“Evri Samting i Gat Wan Taem We i Stret Long Hem”
“Blong evri samting i gat wan taem we i stret long hem. Yes, i gat wan taem blong evri samting aninit long heven.”—EKLESIASTIS 3:1, NW.
1. ?Wanem hadwok we ol sinman oli fesem, mo samtaem hadwok ya i mekem wanem long olgeta?
PLANTE taem ol man oli talem se, “Sipos mi bin mekem samting ya fastaem.” No, afta we wan samting i pas finis, oli se, “I moagud sipos mi bin wet fastaem.” Ol tok ya oli soemaot se ol sinman oli no naf blong luksave wanem taem i stret moa blong mekem samting. Fasin ya we oli no naf blong jusum taem we i stret, hem i wan long ol samting we i stamba blong plante trabol olsem fasin seraot. Hem i mekem tingting blong man i foldaon mo samfala oli kros. Antap long ol samting ya, fasin ya i mekem bilif we sam man oli gat long Jeova mo ogenaesesen blong hem, i kam slak.
2, 3. (a) ?From wanem i waes blong akseptem ol taem we Jeova i jusum? (b) ?Yumi mas gat wanem tingting long saed blong ol profet tok blong Baebol?
2 Jeova i gat waes mo fasin luksave we man i no gat. Sipos Jeova i wantem, hem i naf blong save evri samting we bambae oli hapen from aksin we man i tekem. Hem i save “talemaot fastaem ol samting we biaen oli hapen.” (Aesea 46:10) From samting ya, hem i no save mestem blong jusum stret taem blong mekem samting we hem i wantem mekem. !Taswe, yumi waes blong agri long ol taem we Jeova i makemaot, i bitim we yumi trastem prapa tingting blong yumi we plante taem i rong!
3 Eksampel, ol Kristin we oli bigman long saed blong spirit, oli stap tru long God. Oli wet long stret taem we Jeova i jusum blong bambae ol profet tok blong Baebol oli kamtru. Oli stap bisi oltaem long wok blong prij, mo long semtaem oli holem toktok blong Ol Krae 3:26, i stap klia long tingting blong olgeta, se: “Yumi mas gat longfala tingting, yumi mas stap kwaet, mo yumi wet long hem blong hem i sevem yumi.” (Skelem wetem Habakuk 3:16.) Long semtaem, olgeta ya oli sua fulwan se jajmen we Jeova i talemaot, “bambae i mas kamtru long stret taem blong hem,” nating sipos i luk olsem “se i tektaem tumas blong kam.”—Habakuk 2:3.
4. ?Olsem wanem Amos 3:7 mo Matiu 24:45 i halpem yumi blong wet long Jeova wetem longfala tingting?
4 Be, sipos yumi no kasem fulwan save long sam vas blong Baebol, no mining blong olgeta, olsem i stap long ol buk blong Watch Tower Sosaeti, ?i stret blong yumi lego longfala tingting blong yumi? Yumi waes moa, sipos yumi wet long stret taem we Jeova i jusum blong mekem ol samting oli klia. “Taem Hae Masta Jeova i gat plan blong mekem wan samting, hem i soemaot samting haed ya fastaem long ol man blong hem, ol profet. Sipos no, hem i no save mekem wan samting nating.” (Amos 3:7, NW) !Hemia wan nambawan promes ya! Be yumi mas luksave se Jeova i talemaot ol plan blong hem we oli haed, long stret taem we hem i luk se i stret. From samting ya, God i givim raet long wan “slef we i stret mo waes” blong givim long ol man blong hem, “kakae [long saed blong spirit] long stret taem blong hem.” (Matiu 24:45, NW) Taswe i no gat risen blong yumi wari tumas no blong letem tingting blong yumi trabol, jes from we sam samting oli no kliagud yet. Be, yumi save sua se, sipos yumi gat longfala tingting blong wet long Jeova, bambae hem i yusum slef blong hem blong givim samting we yumi nidim “long stret taem.”
5. ?Olsem wanem Eklesiastis 3:1-8 i save givhan long yumi?
5 Waes King Solomon i tokbaot 28 defren samting, we wanwan long olgeta i gat “wan taem we i stret long hem.” (Eklesiastis 3:1-8, NW) Sipos yumi kasem save long mining blong ol tok blong Solomon, samting ya i save halpem yumi blong luksave wetaem i stret mo wetaem i no stret blong mekem sam samting, we i laenap wetem tingting blong God. (Hibrus 5:14) Biaen, samting ya bambae i stap olsem wan eksampel we yumi save mekem laef blong yumi i laenap wetem.
