?God i Stap Folem “Kruked” Wei?
“DEUS ESCREVE CERTO POR LINHAS TORTAS” (“GOD I RAETEM TOK long stret fasin, folem ol kruked laen”) i wan toktok blong ol man Brasil. Tok ya i min se God i stap mekem ol stret samting, be samtaem hem i folem fasin we ol man oli ting se i kruked. Eksampel, taem wan yang man i ded, plante bambae oli talem se: ‘God i singaot hem i go long heven.’ Sipos wan man i handikap no i kasem hadtaem tumas, oli talem se: ‘Hem i wil blong God.’ Taem oli talem ol tok ya, oli minim se God i ‘raetem tok long kruked fasin,’ hem i mekem ol wok blong hem long fasin we long tingting blong man i no klia. From we long tingting blong olgeta, God i stamba blong ded, sik, no ol narafala trabol we i mekem man i harem nogud.
?From wanem fulap man we oli go long jos, oli ting se God i mekem ded mo trabol i kam long yumi olsemia? Plante taem ol man ya oli gat rong tingting long sam tok we oli tekemaot long Baebol. Yumi save luk samfala vas olsem naoia.
● “?Hu i mekem man i no save toktok? ?Hu i mekem sora blong man i fas? ?Hu i mekem man i save lukluk, mo hu i mekem man i blaen? Mi mi Hae God. Mi nomo mi save mekem ol samting ya.”—Eksodas 4:11.
?Olsem wanem? ?Tok ya i min se God i stamba blong olgeta trabol we oli mekem ol man oli handikap? No gat. Samting ya i no laenap gud wetem ol gudfala fasin blong God. Baebol i talem se: “Olgeta samting we God i mekem oli gud nomo.” (1 Timoti 4:4) Man we taem hem i bon, i blaen, no i no save toktok, no sora blong hem i fas, i no fol blong God. God i wantem we ol gud samting nomo oli kamaot long yumi, from we hem i stamba blong “evri samting we oli gud, mo evri presen we oli nambawan.”—Jemes 1:17.
Ol fas bubu blong yumi, Adam mo Iv, olgeta nao oli jus blong kam rebel agens long God, nao oli lusum stret fasin mo oli no moa naf blong karem ol pikinini we oli stretgud olgeta. (Jenesis 3:1-6, 16, 19; Job 14:4) Biaen, ol pikinini blong olgeta oli mared mo oli gat pikinini, ale sloslou plante rong samting oli kamaot long medel blong olgeta, mo long bodi blong olgeta tu. God Jeova i no stamba blong samting ya, hem i letem nomo i kamaot. Taswe hem i talem tok ya se hem i “mekem” man i no save toktok, harem no lukluk.
● “Ol samting we i kruked, yumi no save stretem, mo ol samting we i no stap, oli plante tumas, yumi no save kaontem.”— Prija 1:15.
?Hu ya i mekem ol samting oli kruked olsem? ?God? No gat. Prija 7:29 i talem se: “Taem God i mekem yumi, yumi stret nomo, be yumi nomo, yumi stap mekem laef blong yumi i paspas olbaot.” Wan narafala Baebol (Contemporary English Version) i tanem tok ya blong talem se: “Taem God i wokem yumi, yumi stret olgeta, be naoia tingting blong yumi i kruked finis.” Bighaf blong ol man mo ol woman oli no ona long ol loa blong God, be oli jus blong folem ol plan blong olgeta nomo, wetem ol projek, ol fasin mo ol wei blong olgeta nomo. Ale, risal blong samting ya, oli kasem trabol.—1 Timoti 2:14.
Mo tu, aposol Pol i talemgud se from we yumi sinman, “God i jajem finis olgeta samting ya we hem i mekem se oli mas kam nating.” (Rom 8:20) Mo ol samting ya, “yumi no save stretem,” from we yumi man. God nomo bambae i karemaot olgeta samting ya we oli kruked finis, mo oli no save karem frut nating long wol ya.
