Evriwan i Wantem Kam Fri

“Ol man oli fri taem oli bon, be long evri ples ol jen oli fasem olgeta.” Franis man ya Jean-Jacques Rousseau i raetem tok ya long 1762. !Tingting ya se yumi fri taem yumi bon i nambawan! Be Rousseau i savegud tu from Histri blong ol man, we plante milyan man oli neva kam fri. I olsem we olgeta oli gat “ol jen” long bodi blong olgeta, oli kalabus long wol ya, from we oli no save kam hapi mo oli no save kasem ol gud samting long laef blong olgeta.

PLANTE milyan man tede oli save se “long wol ya, sam man oli gat paoa, mo ol narafala man oli stap aninit long olgeta, oli stap harem nogud.” (Prija 8:9) Sam man oli wantem tumas blong oli gat paoa long ol narafala man, nao oli no fraet blong spolem fasin fri blong olgeta. Wan eksampel: Wan ripot long niuspepa i talem se: “Ol gang blong faet oli kilim 21 man i ded.” Long narafala kantri, wan ripot i talem se ol polis ‘oli kilim i ded ol woman, ol pikinini mo ol olfala, nating we olgeta oli no save faet, mo oli no traem blong givimbak tu. Ol polis oli katem trot blong olgeta, oli sutum ol presina long hed blong olgeta, mo tu oli spolem evri samting long ol vilej blong olgeta mo oli sakem bom olbaot long ples ya.’

From olgeta fasin olsem, yumi no sapraes we plante man oli rere blong faet blong mekem ol man oli go fri long olgeta we oli stap spolem olgeta. Be sore tumas, plante taem oli faet blong mekem wan man i fri, be long semtaem oli save spolem ol raet blong narafala man, mo fasin fri blong olgeta. Nao oli kilim i ded sam man mo woman ya we oli no gat poen nating, taem we samting ya i save givhan long faet blong olgeta. Nao oli stap talem se ded blong olgeta “i stret nomo,” blong givhan long faet blong olgeta we i impoten tumas, bitim laef blong olgeta. Wan eksampel, las yia, long smol taon blong Oma long Aealan, ol man we i faet from fasin fri, “ol Fridom Faeta,” oli putum wan bom long wan trak. Bom ya i bosta, nao 29 man oli ded mo plante handred bakegen oli karem kil, we olgeta ya oli stap wokbaot long rod nomo, oli no gat haf nating long bisnes ya.

“Ol Jen” Oli Fasem Yumi Yet

Biaen, taem ol faet oli finis, ?oli winim wanem nao? Taem “ol Fridom Faeta” oli win finis, maet ol man oli kam fri moa long sam fasin blong laef blong olgeta. ?Be olsem wanem nao? ?Olgeta oli rili fri? I klia we long olgeta kantri, mo long ol moa gud ples blong ol “fri kantri” tu, ol man oli gat “ol jen” yet we i stap fasem olgeta, from we oli pua, oli sinman, oli sik, mo oli ded. !Wan man i no save talem se ‘Mi mi fri’ sipos ol samting ya oli stap fasem hem yet olsem hankaf nomo!

Moses we bifo i raetem tok long Baebol, i talemgud we laef blong olgeta man blong bifo, mo blong naoia tu, hem i olsem wanem. Hem i talem se maet laef blong yumi i save kasem 70 yia, no ating 80 yia, “be oltaem mifala i stap kasem trabol, mifala i stap harem nogud nomo.” (Ol Sam 90:​10) ?Olsem wanem? ?Samting ya i save jenis samtaem long fiuja? ?Bambae yumi evriwan yumi gat jans blong laef, we yumi gat ol samting we yumi nidim mo yumi fri long soa mo fraet we oli mekem fulap man oli harem nogud naoia?

!Baebol i talem ‘Yes’! Hem i tokbaot “dei ya we God bambae i mekem ol pikinini blong hem oli fri olgeta.” (Rom 8:​21) Naoia, i gud yumi tingtinggud long fasin fri ya we aposol Pol i tokbaot long leta we hem i raetem long ol man Rom. Long leta ya blong hem, Pol i soemaot klia olsem wanem yumi wanwan yumi save “kam fri olgeta,” blong olwe.

[Foto Credit Line Blong Pija Long Pej 3]

From the book Beacon Lights of History, Vol. XIII