!Ol Man Oli Mas “Bilif Fulwan Long Tok Blong God”!
1 Plante milyan man oli stap stadi Baebol wetem ol Witnes blong Jeova. Blong kasem laef we i no save finis, oli mas ‘bilif fulwan long tok blong God,’ olsem ol tri taosen man ya we oli tanem tingting blong olgeta from sin blong olgeta mo oli tekem baptaes long dei blong Pentekos long yia 33 K.T. (Wok 2:41) From samting ya, ?wanem bigfala wok we yumi mas mekem tede?
2 Yumi mas halpem ol Baebol studen blong yumi blong fasgud long Jeova. (1 Tim. 4:7-10) Pepa we i stap insaed long Kingdom Wok blong Jun 1996, paragraf 20, i halpem yumi long saed ya, i se: “Taem yu stap mekem stadi wetem hem, lukaot ol jans blong halpem hem blong gat fasin tangkiu from ol gudfala fasin blong Jeova. Tokbaot ol dip filing blong yu long saed blong God. Halpem hem blong rili laekem mo frengud wetem Jeova.”
3 Wan Traem We Yumi Mas Fesem: From ol tijing blong giaman skul, plante man tede oli glad long wosip blong olgeta from we oli no nidim blong tektaem mo traehad blong jenisim ol fasin blong laef blong olgeta. (2 Tim. 3:5) Traem ya we yumi mas fesem, hemia blong halpem ol Baebol studen blong kasem save se, trufala wosip i no minim we man i lesin nomo long tok blong God. Be, oli mas mekem ol samting ya we oli lanem, i wok long laef blong olgeta. (Jem. 1:22-25) Ol Baebol studen oli mas luksave se, sipos i gat wan fasin long laef blong olgeta we i no stret long ae blong Jeova, oli mas “tanem tingting” blong olgeta mo mekem wanem we God i glad long hem. (Wok 3:19) Blong kasem laef we i no save finis, oli mas “traehad” mo oli mas tekem disisen blong stanap strong long saed blong trutok.—Luk 13:24, 25.
4 Taem yumi tokbaot ol defdefren haf blong fasin klin, askem long Baebol studen wanem tingting blong hem long saed blong ol nogud fasin. Sipos hem i luksave se i gat wan fasin we hem i mas jenisim long laef blong hem, askem long hem wanem we hem i ting se i gud blong mekem. Givhan long hem blong savegud ogenaesesen ya we i stap tijim trutok long hem, mo leftemap tingting blong hem blong kam oltaem long ol miting blong kongregesen.—Hib. 10:25.
5 Mak blong yumi hemia blong kasem hat blong Baebol studen blong yumi tru long save we yumi tijim long hem. !Bambae yumi glad taem yumi halpem ol niuwan blong bilif fulwan long tok blong God mo tekem baptaes!—1 Tes. 2:13.