?God i Stap Long Fasples Long Famle Blong Yu?
“Yu mas laekem Jeova, God blong yu long olgeta hat blong yu.”—MAK 12:29, 30, NW.
1. ?Fasin ya we yumi laekem Jeova tumas i impoten olsem wanem?
WAN tija blong loa i bin askem long Jisas se: “?Wanem loa blong God we i hae moa long ol narafala loa?” Jisas i no talem prapa tingting blong hem, be hem i yusum Tok blong God long Dutronome 6:4, 5 blong givim ansa long kwestin ya. Hem i ansa se: “Yufala man Isrel, yufala i lesingud. Jeova, God blong yumi, hem i wan Jeova nomo. Mo yu mas laekem Jeova, God blong yu, long olgeta hat blong yu, mo long olgeta laef blong yu, mo long olgeta maen blong yu, mo long olgeta paoa blong yu.”—Mak 12:28-30, NW.
2. (a) ?Jisas i fesem wanem fasin agens? (b) ?Wanem samting i save mekem se samtaem i had blong mekem Jeova i glad?
2 Blong obei long loa ya we Jisas i kolem loa we i nambawan—loa we i moa impoten—oltaem nomo, yumi mas mekem samting we Jeova i glad long hem. Jisas i mekem olsem, nating se wan taem, aposol Pita i traem blong blokem hem. Mo long wan narafala taem, ol prapa famle blong hem tu oli traem blong mekem sem samting. (Matyu 16:21-23; Mak 3:21; Jon 8:29) ?Olsem wanem sipos samting olsem i kamaot long laef blong yu? Maet ol memba blong famle blong yu oli wantem se yu no moa stadi Baebol mo yu no moa joen wetem ol Wetnes blong Jeova. ?Bambae yu putum God long fasples, mo mekem samting we hem i glad long hem? ?God i stap long fasples long laef blong yu, nating se ol memba blong famle oli agensem yu taem yu traehad blong mekem wok blong hem?
Fasin Agens Blong Famle i Olsem Wan Trap
3. (a) ?Wanem trabol i save kamaot long famle from ol tijing blong Jisas? (b) ?Olsem wanem ol memba blong famle oli save soem hu nao oli laekem moa?
3 Jisas i no daonem hadtaem we i save kamaot taem sam memba blong famle oli agensem wan narafala long famle we hem i bilif long ol tijing blong Jisas. Hem i talem se: “Bambae man i gat ol enemi blong hem, we olgeta oli blong haos blong hem nomo.” Be nating se nogud samting ya i save kamaot, Jisas i soem hu i mas stap long fasples, taem hem i talem se: “Man we i laekem papa no mama blong hem moa, i winim we hem i laekem mi, hem i no stret blong i kam man blong mi. Mo man we i laekem boe no gel blong hem moa, i winim we hem i laekem mi, hem i no stret blong i kam man blong mi.” (Matyu 10:34-37) Yumi stap putum Jeova God long fasples taem yumi folem ol tijing blong Pikinini blong hem, Jisas Kraes, we i “olsem wan stret pija blong God.”—Hibrus 1:3; Jon 14:9.
4. (a) ?Wanem samting we Jisas i talem se i joen wetem fasin blong kam man blong hem? (b) ?I minim wanem se ol Kristin oli mas no laekem nating ol memba blong famle blong olgeta?
4 Long wan narafala taem, Jisas i stap tokbaot ol samting we oli joen wetem fasin blong kam wan trufala man blong hem, nao hem i talem se: “Sipos wan man i kam long mi, hem i mas no laekem nating papa mo mama blong hem, mo woman blong hem, mo ol pikinini blong hem, mo ol brata mo ol sista blong hem. Yes, mo hem i mas no laekem nating sol blong hem tu. Sipos no, bambae hem i no save kam disaepol blong mi.” (Luk 14:26, NW) I klia we, Jisas i no minim se ol man blong hem oli no mas laekem nating ol memba blong famle blong olgeta. From we hem i bin talem long ol man se oli mas laekem ol enemi blong olgeta tu. (Matyu 5:44) Be long ples ya, Jisas i minim se ol man blong hem oli no mas laekem ol memba blong famle blong olgeta tumas, i winim we oli laekem God. (Skelem wetem Matyu 6:24.) Folem mining ya, Baebol i talem se Jekob i ‘no laekem nating’ Lea mo i laekem tumas Rejel. I minim se hem i laekem Rejel moa, i winim we hem i laekem Lea, sista blong hem. (Jenesis 29:30-32) !Jisas i talem tu se yumi mas no laekem nating prapa “sol” no laef blong yumi, i minim se yumi no mas laekem laef blong yumi tumas bitim we yumi laekem Jeova!
