Stat Long Ol Stori Haos Blong Taon Go Kasem Bus Blong Tandra Oli Go Long Ol Man

REN, sno, ol ston blong aes, ol wael dog, ol laeon blong hil mo ol man we oli agensem olgeta oli no save mekem strong tingting blong olgeta i kam slak. Oli spid tumas, oli resis i gokros long 3,000 kilomita blong flat ples, oli krosem ol reva we oli ron strong, mo ol vali, blong karem ol leta i go kwiktaem long Wes Kos. ?Hu ya olgeta ya?

Hemia ol man blong ‘poni ekspres’ we oli ron long hos mo oli no fraet.a ?From wanem ol yangfala man ya oli gat wan strong tingting olsem? Ating from we oli haremgud taem oli save karem ol leta i go long ol man nating se i no isi, mo tu from we wok ya i olsem wan pleplei. Yumi intres blong save se wanwan man ya i karem wan Baebol long bag blong hem wetem ol leta.

Bitim wan handred yia biaen, bitim 113,000 man blong talemaot Kingdom long Kanada oli soemaot wan tingting we i strong moa, wetem glad mo dip ona long God. ?Wanem tingting i pusum olgeta? Oli laekem God mo ol man raonabaot long olgeta mekem se oli yusum ol buk mo maot blong olgeta blong talemaot trutok blong Kingdom. Trutok ya we i save givim laef, i impoten moa i bitim ol leta we poni ekspres i karem. Yes, hemia nambawan mesej blong Kingdom we i stanap long Tabu Baebol, buk we i stap long bag blong ol man blong ‘poni ekspres.’​—Proveb 2:​21, 22; Aesea 2:​2-4; 61:2; Matyu 22:37-​39; 24:14.

Lav Blong Jeova Mo Ol Man i Pusum Olgeta

Ol Wetnes blong Jeova oli laekem blong tokbaot Kingdom long ol man. Yu save luk olgeta long ol stori haos blong taon, long bigfala flat ples ya tandra we ol man oli stap wanwan olbaot long hem, long ol epot, long rod mo ol narafala pablik ples, mo taem oli toktok long telefon tu. ?From wanem oli mekem wok ya long ol defren ples olsem?

Hadtaem long saed blong mane mo namba blong ol man we i stap gru i jenisim fasin blong laef blong ol man, mo i mekem se naoia i hadwok tumas blong faenem ol man long haos blong olgeta. Plante taem, hasban mo waef tugeta i mas wok blong lukaot long ol stampa nid blong famle, nao oli no moa tingbaot nid blong olgeta long saed blong speret. Long taem ya blong traem mo trabol, oli nidim tumas wan mesej blong hop we i mekem olgeta oli haremgud. Ol Wetnes blong Jeova oli glad blong halpem olgeta. Long waes mo kaen fasin, oli tekem evri jans blong talemaot gud nyus long olgeta man, long fasin we i mekem olgeta oli glad blong lesin mo i pulum tingting blong olgeta.​—1 Timote 2:​3, 4.

Long Ol Narafala Lanwis: Taem Jisas i givim oda ya long ol disaepol blong hem blong ‘go long ol man mo pulum olgeta oli kam man blong hem,’ hem i letem olgeta oli mekem sam samting olgeta nomo, mo soem prapa strong tingting blong olgeta blong karem mesej ya i go long ol man long olgeta ples long wol. (Matyu 28:19) Long plante kantri mo long Kanada tu, i gat plante defren laen blong man we oli toktok ol defren lanwis mekem se plante man blong talemaot Kingdom oli lanem ol narafala lanwis.

