?I Gat Gudfala Risen Blong No Bilif Fulwan Long Jisas?

?I TRU se Jisas blong Nasaret i bin mekem ol merikel? ?Hem i bin laef bakegen long ded, olsem ol disaepol blong hem oli talem? ?Hem i wan trufala man? Long taem blong yumi, i luk olsem se plante man oli no save givim ansa we i sua long ol kwestin ya. ?From wanem? From we oli no bilif fulwan long Jisas. Samting ya i min se oli no sua long ol filing blong olgeta, oli no save sipos wan samting i tru, no i save hapen. ?Be i gat gudfala risen blong gat filing ya we man i no sua long saed blong Jisas? Yumi luk.

?Olsem Wanem Samfala Oli Stat Blong No Bilif Fulwan Long Jisas?

Long en blong ol yia 1800 mo long stat blong ol yia 1900, sam man Jemani we oli man blong stadi dip long saed blong skul, oli talem se store blong Jisas i “wan gyaman store blong Skul blong bifo.” Fasin ya we oli tok agensem Jisas se hem i no wan trufala man, i mekem rao i kamaot long medel blong ol man blong hae save, long stat blong ol yia 1900. Rao ya i kasem olgeta man long taem ya, mo i gat paoa yet long plante man long taem blong yumi. Eksampel, i no longtaem i pas long Jemani, oli askem kwestin long sam man olsem wan stadi, mo 3 pesen blong ol man ya oli bilif se Jisas i “neva laef,” mo se “ol aposol nao oli mekemap store ya long saed blong Jisas.” Yes, ol sid blong fasin ya we man i no bilif fulwan long Jisas, we oli planem long stat blong ol yia 1900, oli stap gru long hat blong ol man yet long taem blong yumi.

?From wanem yumi save talem se i no gat pruf blong bilif ya se man nomo i “mekemap” store blong Jisas? Wolfgang Trilling, wan man blong stadi dip long Baebol, i talem se: “I no moa gat rao long saed ya se Jisas i bin stap no no gat, hemia se, hem i wan gyaman man long histri, wan kastom store, no no gat. Oli stretem kwestin ya finis from dip stadi we oli mekem, long wan rod we ol man we oli tinghevi long ol samting, oli no moa luk problem ya olsem wan kwestin long saed blong save.” Nating se i olsem, samfala oli no bilif fulwan yet se Jisas i bin stap. From samting ya, i gud yumi faenemaot olsem wanem yumi save pruvum se Jisas i bin stap, mo tekemaot ol narafala tingting we oli mekem se samfala oli no bilif long hem fulwan.

Ol Pruf We Oli Givhan Blong Winim Tingting We i Hafhaf

Trilling i talem se rabis rod we oli yusum blong kilim Jisas, olsem we hem i wan prapa man nogud, hemia i “bigfala pruf bitim ol narafala pruf blong agensem ol man we oli no bilif fulwan long Jisas.” ?From wanem? From we ded blong hem i “mekem fasin ya blong seremaot nyufala bilif long ol man Jyu mo ol man we oli no Jyu, i slou daon, mo i blokem tu.” (Skelem wetem 1 Korin 1:23.) !Sipos ded ya blong Jisas we hem i Mesaea i spolem ol man Jyu mo ol Hiten man olsemia, yumi save se ol aposol nomo oli no save mekemap wan store olsem! Mo tu, i no ol fo Gospel nomo we oli tokbaot ded blong Jisas olsem wan trufala samting we i hapen. Man Rom ya, Tacitus, we i man blong raetem ol buk, mo Talmud blong ol man Jyu tu, oli tokbaot.a

