Yumi Luksave Wok We Kraes i Mekem Long Ogenaesesen Blong God
“BIFO we bifo olgeta, God i mekem skae mo graon.” Evri samting oli “gud we i gud tumas.” (Jen. 1:1, 31) Taem Jeova i wokem faswan man, hem i putum wan nambawan fiuja long fored long hem. Be afta we fasin stronghed i kamaot long garen blong Iden, ol man oli no moa hapi. Nating se i olsem, plan blong Jeova long saed blong wol mo ol man i no jenis nating. Taem God i talemaot panis long ol stronghed ya we oli sakemaot rul blong hem, hem i mekem promes se bambae hem i sevem ol pikinini blong Adam we oli obei long hem. Bambae hem i stanemap tru wosip bakegen, mo bambae i spolem Setan mo ol rabis wok blong hem. (Jen. 3:15) Bakegen, evri samting bambae oli “gud we i gud tumas.” Bambae God i yusum Pikinini blong hem, Jisas Kraes, blong mekem olsem. (1 Jon 3:8) Taswe i impoten tumas we yumi luksave wok we Kraes i mekem long ogenaesesen blong God.—Wok 4:12; Fil. 2:9, 11, NW.
WOK BLONG KRAES
Taem yumi tingbaot wok we Kraes i mekem long ogenaesesen blong God, yumi mas rimemba se hem i no mekem wan wok nomo, be hem i mekem plante wok we oli defdefren. Hem i Man blong pemaot yumi, hem i Hae Pris, hem i Hed blong Kristin kongregesen, mo naoia hem i King blong Kingdom blong God. Sipos yumi tingting dip long ol wok ya, bambae yumi gat moa tangkiu from ogenaesesen blong God mo bambae yumi lavem Jisas Kraes moa. Baebol i tokbaot ol defdefren wok blong hem.
Taem Kraes i mekem wok blong God long wol ya, i kam klia se hem nao bambae i mekem rod blong ol man we oli obei long God oli save fren bakegen wetem God. (Jon 14:6) Jisas i givim laef blong hem blong pem rod blong plante man oli save kasem laef blong olwe. (Mat. 20:28) Jisas i soem eksampol blong ol gudfala fasin we God i wantem ol man blong mekem. Be antap long samting ya, hem i nambawan man we God i yusum blong mekem plan blong Hem i kamtru. Jisas nomo i save halpem ol man blong oli kam fren blong God bakegen. (Wok 5:31; 2 Kor. 5:18, 19) Taem Jisas i ded mo i laef bakegen, hem i mekem rod blong ol man we oli obei long God oli save kasem blesing blong olwe, from Kingdom blong God we i rul long heven.
Long heven, Jisas Kraes i mekem wok blong Hae Pris. Long wok ya, “hem i gat sore long yumi” from we “hem i savegud we yumi no gat paoa.” Hem i mekem rod blong olgeta man blong hem long wol ya oli save kasem fogif from ol sin blong olgeta. Aposol Pol i talem se: “Hae Pris ya blong yumi, hem i savegud we yumi no gat paoa, nao hem i gat sore long yumi, from we olgeta samting blong traem yumi oli traem hem finis. Be wan samting nomo, hem i no mekem sin.” Biaen, Pol i pulum ol man we oli bilif long Jisas Kraes, blong oli kam fren blong God bakegen tru long wok blong Jisas olsem Hae Pris, hem i talem se: “From samting ya, i gud yumi mekem tingting blong yumi i strong, nao yumi kam long fes blong God we hem i stap givhan long yumi long gladhat blong hem. Nao . . . hem bambae i givhan long yumi, stret long taem we yumi trabol.”—Hib. 4:14-16; 1 Jon 2:2.
Jisas i Hed blong Kristin kongregesen, mo hem i mekem wok ya wetem lav. Long faswan handred yia, i no gat wan man long wol we i lida blong ol disaepol blong Jisas. Sem mak tede. Jisas nomo i lidim ol man blong hem tru long tabu spirit, Baebol, mo tru long ol elda we oli lukaot long ol sipsip blong God. Bambae ol elda ya oli mas talemaot long Jisas mo Papa blong hem se oli holem wok ya olsem wanem. (Hib. 13:17; 1 Pita 5:2, 3) Jeova i pulum profet Aesea blong talemaot tok ya long saed blong Jisas se: “Mi mi putumap hem i kam king, mo i kam lida mo komanda blong ol man blong ol narafala kantri, mo mi yusum hem blong soemaot long olgeta we mi mi gat paoa.” (Aes. 55:4) Jisas i soem se profet tok ya i stret long hem, taem hem i talem long ol disaepol blong hem se: “Bambae yufala i no letem ol man oli singaot yufala se ‘lida,’ from we yufala i gat wan Lida nomo, hemia mi ya, Kraes.”—Mat. 23:10, NW.
Jisas i wantem halpem ol man. Hem i soemaot tingting ya taem hem i singaot ol man oli kam long hem, i se: “Yufala evriwan we yufala i stap hadwok tumas, mo we yufala i stap karem ol hevi samting, yufala i kam long mi, nao mi bambae mi tekemaot ol hevi samting ya, mi mekem we yufala i spel gud. Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan long mi, nao bambae yufala i save faenem pis long laef blong yufala. Yufala i mas mekem olsem, from we yok ya we mi bambae mi putum long yufala, wok blong hem i isi nomo, mo ol samting we bambae mi givim long yufala blong yufala i karem, oli no hevi.” (Mat. 11:28-30) Jisas Kraes i lukaot long Kristin kongregesen wetem kwaet fasin mo i putum pis long laef blong yumi. Long rod ya, hem i soemaot se hem i “gudfala man ya blong lukaot long sipsip” folem fasin blong Papa blong hem, Jeova God.—Jon 10:11; Aes. 40:11.
