Papa Mama Blong Mifala i Tijim Mifala Blong Lavem God

ELIZABETH TRACY I TALEM STORI YA

Sam man blong faet, we oli bin lidim wan grup blong man blong agensem mifala, oli fosem Mama mo Papa blong kamaot long trak. Oli letem mi mo sista blong mi, mitufala i stap long trak, mitufala i no save se bambae mitufala i luk papa mo mama bakegen no nogat. ?From wanem trabol ya i kasem mifala klosap long Selma, long Alabama, Yunaeted Stet, long 1941? ?Olsem wanem tijing we mifala i kasem long papa mo mama i joen wetem trabol ya?

PAPA blong mi, Dewey Fountain, i lusum papa mama blong hem taem hem i pikinini yet. Taswe, bigfala sista blong papa, i lukaot long papa long plantesin we hem mo man blong hem tufala i gat long Teksas. Biaen, papa i go wok long ples blong faenem oel long graon. Long 1922, taem hem i gat 23 yia, hem i mared wetem Winnie, wan naesfala woman blong Teksas, nao tufala i plan blong gat wan famle.

Papa i bildim wan haos long ples blong katem timba long is blong Teksas, klosap long smol taon blong Garrison. Long ples ya, hem i wokem wan garen we i planem ol defren kaen ligim long hem, wetem koten mo kon tu. Mo hem i gat sam anamol tu. Samtaem biaen, mifala ol pikinini i bon​—Dewey junior long Mei 1924, Edwena long Desemba 1925, mo mi long Jun 1929.

Lanem Trutok Blong Baebol

Mama mo Papa tufala i joenem Jos blong Kraes. Taswe, tufala i ting se tufala i gat save finis long saed blong Baebol. Be long 1932, G. W. Cook i livim tufala buk ya Deliverance mo Government long brata blong Papa, Monroe Fountain. Hemia tu buk we Watch Tower Sosaeti i wokem. Angkel i wantem tumas blong serem samting we hem i stap lanem, wetem papa mama blong mi. Ale, plante taem Angkel Monroe i kam eli long moning, taem mifala i stap dring ti, nao hem i ridimaot wan haf blong Wajtaoa long mifala. Mo afta, hem i stap “fogetem” magasin blong hem i stap long haos blong mifala. Long rod ya, Mama mo Papa tufala i save ridim ol magasin ya.

Wan Sande moning, Angkel Monroe i singaot Papa i go long Baebol stadi we i stap long haos blong wan man klosap long mifala. Hem i talem long Papa se Masta Cook i save ansarem olgeta kwestin we hem i gat, wetem Baebol. Taem Papa i kambak long stadi ya, hem i talemaot long famle se: “!Mi kasem ansa long olgeta kwestin blong mi mo mi kasem sam narafala save bakegen! Mi ting se mi save evri samting finis, be taem Masta Cook i stat eksplenem ol samting long saed blong helfaea, sol, stamba tingting blong God long saed blong wol, mo olsem wanem Kingdom blong God bambae i mekem ol samting ya oli kamtru, !mi luk se mi mi no save wan samting nating long saed blong Baebol!”

Haos blong mifala i olsem ples we ol man oli kam long hem blong joen tugeta. Oltaem ol memba blong famle blong mifala wetem ol fren, oli kam visitim mifala. Mifala i mekem sam loli mo popkon, mo mifala i singsing tugeta wetem Mama we i stap plei piano. Sloslou ol storeyan we mifala i gat long ol taem ya, oli go long saed blong Baebol. Nating se mifala ol pikinini, mifala i no kasem save long olgeta samting we ol bigman oli stap storebaot, be mifala i luksave se papa mo mama tufala i gat bigfala lav long God mo long Baebol. Samting ya i pulum mifala blong gat sem filing long saed blong God mo Tok blong hem.

Sam narafala famle tu oli welkamem man long haos blong olgeta evri wik blong tokbaot Baebol, mo oltaem oli jusum sam poen we oli stap long ol laswan Wajtaoa magasin. Samtaem ol famle long ol narafala taon blong Appleby mo Nacogdoches, oli mekem ol miting long ples blong olgeta. Ale, mifala evriwan i hivap insaed long smol trak blong mifala blong go long ol miting ya, nating se i ren no san i hot.

