Laef Stori

God i Blesem Hem Wetem Wan Spesel Presen

CAROL ALLEN I TALEM STORI YA

Mi mi stap mi wan, mi stap holem naesfala buk blong mi we i niuwan nomo. Fraet i kasem mi, mo wota blong ae blong mi i foldaon. Traem tingbaot. !Mi mi wan smol gel blong seven yia nomo, mi lus long wan taon we mi no savegud long hem, mo i gat plante taosen man oli stap raonabaot long mi!

KLOSAP 60 yia biaen long taem ya, taem mi mo hasban blong mi, Paul, mitufala i visitim naesfala ples ya, Watchtower Educational Center long Patterson, New York, mi tingbaot bakegen wanem we i bin hapen long mi taem mi mi pikinini nomo. Mitufala i go long New York from we oli askem Paul blong joen long namba tu klas blong skul blong ol seket elda blong ol Witnes blong Jeova.

Wan dei, mitufala i stap lukluk raon long bigfala rum we i ples blong welkamem ol man. Long rum ya, we san i saen i kamtru long hem, mi luk wan bigfala pija we oli raetem klosap long hem se “OL ASEMBLI.” !Klosap long medel blong pija ya, i gat wan olfala foto blong ol pikinini we oli glad tumas, oli stap holem ol kopi blong buk ya we mi mi laekem tumas taem mi pikinini! Kwiktaem nomo, mi ridim tok we i stap klosap long pija ya. Tok ya i talem se: “Hemia long 1941, long St. Louis, Missouri. Taem program blong miting i stat, 15,000 pikinini—we yia blong olgeta i stap bitwin 5 mo 18—oli hivap long open ples stret long fored blong platfom . . . Long taem ya, Brata Rutherford i talemaot se niufala buk ya Children i kamaot.”

Wanwan pikinini i kasem wan kopi blong buk ya. Biaen, evri pikinini oli go sidaon bakegen wetem ol papa mama blong olgeta—mi nomo mi stap. !Mi mi lus, mi no save weples blong go! Nao wan man we i gat kaen fasin i kam, i karem mi, i putum mi mi stanap antap long bokis blong presen mane, mo i talem long mi blong lukaot wan man we mi save hem. Mi wari bigwan, mo mi stap lukluk i go long bigfala hip blong man we oli stap wokbaot i godaon long step. !Wantaem nomo mi luksave wan man! “!Angkel Bob! !Angkel Bob!” !Bob Rainer i faenem mi! Nao hem i tekem mi mi go long papa mama blong mi. Tufala i stap wet long mi we tufala i wari we i wari.

Ol Faswan Samting We Oli Gat Paoa Long Laef Blong Mi

Taem mi stap lukluk pija we i stap long bigfala rum ya, we i ples blong welkamem ol man, mi tingbaot bakegen plante samting we i bin hapen bifo—ol samting we oli gat paoa long laef blong mi mo oli mekem se mitufala i kam long nambawan bilding long Patterson. Mi tingbaot bakegen wanem we i bin hapen bitim wan handred yia bifo. Ol samting we oli bin hapen long taem ya, mi harem long tufala olfala bubu blong mi wetem papa mama blong mi tu.

Long Desemba 1894, wan fultaem Kristin minista blong ol Baebol Studen, hemia ol Witnes blong Jeova long taem ya, i kam visitim olfala bubu man, Clayton J. Woodworth, long haos blong hem long Scranton, Pennsylvania, Yunaeted Stet. Clayton i jes mared nomo. Hem i raetem wan leta i go long Charles Taze Russell, presiden blong Watch Tower Bible and Tract Society, mo yumi save ridim leta ya long Wajtaoa blong Jun 15, 1895. Hem i eksplenem se:

“Mi mo waef blong mi, mitufala i jes mared nomo. Samwe long ten yia finis, mitufala i bin joen long wan jos we oli talem se hem i Kristin Skul. Be naoia, mitufala i sua se mitufala i stap aot long tudak blong jos ya, mitufala i stap kam long laet blong niufala dei we naoia, laet blong hem i stap kam klia moa long ol tabu pikinini blong Man ya we i Hae Olgeta. . . . Longtaem bifo we mitufala i mitim mitufala, mitufala i wantem tumas se bambae mitufala i mekem wok blong Masta, olsem misinari long narafala kantri, sipos Masta i wantem olsem.”

