Trastem “Slef Ya We i Stret Mo Waes”

“?HU YA i rili slef ya we i stret mo waes?” Jisas Kraes i stanemap kwestin ya bifo we hem i talem wan parabol no pijatok we i olsem wan impoten profet tok. Kwestin ya i joen wetem “saen” we Jisas i givim blong soemaot se “en blong fasin blong laef blong wol ya i kam.” (Mat. 24:​3, 42-47, NW) Jisas i soem se “slef ya” i gat plante samting blong mekem long taem blong en ya. Hem i mas lukaot long wok blong Kingdom long wol ya, mo mekem bigfala wok ya blong givimaot ol save blong God, we i olsem kakae, “long stret taem blong hem.” Long saed blong wok ya, Jisas i talem se: “Sipos masta blong [slef ya] i kamtru i faenem se hem i stap mekem wok ya, slef ya i save harem gud. Tru ya, Masta bambae i putumap hem blong lukaot long olgeta samting blong hem.”

Parabol ya i mekem yumi tingbaot sam bigfala kwestin: ?Hu ya “slef ya”? ?Wanem ‘olgeta samting blong masta’? ?Olsem wanem parabol ya i joen wetem laef blong yumi wanwan? Yumi wantem faenem ansa blong ol kwestin ya, be i no blong mekem save blong yumi i kam bigwan nomo. Sipos yumi save stret mining blong parabol ya, mo sipos yumi trastem “slef ya we i stret mo waes,” samting ya bambae i givhan long yumi moa blong mekem wok blong Jeova.

?HU YA “SLEF YA WE I STRET MO WAES”?

Long parabol ya, Jisas i talem se “slef ya” bambae i givimaot kakae, hemia save blong God. ?Ale, Jisas i putumap hu blong givim kakae ya long ol man blong hem long faswan handred yia? ?Mo taem hem i kasem paoa blong rul olsem King blong Kingdom long yia 1914, hem i faenem se hu nao i gohed yet blong givimaot kakae ya? I no gat wan man we i laef long taem blong Jisas mo i stap laef gogo kasem 1914. Nogat. Ale slef ya, no ‘man blong wok ya we i gat hed mo i lukaotgud long ol wok blong hem,’ i mas minim fulwan grup blong ol man blong Jisas we tabu spirit i makemaot olgeta, stat long taem blong hem kam kasem taem blong yumi. (Luk 12:42) Yes, Jisas Kraes i givim wok long grup ya blong i printim ol buk we oli givim save long saed blong ol profet tok blong Baebol, mo tu, grup ya i givim advaes long yumi olsem wanem blong folem ol rul blong Baebol long laef blong yumi tede. Hem i sanem ol save ya i goaot long ol wanwan kongregesen blong ol Witnes blong Jeova, olsem we i givimaot kakae long olgeta.​—Aes. 43:10; Gal. 6:16.

?Wanem ‘olgeta samting blong masta’? Hemia olgeta samting long wol mo olgeta man long wol we oli blong Jisas Kraes, mo we hem i yusum olgeta taem hem i stap mekem wok blong hem olsem King long heven. Hem i minim ol samting we ol Witnes blong Jeova oli yusum long hedkwota blong olgeta, i minim tu ol branj ofis blong ol Witnes long olgeta kantri blong wol, ol Haos Kingdom, mo ol Haos Asembli. ‘Olgeta samting blong masta’ i minim tu, wok blong talemaot “gud nius blong kingdom” long olgeta ples blong wol, mo wok blong tijim ol man we oli lesin long gud nius ya. “Slef ya” i olsem tul we God i yusum blong hivimap “wan bigfala kampani blong man, we . . . oli kamaot long olgeta neson, mo long olgeta laen, mo long olgeta kantri, mo long olgeta lanwis.” Bigfala kampani ya bambae i laef tru long taem blong bigfala trabol long wol ya. (Luk 12:​42-44; Mat. 24:​14, NW; Rev. 7:​9-14, NW) Tru ya, bigfala kampani ya i mekem bighaf blong wok ya blong talemaot gud nius long ol laswan ples blong wol. Olgeta ya oli haf blong ol gudgudfala “samting” blong Kraes, mo grup ya we i olsem slef i lavem olgeta from we oli stap tru long slef ya mo oli wok had blong givhan long slef.

WOK BLONG HED KAMPANI

“Slef ya we i stret mo waes” i wok had blong mekem se ol man blong God oli joengud oltaem, mo i meksua se ogenaesesen blong God i mekem “olgeta samting long fasin we i stret gud, we ol man oli glad long hem.” (1 Kor. 14:40) Long faswan handred yia, oli jusumaot sam long ol tabu Kristin ya we oli slef, blong oli wok long nem blong slef ya. Taem i gat wan desisen blong mekem, smol grup ya nao i mekem desisen long nem blong slef ya. Hem i no nid blong askem fastaem long evri tabu Kristin raon long wol. Smol grup ya long Jerusalem i wok olsem hed kampani blong olgeta tabu Kristin long wol.

