Ansa Long Wan Kwestin
◼ ?Wanem stret rod blong yusum tok ya “brata” mo “sista”?
Taem yumi yusum ol tok ya “brata” mo “sista” long prapa famle blong yumi, i minim olgeta we oli gat sem papa mo mama. From we oli blong sem famle, oli laeklaekem olgeta. Mo fasin joen blong olgeta i kolosap moa from we oli gat ol semfala fren, oli gruap long sem ples, mo oli gat strong filing bitwin long olgeta.
Jisas i tijim ol disaepol blong hem blong yusum tok ya “Papa blong Yumi” taem oli prea long Jeova. Samting ya i soem se yumi ol Kristin, yumi blong wan famle we i joengud, we yumi evriwan i haremgud long nambawan fasin fren long saed blong speret. Jisas i makem samting ya bakegen, taem hem i talem long ol man blong hem se “yufala evriwan i brata.”—Mat. 6:9; 23:8.
From we yumi joengud long famle blong God long saed blong speret, yumi singaot ol narafala long miting blong kongregesen se “Brata” mo “Sista.” Long ol miting ya long saed blong speret, brata we i lidim miting i singaot olgeta we oli baptaes finis wetem tok ya “brata” mo “sista,” mo biaen hem i talem famle nem blong man no woman ya.
?Olsem wanem sipos wan we i no baptaes yet i wantem ansa long miting? Sipos wan man i bin kam long ol miting blong ol man blong Jeova blong longtaem, mo hem i rere blong givim laef blong hem i go long Jeova, mo hem i tingbaot hem wan olsem wan Wetnes blong Jeova, i no rong blong singaot hem se “Brata” no “Sista” wetem famle nem blong hem biaen. Samting ya i tru moa sipos hem i wan pablisa we i no baptaes yet.
Be, long saed blong olgeta we oli jes stat blong kam long ol miting i no longtaem, oli no mekem wan samting yet blong soem se oli wantem kam insaed long famle blong God. Taswe, yumi no save singaot olgeta se “Brata” no “Sista,” from we oli no stap yet insaed long famle blong God long saed blong speret. From samting ya, long ol miting, bambae yumi singaot olgeta olsem Masta no Misis wetem famle nem blong olgeta biaen.
Taem yumi yusum tok ya “brata” mo “sista” long ol miting blong kongregesen, yumi soem se yumi gat wan fasin fren we i kolosap moa mo i strong moa, bitim fasin fren we yumi gat wetem ol man taem yumi yusum faswan nem blong olgeta nomo. Samting ya i mekem yumi tingbaot nambawan blesing we yumi gat blong stap olsem wan famle long saed blong speret, aninit long wan Papa, Jeova God. Mo tu, samting ya i pulum yumi blong tingbaot bigfala lav mo filing we yumi gat long ol narafala long kongregesen.—Efes. 2:19; 1 Pita 3:8.