Holem Sam Taem Blong Joen Long Wok Blong Seremaot Magasin
1 Jeova i bin makem finis se bambae i gat ‘pis, wan fyuja mo wan hop’ blong olgeta we oli stap folem ol rod blong hem. (Jer. 29:11) Save long saed blong hop ya i stap kamaot long tufala magasin ya Wajtaoa mo Wekap! long stret taem we yumi nidim. Ol magasin ya oli save givhan long ol samting we i hapen long laef blong olgeta. (1 Tim. 2:4) ?Yu mo famle blong yu, yufala i holem sam taem evritaem blong joen long wok blong seremaot magasin?
2 ?Sipos namba blong magasin we yufala i seremaot i go daon, olsem wanem blong stretem samting ya? Wan samting we yu mas gat, mas holemtaet fasin tangkyu blong yu long ol samting we oli stap insaed long ol magasin blong yumi. Wan man i raetem se: “Taem mi ridim magasin blong yufala, samting ya i mekem mi mi glad tru. Oli no olsem magasin ‘mekem man i haremgud’ we oli olbaot nomo mo we oli no naf blong kasem mak blong wan gudfala magasin, be oli talem sam advaes blong soem rod olsem wanem blong mekem laef i gat mining.” Wajtaoa mo Wekap! oli frut blong wan dip stadi mo oli ol samting we “slef we i stret mo waes” i givim. (Mat. 24:45) Oli ol gudfala tul blong kasem hat blong ol man.
3 I gud blong yu savegud ol haf insaed long magasin we yu stap seremaot. Lukaot sam poen we oli tokbaot ol trabol we oli stap long komuniti blong yu. I gud blong mekem rere blong toktok wetem ol man, ol woman, mo ol yangfala we maet yu save faenem olgeta long haos no long rod. Yu mas rere blong soem olsem wanem ol magasin oli stret long wanwan man mo olgeta long famle.
4 Tingbaot Oltaem Blong Seremaot Ol Magasin: Wok blong seremaot magasin i mas gat bigfala ples long program blong yu blong prij. ?Wanem ol taem we oli gudwan blong seremaot magasin? ?Yu traem finis blong prij long ol haos wanwan long wan no moa haoa long aftenun no long sapa bifo Buk Stadi blong yu long kongregesen? Wok blong prij long sapa i karem gudfala frut long sam ples. Sarede i wan gudfala dei blong yusum defren fasin blong seremaot magasin, be ol narafala dei oli gud tu blong mekem wok ya. Wok blong prij long ol haos wanwan mo long ol stoa wanwan i mas kam samting we yumi mekem oltaem long dei blong seremaot magasin.
5 Wanwan long yumi i mas gat wan stret oda long namba blong ol wanwan magasin we oli kamaot. Taem we yu gat ol olfala magasin wetem yu, yu save yusum blong soem long man blong haos ol defren poen we ol magasin oli stap tokbaot. Sam samtaem yumi save livim ol olfala kopi tu long ol spesel haos blong ol man we oli ritaea finis long wok. Yumi save kaontem ol magasin ya taem yumi seremaot olgeta mo makem olgeta long Pepa Blong Ripot blong yumi evri manis.
6 Taem yu folem ol advaes ya antap, namba blong ol magasin we yu seremaot bambae i kam antap. Ol man we hat blong olgeta i stret we oli harem nogud long laef blong rabis wol ya, oli glad blong kasem ol gudfala tok we oli stap long Wajtaoa mo Wekap! Ol magasin ya oli rili givim ol kakae blong speret we olgeta we oli stap traehad blong kasem glad hat blong Jeova, oli nidim. Taswe, yu mas tingbaot oltaem blong seremaot ol magasin, mo lukaot sam rod blong mekem fasin blong yu blong seremaot ol impoten magasin ya long teritori blong yu i kam antap.