?Yu Yu Wan Man Blong Sem?
1 Yumi no sapraes taem yumi luk wan yangfala pikinini i haed mo pusum hed biaen long papa no mama blong hem blong lukluk yumi. Fasin blong sem hem i wan samting we yumi bon wetem taem yumi smol pikinini yet. Nating se i olsem, plante oli gat fasin blong sem, nomata we oli kam bigman finis. ?Sipos fasin blong sem i stap spolem wok blong yu blong prij, yu save mekem wanem?
2 Winim Fasin Blong Sem: Hem i impoten blong tingbaot “man we i stap haed insaed long hat.” (1 Pita 3:4, NW) Mekem lav we yu gat long Jeova mo long ol fren blong yu i kam strong moa. Yu mas bilif se taem yu obei long oda ya blong prij, hemia i wan long ol beswan rod blong soemaot lav we yu gat blong livim plante samting, blong mekem wok ya. Folem wan gudfala program blong mekem stadi blong yu wan, mo blong kam long ol miting. Prea oltaem mo askem stret help long Jeova. Strong bilif mo tras we yu gat long hem, i save bildimap tras blong yu mo bambae i mekem se yu ‘no moa fraet, mo tingting blong yu i strong moa blong talemaot tok ya blong God.’—Fil. 1:14.
3 Faet agensem ol filing ya se yu no naf. I luk olsem se Timoti i mas faet agensem ol filing olsem. Pol i leftemap tingting blong Timoti se: “Yu yu wan yang man nomo, be i nogud yu letem ol man oli luklukdaon long yu from samting ya.” Hem i mekem Timoti i tingbaot bakegen se: “Spirit ya we God i givim long yumi, hem i no blong mekem yumi fraet, nogat. Spirit ya i blong mekem yumi gat paoa.” (1 Tim. 4:12; 2 Tim. 1:7) Jeova i yusum Timoti fulwan. Taswe hem i save yusum yu tu, sipos yu gohed mo trastem Hem fulwan.—Sam 56:11.
4 Wan sista we i stap sem mo fraet fored long hasban blong hem we i stap agensem hem, i faenem se vas blong Baebol long Matiu 10:37, i givhan long hem. !Taem hem i stanap strong, wok blong prij i kam isi long hem, mo sloslou hasban blong hem, mama, mo ol brata blong hem oli akseptem trutok!
5 Fasin Blong Rere Gud Hem i Impoten: Taem yu rere gud from wok blong prij bambae tras blong yu long wok ya i save kam antap moa. Jusum wan fastok we i isi long buk ya Reasoning, no ol Kingdom Wok Blong Yumi we oli kamaot fastaem finis. Stadi gud long hem mo trenem yu wan blong talem bakegen mo bakegen. Yu nidim blong gat wan positif tingting, i bitim we yu wari blong nating. Wok klosap wetem ol narafala blong kasem paoa blong no fraet. Tingbaot oltaem se sam long ol man we bambae yu mitim long haos, oli save sem, olsem yu. Evriwan i nidim mesej blong Kingdom.
6 Sipos yu yu wan man blong sem, tingting blong yu i no mas foldaon. Taem yu stap traehad, bambae Jeova i halpem yu blong yu save kam wan gudfala man blong talemaot gud nius. Biaen bambae yu save haremgud long wok blong prij.—Prov. 10:22.