Ol Famle We Oli Strong Long Saed Blong Spirit—?From Wanem?
1 I gud tumas we ol Kristin oli ‘lukaot gud long famle blong olgeta.’ (1 Tim. 5:4) Be, ol rabis fasin raonabaot long yumi oli gat paoa, mo oli save slakem bilif blong yumi. Taswe i impoten we ol famle oli wok had blong stap strong long saed blong spirit. ?Bambae oli mekem olsem wanem?
2 Hed i Folem Fasin Blong Kraes: Ol hed blong famle oli mas folem fasin blong Jisas Kraes taem oli mekem famle blong olgeta i kam strong. Jisas i soemaot lav long yumi taem hem i ded olsem wan sakrefaes, be hem i mekem moa. Hem i stap gohed oltaem blong “givim kakae mo lukaot gud” long kongregesen. (Efes. 5:25-29, NW) Ol papa mama we oli gat lav oli folem eksampol ya blong keagud long famle, taem oli givim samting we famle i nidim evri dei long saed blong spirit. Blong mekem olsem, oli mas mekem famle Baebol stadi evri wik, tekem evri janis blong storian long ol sas samting long saed blong spirit, mo stretem ol trabol taem i kamaot.—Dut. 6:6, 7.
3 Long Wok Blong Prij: Evri memba blong famle oli mas kasem save se wok blong talemaot Jeova mo ol samting we hem i wantem i wan impoten haf blong wosip blong olgeta. (Aes. 43:10-12) Sipos yufala ol papa mama i wantem se ol pikinini blong yufala oli kam ol Witnes we oli fasgud long Jeova, yufala i mas stat taem oli smol nomo blong mekem hat blong olgeta i rere blong prij. Tokbaot from wanem yumi mas rere blong livim sam narafala samting blong mekem wok ya, mo from wanem yumi mas joen long wok ya evri wik. (Mat. 22:37-39) Biaen, mekem plan blong oli joen oltaem wetem yufala long wok blong prij.
4 Blong givhan long famle blong oli kasem save se wok blong prij i impoten, i gud we yufala i spenem smol taem long famle stadi evri wik blong lanem sam gudfala rod blong storian wetem ol man. Trenem ol pikinini blong yufala wanwan long wok blong prij, halpem olgeta blong oli gohed folem yia blong olgeta mo ol samting we oli naf blong mekem. Afta we yufala i prij tugeta, tokbaot wanem samting oli bin luk we i soemaot kaengud fasin blong Jeova. Storian long ol samting we i hapen long wok blong prij we i save mekem bilif blong olgeta i kam strong. Moa famle i ‘faenemaot we Masta i gud tumas,’ moa bambae oli kam klosap long Jeova, mo bambae oli strong moa blong blokem “ol rabis fasin.”—1 Pita 2:1-3.
5 Long Ol Miting: !I gud tumas taem ol memba blong famle oli givgivhan long olgeta blong oli kam evriwan long ol miting, antap moa, taem wan long olgeta i harem i taed, tingting blong hem i foldaon, no i harem se ol wok blong hem i hevi tumas! Wan yangfala sista i talem se: “Taem papa blong mi i finis wok mo i kambak long haos, hem i taed. Be mi tokbaot wan gudfala poen we bambae i kamaot long miting long naet ya, mo hemia i leftemap tingting blong hem blong go long miting. Mo taem mi mi harem se mi taed, hem nao i leftemap tingting blong mi blong go.”—Hib. 10:24, 25.
6 Mekem Ol Samting Tugeta: Ol famle oli mas joen blong mekem ol samting tugeta, olsem ol wok long haos. Mo tu, oli mas makemaot sam taem blong spel mo pleplei. Oli save go piknik, wokbaot, pleplei, mo go visitim ol famle no fren, hemia i save karem plante gladtaem mo givim ol gudfala memori we oli save tingting bak long olgeta biaen.—Pri. 3:4.
7 Ol Kristin famle we oli strong oli save winim ol samting we i traem olgeta evri dei long saed blong spirit. Taem oli kam moa klosap long Jeova, oli kasem paoa we hem nomo i givim.—Efes. 6:10.