Wok Folem Ol Samting We Oli Lanem

I no tekem longtaem blong papa mama i luksave se tufala i mas mekem samting. Man we i lavem God i mas serem ol samting we hem i lanem wetem narafala man. (Ol Wok 20:35) Be, i no isi long papa mama blong mifala blong talemaot bilif blong olgeta long ol man raonabaot, from we tufala i no man blong toktok plante mo tufala i sem lelebet. Be, lav we tufala i gat long God i pusum tufala blong mekem wok ya. Mo, samting ya i halpem tufala blong tijim mifala blong putum ful tras blong mifala long Jeova. Papa i talem se: “!Jeova i mekem man blong plantesin i kam man blong prij!” Long 1933, Mama mo Papa tufala i tekem baptaes long wan smol reva klosap long Henderson, Teksas, blong soemaot se tufala i givim laef blong tufala i go long Jeova.

Long stat blong 1935, Papa i raet long Watch Tower Sosaeti blong askem sam kwestin long saed blong hop we ol Kristin oli gat blong laef olwe. (Jon 14:2; 2 Timoti 2:​11, 12; Revelesen 14:​1, 3; 20:6) Joseph F. Rutherford we hem i presiden blong Sosaeti, i raetem leta i kambak long Papa. Brata Rutherford i no givim ansa long ol kwestin blong Papa, be hem i singaot Papa i kam long asembli blong ol Witnes blong Jeova we i stap long Washington, D.C., long Mei 1935.

Papa i tingting se: ‘!Samting ya i no save hapen! Yumi gat wan plantesin blong 26 hektea we i gat plante ligim long hem. Long taem blong asembli ya, bambae i taem blong karem kakae long garen mo blong salem long maket.’ Be, smoltaem biaen, wan bigfala ren i foldaon we i mekem se i no moa gat kakae long garen, i no moa gat fenis mo ol brij tu​—Papa i no moa gat eskius. Ale, mifala wetem sam narafala Witnes, i rentem wan skul bas we i tekem mifala i go long asembli we i stap 1,600 kilometa saed i go long not-is.

Long asembli, Papa mo Mama tufala i glad tumas blong harem tok we i eksplenem hu ya “bigfala kampani” we bambae i laef tru long “bigfala trabol.” (Revelesen 7:​9, 14, King James Version) Hop ya blong laef olwe long wan paradaes long wol, i leftemap tingting blong Mama mo Papa long ful laef blong tufala. Mo tufala i halpem mifala ol pikinini blong “kasem laef ya we i prapa wan,” we i minim laef we i no save finis long wol ya we Jeova i givim. (1 Timoti 6:​19; Ol Sam 37:29; Revelesen 21:​3, 4) Nating se mi gat faef yia nomo long taem ya, mi rili glad blong stap wetem famle blong mi long gudfala asembli ya.

Afta we mifala i kambak long asembli, ful famle i planem bakegen ol samting long garen, mo sam manis biaen, mifala i kasem ol kakae we i plante moa i bitim bifo. Samting ya i halpem Mama mo Papa blong kasem save se man we i trastem Jeova i sua oltaem blong kasem blesing. Biaen, tufala i joen long wan spesel wok blong prij we i mekem se tufala i mas spenem 52 aoa long wok blong prij evri manis. Ale, !long nekis taem blong planem garen, tufala i salem olgeta samting blong mifala! Papa i bildim wan trela blong mifala i laef long hem, we longfala blong hem i 6 mita mo bigfala blong hem i 2.4 mita. Mo hem i pem wan niufala trak blong pulum trela ya. Angkel Monroe i mekem sem mak, mo hem tu i laef long wan trela wetem famle blong hem.

Tijim Trutok

Long Oktoba 1936, Papa mo Mama tufala i statem wok blong paenia, hemia nem blong olgeta we oli prij fultaem. Mifala evriwan long famle i stat prij long ol kantri long is blong Teksas, we mesej blong Kingdom i no kasem olgeta ples ya yet. Blong klosap wan yia, mifala i stap muf i go long plante ples, be mifala i rili laekem laef ya. Mama mo Papa tufala i tijim mifala tru long toktok mo eksampel blong tufala, se yumi mas mekem olsem ol faswan Kristin we oli givim ful laef blong olgeta blong tijim trutok blong Baebol long narafala.

