Trutok i Save Jenisim Laef Blong Man

SORE tumas, laef blong plante man tede i had tumas, mo samfala oli no moa gat rod blong winim. ?Ol man ya oli save faenem glad? Samfala oli brekem loa mo spolem ol man raonabaot long olgeta. ?Ol man olsem oli save lanem stret fasin? Ansa long tufala kwestin ya, se ‘yes.’ Ol man oli save jenisim fasin mo laef blong olgeta. Aposol Pol i soemaot samting ya taem hem i raetem se: “Yufala i mas letem God i jenisim tingting blong yufala, blong mekem tingting blong yufala i nyufala olgeta. Nao bambae yufala i save jusumaot ol fasin we God i wantem, wanem i gud, no wanem God i glad long hem mo wanem i stret gud blong mekem.”​—Rom 12:2.

Maet tok ya “wanem i stret gud blong mekem” i pulum yu blong tingbaot tok we Jisas i talem long ol man blong hem, bitim 20 yia bifo we Pol i raetem leta ya blong hem. Jisas i talem se: “Bambae yufala i save ol trutok, mo trutok ya bambae i mekem yufala i friman.” (Jon 8:​32) Taem Jisas i talem “trutok” long ples ya, hem i minim ol save we oli kamaot long God, we yumi save ridim yet long Baebol. Save ya i long saed blong samting we God i wantem yumi blong mekem. (Jon 17:17) ?Trutok blong Baebol i rili save mekem man i fri? ?Laef blong man i rili save jenis taem hem i mekem ol samting we God i wantem? Yes. Tingbaot sam eksampel.

Givim Mining Long Laef

I no longtaem i pas, wan man long Jibralta, nem blong hem Moisés, i no hapi nating. Hem i talem se: “Mi mi stap dring bitim mak, mo mi stap slip olbaot long rod. Mi harem se laef blong mi i no gat mining nating. Evri naet, mi askem long God blong sore long mi, mo blong no letem mi mi gotru long wan narafala dei olsem. Mi krae, nao mi askem long God from wanem mi stap long wol ya. Mi nogud nating, mi no gat wok, mi no gat famle, mo mi no save wan man blong givhan long mi. ?From wanem mi mas gohed blong laef?” Nao, wan samting i hapen.

Moisés i gohed i se: “Taem mi mitim Roberto, wan Wetnes blong Jeova, mi save se God i bin lesin long prea blong mi. Roberto i givim wan Baebol long mi mo wan buk we nem blong hem se, ?Wanem Samting We God i Wantem Yumi Blong Mekem?a Evri dei, mitufala i stadi Baebol tugeta long jea we mi slip long hem long naet. Wan manis biaen, Roberto i tekem mi mi go long wan miting blong ol Wetnes blong Jeova long Haos Kingdom. I no longtaem, trutok blong Baebol i jenisim tingting blong mi fulwan. Ale, naoia mi no moa slip long rod, dring alkol bitim mak, mo smok. Laef blong mi i jenis bigwan, mo mi hapi. Mi hop se i no longtaem, bambae mi save tekem baptaes mo mekem wok blong Jeova olsem wan Wetnes blong hem.”

!Hemia i rili wan bigfala jenis! Plante man we oli harem nogud from oli no moa gat rod blong winim ol problem blong laef, oli harem olsemia from we oli no gat save. Oli no save wan samting nating long saed blong God mo nambawan stampa tingting blong hem. Long saed blong Moisés, taem hem i kasem save ya, hem i kasem paoa mo strong tingting tu blong jenisim laef blong hem. Moisés i kasem ansa blong prea ya we man blong raetem Ol Sam i talem long God, i se: “Plis yu sanem laet blong yu mo trutok blong yu i kam. Mi wantem blong tufala i lidim mi, tufala i tekem mi mi kambak long Saeon, tabu hil ya blong yu, tufala i tekem mi mi kamtru long ples blong yu we yu yu stap long hem.”​—Ol Sam 43:3.

Samting we i kolosap sem mak i hapen long Daniel long Belis. Hem i no slip long rod, mo hem i gat wan nambawan wok. Nating se i olsem, blong 20 yia, Daniel i bin folem wan laef we hem i tekem drag, i dring alkol bitim mak, mo i slip olbaot. Hem i gruap long skul Katolik, be hem i no save mining blong laef, mo hem i no sua se God i stap. Hem i go long plante defren skul blong lukaot help, be hem i luk se plante fren blong hem we oli go long skul mo sam lida blong skul tu, oli tekem drag mo dring alkol bitim mak. Long semtaem ya, waef blong hem i wantem divos.

