?Yu Yu Gat Tangkiu From Longfala Tingting Blong Jeova?
1 Sipos 10, 20, no moa yia bifo, Jeova i no bin gat longfala tingting blong letem wok blong prij i gohed, ?yu ting se bambae yu lanem trutok? Yumi glad tumas se hem i letem plante moa man “oli tanem tingting blong olgeta.” Nating se i olsem, bigfala dei blong Jeova blong jajem olgeta man “bambae i kam olsem we man blong stil i kam.” (2 Pita 3:9, 10) Taswe, yumi no mas tingbaot longfala tingting blong God se hem i from we God i stap seftem taem blong finisim wol blong naoia.—Hab. 2:3.
2 Soem Sore Long Ol Man: Yumi no naf blong kasem save fulwan long longfala tingting blong Jeova. Yumi no mas fogetem stamba risen blong longfala tingting ya. (Jona 4:1-4, 11) Jeova i luk se laef blong ol man i nogud mo hem i sore long olgeta. Jisas i gat sem kaen filing. Hem i sore long bigfala hip man we hem i prij long olgeta, hem i wantem se wok blong prij i go moa blong mekem se moa man oli save gat jans blong kasem laef we i no save finis.—Mat. 9:35-38.
3 Taem ded mo ol disasta oli hapen, hat blong yumi i sore from ol man we oli no save trutok. Ol man tede oli olsem “ol sipsip we i no gat man blong lukaot long olgeta.” Oli traehad blong laef wetem ol trabol blong olgeta mo oli traem kasem save from wanem i gat tumas trabol long wol ya. (Mak 6:34) Taem yumi wok strong blong talemaot gud nius, yumi mekem olgeta we i stret blong kasem laef oli harem gud, mo yumi soem tangkiu from longfala tingting blong Jeova.—Wok 13:48.
4 Wok Blong Yumi i Impoten: Las yia i bin gat 323,439 man we oli baptaes mo moa long 14,000,000 man oli kam long Memoriol. !Plante moa man oli gat jans yet blong ronwe long rabis wol ya we bambae i lus! Yumi no save se “bigfala hip blong ol man” bambae i bigwan olsem wanem. (Rev. 7:9) Yumi no save se wok blong prij we yumi mekem bambae i finis wetaem. Be Jeova i save. Wok blong talemaot gud nius bambae i gohed kasem mak we hem i glad long hem, mo “biaen, en i save kam.”—Mat. 24:14, NW.
5 Smol taem nomo i stap yet, mo dei blong God i stap kam klosap moa. (1 Kor. 7:29a; Hib. 10:37) Tingting blong yumi i no mas hafhaf. “Fastaem, taem we yumi jes bilif long Kraes, taem ya we bambae hem i sevem yumi i stap longwe lelebet long yumi. Be naoia, taem ya i stap kam klosap moa.” (Rom 13:11) Taswe yumi no mas lusum stamba risen blong longfala tingting blong God. Defren olgeta, yumi mas prij blong mekem se plante moa man we oli laekem stret fasin oli save kasem bigfala sore blong Jeova.