwestin long woman ya we bifo hem i wan Wetnes. From we hem i no save ansarem ol kwestin blong man ya, hem i sanem man ya i go long haos blong ol misinari. Naoia man ya i wok olsem wan man blong givhan mo wan paenia. Samtaem biaen, woman ya i kambak insaed long kongregesen, mo hem tu i kam wan fultaem paenia.

Olgeta misinari long haos ya oli gat bigfala tangkyu long evri samting we Jeova i bin mekem blong olgeta. Oli kam long ol ples olsem Ostrelya, Hawai, Kanada, Swiselan, mo Yunaeted Stet. Leven blong olgeta oli bin joen long namba 11 klas blong Gilead skul blong ol misinari, no ol klas bifo. Oli bin luk olsem wanem wok blong Kingdom i gru long Japan. Mo oli gat sem filing olsem King Deved, we i talem se: “Naoia mi mi olfala, mi stap longtaem, be neva mi luk wan gudfala man we Hae God i lego hem, no ol pikinini blong man olsem we oli stap asaskem kakae olbaot.” (Ol Sam 37:25) Blong soem fasin tangkyu blong olgeta from bigfala lav we God i soemaot taem i keagud long olgeta, ol misinari ya oli gat strong tingting blong neva lego wok blong olgeta be oli wantem gohed oltaem blong mekem wok blong Jeova.