!Oli “Pem Trutok”!

“TU MAS pem trutok mo yu no mas salem.” (Proveb 23:23) Hemia advaes we waes man Solomon i givim. Tok ya i stret long saed blong olgeta trutok, be i tru moa long saed blong Baebol. !Trutok ya i save lidim yumi long laef we i no save finis! (Jon 17:​3, 17) Be, makem se i no isi blong kasem trutok ya. Yumi mas rere blong “pem,” i min se yumi mas rere blong livim samting we yumi nomo i wantem, blong kasem trutok. (Ridim Matyu 13:​45, 46.) Bighaf blong ol man oli no rere blong mekem olsem. Be long sam kantri, plante man oli gat strong tingting blong pem trutok blong Baebol. Plante taem, i hadwok long olgeta blong mekem olsem.

Yumi save tingbaot ol Wetnes blong Jeova long kantri blong Gana we i stap long Wes Afrika. Long Jun 1989, i gat bitim 34,000 man long kantri ya we oli bilif long trutok blong Baebol, mo oli stap seremaot trutok ya long ol narafala man. Biaen, gavman i putum tabu long wok blong prij. Be, ol man we hat blong olgeta i stret oli gohed blong “pem trutok”​—nating se loa i mekem i hadwok long olgeta. Gavman i tekemaot tabu long wok blong prij long Oktoba 31, 1991. !Tri yia haf biaen, hemia long medel blong yia 1995, namba blong ol Wetnes blong Jeova we oli prij long Gana i kasem 46,104! Mo long yia ya 1997, namba ya i go antap bitim 52,800.

?Wanem i pulum ol man ya blong bilif long trutok blong Baebol? ?Oli bin lego long wanem samting blong “pem trutok”? Blong ansa long ol kwestin ya, bambae yumi tokbaot laef blong trifala Kristin long Gana.

Tijing Blong Baebol i Pulum Hem

Fastaem, yumi tokbaot wan woman we i gat bitim 20 yia. Papa blong hem i wan pasta. Nating se i olsem, woman ya i jusum blong livim skul blong papa blong hem. ?From wanem? From we hem i laekem trutok.

Woman ya i eksplenem se: “Oltaem ol Wetnes oli kam long haos blong mifala taem oli stap visitim ol haos wanwan. Afta we mi storeyan plante taem lelebet wetem olgeta, mi luksave se ol tijing blong olgeta oli stanap long Baebol. Mi askem kwestin long olgeta long saed blong Triniti, helfaea, sol we i no save ded, mo long samting we mi intres tumas long hem, hemia ol merikel blong mekem sikman i kamgud bakegen. Mi mi bilif strong se ol tijing ya oli kamaot long Baebol. Be ol Wetnes oli givhan long mi blong luk se samting ya i no tru.”​—Blong save wanem we Baebol i talem long ol bilif ya, plis ridim Mak 13:​32; Rom 6:​23; Ol Wok 10:40; mo 1 Korin 13:8-10.

Yangfala woman ya i gohed i se: “Be, famle blong mi i agensem mi strong, antap moa papa blong mi. Hem i ting se ol Wetnes blong Jeova oli stap gyaman long mi. Be, mi save se oli stap tijim mi long trutok. Mi traem blong yusum Baebol blong pruvum ol poen ya long papa blong mi, be hem i no wantem lesin. Hem i agensem mi long fasin we i strong moa.

“Nating se i olsem, tingting blong mi i no foldaon. Mi save se trutok nomo i save lidim mi long laef we i no save finis long Paradaes, mo mi gat strong tingting blong holemtaet trutok ya. Taem ol Wetnes long ples blong mi oli save long ol problem we mi stap kasem, oli givhan long mi wetem lav, oli leftemap tingting blong mi, mo oli givim sam samting we mi nidim blong laef. Samting ya i halpem mi blong kasem save long mining blong ol tok blong Jisas long Jon 13:35 se: ‘From we yufala i stap laeklaekem yufala, bambae olgeta man oli luksave se yufala i man blong mi.’ Nao tingting blong mi i kam strong moa se ol Wetnes blong Jeova oli trufala skul. Biaen, taem papa mama blong mi i luksave se mi jenisim plante samting blong mekem laef blong mi i kamgud moa, tufala i glad tumas, mo tufala i no moa agensem mi strong. !Fasin blong tufala i jenis bigwan, mekem se, papa blong mi i askem ol Wetnes blong Jeova blong stadi Baebol wetem bigfala brata blong mi!”