● “Yu mas tingting gud long ol samting we God i stap mekem. Sipos God i mekem wan samting i kruked, bambae i no gat man i save stretem.”—Prija 7:13.
I olsem we King Solomon i stap talem se: “Taem God i letem sam samting oli kamaot we oli no finis gud, no oli no stret, ?hu ya man ya we i naf blong stretem?” I no gat man i save stretem ol samting ya, from we God i gat gud risen blong letem olgeta oli hapen.
From samting ya, Solomon i talem se: “Sipos evri samting long laef blong yu oli stap ron gud nomo, i gud yu glad long hem [“yu mekem i gud long narafala tu,” NW]. Be sipos oli no ron gud, i gat tu samting we i moa gud yu stap tingbaot, wan we man i harem gud, mo narawan we man i harem nogud. Tufala samting ya, God nomo i mekem, mo i no gat man i save makem wanem samting bambae i kamtru.” (Prija 7:14) Man i mas glad taem evri samting i ron gud. Sipos hem i gat fasin tangkiu, hem tu bambae i mekem i gud long ol narafala. Hem i mas tingbaot wan gudfala dei olsem wan presen we God i mekem. ?Be olsem wanem nao sipos wan dei hem i kasem trabol? Man ya i mas “tingbaot” dei ya—hem i mas luksave—we God i letem wan trabol i kamaot. ?Blong wanem hem i letem olsem? Solomon i ansa, i se: “God nomo i mekem, mo [“blong,” NW] i no gat man i save makem wanem samting bambae i kamtru.” ?Tok ya i minim wanem?
God i letem tufala samting i kamaot long yumi, ol gudfala samting, mo ol trabol tu. From samting ya, yumi save gud we yumi no naf blong makem wanem samting bambae i kamtru. Ol trabol oli save kasem ol gudfala man, mo oli save kasem ol rabis man tu. I no gat wan man i save ronwe long samting ya. Taswe yumi mas dipen long Jeova, yumi no mas dipen long yumi nomo. Mo yumi mas rimemba we “God i stamba blong fasin ya blong lavem man.” (1 Jon 4:8) I tru, maet yumi no kasem save long sam samting we oli hapen naoia. Be yumi savegud we taem evri samting bambae oli ron finis, ol samting we God i letem oli kamtru bambae oli mekem i gud long evriwan.
Ol samting we hem i letem i kamtru, oli no save mekem trabol long ol stret man blong olwe. Aposol Pita i mekem samting ya i klia taem hem i tokbaot ol trabol we ol narafala Kristin man oli kasem long taem blong hem. Hem i talem se: “Be God i stap soemaot we hem i lavem yumi tumas, mo i stap mekem i gud tumas long yumi, mo hem i singaot yufala blong joen long Kraes long gudfala laef ya blong heven we i no save lus samtaem. Bambae yufala i stap harem nogud long bodi blong yufala blong smoltaem, be biaen, God bambae i mekem yufala i stret gud. Hem bambae i mekem yufala i strong, i givim paoa long yufala, i stanemap yufala olsem pos we i no save muf.”—1 Pita 5:10.
Wan Taem Blong Stretem Evri Samting
Jeova i givim paoa long yumi blong yumi save stap strong oltaem, nating we i gat trabol. Mo tu hem i promes blong “mekem olgeta samting oli kam niuwan bakegen.” (Revelesen 21:5) Yes, plan blong hem, hemia we Kingdom blong hem blong heven bambae i stretem sik blong olgeta handikap, mo i givim laef bakegen long ol dedman. Mo Kingdom ya bambae i tekemaot man ya we olgeta rod blong hem oli kruked—Devel ya Setan. (Jon 5:28, 29; Rom 16:20; 1 Korin 15:26; 2 Pita 3:13) !Long olgeta ples long wol, ol man we oli fraetgud long God bambae oli glad tumas long taem ya we God bambae i stretem evri samting!
[Foto Credit Line Blong Pija Long Pej 28]
Job Hearing of His Ruin/The Doré Bible Illustrations/Dover Publications