5. ?Olsem wanem Setan i save yusum plan blong famle blong trikim yumi?
5 Jeova, Hemia we i Wokem olgeta samting mo Man blong Givim Laef, i wantem we olgeta man blong hem oli wosip long hem fulwan. (Revelesen 4:11) Aposol Pol i raetem se: “Mi bodaon, mi prea long Papa blong yumi ya, we hem nomo i stampa blong fasin blong papa, nao olgeta famle long heven mo long wol oli stap tekem fasin ya long hem.” (Efesas 3:14, 15) Jeova i wokem plan blong famle long wan nambawan fasin, mekem se ol wanwan memba blong famle oli gat wan filing blong lav long ol narafala long famle. (1 King 3:25, 26; 1 Tesalonaeka 2:7) Mo tu, lav ya i mekem se yumi wantem mekem olgeta ya we yumi laekem olgeta tumas oli glad long yumi. Be Devel Setan i save yusum lav ya insaed long famle, blong trikim yumi. Hem i save mekem se famle i agensem yumi. Plante man oli faenem se i hadwok blong stanap strong long saed blong trutok blong Baebol taem oli fesem ol trabol olsem.—Revelesen 12:9, 12.
Winim Traem Ya
6, 7. (a) ?Olsem wanem ol memba blong famle oli save kasem help blong luksave se i impoten tumas blong stadi Baebol mo joen wetem ol narafala Kristin? (b) ?Olsem wanem yumi save soem se yumi rili laekem ol memba blong famle blong yumi?
6 ?Bambae yu mekem wanem sipos yu mas jusum blong mekem God i glad no blong mekem wan memba blong famle i glad? ?Bambae yu mekem eskyus se God i no wantem we yumi stadi long Tok blong hem mo folem ol rul blong hem sipos ol samting ya oli mekem trabol insaed long famle? Traem tingbaot. Sipos yu stop, yu no moa gohed blong stadi Baebol, mo yu no moa joen wetem ol Wetnes blong Jeova, ?olsem wanem ol famle blong yu bambae oli kasem save se laef blong yumi i dipen long stret save blong Baebol?—Jon 17:3; 2 Tesalonaeka 1:6-8.
7 Yumi save eksplenem samting ya olsem: Maet wan memba blong famle i wantem dring alkol tumas. Sipos yu haedem no mekem eskyus from problem blong hem long saed blong dring, ?yu ting se fasin ya bambae i givhan long hem? ?Yu ting se i moa gud blong lego nomo mo no mekem wan samting long saed blong problem ya, blong mekem se pis i stap long famle? No gat. Ating yu agri se i moa gud blong traem halpem hem blong winim problem ya long saed blong dring, nating se hem i kros long yu mo i tok nogud long yu. (Proveb 29:25) Olsem nao, sipos i tru se yu laekem ol memba blong famle blong yu, bambae yu no save letem olgeta oli stopem yu blong stadi Baebol. (Ol Wok 5:29) Taem yu stanap strong, samting ya nomo i save givhan long olgeta blong luksave se laef blong yumi i dipen long fasin blong yumi blong folem ol tijing blong Kraes.
8. ?Olsem wanem fasin blong Jisas blong obeigud long samting we God i wantem i save givhan long yumi?