Stat long lafet blong Pentekos long yia 33 K.T., ol aposol blong Masta Jisas Kraes nao oli lidim wok ya blong lukaot long niufala Kristin kongregesen. (Wok 4:​33, 35, 37; 5:​18, 29) Samwe long yia 49 K.T., hed kampani ya i kam bigwan moa, i no ol aposol blong Jisas nomo we oli stap long hem. Taem oli toktok long saed blong kwestin ya blong sakomsaes, hed kampani hemia ‘ol aposol mo ol elda long Jerusalem.’ (Wok 15:​1, 2) Wok blong olgeta i blong lukluk long evri samting we i save gat paoa long laef blong ol Kristin long evri ples. Oli sanem ol leta mo ol desisen oli goaot long ol kongregesen, mo samting ya i mekem se ol kongregesen oli kam strong mo ol disaepol oli gat wan tingting mo wan plan blong wok. Ol kongregesen oli folem toktok blong hed kampani, mo from samting ya oli kasem blesing blong Jeova mo oli gru.​—Wok 8:​1, 14, 15; 15:​22-31; 16:​4, 5.

Tede yumi luksave klia se plan ya i nambawan. Ol tabu Kristin long Hed Kampani blong ol Witnes blong Jeova tede, oli bin mekem wok blong God blong plante yia mo oli winim plante bigfala trabol finis. Oli givimaot advaes blong Baebol long ol man blong Jeova, olsem hed kampani long faswan handred yia i bin mekem. Mo tu, Hed Kampani tede i lukaot long wok blong prij, i printim ol buk we yumi yusum blong stadi Baebol, mo i lukaot long wok ya blong putumap ol elda we oli mas lukaot long ol defren wok insaed long ogenaesesen blong Jeova. Hemia nao sam long olgeta samting blong Kraes we oli lukaot long olgeta tede. Yumi folem fasin blong ol faswan Kristin, ale yumi glad blong lesin long ol advaes blong Baebol we Hed Kampani i givim blong lidim yumi long ol samting we i joen wetem wosip blong yumi.

Long faswan handred yia, ol man long Hed Kampani oli no stret gud olgeta. Samting ya i sem mak tede. Nating se i olsem, long ol yia we oli pas finis, Jeova i yusum plante man we oli no stret gud blong oli mekem wok blong hem. Hem i talem long Noa blong bildim wan bigfala sip mo blong talemaot long ol man se bambae God i spolem olgeta we oli no obei long Hem. (Jen. 6:​13, 14, 22; 2 Pita 2:5) Jeova i jusum Moses blong lidim ol man blong hem oli aot long Ijip. (Eks. 3:10) God i givim tabu spirit long ol man we oli no stret gud olgeta, blong oli naf blong raetem Baebol. (2 Tim. 3:16; 2 Pita 1:21) Taswe, taem yumi luk we Jeova i yusum ol man we oli no stret gud olgeta tede blong oli lukaot long wok blong prij mo wok blong mekem disaepol, yumi no kam slak blong trastem ogenaesesen blong God. Nogat. Yumi kam strong moa from we yumi save se sipos Jeova i no givhan long Hed Kampani, bambae hem i no naf blong mekem bigfala wok ya we hem i stap mekem.

?FROM WANEM YUMI TRASTEM “SLEF YA WE I STRET MO WAES”?

I gat plante risen blong trastem slef ya fulwan. Faswan risen we i impoten moa, hemia se Jisas i putumap slef ya blong i lukaot long olgeta gudgudfala “samting blong hem.” Long rod ya, Jisas i soemaot klia se hem i trastem slef ya fulwan.

Seken risen, hemia se Tok blong God i talem long ol Kristin se oli mas obei long olgeta we oli stap lukaot long olgeta. ?From wanem samting ya i impoten? Long Hibrus 13:​17 (Nyutestamen wetem Ol Sam long Bislama) aposol Pol i talem se: “Yufala i mas ona long ol man we i stap lidim yufala, mo yufala i mas obei long ol tok blong olgeta. Olgeta ya oli stap lukaot long Kristin laef blong yufala, we oli no save spel, mo bambae oli mas talemaot long God we oli holem wok ya blong olgeta olsem wanem. Yufala i mas mekem olgeta oli harem gud long wok ya blong olgeta. Sipos yufala i stap mekem olgeta oli harem nogud long wok ya, fasin ya bambae i no givhan long yufala nating.” Blong stap strong long saed blong bilif mo blong no foldaon long ol trap, yumi mas lesin mo obei long ol tok blong ol elda we oli stap ‘lukaot long Kristin laef blong yumi.’

