Ol Man Oli Nidim Save Blong God

“Bambae yu kasem save long fasin fraetgud long Jeova, mo bambae yu faenem save blong God.”​—⁠PROVEB 2:⁠5.

1. ?From wanem yumi save talem se hat blong man i wan nambawan wok blong God?

STRET naoia, i gat 5,600,000,000 [faef bilyan sikis handred milyan] hat blong man i stap pam long wol ya. Evri dei, hat blong yu i pam 100,000 taem, mo i pusum 7,600 lita blad i gotru long 100,000 kilomita blong ol string long bodi. I no gat narafala haf blong bodi we i wok had moa bitim hat blong man we God i wokem long nambawan fasin.

2. ?Yu save talem se hat blong man i wok long wanem narafala fasin tu?

² Be, ol 5,600,000,000 hat ya long wol, oli stap wok long wan narafala fasin tu. Ol filing blong yumi, strong tingting we i pusum yumi, ol samting we yumi wantem, oli kamaot long hat. Hem i stampa blong ol tingting mo save blong yumi, mo ol samting we yumi wantem mekem. Hat i save flas no i save gat tingting daon, i save harem nogud no i save haremgud, mo i save gat tudak no laet long hem.​—⁠Nehemaea 2:2; Proveb 16:5; Matyu 11:29; Ol Wok 14:17; 2 Korin 4:6; Efesas 1:​16-18.

3, 4. ?Olsem wanem gud nyus i stap kasem hat blong plante man?

³ Jeova God i save ol samting we i stap long hat blong man. Proveb 17:3 i talem se: “I gat wan pot blong kukum selva long faea, mo wan oven blong kukum gol, be Jeova i stap skelem olgeta samting long hat blong man.” Jeova i no jes lukluk nomo hat blong ol wanwan man mo biaen i jajem olgeta. No gat. Hem i yusum ol Wetnes blong hem blong mekem gud nyus i kasem hat blong olgeta. Samting ya i laenap wetem tok ya blong aposol Pol, se: “ ‘Olgeta we oli singaot long Hae God, oli talem nem blong hem, hem bambae i sevem olgeta. ?Be sipos God i no sanem ol man oli go blong talemaot nyus blong hem, bambae ol man oli save go olsem wanem? ?Mo sipos man i no go talemaot nyus blong God, bambae ol man oli save harem nyus ya olsem wanem? ?Mo sipos ol man oli no harem nyus ya, bambae oli save bilif long hem olsem wanem? ?Mo sipos oli no bilif long hem, bambae oli save singaot long God olsem wanem? Taswe Baebol i talem se “Samting ya i gud tumas, we ol man oli kam blong talemaot gud nyus long yumi.” ’ ”​—⁠Rom 10:​13-15.

⁴ Jeova i glad tumas blong sanem ol Wetnes blong hem oli go long ol laswan ples long wol blong “talemaot gud nyus,” mo blong faenem olgeta we hat blong olgeta i stret. Naoia, namba blong ol Wetnes i bitim 5 milyan​—⁠1 Wetnes long evri 1,200 man long wol. I no isi blong karem gud nyus i go long ol bilyan man we oli stap long wol ya. Be God i yusum Jisas Kraes blong lidim wok ya. Hem i stap pulum ol man we hat blong olgeta i stret. Taswe, profet tok long Aesea 60:22 i stap kamtru, se: “Wan smolwan hem wan bambae i kam wan taosen, mo wan smolwan bambae i kam wan bigfala nesen. Mi Jeova, bambae mi mekem i spid long prapa taem blong hem.”

5. ?Wanem ya save, mo yumi save talem wanem long saed blong ol waes blong wol?

⁵ Taem ya, hem i naoia. Mo wan samting i klia​—⁠ol bilyan man long wol ya oli nidim save. Mining blong save se, ol samting we man i lanem tru long ekspiryens, tru long ol samting we hem i lukluk, mo from stadi. I gat plante save long wol. Ol save i kam antap bigwan long saed blong transpot, wok blong lukaotgud long helt, mo ol rod blong toktok long narafala ples. ?Be ol save ya blong wol, hemia samting we ol man oli rili nidim? !No gat! Faet, fasin agens, sik, mo ded, oli stap gohed blong spolem ol man. Plante taem, waes blong wol i olsem sanbij we wan strong win i stap blu long hem, ale i mekem i go olbaot.