“Wan Taem Blong Krae, Mo Wan Taem Blong Laf”
6, 7. (a) ?From wanem ol man we oli wari tede, oli “krae”? (b) ?Olsem wanem wol i traem daonem hadtaem we i stap kasem hem naoia?
6 Nating se i gat “wan taem blong krae, mo wan taem blong laf,” ating yumi evriwan i laekem moa blong laf i bitim we yumi krae. (Eklesiastis 3:4, NW) Be, sore tumas, yumi laef long wan wol we i fulap moa long ol samting we oli mekem yumi krae. Ol nius long radyo mo niuspepa oli fulap long trabol nomo. Yumi sek taem yumi harem nius se sam yangfala oli sutum ol narafala yangfala long skul, ol papa mama oli mekem nogud long saed blong seks wetem pikinini blong olgeta, ol teroris oli kilim no spolem bodi blong sam man we oli no mekem wan rong, mo ol disasta we oli spolem laef blong man mo olting blong olgeta. Televisin i soem pija blong ol pikinini we oli stap ded from hanggri mo ol refuji we oli stap ronwe long hom blong olgeta. Sam tok we bifo yumi no save long olgeta, naoia oli stap olbaot mo oli mekem wari long tingting blong yumi—ol tok olsem ethnic cleansing, AIDS, germ warfare, mo El Niño.
7 I klia se, wol blong tede, i fulap long problem mo trabol soa. Nomata long samting ya, ol kampani we oli wokem olkaen pleplei, oli gohed blong soem ol doti mo raf fasin long ol pleplei blong olgeta, we oli mekem se yumi no moa tinghevi long fasin safa we i stap kasem ol narafala man. Be, ol pleplei ya we oli yusum krangke fasin blong mekem fani mo we oli mekem yumi laf blong nating nomo, oli no karem glad ya we i prapa wan. Trufala glad ya we i wan frut blong tabu spirit blong God, hem i wan samting we wol ya blong Setan i no save givim long yumi.—Galesia 5:22, 23; Efesas 5:3, 4.
8. ?Ol Kristin tede oli mas putum fasin blong krae no fasin blong laf, fastaem? Eksplenem.
8 Taem yumi luksave se laef blong wol ya i rabis olgeta, yumi kasem save se tede, i no taem blong tinghae tumas long fasin blong laf. Naoia, i no taem blong laef from ol pleplei mo spel nomo, no blong letem fasin blong “gat gudtaem” i tekem ples blong ol samting long saed blong spirit. (Skelem wetem Prija 7:2-4.) Aposol Pol i talem se, “olgeta we oli stap yusum wol” oli mas stap olsem man we “oli no stap yusum tumas wol ya.” ?From wanem? From we “fasin blong wol ya i stap jenis.” (1 Korin 7:31, NW) Evri dei, ol trufala Kristin oli tingbaot se oli laef long wan taem we oli mas tinghevi long hem.—Filipae 4:8.
!Nomata Se Oli Krae, Oli Rili Hapi!
9. ?Wanem samting we yumi sore blong luk long ol dei bifo we Bigfala Wota i ron, mo samting ya i minim wanem long yumi tede?
9 Ol man we oli laef long taem we Bigfala Wota i ron, oli no gat fasin ya blong tinghevi long laef. Oli gohed long ol bisnes blong olgeta evri dei mo oli no stap krae from “olgeta man long wol oli stap mekem i nogud tumas,” oli no kea sipos ‘ol man oli stap faet mo oli stap kilim man i ded, olbaot long evri ples.’ (Jenesis 6:5, 11) Jisas i tokbaot fasin ya we yumi sore tumas blong luk long ol man ya bifo. Be, hem i talemaot se ol man long taem blong yumi tede tu, bambae oli gat wan fasin we i sem mak. Hem i givim woning se: “Long taem ya, taem we wota i no ron bigwan yet, ol man oli stap kakae, mo oli stap dring, mo oli stap mekem mared, go kasem taem we Noa i go insaed long bigfala sip blong hem. Mo olgeta ya oli no save se bambae trabol i kam, gogo wota i ron bigwan, i tekemaot olgeta. Nao long taem ya we mi, mi Pikinini blong Man mi kamtru, bambae i sem mak nomo.”—Matiu 24:38, 39.
10. ?Olsem wanem ol man Isrel we oli laef long taem blong Hagae oli soem se oli no wantem save long stret taem we Jeova i jusumaot?