Long 1 Korin 16:​14, Pol i talem se: “Long olgeta samting we yufala i mekem, be yufala i mas lavem ol man.” Olgeta desisen we ogenaesesen blong God i mekem blong ol man blong Hem, oli stanap long nambawan fasin ya lav. Long saed blong lav, 1 Korin 13:​4-8 i talem se: “Man we i stap lavem man, tingting blong hem i longfala, mo hem i gat sore long man. Man olsem, hem i no save jalus, mo i no save mekem tingting blong hem i go antap, mo i no save flas. Hem i no save jikim man, mo i no save tingbaot hem nomo. Hem i no save kros kwik, mo i no save stap kros longtaem. Sipos hem i luk we wan narafala man i mekem i no stret, be hem i no save glad from, hem i save glad long ol trutok nomo. Hem i no save letem wan samting i daonem tingting blong hem, oltaem hem i stap bilif strong long God, mo i stap putum tingting blong hem i strong long hem. Maet bigfala trabol i save kasem hem, be tingting blong hem i no save foldaon. Fasin ya we oltaem man i lavem man, bambae i no save finis samtaem.” From we olgeta desisen we ogenaesesen blong God i mekem blong givhan long ol man blong Hem oli stanap long lav, yumi harem se yumi stapgud aninit long han blong ol man we oli tekem ol desisen ya. Mo tu, samting ya i soemaot bigfala lav we Jeova i gat long ol man blong hem.

Nating se grup ya we i olsem slef i kasem plante hadtaem mo traem, be yumi luk se tabu spirit blong God i stap wetem hem. Tede, Jeova i stap blesem bigwan ogenaesesen blong hem long wol, mo from samting ya, yumi trastem ogenaesesen ya mo yumi givhan long hem wetem fulhat blong yumi.

?OLSEM WANEM YUMI SOEMAOT TRAS YA?

Olgeta we oli gat wok insaed long kongregesen oli soemaot tras ya taem oli glad blong mekem wok blong olgeta, taem oli holemstrong long wok ya, mo taem oli mekemgud wok ya. (Wok 20:28) Yumi ol man blong talemaot Kingdom, yumi wok strong long wok blong prij long evri haos, yumi visitim ol man bakegen, mo yumi mekem ol Baebol stadi. (Mat. 24:14; 28:​19, 20) Yumi reregud from ol Kristin miting mo yumi go long olgeta miting. Olsem nao, yumi kasem gud ol save we “slef ya we i stret mo waes” i givimaot olsem kakae. Yumi go long ol asembli evri yia tu. Long ol Kristin miting mo asembli, yumi haremgud tumas blong storian wetem ol narafala Kristin, mo yumi lefleftemap tingting blong yumi.​—Hib. 10:​24, 25.

Mo tu, yumi soemaot se yumi trastem “slef ya” taem yumi givim presen mane blong halpem ogenaesesen blong God. (Prov. 3:​9, 10) Taem yumi luk wan Kristin brata no sista blong yumi we i sot long samting, yumi givhan long hem kwiktaem nomo. (Gal. 6:10; 1 Tim. 6:18) Yumi mekem olsem from we yumi lavem ol Kristin brata sista blong yumi. Lav ya i pusum yumi blong lukaot rod oltaem blong soemaot tangkiu long Jeova mo long ogenaesesen blong hem, from ol gudfala samting we yumi kasem.​—Jon 13:35.

Wan narafala rod blong soemaot se yumi trastem “slef ya” tede, i blong agri long ol desisen blong slef ya. Sam samtaem ating yumi no kasem save fulwan from wanem wan desisen i kamaot. Be yumi save se sipos yumi agri long desisen ya, bambae fasin ya i givhan gud long yumi blong olwe. Wanwan taem, i bin gat sam impoten save we i kam klia moa, mo yumi agri wetem fulhat blong yumi long jenis we i kamaot. Biaen, Jeova i givim blesing long yumi from we yumi obei long Tok blong hem mo slef blong hem. Long fasin ya, yumi soemaot se yumi obei long Masta blong yumi, Jisas Kraes.

Yes, i gat plante risen blong trastem “slef ya we i stret mo waes.” Setan we i god blong wol ya, i stap mekem evri samting we hem i save mekem blong sakem doti long nem blong Jeova mo ogenaesesen blong Hem. (2 Kor. 4:4) Yumi no mas foldaon long ol rabis trik blong Setan. (2 Kor. 2:11) Hem i save se smoltaem nomo i stap, nao bambae hem i go lus long bigfala hol, mo hem i stap traehad blong pulum plante man blong Jeova tu oli go lus wetem hem. (Rev. 12:12) Taem Setan i kam strong moa blong pulum yumi, yumi mas kam klosap moa long Jeova. Blong mekem olsem, yumi mas trastem rod we Hem i yusum blong lidim ol man blong hem tede. Setan i stap faet agensem ‘ol pikinini [blong woman]’ we oli stap yet long wol ya, hemia slef ya we i “gat wok blong givim witnes long saed blong Jisas.” (Rev. 12:​17, NW) Taem yumi trastem Jeova mo ogenaesesen blong Hem fulwan, yumi mekem se ful kampani blong ol Kristin brata sista long wol i joengud.