6. Long saed blong blad, ?olsem wanem save blong God i defren long waes blong wol?

⁶ Blong mekem wan eksampel: Tu handred yia bifo, wol i folem fasin blong mekem blad blong sikman i ron, blong traem mekem hem i kamgud bakegen. George Washington, faswan presiden blong Yunaeted Stet, oli mekem blad blong hem i ron plante taem long ol laswan haoa blong laef blong hem. Long taem ya, hem i talem se: “Letem mi mi ded long kwaet fasin nomo. Mi no save stap longtaem nao.” Tok blong hem i tru. Hem i ded long sem dei ya​—⁠long Desemba 14, 1799. Tede, oli no moa yusum fasin ya blong mekem blad blong man i ron. Be oli leftemap fasin blong putum blad i go insaed long bodi blong man. Tufala rod ya evriwan oli mekem plante problem i kamaot we i givim ded long plante man. Be long olgeta taem ya, Tok blong God i bin talem se: “Yufala i no mas yusum blad.” (Ol Wok 15:​29, NW) Save blong God i stret oltaem, man i save trastem, mo i stretgud long taem blong yumi.

7. ?Olsem wanem stret save blong Baebol long saed blong fasin blong trenem pikinini i defren long waes blong wol?

⁷ Tingbaot wan narafala eksampel we i soem se man i no save trastem waes blong wol. Long plante yia, ol man blong stadi long tingting mo fasin blong man, oli leftemap fasin ya blong letem ol pikinini oli folem prapa tingting blong olgeta. Be biaen, wan long olgeta i talem se, hemia i wan mastik. Wan taem, ‘Philological Association’ blong Jemani i talem se fasin blong letem ol pikinini blong mekem wanem oli wantem, “i stampa blong ol problem we naoia yumi gat wetem ol yangfala.” Waes blong wol i save jenis, olsem we win i stap blu long hem. Be stret save blong Baebol i neva bin jenis. Baebol i givim ol waes advaes long fasin blong trenem pikinini. Proveb 29⁠:17 i talem se: “Sipos yu panisim pikinini blong yu, bambae hem i mekem tingting blong yu i spelgud, mo bambae hem i mekem sol blong yu i haremgud.” Papa mo mama i mas mekem samting ya wetem lav, from we Pol i raetem se: “Yufala papa mo mama, bambae yufala i no agensem ol pikinini blong yufala oltaem. Fasin ya bambae i mekem olgeta oli kros. Yufala i mas stretem olgeta, mo yufala i mas tijim olgeta, olsem we Jeova i wantem.”​—⁠Efesas 6:⁠4.

“Save Blong God”

8, 9. ?Olsem wanem yu save eksplenem Proveb 2:​1-6, long saed blong save we ol man oli rili nidim?

⁸ Nating se Pol i skulgud, hem i talem se: “Man we i stap tingbaot se hem i wan waes man long fes blong ol man, hem i mas lukaot gud. I nogud we hem i stap gyaman long hem. I moa gud man olsem i kam wan krangke man long fes blong ol man, nao long fasin ya hem i save kam wan waes man tru. From we olgeta fasin we ol man blong wol oli stap talem se oli waes, be long fes blong God oli krangke nomo.” (1 Korin 3:​18, 19) God nomo i save givim save ya we ol man oli rili nidim. Long saed blong save ya, Proveb 2:​1-6 i talem se: “Pikinini blong mi, yu mas kasem gud ol tok blong mi, mo yu mas holem gud ol loa blong mi oli stap kolosap long yu, blong mekem se sora blong yu i lesingud long ol waes tok, mo hat blong yu i laekem fasin luksave. Mo tu, yu mas gohed blong singaot long dip save, mo yu mas singaot strong long fasin luksave, blong oli kam long yu. Yu mas stap lukaot samting ya olsem selva, yu mas traem faenem olgeta olwe we yu no spel, olsem ol sas samting we oli haed. Sipos yu mekem olsem, bambae yu kasem save long fasin fraetgud long Jeova, mo bambae yu faenem save blong God. From we Jeova hem wan i givim waes. Save mo fasin luksave, oli kamaot long maot blong hem.”

⁹ Olgeta we gudfala hat i pusum olgeta, oli stap lesingud long ol waes tok, taem oli yusum long stret rod save we God i givim long olgeta. Oli mekem hat blong olgeta i laekem fasin luksave, nao oli stap skelemgud ol samting we oli lanem. I olsem we oli singaot dip save, no fasin blong luk olsem wanem olgeta haf blong wan bisnes oli joen tugeta. Olgeta we hat blong olgeta i stret, oli wok olsem we oli stap digim graon blong lukaot selva mo ol sas samting we oli haed. ?Wanem sas samting ya we olgeta we hat blong olgeta i stret oli kasem? Hemia “save blong God.” ?Wanem ya? Blong talem klia, hemia save we yumi faenem long Tok blong God, Baebol.