8 Samtaem, i had tumas blong putum God long fasples. Be rimemba se, Setan i mekem i had long Jisas tu, blong mekem wil blong God. Be Jisas i neva stop. Hem i stanap strong, nating se hem i harem nogud tumas long bodi blong hem, taem hem i ded long pos blong sevem yumi. Baebol i talem se: “Jisas Kraes, [i] Sevya blong yumi.” “Hem i ded blong sevem yumi.” (Taetas 3:6; 1 Tesalonaeka 5:10) Yumi gat bigfala fasin tangkyu from we Jisas i stanap strong taem ol man oli agensem hem. From we hem i stanap strong mo i ded olsem wan sakrifaes, yumi gat hop blong kasem laef we i no save finis long wan nyufala wol we i gat pis mo stret fasin long hem, sipos yumi soem bilif long blad blong hem we i ron.—Jon 3:16, 36; Revelesen 21:3, 4.
Wan Bigfala Pei We Yu Save Kasem
9. (a) ?Olsem wanem ol Kristin oli save joen long wok blong sevem narafala? (b) ?Famle blong Timote i olsem wanem?
9 ?Yu luksave se yu tu, yu save joen long wok blong sevem ol narafala, mo sevem famle blong yu we yu laekem olgeta tumas? Aposol Pol i talem long Timote se: ‘Yu mas lukaotgud long ol samting ya [we yu bin lanem]. Sipos yu mekem olsem, yu save sevem yu wetem ol man we oli stap lesin long yu.’ (1 Timote 4:16) Timote i stap long wan famle we samfala long hem oli no gat sem bilif. Papa blong hem we i wan man Gris, i no bilif. (Ol Wok 16:1; 2 Timote 1:5; 3:14) Yumi no save sipos papa blong Timote i bin kam wan man blong bilif. Be, hem i gat moa jans blong kasem bilif from gudfala fasin mo bilif we waef blong hem, Yunis, mo Timote, tufala i soem.
10. ?Ol Kristin oli save mekem wanem blong givhan long hasban no waef blong olgeta we i no gat bilif?
10 Baebol i soem se ol hasban mo waef we oli strong blong sapotem trutok blong Baebol, oli save givhan blong sevem hemia we oli mared wetem, we i no folem Kristin fasin, taem oli halpem hem blong kasem bilif. Aposol Pol i raetem se: ‘Sipos wan long yufala i gat woman blong hem we i no bilif long Kraes, be woman ya i agri blong stap gud wetem hem, man ya i no save mekem divos long woman ya. Mo sipos wan woman long yufala i gat man blong hem we i no bilif long Kraes, be man ya i agri blong stap gud wetem hem, woman ya i no save livim man ya. ?Sipos yu yu woman olsem, olsem wanem yu ting se yu no save sevem man blong yu? ?No sipos yu yu man olsem, olsem wanem yu ting se yu no save sevem woman blong yu?” (1 Korin 7:12, 13, 16) Aposol Pita i tokbaot olsem wanem ol waef oli save mekem samting we i olsem se oli sevem hasban blong olgeta. Hem i talem se: “Yufala woman we i mared, yufala i mas obei long ol man blong yufala. Nao sipos ol man blong yufala oli no bilif long tok blong God, be bambae fasin nomo blong yufala i save pulum olgeta blong oli bilif.”—1 Pita 3:1.
11, 12. (a) ?Plante taosen Kristin oli kasem wanem pei finis, mo oli mekem wanem blong kasem pei ya? (b) Talem ekspiryens blong wan memba blong famle we i kasem pei from fasin blong hem blong stanap strong longtaem.
11 Long ol yia we oli jes pas i no longtaem, plante taosen man oli kam Wetnes blong Jeova, afta long plante manis no plante yia, we oli stap agensem Kristin wok blong ol famle blong olgeta we oli Wetnes. !Hemia i wan bigfala pei blong ol Kristin we oli bin stanap strong longtaem, mo i wan bigfala blesing long olgeta ya we bifo oli gat fasin agens! Wan Kristin elda we i gat 74 yia, i gat filing long voes blong hem taem i talem se: “Plante taem, mi talem tangkyu long waef mo ol pikinini blong mi, from fasin blong olgeta blong fasgud long trutok long ol yia we mi stap agensem olgeta.” Hem i talem se, long tri yia, hem i mekem stronghed, i no wantem se waef blong hem i tokbaot Baebol long hem. Hem i talem se: “Be woman blong mi i waes mo hem i jusum wan gudfala taem. Hem i stat blong prij long mi taem hem i stap holem ol leg blong mi. !Mi talem tangkyu tumas we hem i no stop taem mi stap agensem hem!”