10 Samwe long 1,850 yia afta we Bigfala Wota i ron, long taem blong Hagae, plante man Isrel oli soem sem kaen tingting ya blong no kea long ol samting long saed blong spirit. Olgeta ya oli bisi blong ronem ol samting we olgeta nomo oli wantem. Ale, oli no luksave se i taem blong putum samting we Jeova i wantem i stap long fasples long laef blong olgeta. Yumi ridim se: “‘Ol man ya oli stap talem se i no taem yet blong wokem haos blong Jeova bakegen.’ Mo profet i go talemaot long ol man we Hae God i talem se, ‘Ol man blong mi. ?From wanem yufala i stap slip long ol gudgudfala haos, be haos blong mi i stap we i nogud yet? Hemia nao tok blong Jeova blong ol ami, “Putum hat blong yu long ol rod blong yu.”’”—Hagae 1:1-5, NW.
11. ?Wanem ol kwestin we i stret blong yumi askem long yumi?
11 Ol Witnes blong Jeova tede, oli gat wok blong mekem long fored blong Jeova, mo oli kasem sam spesel jans olsem ol man Isrel long taem blong Hagae. Taswe, i gud yumi putum hat blong yumi i stap long rod blong yumi, mo tinghevi long ol samting we yumi mekem long laef blong yumi. ?Yumi “krae” taem yumi luk fasin blong laef long wol tede, mo doti we fasin ya i sakem long nem blong God? ?Yumi harem soa taem ol man oli talem se i no gat God no taem oli ting nating long ol stret rul blong hem? ?Yumi mekem sem mak olsem ol man ya we Esikel i luk long wan vison, 2,500 yia bifo? Baebol i tokbaot ol man blong vison ya se: “Nao Jeova i talem long hem [man blong putum mak long fes], i se: ‘Yu mas wokbaot i pas long medel blong taon ya, long medel blong Jerusalem, mo yu mas putum wan mak long fored blong ol man we oli sore mo oli krae from olgeta rabis fasin we ol man oli mekem long medel blong taon ya.’”—Esikel 9:4, NW.
12. ?Olsem wanem Esikel 9:5, 6 i impoten long yumi tede?
12 Tede, mining blong vas ya i kam klia moa taem yumi ridim oda ya we God i givim long sikis man blong faet. Oda ya i se: “Yufala i folem man ya i go long taon ya, yufala i mas kilim olgeta man i ded. Yufala i no sore long olgeta, yufala i no livim wan i stap. Ol olfala, mo ol yang man, mo ol yang woman, mo ol mama wetem ol pikinini blong olgeta, bambae yufala i kilim olgeta evriwan i ded. Be olgeta ya we oli gat mak long fored blong olgeta, bambae yufala i no kilim olgeta. Bambae yufala i stat blong kilim ol man long tabu haos ya blong mi.” (Esikel 9:5, 6) Sipos yumi wantem stap sef long taem blong bigfala trabol, we i klosap nao, yumi mas luksave se tede i taem blong krae.
13, 14. (a) ?Wanem kaen man we Jisas i talem se oli hapi? (b) Eksplenem from wanem yu ting se toktok ya blong Jisas i stret long ol Witnes blong Jeova.
13 From we ol man blong Jeova oli stap “krae” from we oli sore tumas long laef we i stap long wol ya, i no minim se oli neva hapi. !No gat! Ating olgeta ya oli wan grup blong man we oli hapi moa i bitim ol narafala man long wol. Jisas i tokbaot wan stamba risen blong glad taem hem i se: “Olgeta we oli luksave se oli nidim ol samting long saed blong spirit, oli save haremgud, . . . olgeta we oli harem nogud oli stap krae, . . . olgeta we oli kwaet man, . . . olgeta we oli wantem stret fasin, . . . olgeta we oli gat sore long man, . . . olgeta we hat blong olgeta i klin gud, . . . olgeta we oli man blong pis, . . . olgeta we oli kasem trabol from we oli holem ol fasin we oli stret, oli save harem gud.” (Matiu 5:3-10, NW) I gat plante pruf we oli soemaot se tok ya i laenap stret wetem ol Witnes blong Jeova, i bitim olgeta narafala skul.