Daniel i no moa save wan rod blong winim ol problem blong hem, ale hem i go long wan spesel hospital we i givhan long ol man blong winim ol nogud fasin olsem. Be, hem i save se, sipos hem i no kasem help taem hem i kamaot long hospital ya, i no longtaem bambae hem i tekem drag bakegen. ?Hem i nidim wanem kaen help? Long Mei 1996, tu dei afta we Daniel i aot long hospital ya, hem i go luk wan Wetnes blong Jeova mo i talem sam tok we i mekem Wetnes ya i sapraes. Hem i se, “Plis, yu stadi Baebol wetem mi.” Wetnes ya i stadi Baebol wetem Daniel tu taem evri wik. I no longtaem, Daniel i stat mekem laef blong hem i laenap wetem ol samting we God i wantem. Hem i lego ol fren blong hem blong bifo, mo i fren wetem ol Kristin we oli no tekem drag, oli no dring alkol bitim mak, mo oli no slip olbaot. Naoia, Daniel i faenemaot se Baebol i tru taem i talem se: “Man we i wokbaot wetem ol waesman, bambae hem tu i kam waes. Be man we i kampani wetem ol krangke man, bambae hem i kasem trabol from.” (Proveb 13:20) I no longtaem biaen, hem i talem se: “Hemia faswan taem long laef blong mi we tingting blong mi i no stikim mi.” Laef blong Daniel i jenis bigwan.

Wan man blong Porto Riko tu, i jenisim laef blong hem bigwan. Hem i stap long kalabus, mo ol man oli luk hem olsem wan man we i denja tumas, from we hem i bin kilim plante man i ded. ?Trutok blong Baebol i save jenisim fasin blong hem? Yes. Wan Wetnes blong Jeova i givim sam Wajtaoa mo !Wekap! long hem, mo kwiktaem nomo, hem i wantem moa. Wetnes i stat stadi Baebol wetem hem, mo taem trutok blong Baebol i kasem hat blong hem, ol man oli luk se fasin blong hem i jenis bigwan. Faswan samting we i soem se fasin blong hem i stap jenis, hemia se i katem longfala hea mo doti mustas blong hem.

Baebol i talem se God i save fogivim ol sin blong man we i rili tanem tingting mo jenisim laef blong hem. Pol i raetem se: ‘Yufala i save finis. Ol man we oli stap mekem i no stret, bambae oli no save go insaed long kingdom blong God . . . I tru, bifo, sam long yufala i olsem nomo. Be naoia God i mekem yufala i klin finis.’ (1 Korin 6:9, 11) I sua se ol tok ya oli leftemap tingting blong man ya. I sem mak long ol tok blong Ol Wok 24:15, we i talem se: “God bambae i mekem olgeta man oli laef bakegen long ded, ol man we oli stret, wetem ol man we oli no stret.” Man ya i talem se: “Mi mi wantem stap taem ol dedman oli laef bakegen. Olsem nao, mi save askem ol man we mi bin kilim olgeta oli ded blong fogivim mi.”

Wan Nyufala Famle

Wan dei, long Ajentina, wan Wetnes blong Jeova we i prij fultaem, nem blong hem Luis, i mitim wan yangfala man we i bin kasem plante tumas trabol long laef blong hem. Papa mama blong hem i lego hem taem hem i jes bon, mo hem i gruap long plante defren spesel skul blong ol pikinini. Taem hem i gat 20 yia, hem i faenemaot weples mama blong hem i stap, ale hem i mekem disisen blong go stap kolosap long hem. Hem i wokhad, i kasem mane, nao i wokbaot i go long taon we mama blong hem i stap. Mama blong hem i letem hem i stap long haos blong hem go kasem taem we mane blong boe ya i finis. Nao hem i talem long hem blong aot. Taem mama blong hem i sakemaot hem olsemia, hem i wantem kilim hem wan i ded.

Be, Luis i tokbaot trutok blong Baebol wetem yangfala man ya. Trutok ya i joen wetem promes ya blong Baebol, se: ‘Papa mo mama blong mi, maet tufala i save lego mi, be yu, Jeova, bambae yu stap lukaotgud long mi oltaem.’ (Ol Sam 27:10) Yangfala man ya i faenemaot se hem i gat wan Papa long heven we i neva save lego hem. Naoia, hem i glad blong stap long wan nyufala famle, hemia famle blong Jeova.

