?Bambae Yu Yu Presem Jeova?

‘GOD, olgeta man long evri ples oli stap presem yu, mo hae nem blong yu i finisim olgeta ples long wol.’ Hemia profet tok we i stap long wan singsing blong ol boe blong Kora. (Ol Sam 48:10) Tede, ol strongfala voes blong plante milyan Wetnes blong Jeova, oli stap presem God mo talemaot nem blong hem, tru long fasin blong talemaot gud nyus blong Kingdom blong hem. Oli stap mekem olsem long 232 kantri mo aelan mo long bitim 300 lanwis. Taswe i tru tumas se oli rili “finisim olgeta ples long wol.”

?Wanem samting i pusum ol man blong defren kaen laef, kastom mo lanwis blong oli presem Jeova? Wan bigfala risen se, fasin tangkyu from stret save long Tok blong God, Baebol. Trutok long saed blong speret i mekem se oli fri long ol gyaman kastom mo ol gyaman bilif blong ol skul, olsem helfaea, we i mekem man i kalabus long tingting blong hem. (Jon 8:32) Trutok i givhan long olgeta tu blong laekem tumas ol nambawan fasin blong God‚ olsem lav‚ paoa‚ waes‚ mo stret fasin blong jajem man we i joen wetem fasin sore blong hem. Taem ol man we hat blong olgeta i stret oli kasem save long fasin blong God blong givim stret pikinini blong hem, Jisas Kraes, olsem wan sakrifaes blong sevem ol man, samting ya i pusum olgeta blong presem Jeova mo mekem wok blong hem.

Olsem buk blong Baebol, Revelesen i talem, ol voes we oli kamaot long heven oli singsing se: ‘Jeova, yu yu Masta blong mifala, yu yu God blong mifala. Yu yu mekem olgeta samting blong wol fastaem, yu givim laef long olgeta. From samting ya, i stret nomo blong ol man oli leftemap nem blong yu, oli ona long yu, mo oli stap aninit long paoa blong yu oltaem.’ (Revelesen 4:11) Ol enjel ya oli no presem God from we hemia i wan wok blong olgeta nomo. No gat. Oli mekem from we oli gat bigfala respek mo ona long Jeova.

Talemaot Gud Nyus Blong Presem God

Taem wan man i presem Jeova‚ hem i stap folem nambawan eksampel blong Jisas Kraes, we hem i stampa man blong presem God. Blong folem rod blong Jisas, man i mas joen long wok blong talemaot gud nyus blong Kingdom blong God. (Matyu 4:​17, 23; 24:14) Wok blong prij nao hem i bigfala wok long olgeta ples long wol, we i presem Jeova.

Wok ya blong prij hem i rili impoten, taswe Baebol i joenem wok ya wetem rod blong sevem man. Long Rom 10:​13-15 yumi ridim se: “ ‘Olgeta we oli singaot long Hae God, oli talem nem blong hem, hem bambae i sevem olgeta.’ ?Be sipos God i no sanem ol man oli go blong talemaot nyus blong hem, bambae ol man oli save go olsem wanem? ?Mo sipos man i no go talemaot nyus blong God, bambae ol man oli save harem nyus ya olsem wanem? ?Mo sipos ol man oli no harem nyus ya, bambae oli save bilif long hem olsem wanem? ?Mo sipos oli no bilif long hem, bambae oli save singaot long God olsem wanem? Taswe Baebol i talem se, ‘Samting ya i gud tumas, we ol man oli kam blong talemaot gud nyus long yumi.’ ”

Las yia nomo‚ ol Wetnes blong Jeova oli mekem moa long wan bilyan haoa long wok blong prij. !Mo plante gudfala frut i kamaot from fasin ya blong presem God! Samwe 314‚000 man oli joenem voes blong olgeta long ol man we oli stap presem God, taem oli givim laef blong olgeta long Jeova mo tekem baptaes.

Be, ?olsem wanem long ol 12,288,917 man we oli kam long Memoriol long 1994, blong tingbaot ded blong Jisas bakegen? Bitim 7,000,000 blong olgeta ya oli no joen blong presem Jeova yet long wok blong prij. Be fasin blong olgeta blong kam long impoten taem ya, i soem se maet plante moa milyan man oli save joen yet wetem olgeta ya we oli stap presem God. ?Yumi save mekem wanem blong givhan long olgeta ya we oli intres, blong oli kam man blong presem Jeova?

I Gat Rod Blong Kasem Help

Ating plante man we oli intres oli wantem presem Jeova, be oli harem se oli no save kasem ol mak blong kam naf blong mekem wok ya. I gud se oli tingbaot tok blong man blong raetem Ol Sam, we i talem se: “?Man blong givhan long mi bambae i kamaot long weples? Mi lukluk i go antap long ol hil, . . . Hae God ya we i mekem skae mo graon, hem nomo i stap givhan long mi.” (Ol Sam 121:​1, 2) I klia se, man blong raetem Ol Sam i lukluk i go antap long ol hil blong Jerusalem, long ples we haos prea blong Jeova mo gavman we i folem ol rod blong hem i stap long hem. From samting ya, yumi luksave se help we yumi nidim blong presem God mo talemaot mesej blong Kingdom, i save kam nomo long Jeova mo ogenaesesen blong hem.​—Ol Sam 3:4; Daniel 6:10.