Sam narafala samting long laef blong Jisas, oli olsem pruf we i stap insaed long ol Gospel, blong soem se oli tru. Taswe, ol samting ya oli pruvum tu se ol tok we ol Gospel ya oli talem long saed blong Jisas, oli tru. Eksampel, ?ol man blong Jisas oli save mekemap store ya se hem i kamaot long Nasaret, wan ples we i no impoten? ?Mo oli save mekemap store ya we Judas, wan fren we oli trastem, i letem hem long han blong ol enemi blong hem? ?Yu ting se i save tru we oli mekemap wan store se ol narafala disaepol blong Jisas oli lego hem from fasin we oli fraet tumas long ol man? !I no save hapen olsem we ol disaepol oli mekemap ol smosmol haf blong ol store ya we oli soemaot ol rong olsem, nao biaen oli talemaot long olgeta man! Antap bakegen, Jisas i gat gudhan blong tijim ol man from wan spesel fasin we hem i yusum. Long ol buk blong ol man Jyu long faswan handred yia, i no gat wan samting nating we i sem mak long ol parabol blong Jisas. ?Weswan man nao we yumi no save nem blong hem, i save “mekemap” wan nambawan store olsem Bigfala Toktok antap long Hil? Ol poen ya oli pruvum se yumi save trastem ol Gospel olsem ol trufala ripot long laef blong Jisas.

I gat ol pruf afsaed long Baebol tu blong soem se Jisas i wan trufala man. Blong tokbaot laef blong hem, ol fo Gospel oli yusum ol ples mo nem we oli tru mo stret. Ol man oli no jes mekemap nomo nem blong ol ples, olsem Betlehem mo Galili, ol impoten man mo grup, olsem Ponjes Paelet mo ol Farisi, mo ol kastom blong ol man Jyu mo sam narafala spesel fasin. Oli haf blong laef blong ol man long faswan handred yia, mo i gat pruf blong olgeta long ol narafala ples, i no long Baebol nomo, mo long ol samting tu we ol man oli faenem, taem oli digim graon blong lukaot ol samting blong bifo.

Taswe, i gat plante pruf, long Baebol mo afsaed long Baebol, se Jisas i wan trufala man we i bin laef.

Be, plante man oli no bilif fulwan yet long ol merikel blong hem. Yes, stadi we yumi tokbaot antap, i soem se smol nomo blong ol man Jemani we oli stap go long jyos, oli bilif fulwan se ol merikel blong Jisas mo fasin we hem i laef bakegen long ded, oli “rili hapen.” ?I gat risen blong no bilif fulwan long ol merikel mo fasin ya we Jisas i laef bakegen?

?From Wanem Sam Man Oli No Bilif Fulwan Long Ol Merikel Blong Jisas?

Matyu 9:​18-36 i tokbaot ol merikel blong Jisas, se hem i mekem ol sikman oli kamgud, i mekem ol dedman oli laef bakegen, mo i ronemaot ol rabis speret long man. Tija ya Hugo Staudinger, wan man blong raetem histri, i talem se: “Yumi no save bilif, mo histri i soem se i no save hapen, we ol ripot ya blong ol bigbigfala wok olsem oli kamaot long tingting blong man nomo.” ?From wanem? !From we i luk olsem we oli raetem ol faswan Gospel, long wan taem we bighaf blong ol man we oli luk ol merikel ya, oli laef yet! Yumi save faenem moa pruf long tok ya we Staudinger i gohed blong talem se, ol man Jyu we oli agensem Jisas “oli neva haedem se hem i bin mekem ol bigbigfala wok.” Sipos yumi no tingbaot ol narafala pruf, be yumi skelem pruf ya nomo we i no kamaot long Baebol, yumi luk we i stret blong bilif fulwan long ol merikel blong Jisas.​—2 Timote 3:16.

Nating se “bighaf blong ol man Jemani oli bilif se Jisas i bin mekem ol sikman oli gud bakegen,” plante oli hafhaf long saed blong paoa we hem i yusum blong mekem ol merikel ya. Eksampel, wan man Jemani we plante man oli save hem olsem man blong mekem dip stadi long saed blong jyos, i talemaot long fored blong ol man se, ol merikel we Jisas i mekem, oli kamaot from we ol tok blong hem we i gat paoa, i mekem ol man we oli stap trabol long tingting, oli haremgud. ?Tok ya i stret?

