Oli Save Luk We Yumi Defren
1 Las yia, moa long 300,000 niufala man mo woman oli tekem baptaes blong joen long yumi. ?Wanem samting long laef blong ol Witnes blong Jeova, i pulum olgeta ya blong joen long ogenaesesen blong God? ?From wanem yumi defren long olgeta narafala skul? Hemia sam ansa we oli klia nomo:
—Yumi no folem tingting blong man, yumi folem Baebol nomo: Yumi wosipim Jeova God “wetem spirit mo trutok,” stret olsem Jisas Kraes i talem blong mekem. Samting ya i minim se yumi sakemaot finis ol tijing blong giaman skul mo yumi folem Tok blong God long laef blong yumi.—Jon 4:23, 24; 2 Tim. 3:15-17.
—Yumi no wet se ol man oli kam long yumi, be yumi go luk olgeta: Yumi obei long Kraes we i givim oda blong prij mo blong tijim man, mo yumi folem eksampel blong hem blong lukaot ol man we hat blong olgeta i stret. Yumi traem faenem ol man ya long haos blong olgeta, long rod, no long eni ples we oli stap.—Mat. 9:35; 10:11; 28:19, 20; Wok 10:42.
—Yumi givimaot ol tijing blong Baebol i fri nomo, long evri man: Yumi yusum mane mo paoa blong yumi blong spenem moa long wan bilyan aoa evri yia long wok blong God, nating se yumi no kasem pei from. Yumi mekem i sem mak nomo long olgeta man taem yumi stadi Baebol wetem eni kaen man.—Mat. 10:8; Wok 10:34, 35; Rev. 22:17.
—Yumi kasem wan gudfala trening blong halpem ol man long saed blong spirit: Yumi kasem ol nambawan tiokratik tijing evri taem we yumi stadi Baebol yumi wan, lesin long ol tok long ol miting blong kongregesen, mo kam long ol asembli. Olgeta samting ya oli halpem yumi blong karem laet blong trutok i go long ol narafala.—Aes. 54:13; 2 Tim. 2:15; 1 Pita 3:15.
—Yumi tinghae long trutok, mo yumi folem Baebol long laef blong yumi evridei: Yumi jenisim ol fasin blong yumi from we yumi laekem God, mo yumi mekem laef blong yumi i laenap wetem wil blong hem. Yumi folem ol fasin blong Kraes long laef blong yumi, mo samting ya i pulum ol narafala blong kam long trutok.—Kol. 3:9, 10; Jem. 1:22, 25; 1 Jon 5:3.
—Yumi traehad blong laef mo wok long pis wetem ol narafala: Yumi mas wokem ol fasin we God i glad long hem. Samting ya bambae i givhan long yumi blong bos long ol tok mo fasin blong yumi. Yumi “lukaot pis, mo yumi traehad blong kasem pis” wetem olgeta man.—1 Pita 3:10, 11; Efes. 4:1-3.
2 Plante man oli luk ol gudfala Kristin fasin we i stap long ogenaesesen blong Jeova, mo samting ya i pulum olgeta blong kam long trutok. I gud sipos eksampel blong yumi wanwan tu, i pulum olgeta ya we oli save yumi mo we oli stap wajem yumi.