Mifala ol pikinini i rili tinghae long Mama from we hem i rere blong lego haos blong hem blong mekem wok ya. Be, i gat wan samting nomo we hem i no wantem lego, hemia mesin blong hem blong somap klos. Mo hemia wan gudfala disisen tu. From we hem i gat gudhan blong somap klos, oltaem mifala i gat ol gudfala klos blong werem. Long evri asembli, mifala i gat ol niufala mo naesfala klos blong werem.

Mi rimemba gud taem we Herman G. Henschel i kam wetem famle blong hem long ples blong mifala. Olgeta ya oli stap kam wetem wan olfala trak blong Watch Tower Sosaeti we i gat wan spika antap long hem. Oli putum trak ya i stap long wan ples we i gat plante man long hem, nao oli plei long wan sotfala tok we oli rikodem, mo biaen oli visitim ol man we oli wantem save moa long saed blong Baebol. Brata blong mi, Dewey junior, i laekem kampani wetem yangfala boe blong Herman, nem blong hem Milton. Naoia, Milton i presiden blong Watch Tower Sosaeti.

Long asembli blong 1937 long Columbus, Ohaio, Edwena i tekem baptaes, mo Papa mo Mama tufala i kasem blesing blong wok olsem spesel paenia. Long taem ya, oli mas mekem 200 aoa long wok blong prij evri manis. Taem mi tingtingbak long ol yia we oli pas, mi luksave se gudfala eksampel blong Mama i halpem mi blong sapotem hasban blong mi long Kristin wok blong hem.

Taem Papa i statem wan Baebol stadi wetem wan famle, hem i tekem mifala ol pikinini i go wetem hem, blong givim wan gudfala eksampel long ol pikinini blong famle ya. Papa i askem long mifala blong faenem mo ridim ol vas blong Baebol, mo samtaem mifala i ansa long sam kwestin. From samting ya, plante long ol yangfala we oli stadi wetem mifala oli gohed strong long wok blong Jeova kam kasem tede. Mo tu, samting ya i olsem wan strongfala fandesen we i givhan long mifala blong gohed blong lavem God.

Taem Dewey junior i kam bigwan moa, hem i harem se i no isi blong laef long wan smol rum wetem tu yangfala sista. Ale, long 1940 hem i mekem disisen blong aot long haos mo joen long wok blong paenia wetem wan narafala Witnes. Biaen, hem i mared wetem Audrey Barron. Papa mama blong mifala, tufala i tijim Audrey tu long plante samting, mekem se hem i gat bigfala lav long Mama mo Papa. Long 1944, taem Dewey junior i go kalabus from we hem i no wantem joen long ami, Audrey i kam stap wetem mifala long smol trela blong mifala.

Long 1941, long bigfala asembli blong St. Louis, Missouri, Brata Rutherford i toktok stret long ol pikinini we oli gat bitwin 5 mo 18 yia we oli sidaon long wan spesel ples long fored blong platfom. Mi mo Edwena i stap lesin long voes blong hem we i kwaet mo klia. Hem i olsem wan Papa we i gat lav mo we i stap tijim prapa pikinini blong hem. Hem i leftemap tingting blong ol papa mama se: “Tede, Jisas Kraes i hivimap ol man we hem i mekem kontrak wetem olgeta blong oli stanap long fes blong hem, mo hem i talem strong long olgeta se oli mas tijim pikinini blong olgeta long rod blong stret fasin.” Hem i gohed se: “!Holem olgeta oli stap long haos mo tijim trutok long olgeta!” !Mifala i glad tumas from we hemia samting we papa mama blong mifala i bin mekem!

Long asembli ya, mifala i kasem wan niufala buklet, Jehovah’s Servants Defended, we i tokbaot ol defren problem we ol Witnes blong Jeova oli stretem long kot, mo long Saprim Kot blong Yunaeted Stet. Papa i stadi long buklet ya wetem ful famle. Samting ya i halpem mifala blong fesem trabol we i hapen sam wik biaen, long Selma, Alabama.

Wan Hif Blong Man i Agensem Mifala Long Selma

Long moning we mifala i kasem trabol ya, Papa i bin sanem kopi blong wan leta i go long serif, mea, mo jif blong polis long Selma. Leta ya i eksplenem konstitusen we i givim raet long mifala blong prij mo loa we i protektem mifala. Nomata long samting ya, olgeta ya oli mekem disisen blong ronemaot mifala long taon.

