?Yu Luksave Se God i Stap Givhan Long Yu?

1, 2. ?Sam man oli gat wanem tingting long God?

PLANTE man oli bilif se God i no kea long samting we oli stap mekem. Oli ting se God i no wantem save long samting we i hapen long laef blong olgeta. Eksampol, long Novemba 2013, afta we wan strong hariken i spolem bighaf blong Filipin, mea blong wan bigfala taon i talem se: “God i no stap long ples ya.”

² Ol narafala man oli ting se God i no save luk ol samting we oli stap mekem. (Aesea 26:10, 11; 3 Jon 11) Long taem blong aposol Pol, sam man oli gat sem tingting. Hem i tokbaot olgeta i se: “Oli no wantem bilif se God hem i tru.” Olgeta oli stap mekem ol rabis fasin, oli mekem nogud, oli wantem evri samting mo oli stap lukaot rod blong spolem man.—Rom 1:28, 29.

3. (1) ?Wanem ol kwestin we yumi save askem? (2) ?Jehova i yusum paoa blong hem blong mekem wanem?

³ ?Be olsem wanem long yumi? Yumi save se Jehova i stap luk olgeta samting we yumi mekem. ?Be yumi bilif se Jehova i stap tingbaot yumi? ?Yumi luksave se hem i stap givhan long yumi? Long Baebol Jehova i yusum paoa blong hem blong givhan long ol man blong hem, mo blong winim ol enemi blong hem. (Ridim Dutronome 26:8.) Jisas i talem se sam man bambae oli “luk God.” (Matiu 5:8) ?Yumi wan long ol man ya we Jisas i tokbaot? ?Yumi save “luk God” olsem wanem? I gud yumi luk eksampol blong ol man long Baebol we oli luksave paoa blong God long laef blong olgeta, mo olgeta we oli no wantem luksave paoa blong hem. Bambae yumi lanem tu se bilif i save givhan long yumi blong yumi luksave paoa blong God.

OLI NO WANTEM LUKSAVE PAOA BLONG GOD

4. ?From wanem ol enemi oli no wantem luksave se God i stap givhan long ol man Isrel?

⁴ Long taem bifo, plante man oli gat janis blong luk mo harem ol samting we God i mekem blong givhan long ol man Isrel. Jehova i yusum ol merikel blong mekem ol man Isrel oli go fri long Ijip mo blong winim plante King long Promes Lan. (Josua 9:3, 9, 10) Nating se ol narafala king oli harem mo oli luk ol samting we Jehova i mekem blong sevem ol man blong hem, be oli girap “oli kam wanples wetem ol soldia blong olgeta, oli joen blong kam mekem faet long Josua wetem ol man blong hem.” (Josua 9:1, 2) Taem oli stap faet agensem ol man Isrel, ol king ya oli gat janis blong luksave we God i stap givhan long ol man Isrel. Long faet ya, Jehova i soemaot paoa blong hem taem hem i mekem “san i no moa muv, mo mun tu i stap wan ples nomo, gogo kasem we olgeta oli winim ol enemi ya blong olgeta.” (Josua 10:13) Be Jehova i letem “ol man ya oli stronghed tumas,” nao oli faet agensem ol man Isrel. (Josua 11:20) Ol enemi blong Isrel oli lus from we oli no wantem luksave se God i stap givhan long ol man blong hem.

5. ?Rabis King Ehab i no wantem luksave wanem samting?

⁵ Rabis King Ehab tu i gat janis blong luk paoa blong God long sam samting we oli hapen. Profet Elaeja i talem long hem se: “Ren mo wota blong naet bambae i no moa save foldaon, gogo mi nomo bambae mi talem.” (1 King 17:1) Paoa blong God nomo i save mekem samting ya i kamtru, be Ehab i no wantem luksave samting ya. Biaen, Elaeja i prea long Jehova, mo God i ansa long prea blong hem taem hem i sanem faea i kamdaon. Ehab i luk samting ya. Biaen, Elaeja i talem long Ehab se Jehova bambae i sanem ren i kam blong finisim draetaem ya. (1 King 18:22-45) Ehab i luk olgeta merikel ya be hem i no wantem bilif se hemia paoa blong Jehova. ?Yumi lanem wanem long ol stori ya? Yumi mas wantem blong luksave paoa blong God long laef blong yumi.