Long faswan leta we Pol i raetem long ol Kristin long Korin, hem i tokbaot wan narafala wok we Jisas Kraes i mekem, i se: “Kraes i mas rul fastaem, gogo God i winim olgeta enemi blong Kraes, i putum olgeta oli stap daon, aninit long leg blong Kraes. Fastaem God bambae i putum olgeta samting oli stap aninit long paoa blong Kraes. Nao biaen, Kraes ya we i Pikinini blong God, hem nomo bambae i putum hem i stap aninit long paoa blong God ya we fastaem i putum olgeta samting oli stap aninit long paoa blong hem. Nao God bambae i holem paoa bakegen, blong i rul long olgeta samting.” (1 Kor. 15:25, 28) God i wokem Jisas fastaem bifo long ol narafala samting, mo Jisas i kam “nambawan man blong wok” blong God long heven. (Prov. 8:22-31, NW) Taem God i sanem hem i kam long wol, hem i mekem ol samting we God i wantem. Hem i stanap strong tru long traem we i bigwan olgeta, mo hem i stap tru long Papa blong hem go kasem ded. (Jon 4:34; 15:10) From samting ya, God i givim blesing long hem. God i mekem hem i laef bakegen, i leftemap hem i go long heven, mo i givim raet long hem blong kam King blong Kingdom. (Wok 2:32-36) God i givim wan nambawan wok long Jisas Kraes, we bambae hem i mekem taem hem i stap King blong Kingdom ya. Bambae hem i lidim ol milian milian enjel, blong oli yusum bigfala paoa blong olgeta blong karemaot rul blong ol man long wol ya mo karemaot rabis fasin. (Prov. 2:21, 22; 2 Tes. 1:6-9; Rev. 19:11-21; 20:1-3) Afta, bambae i gat wan gavman nomo antap long wol ya, hemia Kingdom blong God long heven we Kraes i king blong hem.—Rev. 11:15.
?OLSEM WANEM BLONG LUKSAVE WOK BLONG KRAES?
Man ya Jisas Kraes we i givim eksampol long yumi, hem i stret olgeta. Jeova God i givim wok long hem blong lukaot long yumi. Hem i putum wan bigfala wok long han blong Jisas Kraes, hemia blong kam Lida mo Komanda blong ol man blong God tede. Taswe, yumi mas stap tru long Jeova mo folemgud ogenaesesen blong hem we i stap gohed oltaem. Long rod ya, yumi soem se yumi luksave wok we Kraes i mekem long ogenaesesen blong God.
Long faswan handred yia, ol man blong Jisas oli luksave fulwan, wok ya we Kraes i mekem long ogenaesesen blong God. Oli soemaot samting ya taem oli wokgud tugeta aninit long hed blong olgeta, Kraes. Oli glad nomo blong letem Jisas i lidim olgeta tru long tabu spirit mo tru long ol tok blong Baebol. (Wok 15:12-21; Rev. 1:1) Aposol Pol i tokbaot fasin joengud long kongregesen blong ol tabu Kristin, i se: “Yumi mas lavem ol man, mo yumi mas talem ol tok we i tru long olgeta. Nao long olgeta fasin blong yumi, bambae yumi save gru blong kam bigman, blong joen long Kraes. Yumi olsem ol haf blong bodi blong hem, we hem nomo i hed blong bodi ya, mo hem i stap mekem yumi joen blong kam wan bodi nomo. Mo ol joen blong bodi ya oli stap holem bodi ya, blong i stap strong oltaem. Nao taem yumi ya, we yumi olsem ol haf blong bodi ya blong hem, yumi mekem ol samting we i stret nomo blong yumi mekem, bodi ya blong hem i save gru. Taem yumi stap lavlavem yumi, bodi ya blong Kraes i save kam strong moa.”—Efes. 4:15, 16.
Kongregesen blong ol tabu man mo “ol narafala sipsip” i gat plante memba long hem, olsem we prapa bodi blong yumi i gat plante haf blong hem. Taem ol wanwan man long kongregesen oli wokgud wetem ol narafala aninit long hed blong olgeta, Jisas Kraes kongregesen i gru gud, mo lav we i “joenemgud olgeta samting, blong oli kam wan,” i stap fulap insaed long kongregesen.—Jon 10:16; Kol. 3:14; 1 Kor. 12:14-26.
Ol profet tok blong Baebol we oli stap kamtru tede oli soemaot klia se long 1914, Jisas Kraes i kasem paoa blong rul long Kingdom. Naoia hem i stap rul long medel blong ol enemi blong hem. (Sam 2:1-12; 110:1, 2, NW) ?Samting ya bambae i mekem wanem long ol man we oli laef long wol naoia? Jisas bambae i yusum paoa blong hem olsem King blong olgeta king mo Masta blong olgeta masta, blong jajem mo spolem ol enemi blong hem. (Rev. 11:15; 12:10; 19:16) I no longtaem, bambae Jeova i sevem ol man we hem i glad long olgeta, folem promes we hem i bin mekem taem stronghed fasin i kamaot long garen blong Iden. (Rom 16:20) Yumi glad tumas se yumi luksave wok we Kraes i mekem long ogenaesesen blong God. !Mo yumi glad blong wok tugeta long ol las dei ya, blong finisim wok blong prij long fulwol, aninit long lida blong yumi, Jisas Kraes!