12 Wan narafala hasban we bifo hem i agensem famle blong hem, i raetem se: ‘Mi mi nambawan enemi blong waef blong mi. Afta we hem i kasem trutok, mi sakem ol nogud tok long hem blong mekem hem i fraet, mo mitufala i rao evri dei. Mi minim se oltaem mi nao mi statem rao. Be mi no win. Waef blong mi i fasgud long Baebol. Blong twelef yia, mi faet strong agensem trutok mo agensem waef mo pikinini blong mi. Tufala i luk mi olsem we Devel Setan i stap long mi.’ Biaen, man ya i luklukgud long laef blong hem. Hem i eksplenem se: ‘Mi luksave se mi bin mekem fasin we i nogud tumas. Ale, mi ridim Baebol, mo mi save talem tangkyu tumas long ol advaes blong Baebol, we i mekem se naoia mi wan Wetnes we mi baptaes finis.’ !Tingbaot bigfala pei we waef ya i kasem! !Yes, hem i givhan blong ‘sevem hasban blong hem,’ taem hem i stanap strong long ol 12 yia we hasban blong hem i stap agensem hem!
Lanem Samting Long Jisas
13. (a) ?Wanem bigfala lesen we ol hasban mo ol waef oli mas lanem long fasin blong laef blong Jisas? (b) ?Olsem wanem eksampel blong Jisas i save givhan long ol man we oli faenem i had blong obei long samting we God i wantem?
13 Bigfala lesen we ol hasban mo ol waef oli mas lanem long laef blong Jisas, hemia fasin blong obei long God. Jisas i talem se: “Oltaem, mi stap mekem ol samting we hem i wantem.” “Mi no traem mekem olsem we mi nomo mi wantem, mi stap traem mekem olsem we Papa blong mi we i sanem mi, hem i wantem.” (Jon 5:30; 8:29) Nating se wan taem, Jisas i faenem se i strong tumas blong mekem samting we God i wantem, be hem i obei. Hem i prea se: “Papa, sipos yu save letem, plis yu tekemaot kap ya, blong bambae mi mi no dring long hem.” Be kwiktaem nomo hem i gohed i se: “Be yu no mekem olsem we mi mi wantem, yu mekem olsem we yu nomo yu wantem.” (Luk 22:42) Jisas i no askem God blong jenisim samting we Hem i wantem. Hem i soem se hem i laekem God tumas, taem hem i obei long God long olgeta samting we God i talem long hem blong mekem. (1 Jon 5:3) Fasin ya blong putum wil blong God long fasples oltaem, olsem Jisas i mekem, i impoten tumas long laef blong yumi wanwan, mo long mared mo famle laef tu. Traem tingbaot from wanem i olsem.
14. ?Sam Kristin oli gat wanem tingting we i no stret?
14 Olsem yumi luk finis, taem olgeta we oli strong long bilif oli putum God long fasples, oli traehad blong no seraot long hasban no waef blong olgeta we i no gat bilif. Mo plante taem, oli halpem olgeta blong folem rod blong laef. Nating se hasban mo waef, tufala tugeta i gat bilif, maet mared blong tufala i no nambawan. From we yumi gat sin, plante taem olgeta we oli mared oli no tingbaot hasban no waef blong olgeta wetem ol tingting blong lav. (Rom 7:19, 20; 1 Korin 7:28) Samfala oli go kasem mak we oli wantem tekem wan narafala waef no hasban, nating se Baebol i no givim raet long olgeta blong mekem divos. (Matyu 19:9; Hibrus 13:4) Oli ting se i moagud blong mekem divos, from we i hadwok tumas blong mekem samting we God i wantem, hemia se hasban mo waef, tufala i mas stap tugeta olwe. (Malakae 2:16; Matyu 19:5, 6) I klia se, hemia wan tingting we i kamaot long man, i no kamaot long God.
15. ?From wanem fasin blong putum God long fasples i lukaotgud long yumi?
