Wari No Letem Hem i Winim Yu

“I NOGUD yufala i stap tingting tumas from ol samting blong tumora. Ol bisnes blong tumora i blong tumora. Trabol blong wan dei, hem i naf finis blong dei ya.” (Matiu 6:​34) Advaes ya we Jisas Kraes i givim i rili gud blong yumi tede from we fasin blong laef i bisi mo i fulap tumas long ol wari.

Be, ?i gat rod blong no wari tumas long saed blong ol problem, ol disisen, ol impoten samting we yumi mas mekem, mo ol wok blong yumi? Tingting blong plante milyan man i foldaon olgeta, oli harem se oli stap karem hevi samting, mo tingting blong olgeta i trabol. Taswe, ol bigfala bisnes blong salem meresin mo drag we i blong mekem man i harem gud bakegen, oli winim plante milyan dola tede.

Skelem Gud Ol Samting

Yumi mas plan fastaem mo reregud blong mekem ol wok blong yumi, blong kasem ol defren mak we yumi putum, blong tekem ol disisen, mo blong winim ol problem​—nating sipos oli impoten no olsem wanem. Baebol i leftemap tingting blong yumi blong “sidaon fastaem blong wokemaot praes blong olgeta samting,” bifo we yumi statem wan bigfala wok. (Luk 14:28-​30) Samting ya i min se yumi mas skelem olgeta jans we yumi gat blong jusum, tingbaot wanem i save kamaot long yumi sipos yumi mekem wan disisen olsem, mo luksave fastaem se hamas taem, paoa, mo mane we bambae yumi mas givim from disisen ya.

I tru se i gud blong tingbaot samting we i save hapen sipos yumi tekem wan disisen. Be, i nogud blong traem tingbaot evri samting we bambae oli save hapen, from we samting ya i save spolem yumi. Eksampel, blong mekem famle blong yu i stap sefgud, ating yu tingbaot sam samting we bambae yu mekem sipos wan faea i kakae haos blong yu. Maet yu putum wan smol alam insaed long haos blong yu we i save ring taem i gat smok blong faea, no maet yu pem wan spesel botel wota blong aotem faea. Maet yu mo famle blong yu i plangud mo toktok tugeta blong save wanem defren rod blong ronwe long haos sipos i gat faea. Be, ?wanem i defren bitwin fasin blong mekem gudfala plan we i save givhan long yu, mo fasin blong wari bitim mak? Wari i kamaot taem yu stat harem nogud tumas long sam samting we yu ting se maet oli save hapen long yu no long famle blong yu. Plante taem, olgeta tingting ya oli kamaot from we yu tingbaot tumas long ol samting we oli no rili stap. Sam narakaen tingting oli save winim yu fulwan, nao oli save mekem yu yu sua se yu bin mestem wan samting, no se yu no stap mekem inaf blong lukaotgud long famle blong yu. Wari ya we yu mekem i kamaot long yu wan, i save kam wan hevi baden long tingting blong yu, mekem se yu no moa save slip.

Moses Long Fored Blong Fero

Jeova God i givim wan wok we i no isi nating long profet blong hem Moses. Fastaem, Moses i mas go luk ol man Isrel blong eksplenem long olgeta se Jeova i jusum hem blong mekem olgeta oli gofri long Ijip. Afta long samting ya, Moses i mas go long fored blong Fero blong askem hem blong i letem ol man Isrel oli gofri. Biaen, Moses i mas lidim wan bigfala hif blong plante milyan man long draeples go kasem wan kantri we i fulap long ol man we oli raf tumas. (Eksodas 3:​1-​10) Ating olgeta samting ya oli mekem Moses i fraet. Be, ?Moses i letem ol bigfala wok ya oli fulumap tingting blong hem gogo hem i wari tumas blong nating nomo?

I sua se Moses i mas tingbaot plante samting. Hem i askem long Jeova se: “?Be sipos mi go talem long olgeta se, ‘God blong ol bubu blong yumi i sanem mi mi kam long yufala,’ mo oli askem long mi se, ‘?Be nem blong hem hu?,’ bambae mi talem olsem wanem long olgeta?” Jeova i givim ansa long Moses. (Eksodas 3:​13, 14) Mo tu, Moses i stap tingbaot wanem i save hapen sipos Fero i no wantem bilivim tok blong hem. Bakegen, Jeova i ansa long profet blong hem. Be, i gat wan laswan problem i stap​—Moses i talem se hem i “no man blong givim gudfala toktok.” ?Wanem i save givhan long hem long saed ya? Jeova i askem long Eron blong toktok long ples blong Moses.​—Eksodas 4:​1-5, 10-​16.