Traem tingbaot. Mak 3:​3-5 i talem se wan man we i no save stretem han blong hem, Jisas i mekem hem i gud bakegen. ?Be sik ya we man i no save stretem han blong hem, i kamaot from tingting we i trabol? No gat. From samting ya, merikel ya i no kamaot nomo from paoa blong toktok blong Jisas i mekem man i haremgud. Oraet, ?wanem nao i mekem se Jisas i naf blong wokem ol merikel? Tija Staudinger i talem se: “I no gat ol loa we oli stretgud long samting ya, mo sipos wan man i no agensem bilif long God fulwan, ale hem i no save tanem baksaed long stampa poen ya se, maet God, we paoa blong hem i bitim paoa blong man, i save mekem ol samting we man i no save mekem.” Yes i tru, wetem “paoa blong God” we i givhan long Jisas, hem i bin mekem prapa bodi blong ol sikman i kamgud. Taswe i no gat gudfala risen blong hafhaf long bilif blong yumi long ol merikel blong hem.​—Luk 9:43; Matyu 12:28.

Olsem The American Peoples Encyclopedia i talem, sipos merikel we i bigfala moa bitim ol narafala merikel​—hemia we Jisas i laef bakegen​—i tru, ale olgeta narafala merikel we ol Gospel oli tokbaot “oli save tru tu.” ?I tru se God i bin mekem Jisas i laef bakegen long ded?

?I Gat Risen Blong No Bilif Fulwan Se Jisas i Laef Bakegen?

Fastaem, tingbaot wan samting we i joen wetem laef bakegen blong Jisas, we i olsem pruf se samting ya i tru​—gref blong hem i emti. Trutok ya se gref blong Jisas i emti, ol man long taem blong hem oli no agensem. Ol enemi blong Jisas tu oli no agensem samting ya. (Matyu 28:​11-15) !Sipos hem i wan gyaman toktok, oli save faenemaot isi nomo! Buk we yumi tokbaot antap, i talem stret nomo, i se: “I no bin gat wan man i eksplenemgud from wanem hol blong ston ya i emti, Baebol nomo i eksplenem, i se: ‘Hem i no stap long ples ya. Hem i laef bakegen finis long ded’ (Mat. 28:6).”

Samfala oli agens, oli talem se hemia ol disaepol blong Jisas nomo we oli talemaot long evri ples se Hem i Mesaea we i laef bakegen long ded. Mo i tru se oli mekem olsem. ?Be mesej blong olgeta i save gat paoa long ol man sipos i no stanap strong long ol trufala samting we oli hapen, antap moa, ded mo laef bakegen blong Jisas? No gat. Aposol Pol i savegud samting ya, taswe hem i raetem se: “Sipos Kraes i no laef bakegen long ded, hemia, mifala i stap talemaot gud nyus ya, be blong nating nomo, mo yufala i stap bilif, be blong nating nomo tu. Antap bakegen, tok ya i min se mifala i gyaman, mifala i tanem store blong God i go krangke. From we mifala i stap wetnes long God, se hem i mekem Kraes i laef bakegen finis long ded.”​—1 Korin 15:​14, 15; skelem wetem Jon 19:35; 21:24; Hibrus 2:3.

Long faswan handred yia, i gat plante man we ol man oli savegud olgeta, we oli talemaot se oli luk Jisas afta we hem i laef bakegen long ded. Sam long ol man ya, hemia ol 12 aposol mo Pol, mo tu, bitim 500 narafala man we oli luk hem.b (1 Korin 15:6) Tingbaot tu, from wanem Matias i naf blong tekem ples blong aposol Judas we hem i no stap tru long Jisas. Ol Wok 1:​21-23 i talem se Matias i save givim wetnes se Jisas i laef bakegen, mo tokbaot ol samting we Jisas i bin mekem. Sipos laef mo fasin we Jisas i laef bakegen long ded oli gyaman store nomo, i blong nating nomo we Matias i mas save ol samting ya blong oli putumap hem.