15 !Fasin blong putum God long fasples i blokem yumi long plante nogud samting! Hasban mo waef we tufala i mekem olsem, bambae tufala i traem blong stap tugeta mo folem ol advaes long Tok blong God blong stretem ol problem blong tufala. Olsem nao, tufala i blokem plante nogud samting we oli save kamaot taem tufala i no traem mekem ol samting we God i wantem. Ol nogud samting ya oli save mekem tufala i harem nogud tumas long hat blong tufala. (Ol Sam 19:7-11) Blong luk wan eksampel, hemia wan yangfala hasban mo waef, we tufala i rere blong mekem divos. Be tufala i mekem disisen blong traem folem ol advaes blong Baebol fastaem. Sam yia biaen, taem waef i tingtingbak long glad we hem i bin kasem long mared blong hem, hem i talem se: “Mi sidaon mo mi krae taem mi tingbaot we kolosap mi bin jusum blong seraot long hasban blong mi mo blong stap laef mi wan long ol yia we oli pas. Biaen, mi prea long Jeova God mo mi talem tangkyu long hem from ol advaes mo tok blong hem, we i soem rod long mitufala blong kasem wan nambawan fasin fren we i bin mekem mitufala i glad tumas.”
Ol Hasban, Ol Waef—!Folem Eksampel Blong Kraes!
16. ?Wanem eksampel we Jisas i soem long ol hasban mo ol waef?
16 Jisas, we oltaem i putum God long fasples, i soem nambawan eksampel long ol hasban mo waef, mo i gud we oli folemgud eksampel ya. Hasban i kasem oda blong folem eksampel blong Jisas, we i hed long ol memba blong Kristin kongregesen wetem kaen fasin mo lav. (Efesas 5:23) Mo ol Kristin waef oli save lanem samting long nambawan eksampel blong Jisas, we oltaem hem i stap obeigud long God.—1 Korin 11:3.
17, 18. ?Olsem wanem Jisas i soem wan nambawan eksampel long ol hasban?
17 Baebol i talem se: “Yufala man we i mared, yufala i mas laekem woman blong yufala tumas, olsem we Kraes i laekem [kongregesen] ya tumas. Taswe hem i letem laef blong hem blong sevem [kongregesen] ya.” (Efesas 5:25) Wan impoten fasin we Jisas i folem blong soem lav blong hem long kongregesen blong ol man blong hem, hemia we hem i stap oltaem olsem gudfala fren blong olgeta. Jisas i talem se: “Mi mi stap singaot yufala se ol fren blong mi, from we mi talemaot olgeta samting ya finis long yufala we mi harem long Papa blong mi.” (Jon 15:15) Tingbaot hamas haoa Jisas i spenem blong toktok wetem ol disaepol blong hem—plante, plante storeyan we hem i mekem wetem olgeta—!mo bigfala fasin tras we hem i gat long olgeta! Hemia i wan nambawan eksampel blong ol hasban.
18 Jisas i soem trufala intres long ol disaepol blong hem mo hem i rili laekem olgeta. (Jon 13:1) Taem oli no kasem klia ol tijing blong hem, wetem longfala tingting, hem i tekem olgeta oli go long wan ples we i no gat man long hem, mo hem i eksplenem bakegen. (Matyu 13:36-43) Ol hasban, ?fasin blong waef blong yufala blong stap strong long saed blong speret, i impoten bigwan long yufala olsem? ?Yu yu spenem taem wetem hem, blong mekem sua se ol trutok blong Baebol oli klia long maen mo hat blong yutufala evriwan? Jisas i joen wetem ol aposol blong hem long wok blong prij, maet hem i bin trenem olgeta wanwan. ?Yu yu stap joen wetem waef blong yu long wok blong prij, mekem visit long ol haos wanwan mo mekem ol Baebol stadi?
19. ?Olsem wanem Jisas i wan eksampel long ol hasban long fasin we hem i mekem taem ol slak fasin blong ol aposol blong hem oli kamaot oltaem?
