Wan Blesing We i Stap Long Olgeta Yangfala
1 Plante long olgeta we naoia oli papa mama, oli glad taem oli tingbaot blesing we oli kasem, taem oli pikinini yet we oli stap gruap long trutok. Hemia long Dei Blong Seremaot Magasin. Oli statem Wok ya long olgeta kongregesen long 1949. Wan dei long wik long taon, long ol haos wanwan, ol stoa wanwan, mo long ol narafala rod, evriwan oli mas tingbaot blong seremaot Wajtaoa mo Wekap! Ol yangfala pablisa oli wet blong joen long wok ya from we, hemia i givim jans long olgeta blong mekem semfala wok olsem olgeta we oli bigwan insaed long kongregesen. ?Samting ya i tru long saed blong yu taem yu wan pikinini yet?
2 Mekem Ol Pikinini Blong Yu Oli Joen: Ol smol pikinini we oli moa yang we oli no rere blong statem wan storian long Baebol long wan haos, oli save seremaot wan magasin yet. Blong oli mekem olsem, oli mas lanem wan sot toktok we isi nomo blong oli talem long fored blong man. Maet oli save talem wan sot toktok we i stap long fored blong magasin, hem i naf. Plante man long haos oli rere blong akseptem ol magasin ya long ol yangfala blong yumi. Samtaem oli talem ol gudfala toktok long saed blong kaen fasin mo gudfala fasin blong ol yangfala ya. Wok ya i wan samting we ol pikinini oli save mekem gud, wetem smol help we oli kasem. Long rod ya oli stap mekem wan impoten haf long wok blong seremaot mesej blong Kingdom. I tru se taem ol pikinini oli gru i kam bigwan, ol papa mama blong olgeta bambae oli wantem halpem olgeta blong gohed mo wokem fasin blong olgeta blong prij i kam moa gud.
3 Manuel i stat blong prij long ol haos wanwan taem hem i gat tri yia. Papa mama blong hem i tijim hem blong tingbaot wan sot toktok we hem i save talem long wan man. Hem i wok strong blong prij wetem papa mama blong hem, mo hem i serem plante magasin, ol buklet, mo ol traket. Mo tu, hem i stap tekem olgeta jans we hem i gat blong prij. Wan taem papa mama blong hem oli tekem hem i go long wan ples blong spel, wan tingting i pusum hem blong tekem jans ya, blong givim traket long sam narafala man we oli stap long ples ya. Nating se hem i yang, glad we Manuel i gat long wok blong prij i leftemap tingting blong papa mama blong hem, mo ful kongregesen.—Prov. 22:6.
4 Long 2000 Calendar of Jehovah’s Witnesses oli jusumaot Sarede olsem wan “Dei Blong Seraotem Magasin”. Ol papa mama, mifala i wantem we yufala i mekem intres blong yufala i kam strong bakegen long wok ya. Halpem ol pikinini blong yufala blong joen oltaem olsem we yufala i naf blong mekem long tabu wok ya.