10. ?Yumi mas mekem wanem blong stap strong long saed blong speret?

¹⁰ Save blong God i tru, i no save jenis, mo i save givim laef. Hem i mekem man i strong long saed blong speret. Pol i talem long Timote se: “Yu yu mas holem stret toktok ya we mi tijim yu finis long hem. Ol toktok ya i blong soemaot rod long yu, blong yu save folem ol fasin blong bilif mo blong laekem tumas ol man, ol fasin ya we yumi stap folem from we yumi joen long Jisas Kraes.” (2 Timote 1:​13) Wan lanwis i gat ol stret toktok blong hem. I sem mak, “klin lanwis” we i kamaot long trutok blong Baebol i gat ‘ol stret toktok’ blong hem. Ol toktok ya i stanap long stampa tok blong Baebol, hemia se hae rul blong Jeova bambae i win tru long Kingdom. (Sefanaea 3:⁠9) Yumi mas holem ol stret toktok ya long maen mo hat blong yumi. Sipos yumi wantem blokem sik long hat blong yumi, olsem wan pijatok, mo stap strong oltaem long saed blong speret, yumi mas mekem Baebol i wok long laef blong yumi. Yumi mas yusumgud ol kakae long saed blong speret we God i stap givim long yumi tru long “slef ya we i stret mo waes.” (Matyu 24:​45-47, NW; Taetas 2:⁠2) I gud yumi tingbaot oltaem se, blong stap strong long saed blong speret, yumi nidim save blong God.

11. ?Wanem sam risen we i soem se ol man oli nidim save blong God?

¹¹ Tingbaot sam narafala risen from wanem ol bilyan man long wol oli nidim save blong God. ?Olgeta man evriwan oli save olsem wanem wol ya mo ol man oli stat? No gat, oli no save. ?Olgeta man oli save trufala God mo Pikinini blong hem? ?Evri man i save long kwestin ya we Setan i stanemap long saed blong hae rul blong God mo fasin blong man blong holemstrong long God? Bakegen, oli no save. ?Oli save from wanem yumi kam olfala mo yumi ded? Yumi mas talem bakegen se, no gat. ?Olgeta man long wol ya oli save se naoia Kingdom blong God i stap rul mo yumi stap long ol las dei? ?Oli kasem save se i gat ol rabis speret oli stap? ?Olgeta man oli gat save we oli save trastem, blong mekem wan hapi famle? ?Mo olgeta man oli save se hapi laef long Paradaes wol i stampa tingting blong Man we i Wokem yumi, we bambae hem i mekem i kamtru long ol man we oli obei long hem? Ol kwestin ya, ansa blong olgeta se, no gat. Taswe, i klia se ol man oli nidim save blong God.

12. ?Olsem wanem yumi save wosipim God “long speret mo long trutok”?

¹² Ol man oli nidim save blong God from wan narafala risen tu. Hemia from samting we Jisas i talem long prea blong hem long laswan naet long laef blong hem long wol ya. Ol aposol blong hem oli mas haremgud tumas taem hem i talem long olgeta se: “Mo hemia laef ya we i no save finis, we man i save yu, we yu nomo yu God tru, mo we man i save mi ya, Jisas Kraes, we yu yu sanem mi mi kam.” (Jon 17:⁠3) Yumi mas mekem save ya i wok. Hemia nomo i rod blong wosip long God long fasin we hem i agri long yumi. Jisas i talem se: “God hem i wan Speret, mo olgeta we oli stap mekem wosip long hem, oli mas wosip long speret mo long trutok.” (Jon 4:​24, NW) Yumi wosipim God “long speret,” taem hat we i fulap long bilif mo lav i pusum yumi. ?Olsem wanem blong wosipim hem “long trutok”? Hemia taem yumi stadi long Tok blong hem mo wosip long hem folem trutok we hem i soemaot long yumi​—⁠“save blong God.”

13. ?Ol Wok 16:​25-34 i talem wanem store, mo yumi save lanem wanem long store ya?