Let long aftenun, faef man we oli holem masket, oli kam long trela blong mifala, nao oli blokem Mama, mi mo sista blong mi, mitrifala i stap insaed long trela ya. Oli stat kafsaedem evri samting. Oli wantem faenem wan samting we i pruvum se mifala i stap agensem gavman. Papa i stap afsaed, nao oli poenem masket i go long hem mo oli givim oda long hem blong fasem trela i go long trak. Long taem ya, mi mi no fraet. Mi mo sista blong mi, mitufala i tingting se i fani nomo from we ol man ya oli mekem mifala olsem we mifala i man we i denja tumas, ale mitufala i stat blong laflaf smol. Be, taem Papa i lukluk strong long mitufala, wantaem nomo mitufala i stop.

Taem mifala i rere blong aot long ples ya, ol man ya oli wantem se mi mo Edwena mitufala i go long trak blong olgeta. Papa i tok strong i se: “!Sipos yufala i wantem mekem olsem, yufala i mas kilim mi mi ded fastaem!” Afta we oli toktok tugeta finis, oli letem famle blong mifala i stap tugeta long trak blong mifala, nao ol man ya wetem masket blong olgeta, oli folem mifala long trak blong olgeta. Mifala i ron long 25 kilometa finis longwe long taon, nao oli talem long mifala blong putum trak long saed blong bigrod. Oli singaot Mama mo Papa i go. Wanwan long olgeta i traehad blong winim tingting blong tufala se: “!Yutufala i lego skul ya! !Gobak long wok blong plantesin, mo trenemgud ol gel blong yutufala!” Papa i traem eksplenem bilif blong mifala long olgeta, be i blong nating nomo.

Nao, wan long ol man ya i talem se: “!Ale, yufala i go! !Be sipos yufala i kambak long Dallas, bambae mifala i kilim yufala evriwan i ded!”

Mifala i glad tumas blong stap tugeta bakegen. Mifala i gohed blong ronron long trak blong plante aoa, gogo tudak i kam nao Papa i stopem trak, blong mifala i slip. Mifala i bin makem namba blong trak blong ol man ya. Ale, kwiktaem nomo, Papa i raetem olgeta samting ya we oli hapen, i go long Watch Tower Sosaeti. Sam manis biaen, polis i faenem ol man ya mo i putum olgeta long kalabus.

Gilead Skul Blong Ol Misinari

Long 1946, Edwena i kasem wan leta we i singaot hem blong joen long klas namba 7 blong Gilead Skul we i trenem ol misinari. Skul ya i stap long Saot Lansing, Niu Yok. Albert Schroeder, wan long ol tija blong skul, i tokbaot ol naesfala fasin blong Edwena, long Bill Elrod. Brata ya i bin mekem wok blong paenia wetem Albert Schroeder bifo, mo naoia hem i stap wok long Betel long Bruklin, Niu Yok, we i hedkwota blong ol Witnes blong Jeova long fulwol.a Ale, Edwena mo Bill tufala i mitim tufala, mo wan yia afta we Edwena i kasem stefeket long Gilead skul, tufala i mared. Tufala i stap plante yia long wok blong fultaem paenia, mo faef yia long wok blong Betel. Be wan dei, long 1959, Brata Schroeder i talemaot long klas namba 34 blong Gilead skul, se gudfala fren blong hem i kam wan papa blong twin, wan boe mo wan gel.

Long en blong 1947, taem mi stap prij wetem papa mama blong mi long Meridian, Mississipi, mitrifala i kasem wan leta we i singaot mitrifala blong joen long klas namba 11 blong Gilead Skul. Mitrifala i sapraes tumas from we folem ol rul blong skul ya, mi mi yang tumas mo Mama mo Papa tufala i olfala tumas blong joen long skul ya. Sosaeti i mekem wan samting we neva hem i bin mekem bifo, mo mitrifala i gat nambawan blesing ya blong kasem plante moa tijing long saed blong Baebol.