Pruvum Trutok Long Yumi Wan

Long saed blong ol yangfala we papa mama blong olgeta i Wetnes, sam samtaem i hadwok long olgeta tu blong “pem trutok.” Sam long olgeta oli no tinghae long trutok blong Baebol. Sipos olgeta wanwan oli no bilif long trutok ya long prapa hat blong olgeta, bilif blong olgeta i slak, i no dip. (Lukluk Matyu 13:20, 21.) Wan man Gana we i gat bitim 30 yia, nem blong hem Nathaniel, i talem olsem wanem hem i ‘pem trutok’ taem hem i yangfala.

Hem i tingtingbak i se: “Papa mama blong mi i tijim mi long Baebol stat taem mi smol nomo. Taem mi stap kam bigwan moa, mi go wetem tufala long wok blong prij, be mi no rili mekem disisen blong kam wan Wetnes. Biaen, mi luksave se mi wan mi mas stadi Baebol.

“Fastaem, mi mas sua se Tok blong God i stap long Baebol, i no long wan narafala tabu buk blong skul. Taem mi stadi mi wan, mi kasem save se hemia nomo tabu buk ya we i gat plante klia profet tok long hem, mo we oli kamtru stret olsem ol tok blong hem i talem. Mo tu, mi kasem save se Baebol i gat plante trutok long hem long saed blong sayens​—wan eksampel, hemia vas we i talem se wol ‘i stanap long nating nomo.’ (Job 26:7) Ol man oli raetem ol tok ya plante taosen yia bifo we ol man blong sayens oli gat save long saed blong wol ya mo ol sta long skae. !God nomo i save pusum ol man blong raetem ol samting ya!a

“Biaen, mi wantem save weswan skul nao i tijim mo i folem ol trutok blong Baebol. Plante skul oli tijim helfaea, Triniti, mo sol we i no save ded. Be long tingting blong mi, ol tijing ya oli no stret. Mi tingting se: Wan papa i nogud nating sipos hem i pusum han blong pikinini blong hem i go long hot wora blong panisim hem. Nao, ?olsem wanem wan God we i gat lav i save sakem ol pikinini blong hem oli go long helfaea blong oli harem nogud tumas? Mi luk se tijing blong ol Wetnes blong Jeova i laenap wetem ol vas blong Baebol olsem Rom 6:​23, we i talem se: ‘Pei we ol man bambae oli kasem, from we oli stap mekem sin, hemia we bambae oli ded from’​—i no helfaea. Long tingting blong mi, samting ya i stret nomo.

“Mo tu, mi luksave se ol Wetnes blong Jeova oli folem ol rul blong Baebol long laef blong olgeta, mo se skul ya i sakemaot eni man we i mekem sin be i no tanem tingting blong hem from. Taem mi skelem ol samting ya, mi save se ol Wetnes blong Jeova oli gat trutok, mo mi mekem prapa disisen blong mi blong kam wan Wetnes. Ale, mi traehad blong kam naf blong tekem baptaes olsem wan Wetnes.”​—1 Korin 5:11-​13.

Store blong Nathaniel i soemaotgud se ol yangfala we oli gat ol Kristin papa mama, olgeta tu oli mas “pem trutok.” I no naf we oli go long ol miting blong kongregesenb nomo. Olsem ol man Berea bifo, oli mas ‘ridimgud ol tok blong Baebol evri dei, blong traem save wanem tingting i tru mo wanem i no tru.’ (Ol Wok 17:11) Samting ya i tekem taem mo i hadwok, be i save mekem tingting mo bilif blong olgeta i strong gud.​—Lukluk Efesas 3:​17-​19.