Long semfala kantri, wan narafala man i talem long wan Wetnes blong Jeova se hem i laekem Wajtaoa. ?From wanem? From we buk ya i sevem mared blong hem. Wan dei, taem man ya i lego ples blong wok blong hem, hem i luk wan Wajtaoa long tin doti. Long fas pej blong Wajtaoa ya, i gat tok ya “Divos” long bigfala raeting. Hem i karem buk ya mo i stat ridim, from we hem i gat trabol long mared blong hem, mo hem wetem waef blong hem i stap mekem ol pepa blong divos. Ale, hem i karem buk ya i go long haos, mo i ridim wetem waef blong hem. Tufala i traem folem ol advaes blong Baebol we buk ya i tokbaot. (Efesas 5:21–​6:4) I no longtaem, fasin fren blong tufala i kamgud moa. Tufala i no moa gohed blong mekem ol pepa blong divos, mo naoia, tufala i stadi Baebol tugeta, olsem wan hasban mo waef we i joengud.

Long Urugwae, wan narafala man we nem blong hem Luis, i no hapi nating. Laef blong hem i fasfas from we hem i tekem drag, i joen long wok blong ol rabis speret mo wosip blong ol aedol, mo i dring alkol bitim mak. Luis i gohed olsemia gogo tingting blong hem i fasfas tumas, nao hem i lego bilif long God. Wan fren i givim wan buk long hem, nem blong buk ya se, Life​—How Did It Get Here? By Evolution or by Creation?b Long rod ya, hem i toktok smol wetem ol Wetnes blong Jeova, be biaen, hem i gobak long fasin blong dring alkol bitim mak mo yusum drag. Wan taem, hem i wekap nao i luk se hem i stap sidaon long wan hol we i fulap long doti. Hem i harem nogud tumas, ale, hem i prea i go long “papa blong Jisas Kraes,” from we hem i no save nem blong God.

Luis i askem God blong soem long hem risen from wanem hem i stap long wol ya, sipos i gat wan risen. Hem i talem se: “Long nekis dei, wan man we mi save hem i givim wan buk long mi we hem i no moa nidim. Nem blong buk ya Revelesen, —!Kolosap i Kasem Nambawan En Blong Hem!”c Buk ya i halpem Luis blong faenem ansa long kwestin blong hem. Nao hem i prea bakegen blong faenem skul we i save soem stret rod blong wosipim God. I no longtaem, wan man i kilim doa. Taem Luis i openem doa, hem i sapraes tumas blong luk tu Wetnes blong Jeova oli stanap i stap. Wantaem nomo, tufala i stat stadi Baebol wetem Luis. Hem i gohed kwiktaem, mo naoia hem i stap haremgud long bigfala blesing blong stap olsem wan Wetnes we i baptaes finis. Hem i stap folem ol gudfala fasin long laef blong hem, mo i stap givhan long ol narafala blong faenem mining blong laef. Ol tok blong Ol Sam 65:2 oli kamtru long hem, se: ‘Man blong Harem Prea, olgeta man long olgeta ples bambae oli kam long yu.’

Allan i wan studen long Filipin. Hem i stap joen long wan grup we oli maj long rod blong soemaot se oli gat strong tingting agensem sam samting. Grup ya i wantem “sakemaot gavman blong mekem se long fyuja, laef blong olgeta man i sem mak, i no gat samfala we oli hae moa long ol narafala.” Wan dei, ol Wetnes blong Jeova oli kam luk Allan, mo hem i kasem save long stampa tingting blong God long saed blong ol man, olsem Baebol i eksplenem. Stampa tingting ya i joen wetem promes ya se: “Bambae i no longtaem, ol man nogud oli lus . . . Ol man we tingting blong olgeta i stap daon, bambae oli tekem graon ya i blong olgeta. Bambae oli harem gud, from we oli stap long pis, mo oli gat plante samting.” (Ol Sam 37:10, 11) Allan i talem se: “Kwiktaem, mi luksave se grup blong mifala i stap traehad blong kasem samting we Baebol i promes longtaem finis. Olgeta samting we mifala i bin wantem tumas, bambae yumi kasem aninit long kingdom blong God.” Naoia, Allan i stap sapotem kingdom blong God mo i stap givhan long ol narafala blong bilif long trutok blong Baebol.

Yes, taem ol man oli bilif long trutok blong Baebol, oli rili jenisim laef blong olgeta. Tru ya, taem i stap kam we olgeta man we oli laef, bambae oli ol man nomo we oli bin mekem laef blong olgeta i laenap wetem ol samting we God i wantem. !Bambae hemia wan bigfala jenis ya! Long taem ya, profet tok ya bambae i kamtru se: “Bambae oli no mekem nogud nating, mo oli no mekem trabol nating long olgeta ples long tabu hil ya blong mi, from we bambae wol ya i fulap tru long save blong Jeova olsem we ol wora oli kavremap solwora.”​—Aesea 11:9.

[Ol futnot]