Halpem Ol Man Blong Kasem Save Ya Blong Lidim Olgeta Long Laef
1 Aposol Pol i talem se, ‘God i wantem sevem olgeta man, mo i wantem olgeta man bambae oli faenem stret save blong trutok.’ (1 Tim. 2:4) ?Olsem wanem blong halpem olgeta blong kasem save ya? Wan rod i blong mekem ol visit bakegen long ol man we buk ya Save Blong Lidim Yu Long Laef We i No Save Finis i wekemap intres blong olgeta. Buk ya i yusum ol klia, isi, gudfala tok blong eksplenem trutok blong Baebol. Stadi long buk ya i save lidim olkaen man blong kasem laef. ?Yumi save talem wanem long ol man blong pulum olgeta blong stadi wetem yumi?
2 Yu save gobak long olgeta we oli intres long poen ya se Baebol i wan gudfala buk blong lidim yumi, mo askem olgeta blong stadi:
◼ “Lastaem, yumitu bin tokbaot from wanem yumi save trastem Baebol olsem wan buk blong lidimgud yumi. From we Baebol i kamaot long God, hem i givim trufala hop mo i mekem yumi haremgud, olsem wan aposol blong Kraes i talem. [Ridim Rom 15:4.] Long en blong laswan storeyan blong yumi, mi stanemap kwestin ya, ?Olsem wanem save blong Baebol i save givhan long yumi wanwan?” Ridim haf 18 long pej 11 blong buk ya Save. Talem se ol Wetnes blong Jeova oli stap mekem bitim faef milyan Baebol stadi long wol, blong halpem ol man long evri ples blong kasem save ya blong lidim olgeta long laef we i no save finis. Talem se bambae yu soem long hem kwiktaem, olsem wanem yumi mekem stadi. Yusum haf 1 kasem 5 long japta 1.
3 Sipos yu bin tokbaot prea lastaem, maet yu traem yusum toktok ya blong statem wan stadi:
◼ “Mi hop se yu glad long storeyan blong yumitu lastaem, long saed blong prea. Yumi bin yusum buk ya Save Blong Lidim Yu Long Laef We i No Save Finis. Mi bin promes blong kambak mo tokbaot olsem wanem olgeta we oli prea long God oli save lesin long hem tu. Traem lukluk tok we i stap long pej 158. [Ridim haf 18.] Taswe, taem yumi wanwan i stadi long Baebol, yumi stap lesin long tok we God i talem long yumi. Samting ya i pulum yumi i kam kolosap moa long hem, mo i halpem yumi blong winim ol problem blong laef evri dei, we yumi tokbaot long ol prea blong yumi. Mi mi glad tumas blong stadi Baebol wetem yu.” Sipos man blong haos i glad, stat long faswan japta blong Save buk.
4 Sipos yu bin askem stret long man blong haos blong stadi, maet yu talem olsem taem yu gobak:
◼ “Mi mekem wan spesel visit long yu tede from we mi wantem storeyan moa wetem yu long saed blong Baebol stadi we mifala i stap mekem wetem ol man, we oli no pem. Mi bin livim wan buk wetem yu, Save Blong Lidim Yu Long Laef We i No Save Finis. Hemia nao buk we mifala i yusum blong stadi. Traem luk olsem wanem hem i lidim yumi blong lukluk insaed long Tok blong God. [Ridim haf 23 long pej 22.] Sipos yu save karem buk blong yu, bambae yumi gohed long stadi long ples we yumi stop lastaem.” Sipos yu no bin statem wan stadi lastaem, yu save talem se: “Maet i gud sipos mi soemaot long yu naoia, fasin we mifala i yusum blong stadi Baebol wetem ol man.” Mekem wan stret taem blong kambak mo blong gohed long stadi.
5 Sipos yumi yusumgud buk ya Save, bambae hem i givhan long yumi blong seremaot stret save we bambae i givim blesing long ol man. (Prov. 15:7) Olgeta we hat blong olgeta i stret, bambae oli haremgud tumas. Mo bambae oli gat strong risen blong folem ol stret fasin blong Jeova long laef blong olgeta. Samting ya bambae i lidim olgeta blong kasem laef we i no save finis.