OLGETA OLI LUK PAOA BLONG JEHOVA

6, 7. ?Ol man Gibeon mo Rehab oli luksave wanem samting?

⁶ Ol man Gibeon oli defren olgeta long ol neson raonabaot long olgeta. Olgeta oli luk paoa blong God. Oli no mekem faet agens long ol man Isrel, be oli wantem blong mekem pis wetem olgeta. ?From wanem? Oli mekem olsem from we oli harem ol samting we Jehova i mekem long ol enemi blong ol man Isrel. (Josua 9:3, 9, 10) Oli waes taem oli luksave se Jehova nao i stap givhan long ol man Isrel long faet.

⁷ Rehab tu i luk paoa blong Jehova. Hem i no wan woman Isrel, be hem i harem samting we Jehova i mekem blong mekem ol man Isrel oli go fri long Ijip. Taem tufala spae blong Isrel i kam luk hem, hem i talem long tufala se: “Mi mi save we Hae God i givim kantri ya finis long yufala.” Rehab i bilif se Jehova i save sevem hem mo ol famle blong hem. Hem i soemaot se hem i bilif long Jehova, nating se hem i save lusum laef blong hem from samting we hem i mekem.—Josua 2:9-13; 4:23, 24.

8. ?Sam man Isrel oli mekem wanem taem oli luk paoa blong God?

⁸ Sam man Isrel oli defren long rabis King Ehab. Taem Elaeja i prea mo oli luk we faea i kamdaon, oli luksave se God nao i mekem samting ya. Nao olgeta oli singaot bigwan se: ‘!Jehova nomo, hem i God!’ (1 King 18:39) Ol man Isrel oli luksave klia nomo se hemia paoa blong God.

9. ?Olsem wanem yumi luk paoa blong Jehova tede?

⁹ Yumi tokbaot finis ol stori we oli save givhan long yumi blong yumi kasemsave se i minim wanem blong “luk God” no blong luksave paoa blong God. Tede yumi luksave paoa blong Jehova taem yumi savegud hem mo yumi luk ol fasin blong hem. (Efesas 1:18) Hemia i pusum yumi blong folem fasin blong ol gudfala man blong God bifo mo tede, we oli luksave se God i stap givhan long ol man blong hem. ?Be i gat pruf we i soemaot se God i stap givhan long ol man blong hem tede?

OL PRUF WE OLI SOEMAOT PAOA BLONG GOD TEDE

10. ?Wanem i soemaot se God i stap givhan long ol man blong hem tede? (Yu luk pija long stat blong stadi.)

¹⁰ Yumi gat plante pruf we oli soemaot se Jehova i stap givhan long ol man blong hem tede. Plante taem yumi harem ol stori blong ol man we oli prea long God blong i givhan long olgeta mo God i ansarem prea blong olgeta. (Ol Sam 53:2) Eksampol, taem Allan i stap prij long wan smol aelan blong Filipin, hem i mitim wan woman mo woman ya i krae. Allan i talem se: “Long moning ya, woman ya i prea mo i askem long Jehova blong hem i sanem ol Witnes blong hem blong oli kam luk hem.” Taem woman ya i yangfala, hem i stadi wetem ol Witnes, be taem hem i mared mo i muv i go long aelan ya, hem i no moa gohed blong stadi. God i ansarem prea blong hem kwiktaem nomo mo samting ya i tajem hat blong hem. Long wan yia nomo, hem i tekem baptaes.

11, 12. (1) ?Jehova i stap givhan long ol man blong hem olsem wanem? (2) Yu tokbaot olsem wanem Jehova i givhan long wan sista.