Biaen, long 1903, Sebastian mo Catherine Kresge, olfala bubuman mo bubuwoman blong mi, hemia papa mama blong Mama, tufala i glad blong lesin long mesej blong Baebol we wan man blong Watch Tower i karem i kam long tufala long bigfala plantesin we tufala i laef long hem, hemia long ol naesfala Hil blong Pacono long Pennsylvania. Ol gel blong tufala, Cora mo Mary, tufala tu i laef long ples ya wetem ol hasban blong tufala, Washington mo Edmund Howell. Carl Hammerle mo Ray Ratcliffe we tufala i stap wok long nem blong Watch Tower, tufala i stap wan ful wik wetem olgeta. Long taem ya, tufala i tijim olgeta long plante samting. Ol sikis famle ya, oli lesingud, oli stadi, mo smoltaem biaen, oli kam ol Baebol Studen we oli wok strong.

Long sem yia ya, 1903, Cora mo Washington Howell, tufala i gat wan smol gel we nem blong hem Catherine. Biaen, Catherine i maredem papa blong mi, Clayton J. Woodworth, Jr. Mi bilif se stori blong tufala i wan stori we i intres tumas mo i gat mining. Stori ya i soemaot nambawan save mo nambawan fasin blong bubuman, Clayton J. Woodworth, Sr.

Givhan Long Papa Blong Mi Wetem Lav

Papa blong mi, Clayton Jr., hem i bon long Scranton long 1906. Ples ya we hem i bon long hem i no bitim 80 kilometa longwe long Howell fam. Long taem ya, Bubuman Woodworth, i frengud wetem bigfala famle Howell, mo plante taem oli singaot hem i go long haos blong olgeta. Bubu i givhan bigwan long kongregesen blong ol Baebol Studen long eria ya. Biaen, oli askem Bubuman blong mekem mared blong trifala boe blong famle Howell. From we Bubu i wantem se laef blong boe blong hem i ron gud, hem i tekem boe blong hem i go wetem hem long trifala taem we hem i go mekem mared.

Long taem ya, Papa i no strong yet long Kristin minista wok blong ol Baebol Studen. I tru, hem i mas draevem Bubu i go blong mekem ol visit, be nating se Bubu i leftemap tingting blong hem, Papa i no traehad hem wan blong kam strong. Long taem ya, papa blong mi i gat bigfala intres long miusek i bitim ol narafala samting, mo hem i stap tren blong kam jampion blong plei miusek.

Catherine, dota blong Cora mo Washington Howell, hem tu i gat gudhan blong plei miusek, mo i stap plei piano mo tijim ol narafala blong plei piano. Hem i gat janis blong kam jampion blong plei miusek. Be hem i lego wok ya mo i joen long fultaem wok blong talemaot gud nius. !Bubu i stap tingting se gel ya nao i beswan kampani blong boe blong hem—mi tu mi gat tingting olsem! Papa i baptaes, mo sikis manis biaen, hem i maredem Mama, long Jun 1931.

Oltaem, Bubuman i glad tumas long save we boe blong hem i gat blong plei miusek. Hem i haremgud tumas taem oli askem Papa blong trenem olgeta we bambae oli plei miusek long taem blong intenasnal asembli long Cleveland, Ohio, long 1946. Long ol yia we oli kam biaen, Papa i plei miusek long sam asembli blong ol Witnes blong Jeova.

Bubuman i Kasem Hadtaem Mo Laef Blong Hem Long Kalabus

Taem mi mo Paul, mitufala i stap long bigfala rum ya long Patterson, mitufala i sek long wan pija we yu save luk long nekis pej. Kwiktaem nomo mi luksave pija ya from we, bitim 50 yia bifo, Bubuman i bin sanem wan kopi long mi. Hem nao i stap stanap long raetsaed, long en olgeta.

