?I Gat Ol Enjel Raonabaot Long Yumi?

Samting ya i hapen kwiktaem tumas. From we Marilynn i stap tingbaot plante samting mo i fogetem weples hem i stap wokbaot long hem, ale hem i wokbaot i go stret long rod blong tren. Wantaem nomo, hem i harem wan bigfala noes. !Hem i lukluk i go, mo i sek se hem i stanap fored long wan tren we i stap kam! Marilynn i no moa save mekem wan samting, fraet i mekem tingting blong hem i lus. Tren ya i kam kolosap tumas long hem, mekem se hem i save luk blu ae mo fes blong draeva, we i seksek tumas. Marilynn i no save fogetem samting we i hapen biaen. Hem i talem se: “I olsem we wan bigfala man i stap biaen long mi, mo i pusum mi. Wantaem nomo, mi flae i goaot long rod blong tren, mo mi foldaon long ol ases blong faea we i stap kolosap.” Marilynn i kasem smol kil nomo. !Ale hem i girap blong talem tangkyu long man we i sevem hem​—be hem i no luk wan man! ?Hem i talem wanem? Marilynn i talem se: “Enjel we i stap lukaot long mi, hem nao i sevem laef blong mi. ?Hu bakegen i save mekem samting olsem?”

OL MAN blong wol ya we oli hafhaf long ol bilif blong olgeta, wantaem nomo oli stat blong tingting tumas long ol enjel. Long ol yia we oli jes pas, oli bin mekem ol store long saed blong ol enjel long ol televisin, ol sinema, mo long ol drama. Oli salem moa buk we i tokbaot ol enjel, i bitim ol narafala buk blong skul. I gat ol klab, ol spesel miting, mo ol nyuspepa blong tokbaot ol enjel. Oli stanemap ol kos blong halpem yu​—blong “letem paoa blong ‘enjel we i stap insaed long yu i kamaot,’” olsem wan magasin i talem.

Ol bisnesman we oli tekem evri jans blong salem sam samting, oli yusum fasin ya we plante man oli intres long ol enjel, blong pulum ol man blong pem olting blong olgeta. Long Yunaeted Stet, wan woman we i namba tu bos long wan stoa, i talem se: “Ol man oli wantem tumas blong pem eni samting we i gat enjel i stap long hem. Antap long plante buk long saed blong ol enjel we woman ya i salem, hem i tokbaot “ol aedol blong ol enjel, ol baj, ol doli, ol singglet, ol pija blong hangem long wol mo ol kad we oli gat pija blong ol enjel long olgeta.” Wan man blong raetem nyuspepa i kolem olgeta samting ya se rod blong “winim mane long olting blong heven.”

Ol man we oli intres tumas long ol enjel, oli talem se samting ya i no jes wan krangke tingting we i kasem plante man blong smoltaem nomo. Blong sapotem tok blong olgeta, oli talem plante store olsem pruf​—“ol trufala store.” Samfala oli talem se oli bin luk wan enjel we i gat bodi olsem man. Sam narafala oli luk wan laet, oli harem wan voes, oli filim se wan man i stap kolosap long olgeta no wan samting i stap pusum olgeta. Yes, oli bilif se, ol enjel nao oli mekem ol samting ya. Olsem Marilynn, plante man oli talem se wan enjel i sevem laef blong olgeta.

?Wanem i stap hapen? Joan Wester Anderson i raetem tu buk we tufala i tokbaot ol man we oli bin mitim “ol enjel.” Hem i talem se: “Mi ting se ol man oli stat blong intres bakegen long ol samting long saed blong speret.” Alma Daniel, wan woman we i givhan blong raetem wan narafala buk, i eksplenem moa. Hem i talem se, naoia ol enjel oli “stap folem wan oda, blong mekem ol man oli save long olgeta, ale long fasin ya, oli save pulum plante moa man. Risen we yumi stap lukluk plante samting long saed blong olgeta, i from we oli wantem olsem. Olgeta nao oli stap mekem samting ya.”

?Olsem wanem? ?Samting ya i tru? ?No i gat wan narafala samting we i stap pusum ol man blong oli intres long ol enjel? Blong faenem ansa blong kwestin ya, yumi mas lukluk long Tok blong God. Baebol i talem trutok long saed blong ol enjel, olsem bambae yumi luk biaen.

[Foto Credit Line long pej 2]

Pages 3 and 4: The New Testament: A Pictorial Archive from Nineteenth-Century Sources, by Don Rice/​Dover Publications, Inc.