Wan Kwestin

Mi kasem save se Grik tok ya “toʹte” (biaen) oli yusum blong talemaot wan samting we bambae i kamaot biaen long narafala samting. Sipos i olsem, ?from wanem Matyu 24⁠:9 (NW) i talem se: “Biaen [toʹte], bambae sam man oli holem yufala, oli mekem tumas trabol long yufala,” be, sem store long Luk 21:12, i talem defren i se: “Be taem olgeta samting ya oli no kamtru yet, bambae ol man oli save holem yufala, oli save mekem i strong long yufala”?

I tru se tok ya toʹte i save talemaot wan samting we i kam biaen no i folem narafala samting. Be, yumi mas kasem save se Baebol i no yusum wod ya blong minim samting ya nomo.

Buk ya A Greek-English Lexicon of the New Testament and Other Early Christian Literature, we trifala man ya Bauer, Arndt, mo Gingrich oli raetem, i soem se taem Baebol i yusum tok ya toʹte, i gat tu stampa mining blong hem.

Wan mining blong hem, hemia “long taem ya.” Samting ya i save minim “samting we i kamaot long wan stret taem bifo.” Wan eksampel hemia Matyu 2:​17 (NW): “Long taem ya, ol samting ya oli mekem tok ya i kamtru we profet Jeremaea i bin talemaot bifo.” Vas ya i no stap tokbaot wan samting we bambae i kamaot biaen long wan narafala samting, be hem i stap tokbaot wan stret taem bifo, se long taem ya. Mo tu, toʹte i save minim samting “we bambae i kamaot long taem ya, long fyuja.” Wan eksampel hemia we yumi faenem long 1 Korin 13⁠:12 (NW): “Naoia yumi save luk fasin blong God, olsem we yumi stap luk long wan glas we i no klia gud. Be long taem ya, bambae yumi save luk hem stret long fes blong yumi. Naoia save blong mi i hafhaf nomo. Be long taem ya, bambae mi savegud olgeta samting, olsem we God i savegud olgeta fasin blong mi finis.” Long ples ya, Pol i yusum tok ya toʹte blong minim ‘wan stret taem long fyuja.’

Diksonari ya i talem se man i save yusum wod ya toʹte tu blong “talemaot wan samting we i folem narawan.” Diksonari ya i givim plante eksampel we yumi faenem long ol trifala Gospel, we oli tokbaot ansa blong Jisas long ol aposol blong hem, taem oli askem long saed blong ol saen we bambae oli soemaot se hem i kambak finis.a Blong soem se tok ya toʹte i save “talem wan samting we i folem narawan,” diksonari ya i yusum ol tok blong Matyu 24:10, 14, 16, 30; Mak 13:14, 21; mo Luk 21:20, 27. Taem yumi luklukgud long ol vas raonabaot, yumi luk from wanem i stret blong kasem save long tok ya olsem wan samting we bambae i kamaot biaen long narafala samting. Mo samting ya i givhan bigwan blong kasem save long profet tok blong Jisas, long saed blong ol samting we bambae oli kamaot long fyuja.

Be, yumi no mas ting se evritaem we toʹte i kamaot long ol Gospel ya, hem i minim nomo samting we bambae i kamaot biaen long wan narafala samting. Eksampel, long Matyu 24:​7, 8, yumi ridim we Jisas i talem se nesen bambae i faet agensem nesen, bambae kakae i sot, mo graon bambae i seksek. Nao vas 9 (NW) i gohed se: “Biaen, bambae sam man oli holem yufala, oli mekem tumas trabol long yufala, gogo oli kilim yufala i ded. Bambae olgeta man oli no laekem yufala, from we yufala i holem nem blong mi.” ?I stret we yumi gat tingting ya se ol faet, kakae i sot, graon i seksek, we Jisas i bin talem, bambae oli kamaot evriwan, mo maet oli finis tu, bifo we trabol i kasem ol man blong God?

I no stret blong tingting olsem. Mo tu, ol samting we oli bin kamaot long faswan handred yia, oli pruvum se tingting ya i no stret. Buk blong Ol Wok i soemaot se taem ol memba blong nyufala Kristin kongregesenb oli jes stat blong prij nomo, ol man oli mekem bigfala trabol long olgeta. (Ol Wok 4:​5-​21; 5:​17-​40) Yumi no save talem se ol faet, kakae i sot, mo graon i seksek we Jisas i tokbaot, oli bin kamaot bifo we trabol ya i kasem ol faswan Kristin. Defren olgeta, ol Kristin oli kasem ol trabol ya “bifo” we plante narafala samting oli kamtru. Samting ya i laenap wetem tok blong Luk se: “Be taem olgeta samting ya oli no kamtru yet, bambae ol man oli save holem yufala, oli save mekem i strong long yufala.” (Luk 21:12) Samting ya i soem se long Matyu 24:9, wod ya toʹte i blong tokbaot samting we i kamaot “long taem ya.” Yes, long taem ya we i gat ol faet, kakae i sot, mo graon i seksek, ol man blong Jisas bambae oli kasem trabol tu.

[Ol futnot]