Gyaman Skul i Mekem Hem i Harem Nogud

Wan man Gana, nem blong hem Godwin, i gat kolosap 70 yia taem hem i lego Presbiterian Jyos mo bilif blong ol Masonik.c Godwin i talem se: “I gat plante samting oli hapen long jyos we mi luk se oli nogud. Eksampel, i gat plante rao insaed long jyos, mo samting ya i stap gohed yet. !Sam samtaem, polis i mas kam blong mekem pis mo putum oda bakegen! Mi bin tingbaot se, hemia i no stret fasin blong ol man blong Kraes. Biaen, mi gat wan problem wetem wan narafala man Presbiterian. Wan pablik kot i harem bisnes ya blong mitufala mo i jajem man ya se hem i gat fol. Nating se i olsem, pasta blong jyos i tekem saed blong man ya, mo i tok agensem mi long fored blong olgeta man long skul. Mi talem stret long hem wanem tingting blong mi long bisnes ya, nao mi aot long jyos ya, mo mi neva gobak bakegen.

“Afta we sam taem i pas, ol Wetnes blong Jeova oli kam long haos blong mi. Fastaem, mi lesin long olgeta from we mi no wantem sakemaot ol man we oli tokbaot God. Be mi stat luksave se, nating we mi mi wan Presbiterian blong plante yia finis, i gat plante samting long Baebol we mi no save nating long olgeta. Eksampel, mi neva save se Baebol i tokbaot hop ya blong laef blong olwe long Paradaes long wol.d Mo taem mi stat go long ol miting blong ol Wetnes blong Jeova, mi laekem tumas gudfala fasin blong olgeta, antap moa, fasin blong ol yangfala blong putum klos mo mekem hea. !Olgeta ya oli ol man we oli rili folem ol rul blong Baebol!”

Be, blong ‘pem trutok,’ Godwin i mas mekem sam bigfala jenis long laef blong hem. Hem i tingtingbak i se: “Mi mi wan memba blong Masonik. Nating se hemia i wan grup we ol memba blong hem oli givgivhan long olgeta, be mi mi stap mekem kastom we i joen wetem bun blong dedman mo fasin blong singaot long ol devel. Ol devel ya oli mas givhan long man we i singaotem olgeta, blong i gru long saed blong speret.

“Stadi i halpem mi blong kasem save se Jeova God i no laekem nating we yumi joen long wok blong ol rabis speret, from we yumi save kam aninit long paoa blong Setan mo ol rabis enjel blong hem.e ?Bambae mi mi gohed blong folem Masonik wetem ol tijing we oli olsem ol tokhaed, no bambae mi lego hem mo mekem Jeova i haremgud? Mi jusum blong mekem Jeova i haremgud. Mi sakem olgeta samting we mi yusum long Masonik, mo ol klos tu we mi putum blong go long ol miting blong olgeta. !Mi luksave se promes blong Jisas i tru, taem hem i talem se: ‘Trutok bambae i mekem yufala i friman’! (Jon 8:​32) Naoia, mi glad blong serem ol samting we mi bin lanem wetem ol narafala. Mi no sore nating we mi bin lego ol gyaman bilif.”

Plante taosen man we hat blong olgeta i stret, oli bin lego plante bigbigfala samting blong “pem trutok.” Olsem ol trifala Kristin we yumi tokbaot antap, oli no sore we oli bin mekem ol bigfala jenis long laef blong olgeta. Trutok blong Baebol i “wan faondesen blong laef, we i save stap strong oltaem. Nao bambae oli save kasem laef ya we i prapa wan.” (1 Timote 6:​19) “Laef ya we i prapa wan” mo ol blesing we oli joen wetem, bambae oli blong yu blong olwe sipos yu “pem trutok.”

[Ol futnot]

[Tok Blong Pija Long Pej 9]

Nathaniel

[Tok Blong Pija Long Pej 9]

Godwin