Jeova Bambae i Sevem Wol

EPOT long wan aelan blong Maldaev i sat long sam haoa evri dei. ?From wanem? From we taem solwora i kamsoa, hem i kavremap ples we ol plen oli stap sidaon long hem, mekem se i no sef blong plen i godaon long hem. Sam man blong sayens oli fraet se level blong solwora long ol aelan blong Maldaev, i save kam antap wan mita long wan handred yia we oli kam biaen. Maet samfala oli ting se namba ya i smol nomo, be hem i naf blong mekem seven aelan i lus fulwan. !Folem tok blong UN Chronicle, sipos solwora i kam antap long tu mita, hem i naf blong draonem olgeta aelan blong ples ya, hemia 1,200 smosmol aelan!

?Wanem nao i mekem solwora i kam antap olsem? Wan Program blong Yunaeted Nesen long saed blong Win mo Wora blong Wol i talem se, fasin blong sakem doti long win from ol “rabis gas,” i mekem solwora long ol ples we i hot i kam bigwan moa, mo i mekem ol sno mo aes antap long ol hil oli ron. From samting ya, level blong solwora i kam antap. Panos Institut long London i talem se, fasin blong sakem doti olbaot long win, “maet hem i bin statem wan bigfala trabol long fulwol we sloslou i stap jenisim mak blong graon blong olgeta kantri mo mak blong solwora.”

Ol man blong sayens oli stap rao from problem ya we wol i stap kam hot moa. Be, yumi save sua se ol problem ya long saed blong win, wora mo graon blong wol, oli no save blokem stampa tingting blong God. Baebol i talem se, “Graon ya wetem olgeta kakae blong hem, i stap strong long ples blong hem. Neva bambae hem i save muf.” (1 Kronikel 16:30) Jeova i bos long win, wora mo graon blong wol, mo yumi glad se i no longtaem, bambae hem i sevem wol ya wetem man, oli aot long ol trabol we oli save spolem olgeta.​—Ol Sam 24:​1, 2; 135:6; 2 Pita 3:13.

[Foto Credit Line blong pija long pej 31]

Drawing based on NASA photo