?Yu Yu Gat Fasin Tangkiu From Lav Blong Kraes?
1 Aposol Jon i tingtingbak long laef blong Masta blong hem long wol ya, nao i raetem se: “Oltaem [Jisas] i stap lavem ol man blong hem, we olgeta oli stap long wol ya, mo hem i stap lavem olgeta olwe, gogo hem i givim laef blong hem from olgeta.” (Jon 13:1) Long manis ya, we i taem blong Memoriol, tingting blong yumi i stap long wan bigfala samting we i soemaot lav blong Kraes. Yumi save soem fasin tangkiu from lav ya taem yumi soem bilif long ransom, wok strong long wok blong prij, mo stanap strong, olsem Jisas, “go kasem en.”—Mat. 24:13, NW; 28:19, 20; Jon 3:16.
2 Soem Tangkiu From Lav Blong Kraes: Jisas i rili wok strong long laswan wik blong hem long wol ya. (Mat. 21:23; 23:1; 24:3) Yumi we i stap folem eksampel blong Kraes, lav we yumi gat i pusum yumi blong ‘traehad moa’ long wok blong Jeova. (Luk 13:24) Long manis Epril bambae i gat ol defren program long saed blong wok blong givim witnes. ?Yu yu save yusum gud ol program ya blong spenem moa taem long wok blong prij?
3 Long yia ya, Lodsapa i foldaon stret long Wenesde naet, Epril 19. ?Hamas man bambae oli joen long impoten taem ya? Ating hemia i dipen bigwan long yumi wanwan. ?Yu yu mekem lis finis blong olgeta man we yu plan blong singaot olgeta i kam—ol Baebol stadi mo narafala man we oli soem intres, ol famle, ol fren long wok mo long skul? ?Yu toktok wetem olgeta finis blong singaot olgeta oli kam long miting ya? ?Yu gat tingting blong luk olgeta bakegen bifo long Memoriol blong mekem olgeta oli tingbaot blong kam? ?Bambae oli nidim transpot blong go long miting ya? Ol elda bambae oli singaot olgeta we oli no moa joen long wok blong prij, blong olgeta tu oli kam long miting ya. Nating se Memoriol bambae i stap long wan dei blong wik, mo i no long wiken, samting ya i no minim se hem i no impoten, mo se bambae i no gat plante man oli save joen long hem.
4 Kam We Yu Reregud: I impoten tumas we yu reregud mo gat stret tingting taem yu kam long Memoriol. Pol i pulum ol Kristin brata blong hem blong tinghae long lafet ya. (1 Kor. 11:20-26) I gud sipos yu ridim japta 13 kasem 17 blong Gospel blong Jon. Maet yu save mekem olsem, long taem we yu mekem famle stadi blong yu. Ale, maet yu askem wanwan memba blong famle blong talem mining we sakrefaes blong Jisas i gat long olgeta. !Mo tu, no fogetem Baebol riding we yumi mas mekem evri dei long wik blong Memoriol!
5 Lav we yumi gat long Kraes i bigwan tumas, mo i mas stap oltaem, nating se Epril 19 i pas. !Yumi gat strong tingting blong soem se yumi lavem hem gogo i no save finis! Lafet blong Memoriol blong yia ya bambae i halpem yumi blong mekem tingting blong yumi i kam strong moa blong lavem Kraes.