?Wan Baebol i Sas Olsem Wanem?
I NO longtaem, Laebri blong Britin i agri blong pem kolosap 160 milyan vatu blong Kristin Grik haf blong Baebol we William Tyndale i tanem i go long Engglis. Oli prentem Baebol ya 468 yia bifo. Hem i wan nomo we i stap yet long ol faswan ful Baebol blong Tyndale. Ol man we oli agensem hem oli spolem ol narawan. Oli bin soemaot Baebol ya long London blong ol man oli luk.
Oli pemaot Baebol blong Tyndale long Baptis Kolej long Bristol, long Engglan. Oli bin holem Baebol ya i stap long ples ya, i stat long 1784. Dr. Roger Hayden, namba tu jeaman blong komiti blong kolej ya, i talem se: “Hemia wan Kristin buk we i impoten tumas long kantri mo fasin blong laef blong yumi. Mifala i wantem se moa man oli save yusum Baebol ya, from we mifala i bin holem hem i stap long ples we i sefgud.”
Long plante handred yia, bighaf blong ol man oli save kasem Baebol ya long lanwis blong Latin nomo. Ol lida blong ol jyos mo ol man we oli skulgud, olgeta ya nomo oli save ridim Baebol ya. Tyndale i gat sem tingting olsem John Wycliffe we i fastaem long hem. Hem i wantem we olgeta man oli save kasem wan Baebol we oli save ridim mo kasem save long hem. Wan taem, hem i talem long wan lida blong jyos we i stap agensem hem se: ‘Sipos God i letem mi blong laef, bifo we plante yia i pas, bambae mi mekem se ol boe blong wokem garen, oli save moa long saed blong Baebol i bitim yu.’
Wok blong hem i denja tumas, from we ol lida blong jyos oli stap agensem strong, eni man we i traehad blong mekem se ol man olbaot oli save kasem wan Baebol. From samting ya, Tyndale i ronwe long Engglan i go long Jemani. Longwe, hem i tanem wan “Nyutesteman” Baebol i kamaot long Grik lanwis blong bifo. Hem i prentem samwe 3,000 kopi mo hem i sanem i go long Engglan, long fasin haed. Wan bisop blong London i pem evri kopi we hem i save faenem mo hem i bonem olgeta Baebol ya long fored blong ol man, long yad blong jyos blong Sen Paul. Biaen, oli holemtaet Tyndale, oli mekem kot, ale oli mekem disisen se hem i stap wok agens long jyos. Long 1536, oli jokem nek blong hem, mo oli fasem hem long pos mo bonem hem long faea. !Yumi intres long poen ya, se Baebol ya we ol lida blong jyos oli no wantem nating, naoia i sas we i sas!
Wetem fulhat blong olgeta, ol Wetnes blong Jeova oli traehad blong tijim ol stret save blong Baebol long ol man we oli stap lukaotem. Antap long ol narafala Baebol we oli prentem mo givimaot, oli wokem wan ful Baebol we i kamaot long ol lanwis blong bifo, we ol tok blong hem i stretgud mo i isi blong ridim. Kam kasem 1995, oli prentem i bitim 74 milyan kopi blong New World Translation of the Holy Scriptures, long 12 lanwis. Tru ya, samting we i sas long eni Baebol, hemia mesej blong hem we i save givim laef.
[Tok blong pija long pej 32]
William Tyndale
[Credit Line]
From an old engraving in the Bibliothèque Nationale