From we Moses i kasem ansa long ol kwestin blong hem mo from we hem i bilif strong long God, ale, hem i gohed blong mekem olgeta samting we Jeova i askem hem blong mekem. Moses i no letem ol tingting oli mekem hem i fraet long samting we maet i save hapen taem hem i go long fored blong Fero, be hem “i mekem ol samting we Hae God i talem.” (Eksodas 7:6) Sipos hem i letem ol wari oli winim hem, ating samting ya i save daonem bilif mo strong tingting we hem i nidim blong mekemgud wok ya we God i givim long hem.

Moses i skelem gud ol samting long saed blong wok blong hem. Hem i givim wan gudfala eksampel blong fasin ya we aposol Pol i tokbaot se “holem klia tingting.” (2 Timoti 1:7, NW; Taetas 2:​2-6) Sipos Moses i no bin holem klia tingting, kwiktaem nomo bambae hem i save fraet from bigfala wok ya we hem i mas mekem, mo ating neva hem i save agri blong mekem wok ya.

Kam Bos Long Ol Tingting Blong Yu

?Yu yu mekem wanem taem yu fesem sam problem no sam traem we oli agensem bilif blong yu? ?Yu yu stap seksek kwiktaem nomo, jes from we yu tingbaot ol trabol no traem we maet oli save kasem yu? no ?Yu yu skelem gud evri samting? Sam man oli talem se, ‘Yu no traem krosem wan brij sipos yu no kasem brij ya yet.’ !Tru ya, maet biaen bambae yumi luksave se i no nidim blong krosem brij ya we i stap long tingting blong yumi nomo! Taswe, i nogud blong wari long wan samting we maet bambae i neva hapen. Baebol i talem se: “Taem man i stap wari, fasin ya i stap mekem tingting blong hem i hevi.” (Ol Proveb 12:25) Yes, fasin ya i save karem nogud frut from we plante taem hem i blokem man blong tekem wan disisen kwiktaem, gogo kasem we i let tumas.

Samting we i moa nogud hemia se, fasin blong wari tumas, blong nating nomo, i save spolem yumi long saed blong spirit. Jisas Kraes i soem se, fasin blong wantem kam rijman mo fasin blong ‘tingting tumas from laef long wol ya,’ oli save jokem fasin tangkiu we yumi gat long ‘tok blong Kingdom.’ (Matiu 13:19, 22) Ropnil i save blokem wan smol sid blong i grugud mo blong i karem gudfala frut. Hemia i sem mak long fasin blong wari bitim mak. Fasin ya i save blokem yumi blong gohed gud long saed blong spirit mo blong karem ol gudfala frut blong presem God. Fasin ya blong wari tumas, we plante taem yumi mekem long yumi wan, i save spolem yumi mo mekem se yumi no wantem givim laef blong yumi i go long Jeova. Maet yumi wari tumas se: “?Olsem wanem sipos mi no save holemtaet promes blong mi?”

Aposol Pol i talem se long faet blong yumi long saed blong spirit, yumi stap traehad blong “tanem olgeta rabis tingting blong man, blong mekem olgeta oli ona long Kraes.” (2 Korin 10:5) Bigfala enemi blong yumi, Devel Setan, i glad tumas taem yumi wari, from we long rod ya nao hem i save mekem tingting blong yumi i foldaon mo yumi kam slak long saed blong bodi, filing, mo spirit. Setan i savegud olsem wanem blong trikim ol man we oli no wekapgud. Taswe Pol i givim woning long ol Kristin blong “no givim janis long Setan.” (Efesas 4:​27) Setan we hem “i rabis god blong wol ya” i winim plante man from we “hem i satem tingting blong olgeta finis.” (2 Korin 4:4) !Yumi no mas letem hem i bos long tingting blong yumi!

