Tijim Pikinini Wan Wok We i No Isi Tede
LET long naet, wan man i wantem sarem restoron blong hem mo gobak hom. Be tu woman wetem wan pikinini oli kam odarem kakae. Man ya i taed tumas, mo hem i wantem talem long olgeta se restoron bambae i sat nao, be hem i jenisim tingting blong hem mo i rerem kakae blong trifala. Taem tufala woman i stap toktok mo kakae, pikinini ya i stap ronron olbaot insaed long restoron, i stap sakem ol bisket olbaot long floa mo i smasem olgeta wetem leg blong hem. Mama blong pikinini ya i no talem wan samting blong blokem hem. Hem i stap smael nomo long smol boe blong hem. Taem oli aot long restoron, ona blong restoron we i taed tumas i mas klinim ol doti ya long floa.
Ating yu luk finis ol fasin olsem we i hapen long stori ya. Ol samting ya oli soem we long plante famle, ol papa mama oli no trenemgud pikinini blong olgeta. I gat defren risen blong samting ya. Sam papa mama oli letem pikinini blong olgeta i mekem evri samting we hem i wantem, from we oli ting se pikinini ya i mas gruap long fasin fri. No maet samtaem, papa mama tufala i bisi tumas, ale oli no tektaem blong lukaotgud mo trenemgud pikinini blong olgeta. Sam papa mama bakegen oli harem se wok long skul i moa impoten i bitim ol narafala samting, taswe oli letem pikinini blong olgeta i mekem klosap eni samting we hem i wantem, be wan samting nomo, hem i mas kasem ol gudfala mak long skul mo i mas go long ol beswan haeskul.
Be, sam man oli talem se i mas gat bigfala jenis long fasin blong laef we ol papa mama mo ol komuniti tu, oli ting se i moa impoten. Oli talem se ol pikinini oli stap joen long olkaen fasin blong brekem loa, mo raf fasin long skul i stap kam antap oltaem nomo. Taswe, hedmasta blong wan skul long Seoul, Ripablik blong Koria, i talem se samting we i impoten moa i blong tijim pikinini blong hem i gat ol gudfala fasin. Hem i se: “Fastaem yu mas wokem ol naesfala fasin [insaed long pikinini], biaen nao, yu save fulumap hed blong hem wetem save.”
Plante papa mama we oli wantem se pikinini blong olgeta i go long haeskul mo i gat wan nambawan laef, oli no wantem lesin long ol woning ya. ?Sipos yu yu wan papa no mama, yu wantem se pikinini blong yu i kam olsem wanem? ?Yu wantem se hem i kam wan bigman we i tinghae long ol gudfala fasin mo we i save mekem wok hem wan? ?Yu wantem se hem i kam wan man we i tingbaot narafala, we i save joengud wetem eni kaen man, mo i lukluk gudfala saed blong evri samting? Sipos yes, plis, i gud yu ridim haf we i kam biaen.