Ripot Long Wok Blong Kingdom

Ol Yangfala Oli Talemaot Gud Nyus Long Afrika

SMOLTAEM afta we Jisas i laef bakegen, wan man Afrika i go visitim Jerusalem. Baebol i no givim nem blong hem. Hem i tokbaot man ya olsem nomo se, “wan haeman blong kwin blong ol man Itiopia. . . Hem i nambawan man blong lukaot long mane blong woman ya.” ?From wanem Baebol i tokbaot hem? From we wan enjel i lidim Filip blong go talemaot long hem, ‘gud nyus long saed blong Jisas.’ Pruf i stap se man ya blong Itiopia, hem i faswan man Afrika blong kam memba blong Kristin kongregesen.—Ol Wok 8:26-39.

Tede i gat plante handred taosen Wetnes blong Jeova long Afrika. Oli yusum evri jans we oli gat, blong serem wetem ol narafala, gud nyus long saed blong Jisas. Ol ekspiryens we oli kam biaen, oli soem se ol yangfala tu long Afrika, oli joen long wok ya.

◻ Sandy mo Priya, tu gel blong Nairobi long Kenya, we oli gat 11 yia, oli stap kolosap. Oli glad blong pleplei tugeta mo oltaem wan i givim buk blong ol store long narawan. Papa mama blong Priya oli stat blong stadi Baebol wetem ol Wetnes blong Jeova. Naoia, Priya i gat sam nyufala buk we hem i save ademap long ol buk we hem i gat finis. Wan long olgeta we hem i laekem moa, hemia Listening to the Great Teacher, we Watch Tower Society i prentem. Hem i serem buk blong hem “Great Teacher” wetem fren blong hem Sandy, mo tufala gel ya oli stat blong stadi buk ya oltaem.

Be, Una, mama blong Sandy, i joenem Jyos blong ol man Anglikan mo hem i no wantem se gel blong hem i ridim ol buk blong ol Wetnes blong Jeova. Nating we mama blong hem i agensem hem, hem i gohed long stadi. Wan dei Sandy i askem bigwan long mama blong hem, blong hem i lesin long storeyan blong tufala, wan taem nomo. Stampa tok blong japta we gel ya i ridim long dei ya, hemia “Tufala Man We Oli Mekem Lafet Blong Betde.” Una i lesin mo hem i sapraes tumas. Kwiktaem nomo, hem i go luk mama blong Priya wetem fulap kwestin long Baebol

Mama blong Priya i mekem plan blong wan Wetnes i kam stadi wetem Una. I no longtaem, Una hem wan i stap serem samting we hem i lanem wetem Dolly, wan woman we hem i wok wetem. Long sem taem ya, Priya we i gat 11 yia, hem i gohedgud mo hem i mekem disisen blong tekem baptaes long wora blong soem se hem i givim laef blong hem fulwan long Jeova, long wan distrik asembli blong ol Wetnes blong Jeova. !Long sem asembli ya, Priya i haremgud tumas, taem Una mo Dolly tufala tu oli tekem baptaes!

◻ I gat sam Kantri long Afrika we oli no rejistarem wok blong ol Wetnes blong Jeova. Long wan kantri olsem, ol man oli akseptem ol wok mo bilif blong skul blong ol Wetnes blong Jeova. Long wan skul long kantri ya, wan boe we i gat seven yia mo brata blong hem we i gat sikis yia, oli pikinini blong ol Wetnes blong Jeova​—oli letem tufala oli no stap long taem blong prea long skul.

Wan dei wan nyufala tija i askem we tufala boe ya oli joen long prea wetem ol narafala pikinini. Fasbon boe i no agri mo tija i kilim hem. Sadrak, yangfala brata blong hem we i gat sikis yia, i strong blong oli go luk hedmasta long ofis blong hem. Hedmasta mo nyufala tija oli askem long hem, from wanem hem i no wantem joen wetem ol narafala. Oli askem long hem sipos hem i fraet we papa-mama blong hem tufala oli kilim hem from. Hem i ansarem stret long Arabik lanwis se: “No, God we mi wosip long hem i no wan God we i gat fasin olbaot be fasin blong hem i stret gud. Mi no save stap olsem wan long ol Wetnes blong Jeova long haos mo long skul mekem narafala wosip!” Frut we i kamaot, oli agri se hem i no moa joen long taem blong prea blong skul.

Afta we hem i tekem baptaes, man Itiopia we buk blong Ol Wok i tokbaot “hem i stap go long rod blong hem bakegen, we i stap harem i gud tumas long tingting blong hem.” (Ol Wok 8:39) Sem mak tede, ol man blong talemaot Kingdom long bigfala kantri blong Afrika oli haremgud long jans we oli gat, blong talemaot gud nyus long saed blong Jisas.’—Ol Wok 8:35.