Kam Moagud Long Fasin Blong Tij—Kasem Hat Blong Studen
1 Jisas i tijim ol man long fasin we hem i kasem hat blong olgeta. Taem hem i eksplenem pijatok ya blong man we i sakem sid, hem i soem se olgeta ya nomo we oli ‘save mining blong tok blong hem,’ bambae oli wantem mekem i wok. (Ridim Matyu 13:18, 23, 51, 52.) Taswe, taem yumi stap tij, yumi mas tingbaot oltaem blong traem kasem hat blong studen. Yumi wantem givhan long hem blong gat tangkyu long Jeova, Pikinini blong hem, mo Kristin ogenaesesen. Yumi mas folem fasin blong Jisas blong tij. Samting ya i min se, long ol Baebol stadi, yumi mas tekem taem blong halpem ol studen blong tingting dip long ol poen.
2 Tijing blong aposol Pita i kasem hat blong ol 3,000 man we oli tekem baptaes long dei blong Pentekos, 33 K.T. Hem i halpem olgeta blong tingting dip long profet tok blong Baebol, long saed blong ded mo laef bakegen blong Jisas. Olsem nao, oli save gat fasin tangkyu long wok we Jeova mo Jisas Kraes tufala i mekem long dei ya. (Wok 2:1-36) Baebol i talem se olgeta we oli bilif, oli harem se ol tok ya ‘i stikim hat blong olgeta.’ Nao oli ‘bilif wetem ful hat blong olgeta.’ (Wok 2:37, 41) Tede, ?olsem wanem yumi save tij long fasin we i kasem hat blong ol man, mo i halpem olgeta blong gat semkaen lav long trutok, olsem ol man ya long taem bifo oli gat?
3 Tekem taem blong kasem hat: Olgeta we yumi stadi Baebol wetem olgeta, oli mas go moa, bitim we oli kasem plante save blong Baebol mo long ol samting we i stap hapen long wol. Oli mas gat wan filing long ol samting we oli stap lanem. Yumi mas mekem olgeta oli tingting dip long ol samting we oli stap lanem. (Wok 17:2, 3) Yumi mas halpem olgeta blong kasem save long ol fasin blong Jeova mo Jisas, mo long ol samting we tufala i bin mekem blong yumi. Oli nidim blong luksave olsem wanem Jeova i bin soem lav, longfala tingting mo fasin sore long ol man, long olgeta samting we hem i mekem. Oli mas kasem save mo gat respek long paoa blong hem, mo agri long ol stret rul blong hem. Oli mas luksave olsem wanem sakrifaes blong Jisas i impoten tumas, mo from wanem rod we hem i folem i waes. Long fasin ya, olgeta wanwan oli save wokem wan fasin fren wetem Jeova mo Jisas, we i joen wetem strong filing blong lav.
4 Tufala buk ya, Laef Foreva mo Joen Tugeta Long Yuniti, oli blong halpem yumi blong kasem hat blong ol studen blong yumi, mo blong wokem fasin tangkyu long hat blong olgeta. Traem luk Laef Foreva buk, pej 10, haf 9 mo 10. Tufala haf ya oli halpem studen blong tingting dip long poen ya se, wan God we i gat lav, i no save wokem ol man wetem tingting we oli wantem laef blong olwe, sipos oli no gat rod blong kasem samting ya. Long plante ples long japta 4 blong Laef Foreva buk, i gat ol poen we oli save givhan blong wokem fasin tangkyu long hat blong ol man. Makemgud ol poen long haf 5, 12, mo 13.
5 Long olgeta haf blong buk ya Joen Tugeta Long Yuniti, yumi faenem ol kwestin we oli go stret long hat blong studen. Sam nambawan eksampel oli stap long pej 32 mo 33. Ol kwestin ya oli mekem se studen i tingting dip mo i skelemgud tingting we i stap pusum hem. Oli halpem hem blong tingbaot filing we hem i gat long Jeova, Jisas, mo ogenaesesen blong God. Sloslou, bambae hem i luksave wanem rod we hem i mas folem blong mekem Jeova i glad mo kasem blesing blong hem.
6 Reregud: Taswe, taem yumi mekem ol Baebol stadi wetem ol narafala man, yumi mas reregud fastaem. Mo biaen, yumi mas tekem naf taem blong mekem ol studen blong yumi oli tingtinggud long ol poen blong stadi. Long rod ya, bambae yumi wokem long hat blong olgeta, wan dip filing blong lav long Jeova, Jisas mo ogenaesesen blong God. Sipos yumi kasem hat blong ol studen blong yumi, samting ya bambae i pusum olgeta blong folem sem rod we ol 3,000 man oli folem long dei blong Pentekos, 33 K.T., taem oli tekem baptaes. (Wok 2:41-46) Bambae samting ya i halpem olgeta blong stanap strong agensem paoa blong Setan, mo ol rod we hem i yusum blong traem lidim olgeta oli go krangke.—Mat. 7:24-27.