19 Antap moa, taem ol aposol blong Jisas oli mekem sam fasin we oli kamaot from sin, Jisas i givim wan nambawan eksampel long ol hasban olsem wanem blong mekem long ol taem olsem. Long laswan kakae we hem i mekem wetem ol aposol blong hem, hem i luksave se fasin ya we wanwan i traem winim narafala i kamaot bakegen. ?Olsem wanem? ?Hem i tok nogud long olgeta? No gat. Wetem tingting daon, hem i wasem leg blong evriwan long olgeta. (Mak 9:33-37; 10:35-45; Jon 13:2-17) ?Yu yu soem longfala tingting olsem long waef blong yu? Bitim we yu toktok oltaem from wan slak fasin we i stap kamaot oltaem long waef blong yu, ?yu yu traem halpem hem wetem longfala tingting, mo soem wan gudfala eksampel we i save tajem hat blong hem? Maet waef i save jenisim fasin blong hem from fasin sore wetem lav we yu soem, sem mak olsem ol aposol oli bin mekem biaen.
20. ?Ol Kristin waef oli neva mas fogetem wanem samting, mo hu i stap olsem wan eksampel long olgeta?
20 Ol waef tu, oli mas tingbaot eksampel blong Jisas, we i neva fogetem se “God i olsem hed blong Kraes.” Oltaem hem i obei long Papa blong hem long heven. I sem mak, ol waef oli no mas fogetem se “man i olsem hed blong woman blong hem,” yes, hasban blong olgeta i hed blong olgeta. (1 Korin 11:3; Efesas 5:23) Aposol Pita i talem long ol Kristin waef blong tingbaot eksampel blong ‘ol woman we oli tabu’ long taem bifo, antap moa, ol woman olsem Sera, we “hem i obei long Ebraham, mo i singaot hem se ‘Masta blong mi.’”—1 Pita 3:5, 6.
21. ?From wanem mared blong Ebraham mo Sera i stapgud be mared blong Lot mo waef blong hem i finis?
21 I luk olsem we Sera i lego wan naes haos long wan taon we i gat plante rij samting, blong go laef long wan haos tapolen long narafala kantri. ?From wanem? ?From we hem i laekem fasin ya blong laef? No gat. ?From we hasban blong hem i askem hem blong go? Yes, hemia wan risen. Sera i laekem tumas Ebraham mo i respektem hem from ol gudfala fasin we hem i mekem blong obei long God. (Jenesis 18:12) Be bigfala risen we i mekem se hem i go wetem hasban blong hem, hemia se Sera i laekem Jeova tumas, mo wetem fulhat blong hem, hem i wantem folem rod we God i soem. (Jenesis 12:1) Hem i glad tumas blong obei long God. Be woman blong Lot i slou tumas blong mekem samting we God i wantem. Taswe, hem i lukluk biaen long ol samting we hem i livim long ples blong hem, Sodom, mo hem i wantem ol samting ya. (Jenesis 19:15, 25, 26; Luk 17:32) !Mared ya i finis wantaem nomo long wan nogud fasin—samting ya i kamaot from fasin blong woman ya blong no obei long God!
22. (a) ?Ol wanwan memba blong famle oli waes blong skelem olgeta olsem wanem? (b) ?Bambae yumi tokbaot wanem long nekis stadi?
22 Ale, olsem wan hasban no wan waef, i impoten we yu askem long yu wan se: ‘?God i stap long fasples long famle blong mifala? ?Mi mi rili stap traehad blong mekem wok we God i givim long mi insaed long famle? ?Mi mi rili traehad blong laekem tumas waef no hasban blong mi, mo blong halpem hem blong kasem mo holemtaet wan gudfala fasin fren wetem Jeova?’ Long bighaf blong ol famle, i gat ol pikinini tu. Long nekis stadi, bambae yumi tokbaot wok blong ol papa mo mama, mo from wanem olgeta mo ol pikinini blong olgeta oli nidim blong putum God long fasples.
?Yu Yu Rimemba?
◻ ?Ol tijing blong Jisas oli save mekem wanem trabol i kamaot long plante famle?
◻ ?Plante taosen Kristin we oli stanap strong, oli kasem wanem pei finis?
◻ ?Wanem bambae i givhan long ol hasban mo waef blong blokem fasin blong slip olbaot mo divos?
◻ ?Ol hasban oli save lanem wanem long eksampel blong Jisas?
◻ ?Olsem wanem ol waef oli save givhan blong mekem mared blong olgeta i hapi?
[Tok blong pija long pej 10]
?Olsem wanem Sera i givhan blong mekem mared blong hem i nambawan?