¹¹ Plante man we bifo oli stap mekem ol rabis fasin, oli luk we Jehova i givhan long olgeta blong lego ol fasin ya. Bifo oli smok, oli tekem drag no oli wajem ol rabis pija blong man wetem woman. Samfala oli traem blong lego ol rabis fasin ya, be oli no save lego. Be taem oli askem long Jehova blong i givhan long olgeta, hem i givim “paoa ya we i bigwan tumas” long olgeta, nao oli naf blong lego ol rabis fasin ya.—2 Korin 4:7; Ol Sam 37:23, 24.

¹² Jehova i givhan tu long ol man blong hem blong oli winim ol problem blong olgeta wanwan. Hemia nao samting we i hapen long sista Amy. Hem i givhan blong bildim wan Haos Kingdom mo wan haos blong misinari long wan smol aelan blong Pasifik. Hem i talem se, fasin blong laef long aelan ya i defren. Hem i laef long wan smol rum we plante taem i no gat laet mo wota, oltaem i gat bigfala ren, mo hem i harem nogud from we hem i no stap wetem ol famle blong hem. Wan dei, hem i singaot strong long wan sista we i wok wetem hem. Amy i harem nogud tumas long samting we hem i mekem long sista ya. Taem hem i gobak long haos i no gat laet. Long taem ya, hem i prea long Jehova blong i givhan long hem. Biaen taem laet i kambak, hem i ridim wan haf long Wajtaoa we i tokbaot skul blong Gilead. Haf ya i tokbaot ol problem we i sem mak long ol problem blong hem. Hem i talem se: “Mi harem se Jehova i stap toktok long mi long naet ya. Samting ya leftemap tingting blong mi blong mi gohed blong mekem wok blong mi.”—Ol Sam 44:25, 26; Aesea 41:10, 13.

13. ?Wanem i soemaot se Jehova i givhan long ol man blong hem blong oli prij?

¹³ Jehova i givhan long ol man blong hem blong oli fri blong talemaot gud nius we man i no save blokem olgeta. (Filipae 1:7) Eksampol, taem sam gavman oli traem blong blokem wok blong prij, yumi tekem kes ya i go long kot. Long fulwol, yumi winim bitim 268 kes long hae kot, mo long ol kot kes ya, i gat 24 long olgeta we yumi winim long Kot Blong Yurop We i Lukaot Long Raet Blong Ol Man, stat long yia 2000. !Hemia i soemaot klia se i no gat man i save winim paoa blong Jehova!—Aesea 54:17; ridim Aesea 59:1.

14. ?Wanem narafala pruf we i soemaot se God i stap wetem ol man blong hem?

¹⁴ Wok blong prij long fulwol i wan narafala pruf we i soemaot se God i stap yusum paoa blong hem blong givhan long ol man blong hem. (Matiu 24:14;Ol Wok 1:8) Mo tu, Jehova nomo i stap mekem ol man blong hem long olgeta kantri long wol blong oli joen gud. !Fasin ya we yumi stap joen gud wanples, i makemaot yumi se yumi defren long ol narafala man! Ol man we oli no wosipim Jehova tu oli luksave mo oli talem se: “Tru, God i stap long medel blong yufala long ples ya.” (1 Korin 14:25) Yumi gat plante pruf we oli soemaot se God i stap wetem ol man blong hem. (Ridim Aesea 66:14.) ?Be olsem wanem long yu? ?Yu yu luk se Jehova i stap givhan long yu?

?YU YU LUK PAOA BLONG JEHOVA LONG LAEF BLONG YU?

15. ?From wanem samtaem, yumi no luksave se Jehova i stap givhan long yumi?