Misinari Wok Wetem Papa Mama Blong Mi

Ples we oli sanem mitrifala blong wok long hem, hemia Colombia, long Saot Amerika. Long Desemba 1949, bitim wan yia afta we oli givim stefeket long mifala, mifala i kasem misinari haos blong Bogotá. Long ples ya, i gat tri misinari i stap finis long hem. Fastaem, Papa i tingting se i moa gud sipos hem i tijim ol man blong ples ya blong toktok Engglis, i bitim we hem i lanem lanwis blong Spen! !Yes, mifala i bin kasem plante traem be i gat plante blesing tu! !Fastaem, long 1949, namba blong ol Witnes long Colombia i no kasem wan handred, be naoia i gat bitim 100,000 Witnes!

Afta we mifala i wok long Bogotá blong faef yia, oli sanem Mama mo Papa i go long taon blong Cali. Long semtaem ya, hemia long 1952, mi mared wetem Robert Tracy, wan misinari we hem tu i wok long Colombia.b Mitufala i stap long Colombia go kasem 1982, mo biaen oli sanem mitufala i go long Meksiko. Mitufala i wok long ples ya kam kasem tede. Long 1968, papa mama blong mi tufala i mas gobak long Yunaeted Stet from sam problem long saed blong helt. Afta we tufala i kamgud bakegen, tufala i gohed long wok blong spesel paenia klosap long Mobile, Alabama.

Lukaot Long Papa Mama Blong Mifala

Taem ol yia oli pas, Mama mo Papa i kam olfala, mekem se tufala i nidim man blong lukaot mo halpem tufala. Tufala i askem long Sosaeti blong sanem tufala i go paenia klosap long Edwena mo Bill long Athens, Alabama. Biaen, brata blong mifala, Dewey junior, i tingting se i moa waes blong ful famle i kam stap wanples klosap long Saot Carolina. Ale Bill mo famle blong hem oli muf i go long Greenwood, wetem Mama mo Papa. Gudfala jenis ya i givim jans long mi mo Robert blong gohed long misinari wok long Colombia, mo blong save se papa mama blong mi tufala i stap sef.

Biaen, long 1985, Papa i kasem wan sik we i mekem se wan saed bodi blong hem i ded. Ale, hem i no moa save toktok mo wokbaot. Mifala evriwan i kam wanples blong mekem wan miting wetem famle, blong tokbaot wanem rod i moagud blong lukaotgud long papa mama blong mifala. Disisen hemia se, Audrey bambae i lukaot long Papa mo mi mo Robert bambae mitufala i raetem wan leta evri wik blong talemaot sam ekspiryens we i leftemap tingting. Mo tu, bambae mitufala i traehad blong visitim tufala plante taem moa.

Laswan visit we mi bin mekem long Papa blong mi i stap yet long tingting blong mi. Hem i no moa save toktok, be afta we mifala i talem long hem se mifala i mas gobak long Meksiko, hem i traehad blong talem wan tok nomo, “!Adios!” (hemia lanwis blong Meksiko blong talem “Tata”) Taem hem i talem samting ya, mifala i kasem save se, long hat blong hem, hem i sapotem disisen blong mitufala blong gohed long wok blong misinari. Hem i ded long Julae 1987, mo Mama i ded naen manis biaen.

Mi kasem wan leta blong sista blong mi we hem i wido finis. Leta ya i eksplenemgud filing we mitufala i gat long papa mama blong mifala. “Mi laekem tumas Kristin presen ya we papa mama tufala i pasem i kam long yumi. Mi neva gat tingting ya se, maet bambae mi hapi moa sipos tufala i bin tijim mi long wan rod we i defren. Gudfala eksampel we tufala i soem long saed blong strongfala bilif, mo fasin blong lego samting we olgeta nomo i wantem, mo bigfala tras we tufala i gat long Jeova, i halpem mi blong stanap strong taem mi harem nogud long laef blong mi.” Edwena i finisim leta blong hem se: “Mi tangkiu long Jeova from we papa mo mama, tufala i givim wan gudfala eksampel long toktok mo fasin blong tufala. Tufala i soem se yumi save glad bigwan sipos yumi mekem evri samting long laef blong yumi i stanap long wok blong Jeova God we i lavem yumi tumas.”

[Ol futnot]

[Tok Blong Pija Long Pej 22, 23]

Famle Fountain: (lef i go long raet) Dewey, Edwena, Winnie, Elizabeth, Dewey junior; raetsaed: Elizabeth mo Dewey junior long trak blong Henschel, we i gat wan spika antap long hem (1937); aninit long raetsaed: Elizabeth i werem kadbod blong prij taem hem i gat 16 yia