Long Faswan Bigfala Faet blong Wol, taem ol nesen oli stap agensem olgeta bigwan, ol man oli mekem giaman tok agensem ol eit brata ya—we insaed i gat Joseph F. Rutherford (long medel), presiden blong Watch Tower Society. Oli putum olgeta long kalabus mo oli no givim janis long olgeta nating. Ol man oli agensem olgeta from ol tok insaed long buk ya The Finished Mystery, we i namba seven buk blong Studies in the Scriptures. Ol man ya we oli agensem olgeta oli no kasem stret save long ol tok insaed long buk ya, nao oli talem se buk ya i daonem fasin blong Yunaeted Stet blong joen long Faswan Bigfala Faet blong Wol.

Charles Taze Russell i bin tekem plante yia blong raetem ol faswan sikis buk blong Studies in the Scriptures, be hem i ded bifo we hem i raetem namba seven buk. Taswe, oli givim ol raeting blong hem long Bubuman mo wan narafala Baebol Studen, nao tufala i raetem namba seven buk. Buk ya i kamaot long 1917, bifo we faet i finis. Long bigfala traem ya, oli putum Bubuman mo bighaf blong ol narafala man i go long presin bakegen, blong wanwan long olgeta i stap 20 yia long kalabus.

Tok we i stap aninit long pija long bigfala rum long Patterson i talem se: “Naen manis afta we Rutherford mo ol fren blong hem oli go long kalabus—mo faet i finis—long Maj 21, 1919, hae kot i givim janis long olgeta eit brata ya, mo long Maj 26, ol brata oli aot long kalabus, be oli holem $10,000 long wanwan long ol brata ya olsem promes se bambae oli mas pas bakegen long kot. Ale ol brata oli kam fri bakegen blong go long Brooklyn. Long Maj 5, 1920, kot i talem se ol poen we oli agensem J. F. Rutherford mo ol narafala brata oli giaman nomo.”

Bifo we ol brata ya oli go long kalabus long Atlanta, Georgia, oli spenem sam dei long smol rum long haos kalabus blong Raymond Street, long Brooklyn, New York. Long kalabus ya, Bubuman i raetem se oli putum hem long wan rum we i smol we i smol. Smol rum ya i “fulap long doti mo i fasfas we i fasfas.” Hem i talem se: “Yu gat wan bigfala hip blong nius pepa i stap, mo sipos fastaem, yu ting nating long ol niuspepa ya, biaen bambae yu kasem save se hemia nao toelet pepa blong yu. Yu mas yusum ol pepa ya wetem wan smol pis kaliko mo wan smol sop sipos yu wantem stap klin mo harem gud long yu wan.”

Nating se i olsem, oltaem Bubuman i mekem fani. Hem i putum nem blong kalabus ya se “Hotel de Raymondie.” Hem i raetem se, “Bae mi stap long ples ya go kasem taem we mane blong pem rum blong mi i finis.” Mo tu, hem i tokbaot ol samting we oli hapen taem oli stap wokbaot afsaed long bigfala yad blong haos kalabus. Wan dei, taem hem i stap stanap blong narafala brata i komem hea blong hem, wan man blong stil i kam, i pulumaot hanwaj we i stap long jen long poket traoses blong hem. Be Bubu i raetem se, “Jen i brok mo mi sevem hanwaj blong mi.” Taem mi go long Brooklyn blong visitim Betel long 1958, Grant Suiter, we long taem ya hem i sekretari-tresara blong Watch Tower Society, i singaot mi i go long ofis blong hem mo i givim hanwaj ya long mi. Kam kasem naoia, mi stap lukaotgud yet long hanwaj ya.

Samting We i Gat Paoa Long Laef Blong Papa

Taem Bubuman i go kalabus blong nating long 1918, papa blong mi i gat 12 yia nomo. Bubuwoman i sarem haos blong olgeta, nao i tekem Papa, tufala i go stap wetem papa mama blong Bubuwoman mo trifala sista blong hem. Famle nem blong Bubuwoman bifo we hem i mared, hemia Arthur, mo famle blong hem oli glad blong talemaot se wan memba blong olgeta, Chester Alan Arthur, hem i namba 21 presiden blong Yunaeted Stet.

