Presem Jeova Evri Dei
1 Jeova, God blong yumi we i Wokem olgeta samting, i nambawan mo i fulap long lav. Hem i Stampa blong laef mo glad. From we hem i hae olgeta, i stret nomo se olgeta samting we hem i wokem oli mas presem hem. Yumi wanwan i wantem talem olsem man blong raetem Sam ya, se: “Oltaem bambae mi mi stap presem yu moa. Bambae mi stap tokbaot ol stret fasin blong yu. Oltaem bambae mi stap talemaot paoa blong yu blong sevem man, i stat long moning gogo kasem long sapa.” (Sam 71:14, 15) Blong mekem samting ya, yumi mas lukaotem ol rod blong presem Jeova evri dei. Mo yumi mas wantem blong presem hem, stret fasin blong hem, mo ol rod we hem i stanemap blong sevem yumi.
2 Ol faswan Kristin oli soem nambawan eksampel blong presem Jeova. Ol Wok 2:46, 47 i tokbaot ol 3000 man we oli tekem baptaes long Pentekos, i se: “Evri dei, olgeta ya oli stap joen olsem wan kampani, insaed long haos blong God. . . . oli stap presem God, mo ol man tu oli stap ona long olgeta. Mo evri dei, Hae God i stap sevem sam moa man, i stap joenem olgeta long kampani ya blong ol aposol.” Oli lanem ol nambawan trutok long saed blong Jeova mo Mesaea we Hem i jusum. Glad blong olgeta i kasem ol narafala tu, i pulum olgeta blong lesin mo blong lanem blong presem Jeova.
3 Yumi Gat Jans Evri Dei: Plante oli luk se oli save presem Jeova evri dei taem oli tekem evri jans blong prij. Fasin blong mekem wan gudfala plan fastaem, i givhan long olgeta blong karem moa frut. Wan sista i mekemap tingting blong hem blong tekem evri jans blong prij. Ale, afta we wan stilman i brekem tufala windo long trak blong hem, hem i telefon i go blong askem wan kampani blong fiksimap trak ya. Nao hem i mekemrere ol toktok blong hem, blong prij long man ya we bambae i mekem wok ya. Taem hem i stap mekemrere, hem i prea long Jeova tu blong hem i lidim hem. Risal blong samting ya se, hem i givim wetnes long wokman ya blong wan haoa, mo i livim Laef Foreva buk wetem hem.
4 Wan narafala sista tu, oltaem i stap mitim woman we i stap kolosap long hem, taem tufala i stap wokbaot wetem ol dog blong tufala. Wan taem, tufala i storeyan gud long saed blong ol problem blong laef, mo samting ya i lidim tufala blong storeyan bakegen long narafala taem. Biaen, sista ya i statem wan Baebol stadi wetem woman ya. I gud blong makem samting we woman ya i talem biaen se, sipos ol Wetnes blong Jeova oli bin kam kilim doa blong hem, hem i no save lesin long olgeta, from we hem i no bilif long God no long Baebol.
5 Samfala oli luk se oli save givim wetnes, taem ol man blong salem ol samting no ol narafala man oli kam long haos blong olgeta. Long Aerlan, wan man blong salem laef insurens i kam long haos blong wan sista. Sista ya i eksplenem se hem i stap tingbaot wan gudfala fyuja we bambae hem i save stap laef blong olwe. Man ya we i gruap long skul Katolik, i no bin harem tingting ya bifo. Hem i karem Laef Foreva buk, i kam long miting long nekis wik blong hem, mo i agri blong stadi Baebol. Naoia, man ya we i salem laef insurens i wan Kristin brata blong yumi we i baptaes finis.
6 Yumi evriwan i mas lukaotem ol jans blong presem Jeova evri dei. I gud blong livim sam magasin no traket i stap long wan ples we ol man oli save luk olgeta, mo we i isi blong soem olgeta long ol man we oli kam visitim yumi. Long sam eria, sipos yu sidaon smoltaem long wan jea long pablik ples, maet yu save gat plante jans blong givim wetnes long olgeta we oli kam sidaon blong spel smoltaem. Long skul, sam yangfala Wetnes oli bin livim ol buk we oli tokbaot Baebol oli stap long tebel blong olgeta. Long rod ya, oli save statem wan storeyan wetem ol yangfala we oli luk ol buk ya mo oli askem kwestin. Tingbaot wan no tu vas blong Baebol we yu save yusum. Askem Jeova blong givhan long yu. Bambae yu kasem blesing from.—1 Jon 5:14.