14 Stat long 1919, taem trufala wosip i stanap bakegen, ol hapi man blong Jeova oli gat moa risen blong “laf.” Long saed blong spirit, olgeta ya oli kasem sem filing olsem ol man ya we oli bin glad bigwan taem oli aot long Babilon long ol yia seven handred B.K.T.a: “Taem Hae God i tekem yumi i kambak long Jerusalem, samting ya i olsem wan drim nomo. Long taem ya, yumi stap laf, yumi stap singsing, from we yumi glad tumas. . . . [Hae God] i mekem ol bigbigfala wok blong givhan long yumi. !Long taem ya, yumi glad we yumi glad!” (Ol Sam 126:1-3) Be, nating sipos ol Witnes blong Jeova oli gat fasin glad long saed blong spirit, oli no fogetem se oli laef long wan taem we oli mas tinghevi long hem. Taem niufala wol i kamtru mo ol man blong wol ya oli “kasem laef ya we i prapa wan,” ale, taem blong laf bambae i tekem ples blong ol krae, gogo i no save finis.—1 Timoti 6:19; Revelesen 21:3, 4.
‘Wan Taem Blong Man i Kis, Mo Wan Taem Blong Man i No Kis’
15. ?From wanem ol Kristin oli jusumgud ol fren blong olgeta?
15 Ol Kristin oli jusumgud olgeta we oli fren wetem olgeta. Oli no fogetem woning blong Pol we i talem se: “Yufala i no go krangke. . . . Ol stret man nomo, be ol fren blong olgeta we oli no stret, oli save spolem fasin blong olgeta.” (1 Korin 15:33) Mo waes King Solomon i makem se: “Sipos man i go joen long ol waes man, bambae hem i save kam waes, be sipos hem i go mekem fren wetem ol man we oli no gat hed, bambae hem i spolem hem nomo.”—Ol Proveb 13:20.
16, 17. ?Wanem tingting blong ol Witnes blong Jeova long saed blong fasin fren mo mared, mo from wanem oli gat tingting olsem?
16 Ol man blong Jeova oli jusumgud ol fren blong olgeta long ol man we oli gat semfala lav long Jeova mo stret fasin, olsem we olgeta tu oli gat. I tru se, oli laekem kampani blong ol fren blong olgeta. Be, oli waes gud blong blokem tingting we i stap long sam kantri tede, long saed blong fasin fren bitwin ol boe mo gel. Fasin blong fren olsem, i no wan pleplei. Hem i wan impoten rod we bambae i lidim wan boe mo gel i go long mared. Taswe, fasin fren bitwin wan boe mo wan gel, i wan fasin we man i save mekem nomo sipos hem i rere long saed blong bodi, tingting, mo spirit—mo, sipos hem i fri, folem wanem we Baebol i talem, blong mekem olsem—blong joen long wan fasin fren we bambae i gohed long ful laef blong hem.—1 Korin 7:36.
17 Sam man maet oli talem se, tingting ya long saed blong fasin fren bifo long mared, hem i long taem blong ol olfala nomo. Be, ol Witnes blong Jeova oli no letem narafala i gat paoa long jus we oli mekem long saed blong ol fren, no ol disisen we oli mekem blong fren wetem wan boe no gel mo blong mared. Oli save se ‘ol gudfala wok oli stap soemaot se waes blong God i tru.’ (Matiu 11:19) Jeova i save moa samting i bitim man, taswe ol Witnes oli tinghevi long advaes ya we God i givim, blong mared nomo long “wan man blong Masta blong yumi.” (1 Korin 7:39; 2 Korin 6:14) Oli no hareap blong mared long enikaen man wetem tingting ya se, sipos mared blong olgeta i no wok bambae oli save divos no seraot nomo. Oli tektaem blong traem faenem wan gudfala hasban no waef from we oli luksave se taem oli mekem promes blong mared, oli mas folem loa ya blong Jeova we i talem se: “Tufala i no moa tu, tufala i olsem wan bodi nomo. Mo from we God i joenem tufala olsem, man i no mas brekem mared blong tufala.”—Matiu 19:5, 6; Mak 10:9.
18. ?Wanem wan samting we i gudfala stat blong wan hapi mared?
18 Mared i wan promes we yumi mekem blong ful laef blong yumi, taswe i nidim gudfala plan fastaem. I stret nomo we wan man i askem long hem wan se: ‘?Woman ya i rili stret long mi?’ Be i impoten tu we hem i askem long hem wan se: ‘?Mi mi man we i stret long hem? ?Mi mi wan Kristin we i bigman finis long tingting, we bambae mi naf blong givim samting we hem i nidim long saed blong spirit?’ Man mo woman we tufala i plan blong mared, tufala tugeta i mas wok blong stap strong long saed blong spirit long fored blong Jeova. Tufala tugeta i mas naf blong wokem wan mared we i joengud mo we i strong, blong bambae God i save glad long hem. Plante taosen Kristin hasban mo waef we oli joen long fultaem wok blong prij, oli pruvum se hemia beswan rod blong statem wan hapi mared, from we wok ya i pulum olgeta blong givim i bitim we oli kasem nomo.