Afta we oli jajem Bubu Woodworth se hem i mas stap plante yia long kalabus from we oli talem se hem i brekem loa blong Yunaeted Stet, famle Arthur i harem se hem i spolem nem blong olgeta. Samting ya i mekem se papa blong mi i harem nogud tumas. Maet samting ya nao i mekem se fastaem, Papa i fraet tumas blong prij long pablik ples.

Taem Bubuman i kamaot long kalabus, hem i tekem famle blong hem, oli go long wan bigfala haos long Quincy Street long Scranton. Olsem wan pikinini, mi savegud haos blong tufala olfala bubu blong mi mo ol naesfala dis blong Bubuwoman. Ol dis ya, mifala i stap kolem se ol tabu dis from we Bubuwoman i no letem mifala blong wasem. Afta we Bubuwoman i ded long 1943, plante taem Mama i yusum ol naesfala dis ya taem man i kakae long haos blong mifala.

Bisi Long Wok Blong Kingdom

Long wan narafala dei, taem mi stap wokbaot long ol rum long Patterson, mi luk pija blong Brata Rutherford. Pija ya i soem hem taem hem i stap givim tok long asembli long Cedar Point, Ohio, long 1919. Long asembli ya, hem i talem long evriwan blong gat strong tingting blong talemaot Kingdom blong God, mo hem i yusum niufala magasin ya The Golden Age, we i kamaot long asembli ya. Sosaeti i jusum Bubuman blong mekem wok blong raetem magasin ya, mo hem i gohed long wok ya go kasem ol yia 1940, smoltaem bifo we hem i ded. Long 1937, oli jenisim nem blong magasin ya i kam Consolation mo long 1946, oli kolem Awake!

Bubuman i stap raetem magasin ya long haos blong hem, be evri tu wik hem i mas go stap tu wik long hedkwota blong Watch Tower long Brooklyn, we i stap longwe olsem 240 kilometa. Papa i talem se hem i rimemba taepraeta blong hem we i stap mekem noes plante taem long faef klok moning. Be, Bubuman, hem i tinghevi long bigfala wok ya blong joen blong talemaot gud nius. Yes, hem nao i stat blong wokem sot blong ol man we i gat bigfala poket insaed we i stret blong holem ol buk we oli tokbaot Baebol. Anti blong mi, Naomi Howell, we hem i gat 94 yia, hem i gat wan sot olsem ya i stap yet wetem hem. Mo tu, Bubuman i wokem plan blong wan bag we ol woman oli save yusum blong karem ol buk.

Wantaem, afta we Bubuman i storiangud wetem wan man long wok blong prij, brata we i wok wetem Bubuman i talem se: “C. J., yu mekem wan mastik.”

Bubuman i askem se: “?Wanem mastik ya?” Hem i jekem bigfala poket long sot blong hem. Tufala poket evriwan i emti.

“Yu foget blong askem man ya blong mekem sabskripsen blong Golden Age.” Tufala i laf we i laf, from we Bubuman i foget blong seremaot magasin ya we hem nao i stap raetem.

Tingtingbak Long Ol Taem We Mi Mi Smol

Mi tingbaot we mi stap sidaon long leg blong Bubuman, taem mi mi wan smol pikinini, mo hem i holem smol han blong mi, i stap talem stori ya we oli kolem “Finger Story.” Hem i stat wetem “Tommy Thumb” afta “Peter Pointer” afta narawan bakegen. Hem i talem wan samting we i spesel long saed blong ol wanwan fingga. Biaen, hem i mekem ol fingga blong mi oli fas wanples mo i talem se: “Ol fingga oli nambawan long fasin blong wokgud tugeta, mo oli givgivhan long olgeta.”

Afta we Papa mo Mama tufala i mared, tufala i muf i go long Cleveland, Ohio, mo tufala i frengud wetem Ed mo Mary Hooper. Ol famle blong tufala ya, oli bin kam Baebol Studen long stat blong ol yia 1900. Papa mama blong mi wetem tufala ya we mi stap singaot tufala se Angkel Ed mo Anti Mary, oli gat wan nambawan fasin joengud. Brata mo sista Hooper, tufala i gat wan pikinini nomo. Hem i wan pikinini gel, be tufala i lusum hem. Taswe taem mi bon long 1934, mi kam wan spesel “dota” blong tufala. From we mi gruap long wan ples we i rij long saed blong spirit, mi givim laef blong mi i go long God mo mi tekem baptaes taem mi no kasem 8 yia yet.