Plante man long faswan handred yia oli save talemaot se oli bin luk laef, ol merikel, ded, mo laef bakegen blong Jisas. From samting ya nao, kwiktaem nomo Kristin Skul i kasem ol ples we oli stap aninit long Gavman blong Rom, nating se i gat plante samting blong blokem, olsem yumi tokbaot antap. Ol man blong Jisas oli rere blong fesem ol hadtaem, trabol we ol man oli ronem olgeta, mo ded tu, blong talemaot long olgeta ples se Jisas i laef bakegen, mo blong talemaot stampa trutok we i joen wetem. ?Wanem trutok ya? Hemia se paoa blong God nomo i mekem Jisas i laef bakegen long ded. ?From wanem Jeova God i mekem Jisas i laef bakegen long ded? Ansa blong kwestin ya i soem se hu nao man ya Jisas we histri i tokbaot.

Long dei blong Pentekos, aposol Pita i talem klia long ol man Jyu long Jerusalem, we oli sapraes, i se: ‘God i mekem man ya Jisas, hem i laef bakegen finis long ded, mo mifala evriwan ya i stap talemaot samting ya. God i leftemap hem i go antap finis, blong i stap long raet saed blong hem. God Papa blong yumi i givim tabu speret long hem finis, olsem we i promes finis long hem bifo. Mo ol samting ya we yufala i stap luk, mo we yufala i stap harem, oli wok blong tabu speret ya we Jisas i givim long mifala. Deved ya, hem i no go antap long heven, be hem nomo i talem tok ya, i se “Hae God i talem long Masta blong mi, i se ‘Yu sidaon long raet saed blong mi, yu wet. Bambae mi mekem ol enemi blong yu olsem mat we i ples blong leg blong yu.’ ” From samting ya, yumi man Isrel evriwan, yumi mas savegud se i tru we God i tekem Jisas ya we bifo yufala i nilim hem long pos, nao hem i mekem hem i Masta blong yumi, mo i Mesaea tu.’ (Ol Wok 2:​32-36) Yes, Jeova God i mekem Jisas blong Nasaret i “Masta blong yumi, mo i Mesaea tu.” ?Ol man oli gat risen blong no bilif fulwan long saed blong wok ya blong hem we i laenap wetem stampa tingting blong God?

?From Wanem Oli No Bilif Fulwan Long Wok Blong Jisas Naoia?

?Wanem i save winim tingting we i hafhaf long saed blong Jisas mo wok blong hem? Trutok ya we i klia se hem i wan trufala profet. Hem i bin talemaot ol fasin we yumi luk tede, olsem faet, hadtaem blong kasem kakae, graon i seksek, fasin blong brekem loa, mo ol man oli no gat lav. Antap bakegen, hem i bin talem se: ‘Bambae ol man oli stap talemaot gud nyus blong kingdom long olgeta man. Bambae oli talemaot long olgeta ples long wol, blong oli wetnes blong hem long fes blong olgeta man. Nao biaen, bambae en i save kam.’ (Matyu 24:​3-14) Ol samting we oli fulumap ol profet tok ya, oli pruvum se Jisas i Kraes ya we i laef bakegen, i stap rul we yumi no save luk, ‘long medel blong ol enemi blong hem.’ Mo i no longtaem, bambae hem i mekem nyufala wol blong God i kamtru.​—Ol Sam 110:​1, 2; Daniel 2:44; Revelesen 21:​1-5.

Naoia, bitim olgeta taem bifo, ol man oli nidim tumas wan Sevya we waes blong hem i bitim waes blong man. I no gat risen blong bilif hafhaf nomo long Jisas se hem i stret man we God i jusum blong sevem ol man. Jon, we hem i luk ol nambawan merikel blong Jisas, mo i stap taem hem i laef bakegen long ded, i talem se: “Yumi luk finis we Papa blong yumi i sanem Pikinini blong hem i kam blong i sevem ol man long wol, mo yumi stap talemaot se samting ya i tru.” (1 Jon 4:14; skelem wetem Jon 4:42.) Yumi no gat wan gudfala risen blong hafhaf long bilif blong yumi long Jisas, ol merikel, ded, mo laef bakegen blong hem. From samting ya, yumi no gat risen tu blong hafhaf long bilif ya se Jeova God i putumap hem long raet saed blong Hem, olsem man we i stret folem loa blong kam King. I klia nomo, Jisas blong Nasaret, hem i King long Kingdom blong God, mo hem i ‘Sevya blong wol.’​—Matyu 6:10.

[Ol futnot]