Eksampel, wan hasban wetem waef blong hem we tufala i prij fultaem long Edmonton, Albeta, oli luksave nid ya blong kasem ol man long taon blong olgeta, we oli toktok Mandarin, hemia wan lanwis blong Jaena. Be faswan samting we tufala i nidim blong mekem, hemia lanem lanwis ya, taswe oli go luk wan studen long yunivesiti we i save lanwis Mandarin. Hem i agri blong tijim lanwis ya long tufala, mo long semtaem, hem i agri blong lanem trutok blong Baebol wetem tufala. !Hemia i gud tumas! Long 24 manis nomo, man mo woman ya we tufala i strong blong talemaot Kingdom oli naf blong prij long lanwis Mandarin. Long semtaem, tija ya, we i olsem studen blong tufala tu, i naf blong tekem baptaes long Kristin fasin.

Long sam narafala taon tu, ol man blong talemaot Kingdom oli kasem gudfala frut olsem tufala ya, taem lav i pusum olgeta blong lanem ol narafala lanwis olsem lanwis blong Polan, Rasia mo Vietnam.

Long Rod: Long ol yia 1800, ol man blong poni ekspres oli go wanwan blong mekem wok blong olgeta. I sem mak long sam man blong talemaot Kingdom long Britis Kolombia taem oli draevem kameong blong olgeta. Oli spenem bighaf blong taem blong olgeta long ol bigfala kameong ya, taem oli karem ol wud blong bus i go long ples blong katem ol plang. Samting ya i mekem se oli stap toktok oltaem wetem ol narafala draeva long radyo, oli storeyan long saed blong ol trak we oli pas long rod mo ol denja long rod.

Ol man ya oli gat gudfala tingting blong talemaot Kingdom, taswe oli yusum ol radyo blong olgeta long wan spesel fasin. Fastaem, oli storeyan long saed blong ol samting we oli stap hapen long wol. Biaen, long gudfala fasin oli tokbaot Baebol. Wan taem, wan draeva i agri long wanem we Baebol i talem long saed blong hop blong ol dedman. (Jon 5:​28, 29; Ol Wok 24:15) Fren blong hem, we i wan draeva tu, i ded long wan aksiden mekem se hem i harem nogud tumas. Hem i agri long wan Baebol stadi, mo naoia, yumi save harem voes blong hem long radyo taem i talemaot gud nyus long ol narafala draeva mo ol fren blong hem. Biaen, hem i glad se waef blong fren blong hem we i ded i stat blong stadi Baebol. !Hemia wan gudfala blesing we hem i kasem from spesel fasin ya blong talemaot mesej blong trutok we i save givim laef!

Oli Yusum Ol Plen: Blong talemaot nambawan mesej blong trutok, ol man blong talemaot Kingdom oli gat strong tingting blong go long weples ol man oli stap, mo oli yusum ol smol plen blong go long ‘ol velej.’ (Matyu 10:11, 12) I no longtaem i pas, strong tingting i pusum sam man blong talemaot gud nyus, nao oli rentem tu plen blong go luk ol man we oli stap wanwan olbaot long wael ples ya tandra. Tufala grup i mekem trep blong 3,000 kilomita long plen, oli godaon long 14 defren velej, mo oli go kasem ples we i 250 kilomita nomo longwe long Aktik Sekel. Ol man ya blong talemaot gud nyus oli no taed, oli gohed 7 fuldei blong kasem ol man we oli stap wanwan olbaot mo longwe tumas long ol narafala man.

Mo oli no mekem samting ya blong nating nomo. Tingbaot olsem wanem mesej blong Baebol i mekem i gud long ol man. Taem ol man ya blong prij oli talemaot stampa tingting blong Jeova se kolosap nao bambae hem i mekem wol i kam wan paradaes, oli halpem ol manples blong kasem samting we oli nidim long saed blong speret, we i impoten tumas. (Matyu 5:3) Longtaem afta we ol man blong karem mesej ya oli aot, ol manples we hat blong olgeta i stret oli save ridim ol buk we ol man ya blong prij oli seremaot, hemia 542 Baebol, ol narafala buk we oli stanap long Baebol, mo 3,000 magasin.​—Lukluk Ol Wok 12:24.

