“Traehad Blong Gohed Gud Long Kristin Laef”

¹ Aposol Pol i givim advaes long Timoti se hem i mas “traehad blong gohed gud long Kristin laef” blong hem. (1 Tim. 6:​12) Pol hem wan i folem gud tok ya. Long taem we hem i kam olfala, hem i talem wetem strong tingting se hem i bin gohed gud long Kristin laef blong hem. (2 Tim. 4:​6-8) Long ol defren rod, hem i gohed long minista wok wetem strong tingting, hem i no fraet, mo hem i stanap strong longtaem. Taem yumi folem gud eksampel blong hem, bambae yumi save sua se yumi stap mekem bes blong yumi blong gohed gud long Kristin bilif.

² Yumi Nidim Blong Traehad Moa: Pol i wokhad long minista wok. (1 Kor. 15⁠:10) Taswe i gud we yumi tu, yumi wokhad, taem yumi stap traehad blong faenem ol stret man long teritori blong yumi. (Mat. 10⁠:11) Blong kasem sam long olgeta ya, i minim se yumi mas girap eli long moning blong prij long olgeta we yumi mitim long rod. I minim tu se yumi mas prij let long aftenun no taem ples i jes tudak nomo, blong mitim ol man we oli stap gobak long haos blong olgeta, afta long wok.

³ Yumi mas stretem yumi wan mo gat wan gudfala program blong stap long stret taem long miting blong prij. Eksampel, sam memba blong Betel famle long Yunaeted Stet oli mas ron 60 menet i go mo kambak blong joen long wok blong prij long ol kongregesen we oli joen wetem. Mo tu, yumi save presem sam pablisa mo famle long kongregesen blong yumi, we oli stap longwe, be oli stap long miting blong prij long stret taem. I stret we yumi folem eksampel blong olgeta ya we oli wok strong mo oli gat gudfala plan.

⁴ Yumi mas gat strong tingting blong gobak blong luk olgeta we oli soem intres. Nating se yumi seremaot sam buk wetem ol man long taon, no long rod, yumi mas tekem adres blong olgeta, no telefon namba blong olgeta. Mo biaen yumi mas visitim olgeta blong bildimap intres blong olgeta, mo yumi mas traehad blong statem Baebol stadi wetem olgeta.

⁵ Joen Oltaem Long Wok Blong Prij: Pol i gohed oltaem long wok blong prij mo i mekem gud wok ya. (Rom 15⁠:19) ?Olsem wanem long yu? ?Yu yu joen oltaem long wok blong prij? ?Yu yu joen finis long wok blong prij long manis ya? Ol brata we oli lidim ol Buk Stadi, oli intres blong luk se evriwan long grup oli joen long wok blong prij long Ogis. Bambae oli halpem yu blong mekem olsem.

⁶ Taem yumi folem gud eksampel blong Pol, we hem i sapotem gud nius fulwan, bambae oltaem, yumi “gohed gud long Kristin laef” blong yumi.