¹³ Evri yia, i gat plante taosen man oli stat blong wosipim Jeova. Be, ?yumi mas stadi Baebol longtaem wetem olgeta we oli intres? Olgeta we hat blong olgeta i stret, ?oli save kasem mak blong tekem baptaes kwiktaem? Tingbaot store blong man ya blong lukaot long kalabus mo famle blong hem, we Ol Wok 16:​25-34 i talem. Oli putum Pol mo Saelas long kalabus long Filipae. Be long medel naet, graon i seksek bigfala, nao ol doa blong haos kalabus ya oli open. Man ya blong lukaot long haos kalabus i stap tingting se ol presina oli ronwe finis, mo se bambae oli panisimgud hem. Ale, hem i wantem kilim hem wan i ded. Be Pol i talem long hem se olgeta evriwan oli stap yet. Pol mo Saelas, tufala i ‘talemaot tok blong Jeova long hem, mo long olgeta long haos blong hem.’ Man ya mo famle blong hem, oli no man Jyu, oli no gat save long tabu Baebol. Be, long wan naet nomo, oli bilif. Antap long samting ya, ‘man ya blong lukaot long kalabus wetem ol famle blong hem mo ol man blong wok blong hem oli baptaes.’ Fasin olsem i no stap hapen plante taem. Ol nyuwan ya oli kasem tijing long ol stampa trutok. Mo, oli lanem plante narafala samting long ol miting blong kongregesen.a Samting olsem i save hapen tede tu.

!I Gat Plante Kakae Tumas Blong Tekem Long Garen!

14. ?From wanem i gat nid blong mekem plante moa Baebol stadi long wan taem we i sot moa?

¹⁴ I gud tumas sipos ol Wetnes blong Jeova oli save mekem plante moa Baebol stadi long wan taem we i sot moa. I rili nidim samting ya. Eksampel, long ol kantri blong Is Yurop, ol man we oli wantem stadi Baebol, oli mas raetem nem blong olgeta long wan lis, mo wet gogo wan Wetnes i gat taem blong mekem stadi wetem hem. Samting ya i stap kamaot long plante narafala ples tu. Long wan taon long Dominikan Ripablik, plante tumas man oli askem long faef Wetnes we oli stap long ples ya blong mekem Baebol stadi wetem olgeta. Ol Wetnes ya oli no naf blong mekem stadi long olgeta evriwan. ?Oli mekem wanem? Oli leftemap tingting blong olgeta we oli intres blong kam long ol miting long Haos Kingdom mo wet gogo wan Wetnes i gat naf taem blong stadi Baebol wetem olgeta. Sem samting i stap hapen long plante ples long wol.

15, 16. ?Yumi kasem wanem blong givhan long yumi blong mekem save blong God i goaot kwik moa, mo wanem sam gudfala samting long saed blong hem?

¹⁵ Long plante bigfala ples​—⁠we plante kakae i rere blong tekem long garen​—⁠naoia ol man blong God oli fri blong wok fulwan. Nating se Jeova, ‘Masta blong Garen,’ i stap sanem moa man blong wok, i gat plante wok yet blong mekem. (Matyu 9:​37, 38) Blong mekem se save blong God i kasem moa man kwiktaem, “slef ya we i stret” i mekemrere wan samting we i givim klia save long smoltaem nomo, blong mekem se olgeta we oli stadi Baebol oli save gohed long saed blong speret evri wik. Hemia wan nyufala buk we yumi save stadi long hem kwiktaem wetem ol Baebol stadi​—⁠maet sam manis nomo. !Mo i isi blong karem buk ya long basket, hanbag, no long poket blong yumi nomo! Ol handred taosen man we oli hivap long “Ol Hapi Man Blong Presem God” Distrik Asembli blong ol Wetnes blong Jeova, oli glad tumas blong kasem nyufala buk ya we i gat 192 pej blong hem, nem blong hem, Save Blong Lidim Yu Long Laef We i No Save Finis.

¹⁶ Plante man long ol defren kantri oli mekemrere ol save we oli raetem wetem bigfala kea long buk ya Save. Taswe, buk ya i mas pulum tingting blong ol man long olgeta ples long wol. ?Be bambae i tekem longtaem blong buk ya i kamaot long ol lanwis blong ol man raonabaot long wol? No gat, from we wan buk we i gat 192 pej, oli save tanem kwiktaem i go long narafala lanwis, bitim wan buk we i bigwan moa. Long Oktoba 1995, Raeting Komiti blong Hed Kampani i givim raet long sam man long bitim 130 lanwis, blong tanem buk ya we i stap long Engglis i go long lanwis blong olgeta.

17. ?Wanem ol samting we bambae oli mekem i isi blong yusum buk ya Save?