Tede, olgeta we oli wantem presem Jeova oli save kasem gudfala help we ogenaesesen blong hem long wol i givim long kaen fasin. Olsem nao, ol Wetnes blong Jeova oli givhan long ol man taem oli mekem ol fri Baebol stadi long haos blong ol man we oli intres. Program ya blong tijim ol man, i no jes blong oli lanem ol stampa tijing blong Baebol nomo. Hem i halpem ol studen blong gat bigfala fasin tangkyu long ol samting we oli stap lanem mo long ogenaesesen we Jeova i stap yusum.

Blong mekem ol samting ya‚ Wetnes we i lidim Baebol stadi hem i traem blong mekem se ol nyufala trutok ya oli no kasem tingting blong man nomo, be oli kasem hat tu. Mo tija ya i no mas mestem blong soem long studen olsem wanem Jeova i stap yusum ogenaesesen blong Hem blong mekem ol stampa tingting blong Hem i kamaot long wol. Buklet ya Ol Wetnes blong Jeova​—Oli Joengud Blong Mekem Wok Blong God Long Olgeta Ples Blong Wol mo video kaset ya Jehovah’s Witnesses​—The Organization Behind the Name, plante taem oli givhan blong mekem olsem.

Ol Kristin miting tu oli impoten blong givhan long hemia we i wantem kam wan man blong presem Jeova. Hemia we i lidim Baebol stadi i save singaot studen blong kam long ol Kristin miting, jes afta we hem i stat blong mekem stadi wetem hem. Biaen, bambae studen i lanem from wanem i impoten blong kam joen oltaem long ol miting blong kongregesen mo givim ansa. (Hibrus 10:​24, 25) Ol elda oli save givhangud long olgeta we oli bilif finis mo olgeta we oli wantem presem Jeova, taem oli reregud ol miting we oli save mekem ol man oli kam strong long saed blong speret, mo we oli save wokgud long laef blong olgeta.

Halpem Ol Pikinini Blong Presem Jeova

Ol pikinini tu oli save kam ol pablisa blong gud nyus long fyuja. Baebol i putum bighaf blong responsabiliti blong tijim ol pikinini long ol papa. Oli mas ‘stretem olgeta, mo trenem tingting blong olgeta olsem we Jeova i wantem.’ (Efesas 6:4) Nating se ol pikinini oli smol nomo, taem oli kasem nambawan trening from papa mama blong olgeta we oli stap obei long God, oli save wokem tingting ya we oli wantem tumas blong presem Jeova.

Wan smol gel long Ajentina i go luk ol elda blong kongregesen bakegen mo bakegen, long plante manis, blong askem olgeta blong oli halpem hem blong kasem ol mak blong kam wan pablisa blong Kingdom. Samtaem biaen, papa mama blong hem mo ol elda oli agri blong letem hem i kam wan pablisa we i no baptaes yet. Naoia hem i stap talemaot mesej blong Kingdom long ol man, long fasin we i gud tumas. Nating se smol gel ya i gat faef yia nomo mo hem i no save rid yet‚ be hem i lanemgud stret ples long Baebol blong faenem sam vas. Afta we hem i faenem wan vas, hem i askem man blong haos blong ridim, mo biaen smol gel ya i eksplenem.

I klia se ol elda mo ol papa mama, olgeta evriwan oli save mekem wan gudfala wok taem oli leftemap tingting mo halpem olgeta we oli stap traehad blong kam ol man blong presem Jeova.​—Proveb 3:27.

Wan Fasin Fren Wetem Jeova We i Stap Blong Olwe

?Olsem wanem sipos yu yu stap joen wetem Ol Wetnes blong Jeova longtaem lelebet nao, be yu no joen yet long wok blong prij wetem olgeta? Ating i gud we yu askem ol kwestin ya long yu wan, ‘?Mi mi bilif se mi faenem trutok mo se Jeova nomo i trufala God? ?Mi mi rili bilif se Kingdom blong God i rod ya nomo blong winim ol problem blong man? ?Mi mi lego finis ol gyaman skul mo ol kastom mo fasin blong wol we oli mekem Jeova i kros? ?Mi mi laekem tumas God mo olgeta stret loa blong hem?’ (Ol Sam 97:10) Sipos yu save ansa yes long olgeta kwestin ya wetem fulhat blong yu, ale, ?wanem nao i stap blokem yu blong yu no presem Jeova?​—Skelem wetem Ol Wok 8:36.

Presem Jeova i minim moa bitim talemaot gud nyus nomo. Sipos yu kasem stret save finis, yu gat tru bilif, mo yu stap mekem laef blong yu i laenap wetem ol hae rul blong God, naoia yu nidim blong mekem fasin fren blong yu wetem God i kam moa strong. ?Olsem wanem? Yu mas givim laef blong yu long hem tru long prea, mo biaen yu mas soemaot samting ya tru long baptaes long wora. Laef we i no save finis i stap long denja. Taswe, yu mas tekem aksin naoia folem advaes ya blong Jisas se: “Yufala i mas pas long get ya we i smol nomo blong go insaed. From we get ya we i bigfala, mo rod ya we i isi nomo, hemia i blong go lus. Mo plante man oli stap folem rod ya. Be get ya we i smol nomo, mo rod we i strong, hemia i blong go kasem laef. Mo smol man nomo oli faenem.”​—Matyu 7:13‚ 14.

I no longtaem, ol fasin blong wol ya bambae oli lus olgeta long wan bigbigfala trabol. Taswe yu no mas westem taem. Tekem aksin kwiktaem blong mekem wan strongfala fasin fren wetem Jeova we bambae i stap blong olwe. Yes, naoia i taem blong talem yes long kwestin ya, ?Bambae yu yu presem Jeova?