Taem mi smol nomo, fasin blong ridim Baebol i kam olsem wan haf blong laef blong mi. Wan long ol vas we mi laekem tumas, hemia Aesea 11:6-9, we i tokbaot laef long niufala wol. Faswan taem we mi traehad blong ridim fulwan Baebol, hemia long 1944, afta we mi kasem wan kopi blong American Standard Version, wan spesel translesen we i kamaot long asembli blong Buffalo, New York. !Mi glad tumas blong ridim Baebol ya, we oli putumbak nem blong God, Jeova, long stret ples blong hem blong klosap 7,000 taem long “Oltesteman”!

Ol wiken oli ol hapi taem. Papa mama blong mi wetem brata mo sista Hooper, oli tekem mi, mifala i go prij long ol ples long bus. Mifala i karem kakae blong mifala mo mifala i kakae klosap long reva. Biaen, mifala i go long wan plantesin blong wan man, blong givim wan tok we i kamaot long Baebol, we mifala i bin singaot ol man raonabaot blong kam lesin long hem. Laef i isi nomo. Mifala i glad tumas olsem wan famle mo blong joen long ol narafala famle. Sam memba blong ol faswan famle we oli joen wetem mifala, biaen oli kam seket elda. I gat Ed Hooper, Bob Rainer, mo tufala boe blong hem. Kam kasem naoia, Richard Rainer i stap mekem wok ya yet wetem waef blong hem, Linda.

Ol hot sisen, oli rili ol hapi taem. Long taem ya, mi go stap wetem tufala kasin sista blong mi long Howell fam. Long 1949, kasin sista blong mi, Grace i maredem Malcolm Allen. Mi no save yet se sam yia biaen, bambae mi maredem brata blong hem. Kasin sista blong mi, Marion, we hem i moa yang, hem i wan misinari long Uruguay. Hem i maredem Howard Hilborn long 1966. Tufala kasin sista ya blong mi wetem hasban blong tufala, olgeta evriwan oli bin wok sam yia long hedkwota long Brooklyn.

Bubuman Mo Taem We Mi Kamaot Long Hae Skul

Long ol yia we mi mi stap long hae skul, oltaem Bubu i raetem leta i kam long mi. Hem i putum plante olfala foto long ol leta we hem i sanem i kam. Hem i raetem sam tok biaen long ol foto ya, blong tokbaot histri blong famle. Hemia nao olsem wanem mi kasem foto ya blong hem mo ol narafala, we ol man oli putum olgeta long kalabus blong nating.

Long en blong 1951, Bubuman i kasem kansa long trot blong hem, nao i lusum voes blong hem. Tingting blong hem i wok gud yet, be blong toktok, hem i mas raetem ol tok blong hem long wan smol buk we hem i stap karem wetem hem. Mifala long klas blong mi i mas kasem stefeket long medel blong tem, hemia long Janewari 1952. Long stat blong Desemba 1951, mi raetemdaon ol tok we bambae mi talem taem mi kasem stefeket, mo mi sanem long Bubuman. Hem i raetem sam gudfala toktok long pepa blong mi mo long las pej, hem i raetem wan sotfala tok we i rili kasem hat blong mi: “Bubuman i glad tumas.” Laef blong hem long wol ya i finis long Desemba 18, 1951, taem hem i gat 81 yia.a Mi stap lukaot gud yet long leta ya we mi bin raetem mo sotfala toktok we i stap long laswan pej.