19. ?From wanem sam Kristin oli no wantem mared?
19 Sam Kristin oli jusum blong no mared from gud nius. Hemia i olsem tok ya se “putum taem blong man i no kis.” (Prija 3:5) Sam narafala oli letem mared i stap fastaem, gogo kasem taem we oli ting se oli strong long saed blong spirit blong kasem wan hasban no waef we i stret long olgeta. Be, yumi no mas fogetem tu, olgeta Kristin ya we maet oli wantem tumas blong mared be oli no faenem wan hasban no waef blong olgeta yet. Yumi sua se Jeova i glad long ol man olsem, from we oli no lego ol rul blong God jes blong ronem mared. Yumi save soem tangkiu long olgeta ya tu, from we oli stap tru long God mo yumi mas leftemap tingting blong olgeta.
20. ?From wanem samtaem olgeta we oli mared oli ‘putum taem blong oli no kis’?
20 Olgeta we oli mared finis, ?olgeta tu oli mas ‘putum taem blong oli no kis’? Yes, samting ya i tru long saed blong sam samting, from we Pol i talem se: “Ol brata mo sista. Hemia mining blong tok blong mi. Naoia, yumi no gat plante taem i stap. Ale, man we i mared, i gud hem i stap olsem we hem i no mared.” (1 Korin 7:29) From samting ya, samtaem yumi mas putum ol glad mo blesing we mared i givim long yumi, oli stap long seken ples, biaen long ol tiokratik wok blong yumi. Wan tingting we i skelgud long saed ya bambae i no spolem mared, be bambae i mekem mared ya i kam strong moa. Yes, fasin ya i mekem tufala we i mared i tingbaot se Jeova i impoten tumas long mared blong tufala mo se hem nao i holem mared blong tufala.—Prija 4:12.
21. ?From wanem yumi no mas jajem ol hasban mo waef we oli no gat pikinini?
21 Mo tu, sam man mo woman we oli mared, oli mekem disisen blong no karem pikinini blong bambae oli save fri moa blong mekem wok blong God. Hemia i minim se oli mas lego sam samting we oli laekem tumas. Be, Jeova bambae i givim blesing long olgeta ya, we i stret nomo blong oli kasem. I tru se, Baebol i leftemap tingting blong man se, from gud nius, i gud we oli no mared. Be, Baebol i no talem se man i no mas karem pikinini blong bambae hem i save mekem wok ya. (Matiu 19:10-12; 1 Korin 7:38; skelem wetem Matiu 24:19 mo Luk 23:28-30.) Taswe, ol man mo woman we oli mared, oli mas mekem prapa disisen blong olgeta. Disisen blong olgeta i mas stanap long wanem we i laenap wetem laef blong olgeta mo tingting ya we i stap jajem olgeta. Nomata wanem disisen we olgeta ya oli tekem be, yumi no mas jikim olgeta.
22. ?Wanem impoten samting we yumi mas luksave?
22 Yes, ‘evri samting i gat wan taem we i stret long hem, i gat wan taem blong evri samting aninit long heven.’ I gat wan ‘taem blong faet mo wan taem blong mekem pis.’ (Prija 3:1, 8) Nekis stadi bambae i eksplenem from wanem i impoten long yumi blong luksave weswan long tufala taem ya i stret long yumi naoia.
[Futnot]
a B.K.T. i minim Bifo Kristin Taem.
?Yu Yu Save Eksplenem?
◻ ?From wanem i impoten long yumi blong tingbaot se i gat ‘wan stret taem blong evri samting’?
◻ ?From wanem tede, hem i “taem blong krae”?
◻ ?Nating se ol Kristin oli stap “krae,” from wanem oli rili hapi?
◻ ?Olsem wanem sam Kristin oli soem se long tingting blong olgeta, taem naoia hem i ‘taem blong oli no kis’?
[Tok Blong Pija Long Pej 6, 7]
Nating se ol Kristin oli “krae” from laef blong wol ya i nogud . . .
. . . oli rili hapi moa i bitim ol narafala man blong wol
[Tok Blong Pija Long Pej 8]
Fultaem minista wok hem i wan nambawan stat blong kasem wan hapi mared