Yu Save Kasem Help

Taem wan pikinini i kasem traem, hem i save go long papa blong hem, mo wetem lav, papa ya bambae i halpem mo leftemap tingting blong pikinini ya. Long sem fasin, yumi save prea long Jeova, Papa blong yumi we i stap long heven, blong i halpem yumi blong winim ol problem blong yumi. Tru tumas, Jeova i singaot yumi blong putum ol trabol mo wari blong yumi long hem. (Ol Sam 55:22) Wan smol pikinini i no moa wari taem papa blong hem i stap wetem hem. Long saed blong yumi i sem mak. I no naf blong putum ol wari blong yumi long han blong Jeova nomo, be yumi mas livim ol wari ya i stap wetem hem.​—Jemes 1:6.

?Olsem wanem yumi save putum ol wari blong yumi long Jeova? Filipae 4:​6, 7 i ansa se: “Sipos yufala i trabol from sam samting, i nogud yufala i stap tingting tumas, i gud yufala i prea long God from evri samting. Yufala i mas askem long hem, mo yufala i mas talem tangkiu tu long hem. Nao pis we hem i givim, we i bigfala moa, i bitim save blong yumi, bambae hem i putum long tingting blong yufala, blong lukaot gud long yufala ya we i joen long Jisas Kraes.” Yes, sipos yumi prea oltaem long Jeova, bambae hem i givim pis insaed long yumi blong blokem tingting blong yumi long ol wari we oli blong nating nomo.​—Jeremaea 17:​7, 8; Matiu 6:​25-​34.

Be, blong wok folem prea blong yumi, i nogud yumi stap yumi wan, long saed blong bodi no long saed blong tingting. (Ol Proveb 18:1) Be, i gud sipos yumi luk ol advaes mo ol rul blong Baebol olsem wan rod we i save stretem ol problem blong yumi, olsemia yumi soem se yumi no dipen long prapa save blong yumi. (Ol Proveb 3:​5, 6) Ol yangfala mo ol olfala tu, oli save faenem plante gudfala advaes long fasin blong mekem gudfala disisen mo blong winim ol defren problem, sipos oli ridim Baebol mo ol buk blong Watch Tower Sosaeti. Antap long samting ya, yumi glad se insaed long ol Kristin kongregesen i gat ol elda we oli gat waes mo ekspiryens, mo tu i gat sam narafala brata we oli strong long saed blong spirit. Olgeta ya oli glad blong storian mo halpem yumi. (Ol Proveb 11:14; 15:22) Olgeta we oli no joen long problem blong yumi mo we oli save tingting blong God long saed ya, bambae oli halpem yumi blong luk ol problem ya long wan fasin we i defren. Nating se olgeta ya bambae oli no mekem disisen long ples blong yumi, be bambae oli save leftemap tingting blong yumi mo halpem yumi bigwan.

‘Putum Tingting i Stap Long God’

Ating yumi evriwan i agri se ol trabol mo wari blong yumi evri dei oli naf finis blong mekem yumi harem nogud. Taswe sipos yumi stat wari tu long sam samting we oli stap long tingting blong yumi nomo, bambae yumi harem nogud moa. Sipos yumi wari bitim mak long samting we yumi ting se maet i save hapen long yumi, bambae tingting blong yumi i trabol mo yumi harem nogud. Long taem olsem, yumi mas prea long God blong i halpem yumi. Lukluk i go long Tok blong hem mo ogenaesesen blong hem blong oli lidim yu, givim waes mo wan tingting we i klia gud long yumi. Nomata wanem problem we yumi save fesem, be oltaem bambae yumi faenem help blong winim olgeta.

Man blong raetem Ol Sam i harem nogud tumas mo tingting blong hem i trabol taem hem i raetem se: “?From wanem mi mi sore tumas olsem? ?From wanem tingting blong mi i trabol tumas olsem? Bambae mi putum tingting blong mi i stap long yu nomo, mo bakegen, bambae mi stap presem yu we yu yu God blong mi, yu sevem mi.” (Ol Sam 42:11) I gud yumi gat sem filing olsem.

Yes, mekem plan from ol samting we yu save se bambae oli kam, mo letem ol samting we yu no sua long hem oli stap long han blong Jeova. “Yufala i mas putum ol trabol blong yufala long han blong hem, from we oltaem hem i stap tingbaot yufala.”​—1 Pita 5:7.

[Tok Blong Pija Long Pej 23]

Olsem Deved, ?yu yu putum ol trabol mo ol wari blong yu long han blong Jeova?