Long Telefon: Long taon, plante taosen man oli stap long ol stori haos we i gat ol spesel mesin blong lukaot long fasin sefgud blong ol man, mekem se ol narafala man oli no save go insaed. Nating se i olsem, ol man blong talemaot Kingdom oli gohed wetem strong tingting mo waes fasin. ?Olsem wanem oli save go long ples we ol man ya oli stap? I moa gud blong toktok stret wetem ol man ya, be, plante taem oli mas yusum wan kaen telefon we i stap long fored blong haos blong storeyan wetem olgeta, mo samting ya i karem gudfala risal. Sipos i no gat rod ya, oli tekem buk blong telefon mo oli telefon long ol man ya.

Wan moning, wan olfala woman i ansa long telefon. Long kaen fasin, sista i talem halo kwiktaem mo i askem long woman ya sipos hem i ting se bambae i gat wan taem we ol man oli save wokbaot sefgud long rod long naet. Sista i ridim sam vas blong Baebol blong soem long hem se bambae i gat fulap pis long fyuja. (Ol Sam 37:10, 11; Daniel 2:​44; Matyu 6:​9, 10) Woman i agri blong storeyan bakegen long telefon. Long wik biaen, tufala i tokbaot risen from wanem yumi save bilif long ol promes blong God. Afta long wan manis we tufala i stadi Baebol long telefon long fasin we sista i ridim sam haf blong buk mo i askem ol stret kwestin, woman i presem sista from we hem i storeyan long plante defren samting evri wik. Nao, taem ya i stret blong sista i tokbaot buk we tufala i save yusum blong stadi mo blong givim buk ya long hem. Ale, tufala i mekem plan blong mitim tufala. Tru, ol Wetnes blong Jeova oli pruvum se oli laekem ol man, mo plante man oli glad blong lesin long olgeta, oli luksave se Jeova i stap givhan long ol Kristin man ya blong prij.​—Lukluk 1 Korin 14:25.

Oli Yusum Ol Buk: Long provins blong Kebek we bighaf blong ol man oli toktok lanwis Franis, ol man blong talemaot Kingdom oli go long evri ples we ol man oli stap. Wan seket elda i makem se: “Blong plante yia, ol brata oli harem olsem se oli no stap gohed from we jyos i agensem olgeta bigwan. Be from we ol brata oli wokhad mo oli visitim ol man oltaem, naoia yumi save faenem wan Baebol long plante haos. Bifo, smol man nomo oli save buk ya mo oli ridim hem.”

Ol risal oli gudfala tumas, i gat ol nyufala man blong talemaot Kingdom we oli kam long olgeta kaen laef blong Kebek, mo samfala oli mekem wok olsem ol dokta. Hemia eksampel blong wan dokta. Waef blong hem i stap talemaot Kingdom finis, mo i storeyan plante taem wetem man blong hem long saed blong hop blong Baebol. Wan elda long kongregesenb we i gat gudfala tingting i singaot dokta ya blong kam long wan miting. Long taem ya, oli stap stadi long buklet ya How Can Blood Save Your Life? Hem i kam mo i givim ansa tu. Hem i sapraes long ol gudfala tok we oli dip long saed blong speret, ale hem i agri blong stadi Baebol. Naoia, hem tu i wan man blong talemaot Kingdom.

Ol buk oli save wokgud blong pulum ol man blong tingting moa long Baebol. Yumi no save wanem poen i save pulum wan man blong kam long trutok. Wan man blong talemaot Kingdom i givim wan Wekap! long wan woman we i stap long wan haos kolosap long hem. Woman ya i no wantem lesin long mesej blong Baebol be hem i intres long fasin blong ol bebet. Pija we i stap long haf ya “Chagas’ Disease​—A Kiss of Death” (“Sik Blong Jagas​—Wan Kis blong Ded”) i pulum intres blong woman ya. Hem i sapraes long samting we hem i ridim, ale hem i askem sam moa buk. Hem i mekem wan Baebol stadi, mo long sikis manis hem i stat blong prij long ol narafala.