¹⁵ Samtaem, maet yumi no luksave se God i stap givhan long yumi. ?From wanem? From we yumi kasem plante trabol. Taswe, maet yumi save fogetem se Jehova i givhan long yumi bifo blong winim ol trabol. Hemia nao samting we i hapen long Elaeja. Hem i wan man we i no fraet, be taem Kwin Jesebel i wantem kilim hem i ded, hem i fraet tumas. Long taem ya, hem i fogetem ol samting we Jehova i mekem long hem bifo blong givhan long hem. Baebol i talem se Elaeja i wantem ded nomo. (1 King 19:1-4) ?Bambae hu i givhan long hem blong hem i no fraet? !Hem i mas askem long Jehova nomo blong i givhan long hem!—1 King 19:14-18.

16. ?Olsem wanem yumi luksave se God i stap givhan long yumi taem yumi kasem trabol?

¹⁶ Job i lukluk ol trabol blong hem nomo, mekem se hem i no luksave samting we Jehova i stap mekem blong givhan long hem. (Job 42:3-6) Samtaem, yumi tu yumi no luksave se God i stap givhan long yumi from ol trabol we yumi kasem. ?Wanem i save givhan long yumi blong luksave samting we God i mekem long yumi? Yumi mas tingting dip long samting we Baebol i talem long ol trabol blong yumi. Biaen, taem yumi luk olsem wanem Jehova i stap givhan long yumi, bambae yumi save se hem i stap wetem yumi oltaem, mo bambae yumi save talem se: “Fastaem, ol narafala man nomo oli stap tokbaot yu long mi, be naoia, mi mi luk yu stret long ae blong mi.”

17, 18. (1) ?Olsem wanem yu luksave se Jehova i stap givhan long yu? (2) Yu tokbaot wan stori we i soemaot se God i stap givhan long yumi tede.

¹⁷ ?Olsem wanem yu luksave se Jehova i stap givhan long yu? Bambae yumi tokbaot faef eksampol. Faswan, maet yu harem se Jehova nao i givhan long yu blong yu faenem trutok. Nambatu, maet yu tingbaot wan taem we yu go long wan miting, mo yu harem gud long wan tok we i kamaot mo yu talem se, “!Man, tok ya i stret long mi wantaem!” Nambatri, hemia taem yu luk we Jehova i ansarem prea blong yu. Namba fo, hemia taem Jehova i givhan long yu blong kasem ol mak we yu wantem kasem long wok blong hem. Mo namba faef, hemia taem yu lego wok blong yu blong mekem moa long wok blong God. Mo biaen yu luk we hem i givhan long yu olsem we hem i promes se: “Bambae mi mi no save lego yu samtaem.” (Hibrus 13:5) Taem yumi fren gud wetem Jehova, bambae yumi luksave klia nomo se hem i stap givhan long yumi.

¹⁸ Wan sista blong Kenya, we nem blong hem Sarah i talem se: “Mi prea long Jehova from wan Baebol stadi blong mi we i no intres long stadi blong hem. Mi askem long Jehova sipos mi save stopem stadi blong mitufala. Taem mi talem ‘Amen,’ wantaem nomo mobaelfon blong mi i ring. ?Yu save wanem? !Baebol stadi blong mi i wantem kam long miting! !Mi mi sek taem mi harem!” Taem yumi luk samting we God i stap mekem long yumi, bambae yumi luksave se hem i stap givhan long yumi. Wan sista we i laef long Esia, we nem blong hem Rhonna i talem se i tekem taem blong yumi luksave samting we Jehova i stap mekem blong givhan long yumi. Hem i gohed i se: “!Taem yu mekem olsem, bambae yu harem gud tumas blong save se Jehova i tinghae long yumi!”

19. ?Wanem narafala samting we yumi mas mekem blong yumi save luk God?

¹⁹ Jisas i talem se: “Olgeta we tingting blong olgeta i klin gud, oli save harem gud, from we bambae oli save luk God.” (Matiu 5:8) Mo tu yumi no moa mekem ol nogud fasin. (Ridim 2 Korin 4:2.) Long stadi ya, yumi lanem se blong luk God, yumi mas gohed blong fren gud wetem hem. Long nekis stadi, bambae yumi tokbaot olsem wanem bilif i save givhan long yumi blong luksave klia paoa blong Jehova long laef blong yumi.