¹⁷ Ol klia poen long wanwan japta blong buk ya Save, oli mas mekem se ol studen oli gru kwiktaem long saed blong speret. Buk ya i eksplenem ol trutok blong Baebol long fasin we i leftemap tingting blong man. Hem i no toktok plante long ol gyaman bilif. Ol tok blong hem oli klia mo i isi blong kasem save long hem. Taswe, bambae i isi blong yusum buk ya blong mekem ol Baebol stadi mo givhan long ol man blong kasemgud ol save blong God. Plante vas oli raetem fulwan long buk ya. Mo tu, i gat ol vas blong Baebol we oli no raetem fulwan, we studen i save jekemap taem hem i stap rerem stadi blong hem. Yumi save ridim ol vas ya long taem blong stadi sipos i gat naf taem. Be i no waes blong yusum ol narafala poen we oli save mekem se ol bigfala poen blong stadi oli no moa klia. Long defren fasin, olgeta we oli lidim ol Baebol stadi, oli mas traem blong luksave mo eksplenem long ol studen, bigfala poen blong ol wanwan japta blong buk ya. Samting ya i minim se hemia we i lidim stadi, hem i mas reregud. Olsem nao, ol bigfala poen oli mas kliagud long tingting blong hem fastaem.

18. ?I gud blong folem wanem rod taem yumi yusum buk ya Save?

¹⁸ ?Olsem wanem buk ya Save Blong Lidim Yu Long Laef We i No Save Finis bambae i spidimap wok blong mekem ol disaepol? Man i save stadi long buk ya we i gat 192 pej blong hem, long sot taem nomo. Mo olgeta we ‘oli stret blong kasem laef blong olwe,’ oli save lanem naf samting taem oli stadi long hem, blong givim laef blong olgeta long Jeova mo blong tekem baptaes. (Ol Wok 13:48) Taswe, yumi mas yusumgud buk ya Save long wok blong talemaot gud nyus. Sipos wan Baebol studen i stadi finis long bighaf blong wan narafala buk, maet i stret we hem i gohed gogo buk ya i finis. Be long ol narafala taem, yumi save talem long ol Baebol studen blong jenis i go long buk ya Save. Afta we Baebol studen i finisim nyufala buk ya, i no gat nid blong stadi wetem hem long wan narafala buk bakegen. Olgeta we oli akseptem trutok, oli save mekem save blong olgeta i gru taem oli kam long ol miting blong ol Wetnes blong Jeova, mo taem olgeta wanwan oli ridim Baebol mo ol defren Kristin buk.​—⁠2 Jon 1.

19. Bifo we yumi mekem ol Baebol stadi long buk ya Save, ?from wanem i gud blong tokbaot ol poen long pej 171 kasem 218 blong buk ya, Ol Rul Blong Mekem Minista Wok Blong Yumi?

¹⁹ Buk ya Save, oli raetem blong givhan long man blong ansarem olgeta kwestin we ol elda oli askem long pablisa we i wantem tekem baptaes blong kam wan Wetnes blong Jeova. Taswe, bifo we ol Baebol stadi blong yu oli jenis i go long nyufala buk ya, i gud blong spenem sam haoa wetem olgeta blong tokbaot ol kwestin long pej 171 kasem 218 blong buk ya Ol Rul Blong Mekem Minista Wok Blong Yumi.b Fasin ya bambae i givhan long yu blong makem ansa blong ol kwestin ya, taem yu stap mekem Baebol stadi wetem olgeta long buk ya Save.

20. ?Yu yu plan blong mekem wanem wetem buk ya Save Blong Lidim Yu Long Laef We i No Save Finis?

²⁰ Ol man long evri ples oli mas harem gud nyus. Yes, olgeta man oli nidim save blong God. Mo Jeova i gat ol Wetnes blong hem blong talemaot save ya. Naoia yumi gat wan nyufala buk we Papa blong yumi long heven we i gat lav i givim long yumi, tru long slef ya we i stret mo waes. ?Bambae yu yusum buk ya blong tijim ol man long trutok mo blong givim ona long tabu nem blong Jeova? Bambae Jeova i blesem yu taem yu traehad blong givimaot save ya long plante man, blong lidim olgeta long laef we i no save finis.

[Ol futnot]

?Bambae Yu Yu Ansa Olsem Wanem?

◻ ?Olsem wanem blong eksplenem hat we i olsem wan pijatok?

◻ ?Wanem ya save blong God?

◻ ?From wanem ol man oli nidim save blong God?

◻ ?Yumi kasem wanem nyufala buk, mo yu yu mekem plan blong yusum buk ya olsem wanem?

[Tok Blong Pija Long Pej 10]

I gat plante risen from wanem ol bilyan man long wol oli nidim save blong God