Talemaot Trutok Long Saed Blong Jisas
1 Ol tabu Kristin mo ol narafala sipsip we oli givhan long olgeta, “oli gat wok blong givim witnes long saed blong Jisas.” (Rev. 12:17, NW) Hemia wan impoten wok, from we Jisas nomo i rod blong sevem man.—Jon 17:3; Wok 4:12.
2 ‘Rod Ya, Trutok Ya, Laef Ya’: Jisas i talem se: “Rod ya, mi ya. Trutok ya, mi ya. Laef ya, mi ya. I no gat man i save kam long Papa blong mi, sipos mi mi no tekem hem.” (Jon 14:6, Nyutesteman Wetem Ol Sam Long Bislama) Tru long Jisas nomo, we hem i “rod ya,” yumi save kam klosap long God long prea mo yumi save kam fren blong Hem. (Jon 15:16) Jisas i “trutok ya” from we ol profet tok mo saen we Hibru haf blong Baebol i tokbaot, oli kamtru long hem. (Jon 1:17; Kol. 2:16, 17) Yes, bigfala wok blong trufala profet tok, i blong givim save long saed blong wok we Jisas i mekem blong bambae stamba tingting blong God i kamtru. (Rev. 19:10) Mo tu, Jisas i “laef ya.” Blong kasem laef we i no save finis, olgeta man oli mas bilif long ransom sakrefaes blong hem.—Jon 3:16, 36; Hib. 2:9.
3 Hed Mo King We i Rul: Ol man oli mas luksave se Jeova i givim bigfala paoa long Pikinini blong hem, blong hem i meksua se ol tok blong Jeova oli kamtru. Jisas i tekem paoa finis olsem King blong Kingdom blong God. ‘Olgeta man bambae oli mas obei long hem.’ (Jen. 49:10) Mo tu, Jeova i putumap Jisas olsem Hed blong kongregesen. (Efes. 1:22, 23) Yumi mas givhan long ol Baebol stadi blong yumi blong luksave se Jisas i stap lidim kongregesen, mo i stap yusum “slef we i stret mo waes” blong givim ‘kakae long saed blong spirit long stret taem blong hem.’—Mat. 24:45-47, NW.
4 Hae Pris We i Gat Sore: From we Jisas i kasem plante traem mo i safa bigwan taem hem i stap long wol, hem i “save givhan long olgeta we ol samting oli stap traem olgeta.” (Hib. 2:17, 18) !Taem yumi ol sinman yumi lanem se Jisas i kasem save long ol slak fasin blong yumi, mo se i stap toktok long kaen fasin from yumi long fes blong God, samting ya i mekem yumi haremgud tumas! (Rom 8:34) From sakrefaes blong Jisas mo wok blong hem olsem Hae Pris, yumi save “mekem tingting blong yumi i strong” blong kam long fes blong Jeova, nao “hem bambae i givhan long yumi, stret long taem we yumi trabol.”—Hib. 4:15, 16.
5 Traehad blong yumi blong talemaot trutok long saed blong Jisas long ol narafala, i save pulum olgeta blong obei long hem mo joen wetem yumi blong mekem wok blong hem.—Jon 14:15, 21.