Long Ol Pablik Ples: Loa blong Kanada i givim raet long ol man blong storeyan long eni samting we oli wantem tokbaot long ol pablik ples olsem ol epot. Long Halifaks Intenasnal Epot, ol man blong talemaot Kingdom oli yusum waes fasin taem oli traem storeyan wetem ol man we oli stap wet blong tekem plen. Oli askem ol stret kwestin long ol man ya, blong pulum olgeta blong storeyan long saed blong Baebol. Oli karem wan smosmol Baebol mo sam narafala buk mekem se oli save givim ol samting we ol man ya oli nidim long saed blong speret. Long rod ya, ol dokta blong katem man, ol man blong sayens, ol loea, ol paelot, ol lida blong skul, ol polisman, ol taksi draeva, ol man we oli wokem ol enjin, ol tija, ol ami, mo sam lida blong politik we oli kam long ol narafala kantri oli bin harem mesej blong Kingdom, mo oli karem ol sid ya blong trutok oli go long ol ples farawe blong oli save gru.​—Kolosi 1:6.

Long epot, eli long wan moning, wan man i tekem Wajtaoa mo Wekap! Mo hem i talem long fasin we i kwaet tumas se: “!O, i no ol Wetnes blong Jeova!” ?From wanem hem i talem samting ya? Man ya i strong blong folem skul Muslim mo i jes finis blong prea long jyos blong epot. Hem i bin askem long God blong soem waes fasin, fasin luksave, mo trutok long hem. Hem i sapraes tumas blong tingbaot se maet ol Wetnes blong Jeova nao oli olsem ansa we God i stap givim long hem wantaem nomo.

Yes, ol man blong talemaot Kingdom long Kanada oli no fraet, mo oli no letem wan samting i blokem olgeta blong talemaot nambawan mesej blong Kingdom. Mo tu, oli no letem tingting blong olgeta i foldaon from we i gat plante man we oli toktok ol narafala lanwis, ol rod we oli nogud, ol velej we oli stap farawe, mo ol stori haos long taon we oli gat ol spesel mesin blong lukaot long fasin sefgud blong ol man we oli stap long olgeta. Tingting blong olgeta i strong blong talemaot mesej blong God we i save givim laef long ol man we oli lukaot trutok mo we hat blong olgeta i stret. Oli no tingbaot olgeta nomo, be, wetem ol brata blong olgeta long ol narafala ples blong wol, oli stap obei long oda blong Jisas se oli ‘mas go long ol man long olgeta ples long wol, blong pulum olgeta oli kam man blong hem.’​—Matyu 28:19.

[Ol futnot]

[Bokis blong pija long pej 27]

Ol Man Blong Talemaot Kingdom Oli Gat Gudfala Risal Taem Oli Yusum Telefon

Samfala oli talem se: “Halo. Nem blong mi se [talem nem blong yu]. Mi stap storeyan smol wetem ol man kolosap long haos blong yu long saed blong pis mo olsem wanem blong putum pis long wol. ?Yu yu ting se bambae pis i save stap long olgeta ples long wol samtaem? [Letem man i ansa.] Blong mekem tingting blong yu i haremgud, mi wantem talem se mi no stap mekem wan ripot no salem wan samting. Be, mi stap serem wan tingting blong Baebol se bambae God i putum pis long wol.” Biaen, maet storeyan i save gohed smol long saed blong Baebol.

Sam narafala oli talem se: “Gud naet. Nem blong mi se [talem nem blong yu]. Mi mi stap mekem wan wok long eria blong yu. Mi stap storeyan wetem ol wanwan man raonabaot long haos blong yu blong traem save tingting blong olgeta long wan samting. Plante oli tingbaot olsem wanem oli save stap sefgud from we raf fasin mo fasin blong brekem loa i stap kam antap raonabaot long yumi. ?Samting ya i impoten long yu? [Letem man i ansa.] ?Yu yu ting se bambae i gat wan taem we ful wol i save harem sefgud?” Letem man i ansa, mo gohed blong tokbaot mesej blong Baebol.