Stret afta we mi kamaot long hae skul, mi joen long wok blong paenia, hemia nem we ol Witnes blong Jeova oli stap yusum blong kolem fultaem wok blong prij. Long 1958, mi go long wan bigfala asembli long New York City. I gat 253,922, man oli kam long asembli ya, mo ol man ya we oli kamaot long 123 kantri, oli fulumapgud Yankee Stadium mo Polo Graon. Wan dei, long asembli ya, mi mitim wan man Afrika we i putum wan baj we i talem se “Woodworth Mills.” !Samwe long 30 yia bifo, oli putum nem blong hem folem nem blong Bubuman!

Mi Haremgud Tumas From Presen We Mi Mi Kasem

Taem mi gat 14 yia, mama blong mi i stat paenia bakegen. !Hem i ded 40 yia biaen, hemia long 1988, we long taem ya, hem i wan paenia yet! Papa i joen long wok blong paenia taem hem i naf blong mekem. Hem i ded naen manis bifo we Mama i ded. Ol famle we mifala i bin mekem stadi blong olgeta, oli kam ol gudfala fren blong mifala. Sam long ol boe blong olgeta oli wok long hedkwota long Brooklyn, mo samfala oli joen long wok blong paenia.

Long tingting blong mi, 1959 i wan yia we i spesel tumas. Hemia taem we oli talemaot mi long Paul Allen. Sosaeti i bin putumap Paul olsem seket elda long 1946 taem hem i kamaot long namba seven klas blong Gilead, wan skul blong trenem ol misinari blong ol Witnes blong Jeova. Taem mifala i stap mekem miting, mifala i no save se nekis ples we bambae Paul i go wok long hem, hemia, Cleveland, Ohio, ples we mi stap paenia long hem. Papa mo Mama, tufala i lavem Paul tumas. Mitufala i mared long Julae 1963 long Howell fam. I gat plante famle oli kam mo Ed Hooper i givim tok blong mared blong mitufala. Hemia wan drim we i kamtru.

Paul i neva gat wan trak. Taem mitufala i aot long Cleveland blong go visitim ol kongregesen long narafala seket, mitufala i putum olting blong mitufala i go evriwan long smol trak blong mi. Plante taem, long ol Mande, ol fren oli kam visitim mitufala. Long dei ya mitufala i muf i go long narafala kongregesen, mo oli kam wajem mitufala i stap fulumap ol ting blong mitufala. I olsem wan konset nomo blong luk we mitufala i putum bokis i go, hanbak, ol bokis blong buk, taepraeta, mo plante samting bakegen. Mitufala i putum evriwan i go long smol trak ya.

Mi wetem Paul, mitufala i bin mekem plante trep i go long narafala ples, mitufala i bin haremgud tugeta long ol gudfala taem mo stanap strong long ol hadtaem blong laef naoia—mitufala i mekem evri samting long paoa ya nomo we Jeova i save givim. Ol yia we oli pas oli rili ol hapi yia. Long olgeta yia ya, mitufala i bin lavem Jeova, mitufala i lavem mitufala, mo ol fren, olgeta we oli stap longtaem long trutok mo ol niuwan tu. Mitufala i spenem tu manis long Patterson blong Paul i kasem trening. Taem ya i rili wan bigfala samting long laef blong mitufala. From we taem mifala i stap long ples ya, mi gat janis blong luklukgud ogenaesesen blong Jeova long wol. Samting ya i mekem se tingting we mi kasem long famle blong mi, we i wan sas presen long saed blong spirit, i kam strong moa. Yes, hemia i rili ogenaesesen blong God. !Mi mi glad tumas blong stap olsem haf blong bigfala ogenaesesen ya!

[Futnot]

[Tok blong pija long pej 25]

Mi wetem Ed Hooper, smoltaem bifo long asembli blong St. Louis long 1941, taem ya we mi kasem wan kopi blong buk ya “Children”

[Tok blong pija long pej 26]

Bubu man long 1948

[Tok blong pija long pej 26]

Long Howell fam, taem papa mo mama blong mi (long sekol), i mared

[Tok blong pija long pej 27]

Ol eit Baebol studen we oli go kalabus blong nating long 1918 (Bubuman i stanap long raet saed)

[Tok blong pija long pej 29]

Olting blong mitufala oli go evriwan insaed long smol trak blong mitufala

[Tok blong pija long pej 29]

Mi wetem hasban blong mi, Paul